Jaceuq 148 - Akha

Mˬ hawˇ-eu miˇ dawˬ tawˆ luꞈ Miˬyehˇ-ahˇ ja ceuˬ le-awˬ lehˇ kuˇ-eu caˇ dawˬ

¹ Sahˬpaˬ Miˬyehˇ-ahˇ ja ceuˬ-awˬ. Yaw goˇ-ahˇ jawˇ-eu deuˬ-oˇ, mˬ kʼoeˇ taˆ jawˇ-awˇ Sahˬpaˬ Miˬyehˇ-ahˇ ja ceuˬ-awˬ.

² Aˬ yawꞈ-euˬ mˬ taˆ gʼaˬ kʼehˇ dawˬ tawˆ luꞈ hawˇ-eu, aˬ yawꞈ-euˬ mˬ taˆ guiˇ maꞈ dawˬ tawˆ luꞈ, aˬ yawꞈ-ahˇ ja ceuˬ-awˬ.

³ Nahˇ ma ba la dawˬ tawˆ luꞈ aˬ yawꞈ-ahˇ ja ceuˬ-awˬ. Aˬ guiˇ kʼaˇ tsehˬ-eu dawˬ tawˆ luꞈ aˬ yawꞈ-ahˇ ja ceuˬ-awˬ.

⁴ Goˇ dui dui-eu mˬ deuˬ aˬ yawꞈ-ahˇ ja ceuˬ-awˇ, mˬ-euˬ kʼoeˇ taˆ paw jaˆ-eu iˇ cuꞈ deuˬ kʼawꞈ, aˬ yawꞈ-ahˇ ja ceuˬ-awˬ.

⁵ Kʼoeˇ deuˬ dawˬ tawˆ luꞈ Sahˬpaˬ Miˬyehˇ-ahˇ ja ceuˬ luꞈ-uˇ. Aˬ yawꞈ-euˬ kʼaˬ meh neh dawˬ biꞈ-awˇ, aˬ yawꞈ maꞈ-ahˇ beh-euˬ meh.

⁶ Aˬ yawꞈ dawˬ biꞈ-awˇ kʼoeˇ deuˬ-ahˇ ziꞈ dah ni ciˬ tsaˬ taˬ-euˬ miˇ neh, mˬ maˬ maˬ byaˆ zaˇ ziˇ aˬ yawꞈ-euˬ dawˬ-ahˇ maˬ leuˇ nya-ehˇ, jiˆ poˆ jiˆ paˇ maˬ mˇ nya-a.

⁷ Miˇ tsaˬ kʼoeˇ taˆ kʼaˇ jawˇ-eu deuˬ Sahˬpaˬ Miˬyehˇ-ahˇ ja ceuˬ-awˬ. Laˆ shaˆ byaˆ yahˬ hawˇ-eu naꞈ-eu iˬ ma laˆ shaˆ maˬ ehˇ,

⁸ mˬ jeˬ tsawˬ tehˆ hawˇ-eu uˬ yehˇ aˇ siˬ maˬ ehˇ, ngehˇ hawˇ-eu mˬ dmˇ deuˬ maˬ ehˇ, aˬ yawꞈ-euˬ dawˬ naˇ haˬ-eu mˬ jeˬ jaˬ lehˇ maˬ ehˇ, aˬ yawꞈ-ahˇ ja ceuˬ-awˬ.

⁹ Gawˬ jawˬ gawˬ duˇ deuˬ aˬ yawꞈ-ahˇ ja ceuˬ-awˬ. Aˇ siˬ aˇ bawˇ hawˇ-euˬ aˇ bawˇ sahˬ kʼaˆ deuˬ kʼawꞈ ja ceuˬ-awˬ.

¹⁰ Jeˬ zaˬ yaw yah deuˬ hawˇ-eu bawˇ tsahˬ jeˬ zaˬ maˬ ehˇ, miˇ tsaˬ-ahˇ joe joe-ehˇ cah-eu deuˬ hawˇ-eu aˇ jiˇ deuˬ maˬ ehˇ, aˬ yawꞈ-ahˇ ja ceuˬ-awˬ.

¹¹ Sahˬpaˬ Miˬyehˇ-euˬ miˇ kʼahˬ zaˬ dawˬ tawˆ luꞈ aˬ yawꞈ-ahˇ ja ceuˬ-awˬ. Sahˬ paˬ sahˬ ma dawˬ tawˆ luꞈ ja ceuˬ-awˬ.

¹² Zaˬ miˬ aˬ buˇ dawˬ tawˆ luꞈ ja ceuˬ-awˇ, zaˬ guˬ tsawˇ kʼaˆ dawˬ tawˆ luꞈ ja ceuˬ-awˬ.

¹³ Aˬ yawꞈ maꞈ dawˬ tawˆ luꞈ Sahˬpaˬ Miˬyehˇ-ahˇ ja ceuˬ luꞈ-uˇ. Tsawˇ myahˇ dawˬ tawˆ luꞈ kʼoeˇ taˆ aˬ yawꞈ-euˬ tsawˇ myahˇ huiˬ dzehˬ-awˇ, mˬ hawˇ-eu miˇ tsaˬ naˆ maˬ tseˇ, aˬ yawꞈ-euˬ yaw shehꞈ kʼahˬ sehˇ goˇ dzehˬ-eu meh.

¹⁴ Aˬ yawꞈ-euˬ tsawˇ jeuˬ-ahˇ aˬ yawꞈ gʼaˬ bi kʼaˆ laˇ-euˬ meh. Kʼoeˇ miˇ neh aˬ yawꞈ-euˬ tsawˇ haˬ deuˬ aˬ yawꞈ-ahˇ ja ceuˬ-awˬ. Aˬ yawꞈ-ahˇ peh-eu Iˇsaˬleˬlaˆ tsawˇ haˬ deuˬ aˬ yawꞈ-ahˇ ja ceuˬ-awˬ. Sahˬpaˬ Miˬyehˇ-ahˇ ja ceuˬ-awˬ.