Jaceuq 130 - Akha

Caw ba nehˬ laꞈ lehˇ shaˇ-eu shaˇ dawˬ

(Uˬ duˬ tahˬ nymˇ nymˇ ma-ahˇ daˆ leˇ-eu caˇ dawˬ)

¹ Ngaˇ nui ma shaˬ zahˬ naꞈ dui dui-eu laꞈ kʼoeˇ, Sahˬpaˬ Miˬyehˇ-ahˇ kuˇ-eu ma.

² Sahˬpaˬ Miˬyehˇ-oˇ, ngaˇ guˇ-awˇ ngoeˇ gaˇ naˇ haˬ nehˬ laꞈ. Ngaˬ-euˬ shaˇ dawˬ-ahˇ taˬ byehˇ dzeh nehˬ laꞈ.

³ Nga maꞈ-euˬ iˬ baˇ-ahˇ nawˇ noeˬ taˬ naˇ, aˬ geu gʼaˬ dzeuˇ-iˇ nya nmˇ.

⁴ Ehˇ kʼawꞈ nawˬ-euˬ mehˬ shi nga maꞈ guˆ-awˇ yawꞈ laˇ coeˇ ni, iˬ baˇ pyehˬ nehˬ laꞈ-awˬ.

⁵ Sahˬpaˬ Miˬyehˇ ngehˬ gʼeh nehˬ laꞈ gaˇ ngaˇ noeˬ tsoˆ taˬ-awˇ, aˬ yawꞈ-euˬ dawˬ-ahˇ ngaˇ gʼoe-eu ma.

⁶ Uˬ ciꞈ paw loꞈ piˇ-eu deuˬ uˬ bya bya laˇ gaˇ noeˬ tmˬ-eu naˆ maˬ tseˇ, uˬ bya bya laˇ gaˇ aˬ yawꞈ maꞈ noeˬ tsoˆ taˬ-euˬ naˆ maˬ tseˇ, Sahˬpaˬ Miˬyehˇ-ahˇ ngaˇ noeˬ tmˬ taˬ-euˬ ma.

⁷ Iˇsaˬleˬlaˆ tsawˇ jeuˬ-oˇ, Sahˬpaˬ Miˬyehˇ-ahˇ gʼoe-awˬ. Aˬ yawꞈ-euˬ gʼoeˇ-eu gaˬ-eu jeˬ maˬ tsehˆ leˇ nya-ehˇ, aˬ dui-ahˇ ka kʼoꞈ mawꞈ-eu nui ma jaˆ-eu miˇ neh, aˬ yawꞈ-ahˇ gʼoe-awˬ.

⁸ Aˬ yawꞈ-euˬ tsawˇ haˬ pyeuꞈ-eu Iˇsaˬleˬlaˆ tsawˇ jeuˬ-ahˇ, iˬ baˇ dawˬ tawˆ luꞈ laꞈ kʼoeˇ aˬ yawꞈ ka kʼoꞈ tehꞈ-a.