Jaceuq 46 - Akha

Miˬyehˇ aˬ dui nehˬ-ehˇ jawˇ-eu

(Kawˇlaˆ-euˬ aˬ li deuˬ-euˬ caˇ dawˬ)

¹ Miˬyehˇ-aˬ, aˬ dui-euˬ gʼoe duˬ hawˇ-eu aˬ dui-euˬ gʼaˬ pyeuꞈ-awˇ, shaˬ-eu zahˬ-eu aˇ yamˬ laꞈ kʼoeˇ, aˬ dui-ahˇ caw ba nehˬ laꞈ-eu meh.

² Kʼoeˇ miˇ neh miˇ tsaˬ tahˬ kʼawˇ nyeh laˇ-awˇ, gawˬ jawˬ deuˬ iˬ ma laˆ shaˆ dawˬ dah byaˆ ahˇ jiˇ kʼawꞈ nga maꞈ maˬ guˆ.

³ Iˬ ma laˆ shaˆ mahˇ laˇ-awˇ, iˇ kʼawˇ kʼaˆ dui dui-awˇ, gawˬ jawˬ gawˬ duˇ deuˬ nyeh laˇ luˆ laˇ kʼawꞈ, nga maꞈ maˬ guˆ.

⁴ Miˬyehˇ-euˬ meuˬ hawˇ-eu Huiˬ dui mahˇ dui dui-eu Gʼaˬ-euˬ nymˇ-ahˇ, laˬ kʼaˬ cehˇ nui saˇ za-eu jeˬ hehˇ ahˇ leꞈ-eu lawˇ gawˆ tiˬ gawˆ yoeˇ-eu meh.

⁵ Meuˬ kʼoeˇ meuˬ-ahˇ Miˬyehˇ jawˇ-awˇ, tiˬ jawˇ-iˬ maˬ cawˆ-iˇ nya-a. Uˬ bya bya laˇ ngeh meuˬ kʼoeˇ meuˬ-ahˇ aˬ yawꞈ caw ba le-eu meh.

⁶ Tsawˇ jeuˬ dawˬ tawˆ luꞈ laˇ baˇ-iˇ-awˇ, miˇ kʼahˬ dawˬ tawˆ luꞈ yaw dzuˬ dzuˬ-eu meh. Miˬyehˇ lmˬ laˇ ngeh, miˇ tsaˬ tahˬ kʼawˇ byaˆ-iˇ meuˇ-iˇ-eu meh.

⁷ Baoˬ huiˬ-eu Sahˬpaˬ Miˬyehˇ aˬ dui nehˬ-ehˇ jawˇ-eu meh. Yaˬkoˆ-euˬ Miˬyehˇ-aˬ, aˬ dui-euˬ gʼoe duˬ pyeuꞈ-eu meh.

⁸ Sahˬpaˬ Miˬyehˇ neh mˇ-euˬ gaˇ-ahˇ haw laˇ sheˇ. Miˇ tsaˬ kʼoeˇ taˆ aˬ yawꞈ neh mˇ-euˬ zahˬ leˇ paˬ-ehˇ gʼeh-eu gaˇ deuˬ-ahˇ haw laˇ sheˇ.

⁹ Miˇ tsaˬ kʼoeˇ taˆ guiˇ kʼaˇ deuˆ gaˇ aˬ yawꞈ laˆ naˬ-eu meh. Kaˆ hawˇ-eu gahˬ-ahˇ aˬ yawꞈ ngawˬ kʼehꞈ ngawˬ kʼoeˆ-awˇ, dehˬ daˬ duˬ-ahˇ miˬ dzaˬ dzah dzeh-eu meh.

¹⁰ “Ngaˇ Miˬyehˇ meh lehˇ siˬ nya-awˇ, guiˇ deuˆ-eu naˬ leˇ-awˬ. Tsawˇ haˬ dawˬ tawˆ luꞈ kʼoeˇ taˆ huiˬ dzehˬ-awˇ, miˇ tsaˬ dawˬ tawˆ luꞈ kʼoeˇ taˆ huiˬ dzehˬ-eu gʼaˬ, ngaˇ meh lehˇ siˬ nya-awˬ” lehˇ ehˇ-eu meh.

¹¹ Baoˬ huiˬ-eu Sahˬpaˬ Miˬyehˇ aˬ dui nehˬ-ehˇ jawˇ-eu meh. Yaˬkoˆ-euˬ Miˬyehˇ-aˬ, aˬ dui-euˬ gʼoe duˬ pyeuꞈ-eu meh.