Jaceuq 31 - Akha

Miˬyehˇ-ahˇ gʼoe-eu guiˬlahˬshaˇdawˬ

(Daˬbiˇ-euˬ caˇdawˬ)

¹ Sahˬpaˬ Miˬyehˇ-oˇ, nawˬ-ahˇngaˇtahˬshaˇlaˇ-euˬma. shaꞈdawˇ-eu jeˬtaˬbi pi laꞈ. Nawˬ-euˬyaw tsaˬyaw dawˇlaꞈkʼoeˇ, ngaˬ-ahˇmaˬbyehˇni ka kʼoꞈlaꞈ.

² Ngaˬ-euˬshaˇdawˬ-ahˇ naˇhaˬ-awˇ, yaw kawˇ-ehˇ ka kʼoꞈle nehˬlaꞈ. Ngaˬ-euˬgʼoe duˬlo guˇhawˇ-eu, ziꞈdah ni gʼeh-eu taˆloꞈ-ehˇ, ngaˬ-ahˇhaw teˬhaw piˇnehˬlaꞈ.

³ Nawˇ-aˬ ngaˬ-euˬlo guˇhawˇ-eu, ziꞈdui dui-eu taˆpyeuꞈ-eu ma. Nawˬ-euˬtsawˇmyahˇsaˇjaˇbaˬda, ngaˬ-ahˇsheuˬgʼeh bo saˆnehˬlaꞈ.

⁴ Nawˬ-ahˇngaˇgʼoe-eu baˬda neh, yaw zaꞈ-ahˇkʼmˇ-euˬlahˇju-ahˇ, dzeuˇ-iˇnya ni haw piˇnehˬlaꞈ.

⁵ Ngaˬ-euˬsaˬlaˇgʼawˇmawˇdawˬtawˆ, nawˬ-euˬlaꞈ-ahˇ a nehˬ-eu ma. Saˇjaˇziꞈ-eu Miˬyehˇpyeuꞈ-eu, SahˬpaˬMiˬyehˇnawˬneh ngaˬ-ahˇ, gʼawˬshaˬgaˬ-awˇka kʼoꞈ-euˬmeh.

⁶ Maˬngeuˇ-eu miˬyehˇ-ahˇgʼoe-eu, tsawˇhaˬdeuˬ-ahˇnawˇ bye-eu meh. Nawˬ-ahˇtehꞈ-ehˇngaˇgʼoe-eu ma.

⁷ Nawˇmaˬtsehˆleˇni gaˬ-eu gaˇ, ngaˇlaˬkʼaˬcehˇ nui saˇza ma. Ngaˇya daˬ-eu jeˬnawˇmawˇ-awˇ, ngaˬ-euˬshaˬzahˬnawˇsiˬnya-awˇ,

⁸ muiˇ-eu deuˬ-euˬ aˬlaꞈlaꞈkʼoeˇ, maˬbi ahˇleˇni tsahˇdzeuˇ-awˇ, kʼahˬbya lawˬbya jeˇlo gʼeh gaˇ, kuiˇka ciˬpaˇnehˬlaꞈ-euˬmeh.

⁹ Ngaˇshaˬzahˬnaꞈluꞈ-eu miˇneh, SahˬpaˬMiˬyehˇgʼawˬshaˬgaˬlaꞈ. Ngoeˇ-euˬmyaˆnuiˆgʼah dui dui-awˇ, nui ma gʼawˇmawˇjuˆdui dui nya.

¹⁰ Shaˬzahˬbaˬda ziˇnym le-awˇ, ngoeˇ-euˬbaˬda ziˇteˬle nya. Nui noeˬshaˬ-eu gʼaˬjiˇle-awˇ, shaˬyoeˬshaˬlaꞈdzaˬjiˇ-euˬnya.

¹¹ Muiˇ-eu deuˬngaˬ-ahˇnaˬgʼa-awˇ, cawˬdeuˬehˇniˇgʼa laˇ-eu meh. Yaw beh gʼoeˇdui dui-euˬdeuˬkʼawꞈ, ngaˬ-ahˇhaw-awˇguˆ-iˇ-euˬmeh. Kʼaˇpuˬkʼaˇmawˇle-eu tsawˇhaˬ, dawˬpeh maˬoe ni cehˆ-eu meh.

¹² Shiˇ-euˬdeuˬ-ahˇngehˇ-eu loꞈ-ehˇ, yawˬ gʼaˬna luꞈngaˬ-ahˇngehˇ-awˇ, oeˬlahˬlahˬpyehˬmaˬtawˬmiˇ-a.

