Jaceuq 51 - Akha

Iˬ baˇ shaˇ pyehˬ-eu guiˬ lahˬ shaˇ dawˬ

(Daˬbiˇ-euˬ caˇ dawˬ)

¹ Miˬyehˇ-oˇ, aˬ myah luꞈ maˬ tsehˆ leˇ ni gaˬ-eu nawˬ-euˬ gʼoeˇ-eu gaˬ-eu jeˬ baˬ da neh, ngaˬ-ahˇ gʼawˬ shaˬ gaˬ nehˬ laꞈ-awˬ. Huiˬ dui dui-eu gʼawˬ shaˬ gaˬ nya-eu jeˬ baˬ da neh, ngaˬ-euˬ iˬ baˇ tsiˬ shawˇ nehˬ laꞈ-awˬ.

² Ngaˬ-euˬ laꞈ kʼoeˇ ahˇ-eu yaw haiˬ jeˬ dawˬ tawˆ luꞈ-ahˇ tsiˬ shawˇ nehˬ laꞈ-awˇ, iˬ baˇ laꞈ kʼoeˇ ngaˬ-ahˇ bi shawˇ-iˇ laꞈ-awˬ.

³ Ngaˬ-euˬ yaw lehˬ-ahˇ ngaˇ noeˬ siˬ noeˬ mawˇ-awˇ, ngaˇ iˬ baˇ ahˇ meh lehˇ noeˬ-eu tiˬ jawˇ-iˬ maˬ jiˇ nya.

⁴ Nawˬ-ahˇ ngaˇ mˇ lehˬ gʼaˬ-euˬ ma. Nawˬ-ahˇ tehꞈ-ehˇ mˇ lehˬ-euˬ ma. Nawˬ neh yaw haiˬ lehˇ sawˇ taˬ-euˬ jeˬ-ahˇ ngaˇ mˇ dzeuˇ-euˬ ma. Kʼoeˇ miˇ neh nawˇ ngaˬ-ahˇ yaˇ kʼaˬ daˇ-euˬ dawˇ dui dui meh. Ngaˇ yaw lehˬ meh lehˇ nawˇ daˇ-euˬ tsaˬ dui dui meh.

⁵ Ngaˇ dehꞈ le ngeh neh haiˬ-eu tsawˇ haˬ pyeuꞈ-eu ma. Dehꞈ doˆ le ngeh nah neh iˬ baˇ ahˇ-euˬ ma.

⁶ Nui ma yaw sui yaw dawˇ jeˬ-ahˇ nawˇ geuꞈ mawꞈ-eu meh. Kʼoeˇ miˇ neh, ngaˬ-euˬ nui ma laꞈ kʼoeˇ nawˬ-euˬ zaˬ siˬ tsawˇ gahˇ bi byah laˇ-awˬ.

⁷ Ngaˇ shawˇ laˇ ni ngaˬ-euˬ iˬ baˇ yuˇ dzeh nehˬ laꞈ-awˬ. Saˬ laˬ saˬ behˆ naˆ maˬ tseˇ pyuˇ laˇ ni, ngaˬ-ahˇ tsiˬ shawˇ nehˬ laꞈ-awˬ.

⁸ Ngaˬ-euˬ shaˬ yoeˬ-ahˇ nawˬ neh ngawˬ kʼehꞈ ngawˬ kʼoeˆ jiˇ-euˬ kʼawꞈ, ngaˇ laˬ kʼaˬ paˇ cehˇ laˇ nya ni, laˬ kʼaˬ cehˇ-eu dawˬ kawˬ deuˬ ngaˬ-ahˇ bi gaˬ laꞈ-awˬ.

⁹ Ngaˬ-euˬ iˬ baˇ-ahˇ maˬ haw ni nawˇ myaˆ nuiˆ miˆ tehˬ-awˇ, yaw lehˬ jeˬ dawˬ tawˆ luꞈ-ahˇ yuˇ dzeh nehˬ laꞈ-awˬ.

