Jaceuq 36 - Akha

Tsawˇhaˬzaˬ-euˬ maˬtsaˬmaˬdawˇ-eu jeˬ

(Daˬbiˇ-euˬ caˇdawˬ)

¹ Haiˬ-eu tsawˇhaˬ nui ma dawˬdah, iˬbaˇ neh dawˬngehˬahˇ taˬ-awˇ, Miˬyehˇ-ahˇguˆ-awˇ zeu-eu jeˬ, aˬyawꞈ-euˬmehˬshi maˬjaˆ-a.

² Yawˬhaˇyawˬha noeˬhuiˬtaˬ-awˇ, yawˬha iˬbaˇmaˬmawˇnya-ehˇ, iˬbaˇ-ahˇ guˆ-eu maˬnoeˬ-a.

³ Yawꞈ-euˬkʼaˬmehˬ-ahˇngehˬ-eu dawˬ, jaˬmyawꞈmehˇshuiˇtehꞈ-ehˇbyah-awˇ, yaw muiˬmˇ-eu byehˇtsehˆ-euˬmeh.

⁴ Yuꞈzaˇlaꞈkʼoeˇ yaw cawˆbymˬ-awˇ, iˬbaˇgaˇjawˬ tiˬ li iˇ-awˇ, yaw haiˬ-ahˇnui daˆmaˬdaˆ-a.

Miˬyehˇ-euˬ muiˬ-eu jeˬ

⁵ SahˬpaˬMiˬyehˇnawˇgaˬ-eu jeˬ, mˬ-ahˇkeuˆni huiˬ-awˇmahˇ-awˇ, nawˬ-euˬ saˇjaˇziꞈ-eu jeˬ-aˬ, maˬtaˆmˬdmˇ-ahˇtuˆ-eu meh.

⁶ Nawˬ-euˬyaw tsaˬyaw dawˇjeˬ-aˬ, gawˬjawˬloꞈ-ehˇ goˇdui dui-awˇ, nawˬ-euˬ yaw sui yaw dawˇjeˬ-aˬ, laˆshaˆloꞈ-ehˇ naꞈdui dui-awˇ, tsawˇhaˬhawˇ-eu jeˬzaˬdeuˬ-ahˇ, nawˇngehˬgʼeh dah teˬluꞈ-eu meh.

⁷ Miˬyehˇnawˇ gʼoeˇ-eu gaˬ-eu jeˬ, aˇnaˆni poeˬ-eu lawˬ-eu nga. Nawˬ-euˬaˬdahˇnaˇshmˇuˬmoˆ, tsawˇhaˬzaˬ awˆkʼaˇza-eu meh.

⁸ Baw-eu za-eu nawˬ-euˬnymˇ-ahˇ, aˬyawꞈmaꞈdzaˬdehˆdawˇdehˆ-awˇ, nawˬ-euˬ guiˬlahˬlawˇbaˬyoeˇgaˇ, aˬyawꞈmaꞈya kʼawꞈdawˇ-eu meh.

⁹ Nawˇ-aˬ, saꞈlaˇiˇbyoe pyeuꞈ-awˇ, nawˬ-euˬ yaw shehꞈ baˬda baˇneh, nga maꞈyaw shehꞈmawˇnya-eu ma.

¹⁰ Nawˬ-ahˇsiˬnya-eu deuˬkʼoeˇtaˆ, nawˇgaˬ-eu taˬbi tsehˆ-iˇlaꞈ. Nui ma yaw dawˇdeuˬ-euˬkʼoeˇtaˆ, ka kʼoꞈ-eu jeˬ bi keuˆle laꞈ.

¹¹ Nui ma huiˬ-eu deuˬ-euˬaˬkuiˇ, ngaˬ-ahˇ taˬbi nawˬtehˬnehˬlaꞈ. haiˬ-eu tsawˇ haˬ-eu aˬlaꞈneh, ngaˬ-ahˇtaˬbi teh byoˆnehˬlaꞈ.

¹² Haiˬ-eu deuˬ coˬ-iˇ gaˇ haw sheˇ. Aˬyawꞈmaꞈ maˬtuˇlaˇcoeˇ-ehˇ, miˇtsa coˬdzeh-awˇ ga luꞈ meh.