Jaceuq 52 - Akha

Miˬyehˇ yaˇ kʼaˬ daˇ-eu jeˬ hawˇ-eu gʼawˬ shaˬ gaˬ-eu jeˬ

(Daˬbiˇ-euˬ caˇ dawˬ)

¹ Baoˬ yaw shehꞈ kʼahˬ sehˇ jaˆ-eu tsawˇ haˬ deuˬ-oˇ, naw maꞈ-euˬ haiˬ-eu gaˇ-ahˇ gʼoe-awˇ, aˬ jeˬ miˇ neh kʼahˬ sehˇ jehˆ te. Miˬyehˇ-euˬ gʼoeˇ-eu jeˬ mˬ maˬ maˬ byaˆ zaˇ ziˇ ziꞈ-eu meh.

² Aˬ cawˬ-ahˇ laˆ luˬ laˆ seˇ-eu gʼaˇ duˬ naw maꞈ shaˇ noeˬ-eu meh. Naw maꞈ-euˬ mehˬ laˇ mi cehˇ tawˆ zaˬ loꞈ-ehˇ taˆ-awˇ, jaˬ myawꞈ mehˇ shuiˇ tehꞈ-ehˇ naw maꞈ toˆ luꞈ-eu meh.

³ Muiˬ-eu jaˬ-eu jeˬ-ahˇ naˆ maˬ tseˇ yaw haiˬ jeˬ-ahˇ naw maꞈ gaˬ-awˇ, tsaˬ-eu jeˬ-ahˇ naˆ maˬ tseˇ lehˬ-eu jeˬ-ahˇ naw maꞈ gʼoeˇ-eu meh.

⁴ Jaˬ myawꞈ mehˇ shuiˇ deuˬ-oˇ, naw maꞈ-euˬ dawˬ neh, aˬ cawˬ-ahˇ naw maꞈ mˇ coeˬ mˇ ciˆ mawꞈ-eu meh.

⁵ Kʼoeˇ miˇ neh, mˬ maˬ maˬ byaˆ zaˇ ziˇ naw maꞈ-ahˇ Miˬyehˇ laˆ luˬ laˆ seˇ nehˬ laꞈ tehꞈ-a. Naw maꞈ-ahˇ aˬ yawꞈ tsuˆ tehˬ-awˇ, naw maꞈ-euˬ nymˇ jiˇ laꞈ kʼoeˇ neh gʼeu doˆ gʼeh tehꞈ-a. Yaw dehꞈ zaˬ jawˇ-eu miˇ kʼahˬ-ahˇ neh, naw maꞈ-ahˇ aˬ yawꞈ sheu dzeh byoˆ tehꞈ-a.

⁶ Yaw tsaˬ yaw dawˇ tsawˇ haˬ deuˬ kʼoeˇ gaˇ mawˇ ngeh guˆ tehꞈ-a. Aˬ yawꞈ maꞈ naw maꞈ-ahˇ uiˇ-awˇ heu loꞈ-ehˇ ehˇ tehꞈ-a.

⁷ “Yawˬ ha-euˬ pyuˇ shuiˇ myawˬ gahˬ-ahˇ nui kʼaˬ tsmˬ-awˇ, yaw haiˬ jeˬ-ahˇ gʼoe-awˇ yaw dehꞈ dehꞈ-eu, Miˬyehˇ-ahˇ maˬ gʼoe-eu tsawˇ haˬ teu gʼaˬ-ahˇ haw-awˬ” lehˇ ehˇ tehꞈ-a.

⁸ Ehˇ kʼawꞈ ngaˇ-aˬ, Miˬyehˇ-euˬ nymˇ-ahˇ dehꞈ-eu saˬ loˬ aˇ bawˇ-ahˇ duˇ-eu meh. Maˬ tsehˆ leˇ nya-eu aˬ yawꞈ-euˬ gʼoeˇ-eu gaˬ-eu jeˬ-ahˇ, mˬ maˬ maˬ byaˆ zaˇ ziˇ gʼoe-eu ma.

⁹ Miˬyehˇ-oˇ, nawˬ neh mˇ-euˬ gaˇ deuˬ baˬ da neh, nawˬ-euˬ guiˬ lahˬ-ahˇ aˬ myah luꞈ ja ceuˬ ma. Nawˬ-euˬ tsawˇ haˬ deuˬ jawˇ-eu mehˬ shi, nawˇ muiˬ-eu gaˇ kawˆ ngaˇ ja mehˬ ma.