¹⁰ Miˬyehˇ-oˇ, ngaˬ-ahˇ shawˇ jehˆ ni gʼeh-eu nui ma tiˬ siˬ beh ahˇ nehˬ laꞈ. Nawˬ-ahˇ saˇ jaˇ ziꞈ-eu nui loˆ bi ahˇ laꞈ.

¹¹ Nawˬ nehˬ-ehˇ maˬ bi jawˇ ni taˬ sheuˬ dzeh nehˬ laꞈ muiˬ-eu shawˇ-eu nawˬ-euˬ yaw sahˇ ngaˬ-ahˇ taˬ bi byehˇ dzeh nehˬ laꞈ.

¹² Nawˬ-euˬ ka kʼoꞈ-eu guiˬ lahˬ yaw dzahˇ laꞈ kʼoeˇ doˆ le-euˬ laˬ kʼaˬ cehˇ-eu jeˬ ngaˬ-ahˇ biꞈ nehˬ laꞈ-awˇ, nawˬ-euˬ ehˇ dawˬ naˇ haˬ nya ni ngaˬ-ahˇ caw ba nehˬ laꞈ.

¹³ Kʼoeˇ naˇ, iˬ baˇ zaˬ deuˬ-ahˇ nawˬ-euˬ dawˬ ngaˇ mehˬ-awˇ, aˬ yawꞈ maꞈ nawˇ jawˇ gaˇ gʼoꞈ kʼoꞈ laˇ tehꞈ-a.

¹⁴ Miˬyehˇ-oˇ, luˬ-iˇ seˇ-iˇ-eu jeˬ laꞈ kʼoeˇ ngaˬ-ahˇ ka kʼoꞈ nehˬ laꞈ. Nawˬ-euˬ yaw tsaˬ yaw dawˇ jeˬ gaˇ kawˆ ngaˇ laˬ kʼaˬ tiˬ cehˇ ja gaˬ ma.

¹⁵ Sahˬ paˬ Miˬyehˇ-oˇ, ngaˇ dawˬ ngehˬ nya ni caw ba nehˬ laꞈ. Nawˬ-ahˇ ngaˇ ja ceuˬ ma.

¹⁶ Nawˬ-ahˇ ngaˇ lawˇ nehˬ shehˇ nehˬ law hawˇ kʼawꞈ, kʼoeˇ jeˬ-ahˇ nawˇ laˬ kʼaˬ maˬ cehˇ-a. Miˬ dzaˬ-ahˇ dzah puiˆ-awˇ lawˇ nehˬ-eu jeˬ-ahˇ, nawˇ mawꞈ-eu maˬ ngeuˇ-a.

¹⁷ Miˬyehˇ-oˇ, ngaˇ nawˬ-ahˇ nui nahˬ nui yu lawˇ nehˬ ma. Nahˬ yu ni gʼeh-eu iˬ baˇ noeˬ poˆ-euˬ nui ma-ahˇ nawˇ maˬ byehˇ dzeh nehˬ laꞈ-a.

¹⁸ Miˬyehˇ-oˇ, Ziˇoˬ gawˬ jawˬ-ahˇ gʼawˬ shaˬ gaˬ-awˇ ngehˬ gʼeh nehˬ-awˬ. Yeˬluˇsaˬlehˬ meuˬ-euˬ meuˬ lahˇ laˆ muiˬ nehˬ-awˬ.

¹⁹ Kʼoeˇ naˇ, nawˇ nui kʼahˇ shiˇ-eu tsaˬ-eu dawˇ-eu lawˇ-eu jeˬ pyeuꞈ-eu, miˬ dzaˬ-ahˇ dzah puiˆ-awˇ lawˇ-eu jeˬ hawˇ-eu, mawˇ neˇ mawˇ gaw deuˬ-ahˇ nawˬ-euˬ lawˇ duˬ kʼoeˇ taˆ ya lawˇ tehꞈ-a.