Jaceuq 48 - Akha

Miˬyehˇ-euˬ Ziˇoˬ meuˬ

(Kawˇlaˆ-euˬ aˬ li deuˬ-euˬ caˇ dawˬ)

¹ Sahˬpaˬ Miˬyehˇ-aˬ, huiˬ dui mahˇ dui dui-eu meh. Miˬyehˇ-euˬ meuˬ laꞈ kʼoeˇ, aˬ yawꞈ-euˬ muiˬ-eu shawˇ-eu gawˬ jawˬ kʼoeˇ taˆ, aˬ yawꞈ-ahˇ ja ceuˬ dui dui paˬ-ehˇ gʼeh-eu meh.

² Miˬyehˇ-euˬ Ziˇoˬ gawˬ jawˬ-aˬ, yaw goˇ-ahˇ jaˆ-awˇ haw muiˬ dui dui-eu meh. Huiˬ-eu sahˬ paˬ-euˬ meuˬ kʼoeˇ meuˬ, miˇ kʼahˬ dawˬ tawˆ luꞈ kʼoeˇ taˆ laˬ kʼaˬ cehˇ-eu jeˬ bi keuˆ le-eu meh.

³ Meuˬ laꞈ kʼoeˇ ziꞈ dah ni jaˆ-euˬ aˬ yawꞈ-euˬ nymˇ laꞈ kʼoeˇ, guˆ-eu gaˆ-eu jeˬ-ahˇ dzeuˇ-eu gaˇ kawˆ, Miˬyehˇ bi siˬ bi mawˇ-eu meh.

⁴ Miˇ kʼahˬ sahˬ paˬ deuˬ tiˬ kawˆ loꞈ-ehˇ uiˬ leˇ-awˇ, Ziˇoˬ gawˬ jawˬ-ahˇ guiˇ deuˆ-eu lehˇ laˇ-eu meh.

⁵ Ehˇ kʼawꞈ, Ziˇoˬ gawˬ jawˬ-ahˇ aˬ yawꞈ maꞈ ya mawˇ ngeh zahˬ leˇ-eu laꞈ kʼoeˇ, guˆ-awˇ cehˆ-eu meh.

⁶ Aˬ nyiˇ ciˬ-eu lehˇ gʼeh-eu zaˬ miˬ zaˬ loꞈ-ehˇ aˬ yawꞈ maꞈ shaˬ zahˬ mˇ-awˇ,

⁷ jaˬ lehˇ lehˇ ma baw-eu laˆ shaˆ gʼahˇ ceh shaˬ-eu, saˇ baoˬ loꞈ-ehˇ yaw dzuˬ dzuˬ-eu meh.

⁸ Baoˬ huiˬ-eu Sahˬpaˬ Miˬyehˇ pyeuꞈ-eu Miˬyehˇ-euˬ nymˇ laꞈ kʼoeˇ, nga maꞈ ya gaˬ haw-euˬ Miˬyehˇ neh mˇ-euˬ gaˇ deuˬ-ahˇ, nymˬ-mˇ ya siˬ ya mawˇ duˬ-eu ma. Meuˬ kʼoeˇ meuˬ-ahˇ mˬ maˬ maˬ byaˆ zaˇ ziˇ aˬ yawꞈ haw piˇ tehꞈ-a.

⁹ Miˬyehˇ-oˇ, nawˬ-euˬ Uˬ duˬ tahˬ nymˇ nymˇ ma laꞈ kʼoeˇ, maˬ tsehˆ leˇ-eu nawˬ-euˬ gʼoeˇ-eu gaˬ-eu jeˬ-ahˇ, nga maˬ shaˇ noeˬ-eu ma.

¹⁰ Miˇ tsaˬ zaˬ dawˬ tawˆ luꞈ nawˬ-ahˇ ja ceuˬ-awˇ, mˬ dzeˇ miˇ dzeˇ keuˆ ni nawˇ tsawˇ myahˇ doˆ-eu meh. Nawˇ yaw tsaˬ yaw dawˇ laꞈ kʼoeˇ uˆ lahˇ-eu meh.

¹¹ Ziˇoˬ gawˬ jawˬ-ahˇ jawˇ-eu deuˬ laˬ kʼaˬ cehˇ luꞈ-uˇ. Nawˇ dawˇ coe ni yaˇ kʼaˬ daˇ-eu miˇ neh, Yuˇdaˆ meuˬ deuˬ laꞈ kʼoeˇ laˬ kʼaˬ cehˇ-eu jeˬ byah luꞈ-uˇ.

¹² Miˬyehˇ-euˬ tsawˇ haˬ deuˬ-oˇ, Ziˇoˬ meuˬ cah jawˬ-awˇ, loꞈ-euˬ nymˇ goˇ deuˬ-ahˇ gui haw sheˇ.

¹³ Meuˬ lahˇ deuˬ-ahˇ cah haw doe-awˇ, gawˬ ziꞈ taˬ-euˬ taˆ nymˇ deuˬ-ahˇ haw duˬ-eu laꞈ kʼoeˇ, zaˬ ziˇ-ahˇ heu loꞈ-ehˇ mehˬ nehˬ yaꞈ-awˬ.

¹⁴ Miˬyehˇ heu gʼaˬ mˬ maˬ maˬ byaˆ zaˇ ziˇ aˬ dui-euˬ Miˬyehˇ pyeuꞈ-eu meh. Aˬ yawꞈ aˬ dui-ahˇ mˬ maˬ maˬ byaˆ zaˇ ziˇ sheuˬ gʼeh tehꞈ-a lehˇ mehˬ nehˬ yaꞈ-awˬ.