¹³ Muiˇ-eu deuˬdawˬsaˆsaˆkʼoeˬ-eu, ngaˬ-euˬnaˬbawˇ-ahˇgaˬle-awˇ, guˆ-eu jeˬtiˬjawˬ oe miˇ-a. Aˬyawꞈmaꞈtiˬgaˇuiˬleˇ-awˇ, ngaˬ-ahˇsehꞈ-eu bawˬkʼoeˬluꞈmeh.

¹⁴ Ehˇkʼawꞈni, SahˬpaˬMiˬyehˇ-oˇ, nawˬ-ahˇngaˇgʼoe-eu ziꞈluꞈ-awˇ, nawˇngaˬ-euˬMiˬyehˇpyeuꞈ-eu ma.

¹⁵ Ngaˬ-euˬaˇnah aˇyamˬdawˬtawˆ, nawˬ-euˬaˬlaꞈlaꞈkʼoeˇjaˆmeh. Muiˇ-eu deuˬ-euˬlaꞈ-ahˇmaˬehˇ, kʼehˬ-eu deuˬ-euˬlaꞈ-ahˇmaˬehˇ, nawˇngaˬ-ahˇka kʼoꞈnehˬlaꞈ-awˬ.

¹⁶ Nawˬ-euˬmyaˆpyawˬbya nehˬlaꞈ-awˇ, maˬtsehˆleˇni gaˬ-eu jeˬneh, nawˬ-euˬzaˬkʼaˆ-ahˇ ka kʼoꞈlaꞈ.

¹⁷ Sahˬpaˬ Miˬyehˇ-oˇ, nawˬ-ahˇngaˇkuˇgaˇnaˇhaˬ-awˇ, shaꞈdawˇ-eu jeˬ taˬbi keuˆlaꞈ. Haiˬ-eu tsawˇhaˬbi shaꞈdawˇ-awˇ, shiˇ-eu Shiˇloˬmiˇkʼahˬlaꞈkʼoeˇ, ciˬcuˇni iˇbyoˆgʼeh luꞈ-uˇ.

¹⁸ Nui ma huiˬ-awˇkʼahˬsehˇjehˆ-ehˇ, yaw tsaˬyaw dawˇdeuˬ-ahˇbu-eu, jaˬmyawꞈmyawꞈ-eu mehˬluˬkʼoeˇdeuˬ, dawˬmaˬngehˬnya ni pyeuꞈluꞈ-uˇ.

¹⁹ Nawˬ-ahˇzeu-eu deuˬ-euˬkʼoeˇtaˆ, nawˬneh biꞈ-euˬguiˬlahˬkʼoeˇdeuˬ, aˇnaˆni byah-eu kuꞈ-eu nga. Nawˬ-ahˇgʼoe-eu tsawˇ haˬdeuˬ-ahˇ, nawˇaˇnaˆni muiˬ-eu gaˇkawˆ, miˇtsaˬzaˬdeuˬmawˇjiˇluꞈmeh.

²⁰ Yaw doeˇmaˬbi jahˇ-eu gʼaˇduˬ, yawꞈmaꞈ-ahˇnawˇhaw piˇnehˬ-awˇ, dawˬdoeˇmaˬbi daˬ-eu gʼaˇduˬ, yawꞈmaꞈ-ahˇnawˇha lahˇ-eu meh.

²¹ Sahˬpaˬ Miˬyehˇ-ahˇ ja ceuˬ-awˬ. Muiˇ-eu deuˬngaˬ-ahˇloꞈjawˬngeh, zahˬdui dui leˇpaˬ-ehˇgʼeh-eu, aˬyawꞈ-euˬgʼoeˇ-eu gaˬ-eu jeˬ, ngaˬ-ahˇbi mawˇnehˬlaꞈ-euˬmeh.

²² “Ngaˬ-ahˇteh dzeh laꞈ-euˬngaˇ” lehˇ, ngaˇguˆ-eu laꞈkʼoeˇ ehˇ-euˬma. Ehˇ kʼawꞈ, caw ba laꞈlehˇguˇngeh, nawˇnaˇhaˬgeuꞈnehˬlaꞈ-euˬmeh.

²³ Yawꞈ-euˬtsawˇmuiˬtsawˇjaˬdeuˬ-oˇ, SahˬpaˬMiˬyehˇ-ahˇgaˬ-awˬ. Saˇjaˇziꞈ-eu tsawˇhaˬdeuˬ-ahˇ SahˬpaˬMiˬyehˇ haw piˇnehˬ-awˇ, nui ma huiˬ-eu tsawˇhaˬdeuˬ-ahˇ, yaw kʼaˆkʼaˆ-ehˇkʼehˬnehˬ-eu meh.

²⁴ SahˬpaˬMiˬyehˇ-ahˇdawˬ-eu deuˬ, guˆ-eu tiˬpawꞈ-iˬ maˬ ahˇ ni, nui ma kʼaˬduˬni bi jaˆ-awˬ.