Jaceuq 143 - Akha

Caw ba nehˬ laꞈ lehˇ shaˇ-eu shaˇ dawˬ

(Daˬbiˇ-euˬ caˇ dawˬ)

¹ Sahˬpaˬ Miˬyehˇ-oˇ, ngaˬ-euˬ guiˬ lahˬ shaˇ dawˬ-ahˇ naˇ haˬ nehˬ laꞈ. Nawˬ-euˬ yaw tsaˬ yaw dawˇ jeˬ laꞈ kʼoeˇ, ngaˬ-euˬ shaˇ dawˬ-ahˇ naˇ haˬ nehˬ laꞈ. Nawˬ-euˬ saˇ jaˇ ziꞈ-eu jeˬ laꞈ kʼoeˇ, ngaˬ-euˬ shaˇ dawˬ-ahˇ naˇ haˬ nehˬ laꞈ.

² Nawˬ-euˬ zaˬ kʼaˆ pyeuꞈ-eu ngaˬ-ahˇ, yaˇ kʼaˬ taˬ daˇ nehˬ laꞈ. Nawˬ-euˬ mehˬ shi yaw tsaˬ yaw dawˇ tiˬ gʼaˬ-iˬ maˬ jawˇ-a.

³ Ngaˬ-ahˇ muiˇ-eu gʼaˬ ngaˬ-ahˇ teh-awˇ, dawꞈ lah nehˬ laꞈ-euˬ meh. Zahˇ tsui ni gʼeh-eu paˬ kuˆ laꞈ kʼoeˇ paꞈ ahˇ nehˬ laꞈ-awˇ, aˇ hu ba neh shiˇ taˬ-euˬ tsawˇ haˬ-ahˇ duˇ miˇ-a.

⁴ Kʼoeˇ miˇ neh ngaˇ noeˬ tmˬ duˬ maˬ jaˆ-ehˇ, nui ma shaˬ zahˬ naꞈ dui dui nya.

⁵ Dzeuˇ yaꞈ-euˬ aˇ nah aˇ yamˬ deuˬ-ahˇ noeˬ mawˇ laˇ miˇ-a. Nawˬ neh mˇ dzeuˇ shaˇ dzeuˇ yaꞈ-euˬ deuˬ-ahˇ ngaˇ shaˇ noeˬ-awˇ, gaˇ kawˆ kʼoeˇ deuˬ-ahˇ ngaˬ-euˬ nui ma laꞈ kʼoeˇ shaˇ sawˇ luꞈ-eu ma.

⁶ Ngaˬ-euˬ aˬ laꞈ cawˬ diˇ-awˇ nawˬ-ahˇ guiˬ lahˬ shaˇ luꞈ-eu ma. Miˇ tsaˬ yaw gui iˇ cuꞈ mehꞈ-eu loꞈ-ehˇ, nawˬ-ahˇ ngaˇ mehꞈ luꞈ-eu ma.

⁷ Sahˬpaˬ Miˬyehˇ-oˇ, ngaˬ-euˬ shaˇ dawˬ naˇ haˬ nehˬ laꞈ. Noeˬ tmˬ kʼaˇ maˬ za miˇ-a. Shiˇ-eu miˇ kʼahˬ-ahˇ iˇ dzeuˇ-euˬ tsawˇ haˬ deuˬ jawˇ gaˇ, ngaˇ ya iˇ-eu keuˆ laˇ taˬ-euˬ miˇ neh, nawˬ-euˬ myaˆ pyawˬ taˬ ciˬ zaꞈ nehˬ laꞈ.

⁸ Nawˬ-ahˇ ngaˇ gʼoe luꞈ-eu miˇ neh, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ, yawˬ shawˬ na luꞈ ngaˬ-ahˇ bi noeˬ mawˇ laꞈ. Ngaˬ-euˬ shaˇ dawˬ nawˇ jawˇ gaˇ le keuˆ ngeh, ngaˇ ya iˇ-eu gaˇ ma mehˬ laꞈ.

⁹ Sahˬpaˬ Miˬyehˇ-oˇ, nawˬ-ahˇ ngaˇ laꞈ jeuˬ shaˇ ngeh, muiˇ-eu deuˬ-euˬ laꞈ-ahˇ ka kʼoꞈ nehˬ laꞈ.

¹⁰ Nawˇ ngaˬ-euˬ Miˬyehˇ ma. Nawˬ-euˬ nui kʼahˇ mˇ nya ni ngaˬ-ahˇ mehˬ nehˬ laꞈ. Nawˬ-euˬ muiˬ-eu jaˬ-eu jeˬ baˬ da neh, nui saˇ oꞈ-eu gaˇ ma-ahˇ sheuˬ gʼeh nehˬ laꞈ.

¹¹ Sahˬpaˬ Miˬyehˇ-oˇ, nawˬ neh saˇ jaˇ dzaˬ taˬ-euˬ loꞈ-ehˇ, ngaˬ-ahˇ ka kʼoꞈ nehˬ laꞈ. Nawˬ-euˬ muiˬ-eu jaˬ-eu jeˬ laꞈ kʼoeˇ, shaˬ zahˬ naꞈ gaˇ ka kʼoꞈ nehˬ laꞈ.

¹² Nawˇ ngaˬ-ahˇ gaˬ-euˬ baˬ da neh, ngaˬ-ahˇ muiˇ-eu deuˬ-ahˇ sehꞈ nehˬ laꞈ. Ngaˇ nawˬ-euˬ zaˬ kʼaˆ pyeuꞈ-eu baˬ da neh, ngaˬ-ahˇ kʼehˬ-eu deuˬ-ahˇ laˆ luˬ laˆ seˇ nehˬ laꞈ.