Jaceuq 121 - Akha

Sahˬpaˬ Miˬyehˇ aˬ dui-ahˇ haw piˇ-eu

¹ Ngaˬ-ahˇ caw ba-eu jeˬ aˬ gaˇ neh doˆ le nmˇ lehˇ, gawˬ jawˬ-ahˇ ngaˇ gʼawˇ leuˇ haw-eu ma.

² Mˬ hawˇ-eu miˇ-ahˇ beh-euˬ gʼaˬ pyeuꞈ-eu, Sahˬpaˬ Miˬyehˇ-euˬ laꞈ kʼoeˇ neh, ngaˬ-ahˇ caw ba-eu jeˬ doˆ le-eu meh.

³ Aˬ yawꞈ nawˬ-ahˇ coˬ-iˇ gaˇ maˬ bi keuˆ-a. Nawˬ-ahˇ haw piˇ-eu gʼaˬ aˬ myah luꞈ yaw noeˬ meh.

⁴ Iˇsaˬleˬlaˆ-ahˇ haw piˇ-eu gʼaˬ-aˬ, yuꞈ yoeˇ ngeuˇ-awˇ yuꞈ kʼaˆ-euˬ maˬ baw-a.

⁵ Sahˬpaˬ Miˬyehˇ nawˬ-ahˇ haw lahˇ tehꞈ-a. Nawˬ-eu dawˬ peh jawˇ-awˇ nawˬ-ahˇ haw piˇ tehꞈ-a.

⁶ Nah gʼahˇ paw nahˇ tsaˇ nawˬ-ahˇ maˬ coeˬ-ehˇ, uˬ ciꞈ paw ba la nawˬ-ahˇ maˬ ciˆ-a.

⁷ Guˆ-eu gaˆ-eu jeˬ dawˬ tawˆ luꞈ laꞈ kʼoeˇ, Sahˬpaˬ Miˬyehˇ nawˬ-ahˇ haw piˇ-awˇ, kʼahˬ lahˇ kʼaˇ maˬ za ni ya dehꞈ tehꞈ-a.

⁸ Nawˇ kʼaˇ iˇ kʼaˇ laˇ-eu yawˬ gaˇ na luꞈ, mˬ maˬ maˬ byaˆ zaˇ ziˇ aˬ yawꞈ haw piˇ tehꞈ-a.