Jaceuq 147 - Akha

Baoˬ huiˬ-eu Miˬyehˇ-ahˇ ja ceuˬ-eu caˇ dawˬ

¹ Sahˬpaˬ Miˬyehˇ-ahˇ ja ceuˬ-awˬ. Aˬ dui-euˬ Miˬyehˇ-ahˇ ja ceuˬ-eu muiˬ dui dui meh. Aˬ yawꞈ-ahˇ ja ceuˬ-eu jeˬ tsaˬ-awˇ, nui kʼahˇ shiˇ dui dui nya.

² Yeˬluˇsaˬlehˬ meuˬ-ahˇ Sahˬpaˬ Miˬyehˇ tsoˆ muiˬ luꞈ-awˇ, aˬ cawˬ miˇ kʼahˬ-ahˇ bi nyehꞈ gʼeh-euˬ deuˬ-ahˇ sheuˬ kʼoꞈ leꞈ-eu lehˇ gʼeh-eu meh.

³ Nui ma tsawˬ paˆ-iˇ-euˬ deuˬ-ahˇ aˬ yawꞈ laˆ taˬ nehˬ-awˇ, maˇ kʼehˬ-ahˇ lahˇ cuꞈ nehˬ-eu meh.

⁴ Aˬ guiˇ aˇ myaˆ siˬ ya bi byah-eu aˬ yawꞈ sawˇ duˬ taˬ-awˇ, yawˬ siˬ na luꞈ-ahˇ tsawˇ myahˇ biꞈ taˬ-euˬ meh.

⁵ Baoˬ jaˆ-awˇ huiˬ dui mahˇ dui dui-eu gʼaˬ-aˬ, aˬ dui-euˬ Sahˬpaˬ Miˬyehˇ meh. Aˬ yawꞈ-euˬ zaˬ siˬ tsawˇ gahˇ-ahˇ aˬ dui maˬ noeˬ miˇ coeˇ-a.

⁶ Nui nahˬ nui yu ahˇ-eu deuˬ-ahˇ aˬ yawꞈ gʼeu tuˇ-awˇ, haiˬ-eu tsawˇ haˬ deuˬ-ahˬ miˇ tsa nawˬ pahˬ nehˬ-eu meh.

⁷ Sahˬpaˬ Miˬyehˇ-ahˇ ja ceuˬ-eu caˇ dawˬ caˇ-awˬ. Deuˇ-mˬ diˬ-awˇ aˬ dui-euˬ Miˬyehˇ-ahˇ ja ceuˬ-awˬ.

⁸ Mˬ kʼoeˇ taˆ mˬ dmˇ-ahˇ aˬ yawꞈ sheu taw-awˇ, miˇ tsaˬ kʼoeˇ taˆ uˬ yehˇ bi yehˇ le-eu laꞈ kʼoeˇ, gawˬ duˇ uˬ du yaˇ moꞈ bi dehꞈ laˇ-eu meh.

⁹ Jeˬ zaˬ deuˬ-ahˇ aˬ yawꞈ bi dzaˬ bi dawˇ-awˇ, jeˬ shiˇ kʼaˬ dzeˇ-euˬ zaˬ deuˬ dzaˇ mehꞈ-awˇ mahˇ ngeh, aˬ yawꞈ bi dzaˬ bi dawˇ-eu meh.

¹⁰ Gʼaˬ kʼaˆ-eu mahˬ paˬ-ahˇ aˬ yawꞈ nui ma maˬ huiˬ-ehˇ, nui kʼaˬ ahˇ-eu yehˇ-ahˇ aˬ yawꞈ laˬ kʼaˬ maˬ cehˇ-a.

¹¹ Ehˇ kʼawꞈ, aˬ yawꞈ-ahˇ taˬ huiˬ-eu tsawˇ haˬ deuˬ hawˇ-eu, maˬ tsehˆ leˇ nya-eu aˬ yawꞈ-euˬ gʼoeˇ-eu gaˬ-eu jeˬ-ahˇ gʼoe-eu tsawˇ haˬ deuˬ-ahˇ, aˬ yawꞈ nui kʼahˇ shiˇ-eu meh.

¹² Yeˬluˇsaˬlehˬ meuˬ-oˇ, Sahˬpaˬ Miˬyehˇ-ahˇ ja ceuˬ-awˬ. Ziˇoˬ gawˬ jawˬ-oˇ, nawˬ-euˬ Miˬyehˇ-ahˇ ja ceuˬ-awˬ.

¹³ Nawˬ-euˬ lahˇ kʼehˬ laˇ gʼoˆ-ahˇ aˬ yawꞈ neh laˆ ziꞈ-awˇ, nawˬ-euˬ tsawˇ haˬ deuˬ-ahˇ aˬ yawꞈ guiˬ lahˬ biꞈ-euˬ meh.

¹⁴ Nawˬ-euˬ miˇ kʼahˬ-ahˇ nui saˇ oꞈ-eu jeˬ aˬ yawꞈ neh bi keuˆ le-awˇ, nawˬ-euˬ nui kʼahˇ tiˬ shiˇ muiˬ dui dui-eu cehˇ bi za le-euˬ meh.

¹⁵ Miˇ tsaˬ tahˬ kʼawˇ-ahˇ aˬ yawꞈ dawˬ tiˬ dawˬ biꞈ ngeh, aˬ yawꞈ neh kʼaˇ-ehˇ-euˬ jeˬ yaw kawˇ-ehˇ keuˆ le-eu meh.

¹⁶ Ngehˇ aˇ bui aˬ yawꞈ dzeh pymˬ nya-awˇ, ceuˬ kʼaˬ lehˇ aˬ yawꞈ byaˆ kʼawˬ nya-eu meh.

¹⁷ Kʼaˬ lo lo zaˬ byaˆ ka leꞈ-eu loꞈ-ehˇ uˬ yehˇ aˇ siˬ aˬ yawꞈ pyehˬ gʼeh leꞈ nya-awˇ, aˬ yawꞈ neh pyehˬ gʼeh leꞈ-euˬ yaw tsehꞈ-ahˇ tiˬ gʼaˬ-iˬ maˬ kamˬ coeˇ-a.

¹⁸ Aˬ yawꞈ dawˬ biꞈ ngeh ngehˇ guiˇ-iˇ-awˇ, jaˬ lehˇ pyehˬ gʼeh leꞈ-awˇ iˇ cuꞈ bi yoeˇ le-eu meh.

¹⁹ Yaˬkoˆ-ahˇ aˬ yawꞈ-euˬ dawˬ biꞈ nehˬ-awˇ, aˬ yawꞈ-euˬ zahˇ dawˬ kʼoꞈ dawˬ hawˇ-eu zahˇ sahˇ kʼoꞈ deuˬ, Iˇsaˬleˬlaˆ tsawˇ haˬ deuˬ-ahˇ biꞈ nehˬ-euˬ meh.

²⁰ Aˬ cawˬ tsawˇ jeuˬ-ahˇ aˬ yawꞈ kʼoeˇ loꞈ-ehˇ maˬ jahˇ nehˬ-ehˇ, aˬ yawꞈ-euˬ zahˇ dawˬ kʼoꞈ dawˬ-ahˇ aˬ yawꞈ maꞈ maˬ siˬ nya-a. Sahˬpaˬ Miˬyehˇ-ahˇ ja ceuˬ-awˬ.