Jaceuq 125 - Akha

Miˬyehˇ-euˬ tsawˇ jeuˬ nui saˇ oꞈ-eu

(Uˬ duˬ tahˬ nymˇ nymˇ ma-ahˇ daˆ leˇ-eu caˇ dawˬ)

¹ Sahˬpaˬ Miˬyehˇ-ahˇ gʼoe-eu tsawˇ haˬ deuˬ-aˬ, tiˬ jawˇ-iˬ maˬ jiˆ maˬ paˇ laˇ ni ziꞈ-eu Ziˇoˬ gawˬ jawˬ-ahˇ duˇ-eu meh.

² Yeˬluˇsaˬlehˬ meuˬ-ahˇ gawˬ jawˬ jawˬ lahˇ taˬ-euˬ loꞈ-ehˇ, aˬ yawꞈ-euˬ tsawˇ haˬ deuˬ-ahˇ mˬ maˬ maˬ byaˆ zaˇ ziˇ, Sahˬpaˬ Miˬyehˇ haw lahˇ tehꞈ-a.

³ Yaw tsaˬ yaw dawˇ deuˬ-euˬ miˇ kʼahˬ-ahˇ yaw haiˬ deuˬ aˬ myah luꞈ maˬ ya uˆ lahˇ-a. Kʼoeˇ loꞈ-ehˇ uˆ lahˇ naˇ, yaw tsaˬ yaw dawˇ deuˬ yaw haiˬ jeˬ mˇ laˇ tehꞈ-a.

⁴ Sahˬpaˬ Miˬyehˇ-oˇ, muiˬ-eu jaˬ-eu deuˬ-ahˇ yaw muiˬ jeˬ mˇ nehˬ-awˬ. Nawˬ-euˬ dawˬ naˇ haˬ geuꞈ-eu deuˬ-ahˇ yaw muiˬ jeˬ mˇ nehˬ-awˬ.

⁵ Ehˇ kʼawꞈ haiˬ-eu tsawˇ haˬ deuˬ-ahˇ nawˇ kʼehˬ nehˬ ngeh, nawˬ-euˬ zahˇ sahˇ kʼoꞈ-ahˇ byehˇ-eu deuˬ-ahˇ kʼawꞈ kʼehˬ nehˬ-awˬ. Iˇsaˬleˬlaˆ miˇ kʼahˬ laꞈ kʼoeˇ nui saˇ oꞈ-eu jeˬ jaˆ luꞈ-uˇ.