Jaceuq 122 - Akha

Yeˬluˇsaˬlehˬ meuˬ-ahˇ ja ceuˬ-eu caˇ dawˬ

(Daˬbiˇ-euˬ caˇ dawˬ)

¹ Sahˬpaˬ Miˬyehˇ-euˬ nymˇ-ahˇ le kaˇ-euˇ lehˇ aˬ cawˬ ngaˬ-ahˇ ehˇ ngeh, ngaˇ laˬ kʼaˬ cehˇ-euˬ ma.

² Yeˬluˇsaˬlehˬ meuˬ-oˇ, nawˬ-euˬ lahˇ kʼehˬ laꞈ kʼoeˇ, nga maꞈ nymˬ-mˇ yawꞈ luꞈ ma.

³ Yeˬluˇsaˬlehˬ meuˬ-aˬ, haw muiˬ jawˇ muiˬ dui dui paˬ-ehˇ tsoˆ taˬ-euˬ meuˬ pyeuꞈ-eu meh.

⁴ Sahˬpaˬ Miˬyehˇ-euˬ tsawˇ jeuˬ pyeuꞈ-eu, Iˇsaˬleˬlaˆ tsawˇ jeuˬ tsawˇ ca deuˬ heu gaˇ laˇ-awˇ, Sahˬpaˬ Miˬyehˇ neh ehˇ taˬ-euˬ dawˬ-ahˇ tsaˬ ni, aˬ yawꞈ-ahˇ ja ceuˬ laˇ-eu meh.

⁵ Iˇsaˬleˬlaˆ sahˬ paˬ deuˬ heu gaˇ nuiˇ-awˇ, aˬ yawꞈ-euˬ tsawˇ haˬ deuˬ-ahˇ yaˇ kʼaˬ daˇ-eu meh.

⁶ Yeˬluˇsaˬlehˬ meuˬ nui saˇ oꞈ ni guiˬ lahˬ shaˇ-awˬ. Nawˬ-ahˇ gaˬ-eu tsawˇ haˬ deuˬ baw le za le luꞈ-uˇ.

⁷ Nawˬ-euˬ meuˬ lahˇ laꞈ kʼoeˇ suˬ saˬ-eu jeˬ maˬ ya keuˆ le-ehˇ, sahˬ paˬ-euˬ nymˇ guˆ-eu gaˆ-eu jeˬ-ahˇ buˬ-iˇ luꞈ-uˇ.

⁸ Nawˇ nui saˇ oꞈ luꞈ-uˇ lehˇ, ngaˬ-euˬ aˬ yuiꞈ aˬ nyiˇ hawˇ-eu cawˬ deuˬ-euˬ gʼaˇ duˬ, Yeˬluˇsaˬlehˬ meuˬ-ahˇ ngaˇ ehˇ dah nehˬ-eu ma.

⁹ Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ, nawˇ baw le za le ni ngaˇ guiˬ lahˬ shaˇ-eu ma.