Jaceuq 132 - Akha

Uˬ duˬ tahˬ nymˇ nymˇ ma-ahˇ ja ceuˬ-eu caˇ dawˬ

(Uˬ duˬ tahˬ nymˇ-ahˇ daˆ leˇ-eu caˇ dawˬ)

¹ Sahˬpaˬ Miˬyehˇ-oˇ, Daˬbiˇ-ahˇ taˬ ngehˇ. Aˬ yawꞈ ya daˬ-euˬ shaˬ zahˬ-ahˇ taˬ ngehˇ.

² Sahˬpaˬ Miˬyehˇ-oˇ, aˬ yawꞈ-euˬ saˇ jaˇ dawˬ-ahˇ noeˬ keuˆ-awˬ. Yaˬkoˆ-euˬ Baoˬ huiˬ-eu Miˬyehˇ-oˇ, aˬ yawꞈ neh nawˬ-ahˇ saˇ jaˇ dzaˬ taˬ-euˬ dawˬ-ahˇ taˬ ngehˇ.

³ Ngaˬ-euˬ nymˇ-ahˇ maˬ gʼoꞈ leˇ. Ngaˬ-euˬ yuꞈ zaˇ-ahˇ ngaˇ maˬ yuꞈ leˇ.

⁴ Ngaˇ coˬ lah-awˇ gʼaˬ naˬ maˬ naˬ. Ngaˇ myaˆ nuiˆ miˆ tehˬ-awˇ maˬ yuꞈ kʼaˆ.

⁵ Sahˬpaˬ Miˬyehˇ gʼaˇ duˬ jawˇ zaˇ shaˇ-awˇ, Yaˬkoˆ-euˬ Baoˬ huiˬ-eu Miˬyehˇ gʼaˇ duˬ nymˇ maˬ tsoˆ doˆ kʼoeˇ keuˆ ni, ngaˇ coˬ lah-awˇ gʼaˬ naˬ maˬ naˬ.

⁶ Behˬlehˬhehˬ meuˬ laꞈ kʼoeˇ, Dawˬ ma saˇ jaˇ Bahˬ keuˆ gaˇ kawˆ aˬ dui ya gaˬ-awˇ, Yeˬlmˬ deh ga laꞈ kʼoeˇ, Bahˬ keuˆ kʼoeˇ mawˇ-euˬ ma.

⁷ “Sahˬpaˬ Miˬyehˇ-euˬ nymˇ-ahˇ aˬ dui le kaˇ-euˇ. Aˬ yawꞈ-euˬ nuiˇ mahˬ mehˬ shi uˬ duˬ tahˬ leˇ kaˇ-euˇ” lehˇ aˬ dui ehˇ-euˬ ma.

⁸ Sahˬpaˬ Miˬyehˇ-oˇ, nawˬ-euˬ baoˬ-euˬ saˇ kiˇ pyeuꞈ-eu Dawˬ ma saˇ jaˇ Bahˬ keuˆ nehˬ-ehˇ, Uˬ duˬ tahˬ nymˇ nymˇ ma-ahˇ oe-awˇ, mˬ maˬ maˬ byaˆ zaˇ ziˇ jawˇ le-awˬ.

⁹ Nawˬ-euˬ piˇ ma deuˬ aˬ myah luꞈ, yaw tsaˬ yaw dawˇ dawˇ-ehˇ mˇ-awˇ, nawˬ-euˬ tsawˇ haˬ deuˬ laˬ kʼaˬ cehˇ-awˇ guˇ luꞈ-uˇ.

¹⁰ Nawˬ-euˬ zaˬ kʼaˆ Daˬbiˇ nehˬ-ehˇ, nawˇ saˇ jaˇ dzaˬ taˬ-euˬ jaˆ-eu meh. Sahˬpaˬ Miˬyehˇ-oˇ, nawˬ neh tseˇ doˆ-euˬ sahˬ paˬ-ahˇ, nawˇ taˬ byehˇ dzeh nehˬ laꞈ.

¹¹ Daˬbiˇ-ahˇ nawˇ saˇ jaˇ ziꞈ dah ni dzaˬ-awˇ, saˇ jaˇ kʼoeˇ nawˇ maˬ puiˬ-eu saˇ jaˇ meh. Nawˬ-euˬ aˬ li tiˬ li-ahˇ ngaˇ sahˬ paˬ bi keuˆ leˇ-awˇ, nawˬ-euˬ dzoeˬ dzaˬ aˬ yawꞈ-ahˇ oꞈ tehꞈ-a.

¹² Nawˬ li deuˬ ngaˬ-euˬ dawˬ ma saˇ jaˇ-ahˇ ziꞈ-awˇ, ngaˬ-euˬ zahˇ sahˇ kʼoꞈ-ahˇ caw teh naˇ, aˬ yawꞈ maꞈ-euˬ aˬ li deuˬ ziˇ keuˆ ni sahˬ paꞈ geuꞈ-awˇ, nawˬ-euˬ dzoeˬ dzaˬ aˬ myah luꞈ oꞈ tehꞈ-a.

¹³ Ziˇoˬ meuˬ-ahˇ Sahˬpaˬ Miˬyehˇ tseˇ doˆ-awˇ, aˬ yawꞈ-euˬ jawˇ zaˇ geuꞈ mawꞈ-eu meh.

¹⁴ “Heu gaˇ-ahˇ ngaˇ mˬ maˬ maˬ byaˆ zaˇ ziˇ jawˇ ma. Heu gaˇ jawˇ-awˇ ngaˇ uˆ lahˇ ma.

¹⁵ Ziˇoˬ meuˬ kʼaˇ loˬ-eu jeˬ, byah kʼaˇ ngeh keuˆ ni ngaˇ lahˬ nehˬ-awˇ, yaw shaˬ zaˬ deuˬ-ahˇ bi dzaˬ dehˆ ma.

¹⁶ Ziˇoˬ-euˬ piˇ ma deuˬ kʼaˇ mˇ kʼaˇ shaˇ-eu jeˬ laꞈ kʼoeˇ, ngaˇ guiˬ lahˬ biꞈ nehˬ-awˇ, meuˬ zaˬ deuˬ laˬ kʼaˬ cehˇ-awˇ guˇ tehꞈ-a.

¹⁷ Heu gaˇ Daˬbiˇ-euˬ zaˬ deuˬ uˆ deuˬ laꞈ kʼoeˇ, huiˬ-eu sahˬ paˬ tiˬ gʼaˬ ngaˇ bi doˆ laˇ-awˇ, ngaˬ neh tseˇ doˆ-euˬ sahˬ paˬ heu gaˇ bi uˆ lahˇ ma.

¹⁸ Aˬ yawꞈ-ahˇ muiˇ-eu deuˬ-ahˇ ngaˇ daˬ bi ga-awˇ, aˬ yawꞈ-euˬ miˇ kʼahˬ bi baw bi za le ma.”