Jaceuq 120 - Akha

Caw ba nehˬ laꞈ lehˇ shaˇ-eu shaˇ dawˬ

¹ Shaˬ-eu zahˬ-eu jeˬ-ahˇ ngaˇ ya tahˬ puˬ-awˇ, Sahˬpaˬ Miˬyehˇ-ahˇ kuˇ ngeh, ngaˬ-euˬ kuˇ dawˬ-ahˇ aˬ yawꞈ naˇ haˬ-eu meh.

² Sahˬpaˬ Miˬyehˇ-oˇ, jaˬ myawꞈ mehˇ shuiˇ deuˬ-euˬ laꞈ-ahˇ, ngaˬ-ahˇ ka kʼoꞈ nehˬ laꞈ.

³ Jaˬ myawꞈ mehˇ shuiˇ deuˬ-oˇ, Miˬyehˇ naw maꞈ-ahˇ aˬ joˆ-ehˇ jahˇ nehˬ nmˇ lehˇ siˬ nya ma loˇ. Aˬ yawꞈ naw maꞈ-ahˇ aˬ joˆ-ehˇ kʼehˬ nehˬ laꞈ nmˇ lehˇ, naw maꞈ siˬ nya ma loˇ.

⁴ Guiˇ deuˆ-eu deuˬ-euˬ taˆ dui dui-eu kaˆ myaˬ hawˇ-eu, neˇ hoˬ ni doꞈ-eu miˬ jiˆ neh kʼehˬ nehˬ laꞈ tehꞈ-a.

⁵ Naw maꞈ nehˬ-ehˇ jawˇ-euˬ-aˬ, Meˬshehˆ miˇ kʼahˬ-ahˇ jawˇ-eu naˆ ni doeˇ-awˇ, Geˬdaˬ tsawˇ haˬ deuˬ-euˬ tsahˬ-ahˇ jawˇ-eu loꞈ-ehˇ shaˬ miˇ-a.

⁶ Yaw muiˬ yaw saˇ saˇ-ehˇ maˬ dehꞈ-eu deuˬ nehˬ-ehˇ, ngaˇ maˬ jawˇ coeˇ-ehˇ pyeuꞈ laˇ-euˬ miˇ-a.

⁷ Ngaˇ tsaˬ leˇ tsahˇ leˇ-eu jeˬ ja ngeh, guiˇ deuˆ-eu gaˇ kawˆ aˬ yawꞈ maꞈ ja-eu meh.