Jaceuq 137 - Akha

Aˬ cawˬ miˇ kʼahˬ-ahˇ bi nyehꞈ gʼeh-euˬ Iˇsaˬleˬlaˆ tsawˇ haˬ deuˬ tsawˇ ngoeˇ ngoeˇ-eu

¹ Baˬbuˇloˬ lawˇ baˬ dawˬ peh nga maꞈ nuiˇ-awˇ, Ziˇoˬ meuˬ-ahˇ noeˬ mawˇ-eu laꞈ kʼoeˇ tsawˇ ngoeˇ ngoeˇ-euˬ ma.

² Lawˇ baˬ gawˆ taw dehꞈ-eu iˇ nmˬ aˇ bawˇ-ahˇ, nga maꞈ-euˬ deuˇ-mˬ ciˬ ceuˬ-eu ma.

³ Nga maꞈ-ahˇ nyehꞈ gʼeh-euˬ tsawˇ haˬ deuˬ nui ma saˇ ni, caˇ dawˬ bi caˇ nehˬ laꞈ-euˬ meh. “Ziˇoˬ meuˬ-euˬ caˇ dawˬ caˇ sheˇ” lehˇ, nga maꞈ-ahˇ aˬ yawꞈ maꞈ kʼehˇ-eu meh.

⁴ Boeˇ miˬ siˬ kʼaˬ-euˬ miˇ kʼahˬ laꞈ kʼoeˇ, Sahˬpaˬ Miˬyehˇ-euˬ caˇ dawˬ aˬ joˆ-ehˇ caˇ nmˇ.

⁵ Yeˬluˇsaˬlehˬ meuˬ-oˇ, nawˬ-ahˇ ngaˇ ngehˇ tsehˆ lawˬ naˇ, ngaˬ-euˬ aˬ laꞈ deuˇ-mˬ maˬ diˬ nya ni laꞈ shiˇ shiˇ luꞈ-uˇ.

⁶ Nawˬ-ahˇ ngaˇ maˬ noeˬ mawˇ-ehˇ, yawˬ jeˬ na luꞈ naˆ maˬ tseˇ nawˬ-ahˇ ngaˇ laˬ kʼaˬ maˬ cehˇ dzehˬ naˇ, ngaˬ-euˬ mehˬ laˇ kʼaˆ-iˇ-awˇ caˇ dawˬ maˬ caˇ nya ni pyeuꞈ-iˇ luꞈ-uˇ.

⁷ Yeˬluˇsaˬlehˬ meuˬ-ahˇ deuˆ gʼaˬ ngeh nah, Eˬdoˬ tsawˇ haˬ deuˬ neh jahˇ nehˬ laꞈ-euˬ jeˬ-ahˇ taˬ ngehˇ. “Meuˬ teu meuˬ miˇ tsa tuˆ ni laˆ meuˇ nehˬ-awˬ” lehˇ, aˬ yawꞈ maꞈ ehˇ nawˆ nawˆ-euˬ gaˇ taˬ ngehˇ.

⁸ Baˬbuˇloˬ meuˬ-oˇ, nawˇ ya luˬ ya seˇ-iˇ tehꞈ-a. Nawˬ neh nga maꞈ-ahˇ jahˇ nehˬ laꞈ-euˬ loꞈ-ehˇ, nawˬ-ahˇ paˇ jahˇ kʼoꞈ nehˬ-eu tsawˇ haˬ guiˬ lahˬ huiˬ tehꞈ-a.

⁹ Nawˬ-euˬ zaˬ yaw nyiˇ deuˬ-ahˇ nyehꞈ-awˇ, kʼaˬ lo-ahˇ ciˬ jeˬ nehˬ-eu tsawˇ haˬ guiˬ lahˬ huiˬ tehꞈ-a.