Jaceuq 19 - Akha

Miˬyehˇ-euˬ kuiˇ zaˇ laꞈ zaˇ

(Daˬbiˇ-euˬ caˇdawˬ)

¹ Miˬyehˇ-euˬyaw shehꞈkʼahˬsehˇ-ahˇ, mˬtaˆbya cehˆni pah mehˬ-awˇ, aˬyawꞈ-euˬkuiˇzaˇlaꞈzaˇ-ahˇ, mˬtiˬbyah ni byaˬtaˬ-euˬmeh.

² Nah doˆle ngeh pah mehˬluꞈ-awˇ, yawˬmiˇna luꞈmehˬpoˆluꞈmeh.

³ Dawˬtiˬdawˬ-iˬmaˬngehˬdoˆ-ehˇ, teˇsaˇmahˇ-eu maˬya gaˬkʼawꞈ,

⁴ miˇkʼahˬdoe ni kʼawˇteˇdoˆ-awˇ, mˬdzeˇmiˇdzeˇ gaˬkeuˆ-eu meh. Nahˇma mˬtaˆbi jawˇ-eu lehˇ, Miˬyehˇneh nymˇtsoˆnehˬ-euˬmeh.

⁵ Miˬzaˬlaˬ-eu zaˬyo loꞈ-ehˇ, cehˆceh ceh-eu tsawˇhaˬloꞈ-ehˇ, zoˇtseuˆni coeˬdoˆlaꞈ-eu meh.

⁶ Mˬdzeˇ-ahˇdoˆdahˬbeh laˇ-awˇ, miˇdzeˇkeuˆni iˇgʼeh-eu meh. Yawꞈ-euˬyaw shehꞈlahˇdui dui gaˇ, dzuˇzaꞈnya-eu jeˬ maˬjaˆ-a.

SahˬpaˬMiˬyehˇ-euˬ Zahˇdawˬkʼoꞈdawˬ

⁷ SahˬpaˬMiˬyehˇ-euˬ Zahˇdawˬ-aˬ, byah dui dui-eu Zahˇdawˬpyeuꞈ-awˇ, nui ma-ahˇgʼaˬbi ahˇ-eu meh. SahˬpaˬMiˬyehˇbiꞈ-euˬdawˬ-aˬ, jah coeˇdui dui-eu dawˬpyeuꞈ-awˇ, maˬsiˬmaˬnya-eu tsawˇhaˬ-ahˇ, zaˬsiˬtsawˇgahˇbiꞈlahˬ-eu meh.

⁸ SahˬpaˬMiˬyehˇ-euˬ zahˇkʼoꞈ-aˬ, tsaˬ-eu dawˇ-eu zahˇkʼoꞈpyeuꞈ-awˇ, naˇhaˬgeuꞈ-eu tsawˇhaˬdeuˬ-ahˇ, laˬkʼaˬcehˇ-eu jeˬ biꞈ-eu meh. SahˬpaˬMiˬyehˇbiꞈ-euˬdawˬ-aˬ, shawˇjehˆni gʼeh-eu dawˬpyeuꞈ-awˇ, myaˆnuiˆbi mawˇshawˇlaˇ-eu meh.

⁹ SahˬpaˬMiˬyehˇ-ahˇzeu-eu jeˬ, muiˬ-eu jaˬ-eu tiˬjeˬ pyeuꞈ-awˇ, mˬmaˬmaˬbyaˆzaˇziˇgmˬmeh. SahˬpaˬMiˬyehˇyaˇkʼaˬ daˇ-eu, tsaˬdui dawˇdui muiˬdui dui-awˇ, tiˬpawꞈ-iˬ ehˇkʼaˇmaˬza-a.

¹⁰ Shuiˇnaˆmaˬtseˇ poeˬdui dui-awˇ, byaˬuiˇmaˬtseˇ coeˇdzehˬ-eu meh.

¹¹ Dawˬkʼoeˇbaˬda nawˬ-euˬ zaˬkʼaˆ, siˬnya mawˇnya yahˇnya laˇ-awˇ, guiˬlahˬbaw dzehˬlaˇ-euˬmiˇ-a.

¹² Yawˬha yaw lehˬ siˬduˬnya-eu, tsawˇhaˬtiˬgʼaˬ-iˬ maˬjawˇ-a. Ngaˇmaˬmawˇ-euˬngaˬ-euˬiˬbaˇ, SahˬpaˬMiˬyehˇtsiˬshawˇnehˬlaꞈ.

¹³ Siˬnya-awˇmˇlehˬ-eu jeˬ-ahˇ, maˬya mˇni haw lahˇlaꞈ-awˇ. iˬbaˇneh taˬbi uˆlahˇlaꞈ. Kʼoeˇnaˇ ngaˇmuiˬlaˇbyah laˇ-awˇ, iˬbaˇ-ahˇ ya dzeuˇ-iˇ tehꞈ-a.

¹⁴ Ka kʼoꞈyaw sahˇ SahˬpaˬMiˬyehˇ, ngaˬ-euˬlo guˇpyeuꞈ-eu gʼaˬ-oˇ, ngaˬ-euˬnui noeˬnui duˇ hawˇ-eu, ngaˬneh ngehˬ-euˬtmˇ-euˬ dawˬdeuˬ, nawˇgeuꞈnya-eu jeˬbi pyeuꞈlaꞈ.