Jaceuq 54 - Akha

Haw piˇ nehˬ laꞈ lehˇ shaˇ-eu shaˇ dawˬ

(Daˬbiˇ-euˬ caˇ dawˬ)

¹ Miˬyehˇ-oˇ, nawˬ-euˬ baoˬ-ahˇ gʼoe-awˇ ngaˬ-ahˇ ka kʼoꞈ nehˬ laꞈ. Nawˬ-euˬ gʼaˬ-ahˇ gʼoe-awˇ ngaˬ-ahˇ bi buˬ-iˇ laꞈ.

² Miˬyehˇ-oˇ, ngaˬ-euˬ shaˇ dawˬ naˇ haˬ nehˬ laꞈ. Ngaˬ-euˬ kʼaˬ meh-ahˇ neh doˆ le-euˬ dawˬ-ahˇ, naˬ bawˇ ciˬ kʼmˇ nehˬ laꞈ.

³ Biˇ siˇ siˇ-eu tsawˇ haˬ deuˬ ngaˬ-ahˇ ceh le-eu lehˇ oe luꞈ meh. Gʼawˬ shaˬ gaˬ-eu maˬ siˬ nya-eu, Miˬyehˇ-ahˇ yaw zeu maˬ baw-eu tsawˇ haˬ deuˬ, ngaˬ-ahˇ sehꞈ-eu lehˇ oe luꞈ meh.

⁴ Ehˇ kʼawꞈ, ngaˬ-ahˇ ngehˬ gʼeh-eu gʼaˬ Miˬyehˇ meh. Ngaˬ-ahˇ dah teˬ-eu gʼaˬ Sahˬpaˬ Miˬyehˇ meh.

⁵ Yawˬ ha neh kʼmˇ taˬ-euˬ lahˇ ju-ahˇ yawˬ ha paꞈ leˇ-eu loꞈ-ehˇ, muiˇ-eu deuˬ-ahˇ Miˬyehˇ yaw haiˬ jeˬ jahˇ kʼoꞈ nehˬ tehꞈ-a. Aˬ yawꞈ saˇ jaˇ ziꞈ-eu gʼaˬ pyeuꞈ-eu miˇ neh, aˬ yawꞈ maꞈ-ahˇ aˬ yawꞈ laˆ luˬ laˆ seˇ nehˬ tehꞈ-a.

⁶ Sahˬpaˬ Miˬyehˇ-oˇ, nawˬ-ahˇ ngaˇ laˬ kʼaˬ tiˬ cehˇ lawˇ nehˬ shehˇ nehˬ ma. Nawˇ muiˬ-eu gʼaˬ pyeuꞈ-eu miˇ neh, nawˬ-euˬ guiˬ lahˬ-ahˇ ngaˇ ja ceuˬ ma.

⁷ Shaˬ zahˬ dawˬ tawˆ luꞈ laꞈ kʼoeˇ nawˇ ngaˬ-ahˇ ka kʼoꞈ nehˬ laꞈ-awˇ, muiˇ-eu deuˬ luˬ-iˇ seˇ-iˇ gaˇ ngaˇ ya mawˇ-euˬ ma.