Jaceuq 142 - Akha

Caw ba nehˬ laꞈ lehˇ shaˇ-eu shaˇ dawˬ

(Daˬbiˇ-euˬ guiˬ lahˬ shaˇ dawˬ)

¹ Caw ba nehˬ laꞈ lehˇ Sahˬpaˬ Miˬyehˇ-ahˇ kuˇ-awˇshaˇ-euˬ ma.

² Ngaˇ nui ma cawˆ-eu jeˬ dawˬ tawˆ luꞈ aˬ yawꞈ-ahˇ tsaꞈ gaˬ-awˇ, ngaˬ-euˬ shaˬ zahˬ dawˬ tawˆ luꞈ aˬ yawꞈ-ahˇ dzawˇ nehˬ-euˬ ma.

³ Ngaˬ-euˬ nui ma gʼaˬ baˬ dui dui ngeh, ngaˇ aˬ joˆ-ehˇ mˇ paˬ-ehˇ gʼeh-eu aˬ yawꞈ siˬ nya-eu meh. Ngaˇ cah luꞈ-eu gaˇ ma-ahˇ, muiˇ-eu deuˬ ngaˬ-ahˇ lahˇ ju kʼmˇ taˬ-euˬ meh.

⁴ Ngaˬ-euˬ dawˬ peh ngaˇ haw ngeh, caw ba le-eu tsawˇ haˬ-ahˇ maˬ ya mawˇ-a. Ngaˬ-ahˇ haw piˇ-eu tiˬ gʼaˬ-iˬ maˬ jawˇ-a. Ngaˬ-ahˇ ka kʼoꞈ-eu tiˬ gʼaˬ-iˬ maˬ jawˇ-a.

⁵ Sahˬpaˬ Miˬyehˇ-oˇ, caw ba nehˬ laꞈ lehˇ nawˬ-ahˇ ngaˇ guˇ-eu ma. Nawˇ-aˬ, ngaˬ-euˬ gʼoe duˬ ma. Ngaˬ-euˬ tiˬ ziˇ loˬ dui dui-eu jeˬ-aˬ, nawˇ ma.

⁶ Caw ba nehˬ laꞈ lehˇ ngaˇ guˇ gaˇ naˇ haˬ nehˬ laꞈ-awˬ. Naꞈ dui dui-eu nui ma cawˆ-eu jeˬ laꞈ kʼoeˇ ngaˇ ga nuiꞈ-iˇ luꞈ-eu ma. Muiˇ-eu deuˬ-euˬ aˬ laꞈ laꞈ kʼoeˇ ngaˬ-ahˇ ka kʼoꞈ nehˬ laꞈ. Aˬ yawꞈ maꞈ gʼaˬ kʼaˆ dui dui-eu meh.

⁷ Nui ma cawˆ-eu jeˬ laꞈ kʼoeˇ ngaˬ-ahˇ ka kʼoꞈ nehˬ laꞈ. Nawˇ ngaˬ-ahˇ guiˬ lahˬ biꞈ laꞈ-euˬ miˇ neh, nawˬ-euˬ tsawˇ haˬ deuˬ uiˬ leˇ taˬ-euˬ mehˬ shi, nawˬ-ahˇ ngaˇ ja ceuˬ ma.