Jaceuq 27 - Akha

Ja ceuˬ-eu guiˬ lahˬ shaˇ dawˬ

(Daˬbiˇ-euˬ caˇdawˬ)

¹ SahˬpaˬMiˬyehˇngaˬ-euˬyaw shehꞈ, ngaˬ-ahˇka kʼoꞈ-eu yaw sahˇmeh. Aˬsuˇgʼaˬ-ahˇngaˇpaˇguˆnmˇ. SahˬpaˬMiˬyehˇngaˬ-euˬgʼaˇduˬ, ziꞈdui dui-eu taˆpyeuꞈ-eu meh. Aˬgeu jeˬ-ahˇngaˇpaˇguˆnmˇ.

² Haiˬ-eu deuˬngaˬ-ahˇsehꞈle ngeh, muiˇ-eu deuˬngaˬ-ahˇdawꞈle ngeh, sahˬtiꞈtiꞈ-awˇcoˬdzeh-eu meh.

³ Guiˇmaꞈtiˬmaꞈmaꞈlah oe-awˇ, ngaˬ-ahˇjawˬlahˇjiˇkʼawꞈmaˬguˆ. Muiˇ-eu deuˬngaˬ-ahˇdeuˆle kʼawꞈ, ngaˬ-euˬnui ma ziꞈdah jaˆma.

⁴ SahˬpaˬMiˬyehˇ-ahˇ shaˇ-eu lehˇ, heu tiˬjeˬshaˇmawꞈ-eu tehꞈma. SahˬpaˬMiˬyehˇ-euˬnymˇlaꞈkʼoeˇ, maˬshiˇtiˬziˇngaˇjawˇmawꞈ-awˇ, aˬyawꞈ-euˬyaw muiˬyaw jaˬ-ahˇ, nui kʼahˇtiˬshiˇhaw dehˆmawꞈ-awˇ, aˬyawꞈsheuˬgʼeh haw piˇlaꞈni, aˬyawꞈ-ahˇshaˇju mawꞈ-eu ma.

⁵ Guˆ-eu gaˆ-eu jeˬkeuˆle ngeh, aˬyawꞈ-euˬnymˇnymˇma laꞈkʼoeˇ, aˬyawꞈngaˬ-ahˇsheuˬpiˇtehꞈ-a. Sehˬgʼawˆnaˇshmˇbaˇzaꞈuˬmoˆ, aˬyawꞈngaˬ-ahˇsheuˬzaꞈtehꞈ-a. goˇdui dui-eu lo guˇ uˬ du, aˬyawꞈngaˬ-ahˇciˬdaˆtehꞈ-a.

⁶ Ngaˬ-euˬtiˬjawˬjawˇbyah taˬ-euˬ, muiˇ-eu deuˬ-ahˇngaˇgʼaˬleˇ-awˇ, laˬkʼaˬcehˇ-awˇguˇ-eu laꞈkʼoeˇ, aˬyawꞈ-euˬUˬduˬtahˬnymˇ-ahˇ, lawˇ-eu shehˇ-eu jeˬ ngaˇmˇ-awˇ, ja ceuˬ-eu caˇ-eu dawˬcaˇ-awˇ, SahˬpaˬMiˬyehˇ-ahˇ ja ceuˬma.

⁷ SahˬpaˬMiˬyehˇ-oˇ, ngaˇyaw kʼaˆ-ehˇguˇ-awˇkuˇngeh, gʼawˬshaˬgaˬ-awˇ naˇhaˬnehˬ laꞈ.

⁸ Ngaˬ-euˬmyaˆpyawˬ-ahˇ poˆ-awˬlehˇ, nawˇngaˬ-ahˇehˇnehˬlaꞈngeh jawˇ, nawˬ-euˬmyaˆpyawˬngaˇpoˆma lehˇ, nui ma laꞈkʼoeˇngaˇehˇ-euˬma.

⁹ Nawˬ-euˬmyaˆpyawˬ taˬciˬzaꞈlaꞈ. Nawˬ-euˬzaˬkʼaˆpyeuꞈ-eu ngaˬ-ahˇ, nui ma pehˇ-awˇ taˬteh dzeh laꞈ. Ngaˬ-ahˇngehˬgʼeh-eu gʼaˬnawˇmeh. Ngaˬ-ahˇka kʼoꞈ-eu Miˬyehˇ-oˇ, Byehˇdzeh-awˇtaˬbi shaˬnehˬlaꞈ.

¹⁰ Ngaˬda ngaˬma ngaˬ-ahˇbyehˇkʼawꞈ, SahˬpaˬMiˬyehˇngehˬgʼeh laꞈ meh.

¹¹ SahˬpaˬMiˬyehˇnawˬ-euˬgaˇma, ngaˬ-ahˇnawˇtoeˬmehˬnehˬlaꞈ-awˬ. Muiˇ-eu tsawˇhaˬmyaˬ-eu miˇneh, gaˇsaˇlaw caw sheuˬgʼeh laꞈ-awˬ.

¹² Ngaˬ-ahˇnawˬdzaˬkʼaˆdzaˬle-eu, muiˇ-eu deuˬ-euˬaˬlaꞈlaꞈkʼoeˇ, nawˇngaˬ-ahˇtaˬ a dzeh nehˬlaꞈ.

¹³ Miˇtaˆdehˬ-eu heu ziˇlaꞈkʼoeˇ, SahˬpaˬMiˬyehˇmuiˬ-eu jeˬ-ahˇ, ngaˇmyaˆnuiˆhaw duˬgaˇkeuˆni, dehꞈziˇshehˇma lehˇjah-eu ma.

¹⁴ SahˬpaˬMiˬyehˇ-ahˇnoeˬtmˬ-awˬ. Gʼaˬbyehˆtaˬbyehˆ, nui ma taˬcawˆ. SahˬpaˬMiˬyehˇ-ahˇnoeˬtmˬ-awˬ.