Jaceuq 116 - Akha

Maˬ shiˇ ni gʼoꞈ dehꞈ laˇ-euˬ gʼaˬ Miˬyehˇ-ahˇ ja ceuˬ-eu

¹ Ngaˬ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-eu miˇ neh, Sahˬpaˬ Miˬyehˇ-ahˇ ngaˇ gaˬ-eu ma.

² Ngaˇ aˬ yawꞈ-ahˇ kʼaˇ kuˇ-eu yawˬ poˆ na luꞈ, aˬ yawꞈ naˇ haˬ nehˬ laꞈ-eu meh.

³ Shiˇ-eu lahˇ ju ngaˬ-euˬ tiˬ jawˬ kʼmˇ taˬ-euˬ meh. Lmˬ bymˇ-euˬ naˇ shmˇ ngaˬ-euˬ tiˬ jawˬ oe luꞈ meh. Ngaˬ-euˬ nui ma shaˬ zahˬ naꞈ dui dui nya.

⁴ Kʼoeˇ ngeh Sahˬpaˬ Miˬyehˇ-ahˇ ngaˇ kuˇ-awˇ, “Sahˬpaˬ Miˬyehˇ-oˇ, ngaˬ-ahˇ ka kʼoꞈ nehˬ laꞈ” lehˇ shaˇ-euˬ ma.

⁵ Sahˬpaˬ Miˬyehˇ-aˬ, gʼawˬ shaˬ gaˬ nya-awˇ muiˬ dui jaˬ dui dui meh. Aˬ dui-euˬ Miˬyehˇ-aˬ, gʼawˬ shaˬ gaˬ nya-eu gʼaˬ meh.

⁶ Laꞈ jeuˬ shaˇ kʼaˇ maˬ za-eu deuˬ-ahˇ Sahˬpaˬ Miˬyehˇ haw piˇ-awˇ, ngaˇ shaˬ ngeh zahˬ ngeh, aˬ yawꞈ ka kʼoꞈ nehˬ laꞈ-euˬ meh.

⁷ Ngaˬ-euˬ nui ma-oˇ, gʼaˬ byehˆ taˬ byehˆ. Sahˬpaˬ Miˬyehˇ nawˬ-ahˇ ngehˬ gʼeh dah teˬ luꞈ meh.

⁸ Shiˇ-eu jeˬ laꞈ kʼoeˇ, Sahˬpaˬ Miˬyehˇ ngaˬ-ahˇ ka kʼoꞈ-euˬ meh. Ngaˬ-euˬ myaˆ biˇ bi tsiˇ leˇ-awˇ, ngaˬ-euˬ aˬ kuiˇ sahˬ tiꞈ maˬ bi tiꞈ-a.

⁹ Kʼoeˇ miˇ neh dehꞈ-eu miˇ kʼahˬ heu laꞈ kʼoeˇ, Sahˬpaˬ Miˬyehˇ mehˬ shi ngaˇ cah luꞈ-eu ma.

¹⁰ Nui ma cawˆ dui dui nya lehˇ ngaˇ ehˇ luꞈ kʼawꞈ, jah-eu gʼaˬ byehˆ maˬ byehˆ.

¹¹ Tsawˇ haˬ tiˬ gʼaˬ-ahˇ-iˬ maˬ jah coeˇ luꞈ-a lehˇ ngaˇ guˆ-awˇ ehˇ luꞈ kʼawꞈ jah-eu gʼaˬ byehˆ maˬ byehˆ.

¹² Sahˬpaˬ Miˬyehˇ ngaˬ-euˬ kʼoeˇ taˆ muiˬ dui dui-eu miˇ neh, aˬ yawꞈ-ahˇ ngaˇ aˬ jeˬ ya damˬ nehˬ nmˇ.

¹³ Sahˬpaˬ Miˬyehˇ ka kʼoꞈ nehˬ laꞈ-euˬ guiˬ lahˬ-ahˇ noeˬ keuˆ-awˇ, aˬ yawꞈ-ahˇ aˬ gaꞈ dzaˇ uiˇ lawˇ nehˬ ma.

¹⁴ Aˬ yawꞈ-euˬ tsawˇ haˬ deuˬ uiˬ leˇ taˬ-euˬ mehˬ shi, ngaˬ neh saˇ jaˇ dzaˬ taˬ-euˬ jeˬ aˬ yawꞈ-ahˇ ngaˇ damˬ ma.

¹⁵ Muiˬ-eu jaˬ-eu aˬ yawꞈ-euˬ tsawˇ haˬ tiˬ gʼaˬ shiˇ ngeh, Sahˬpaˬ Miˬyehˇ aˇ naˆ ni shaˬ zahˬ mˇ-eu nga.

¹⁶ Sahˬpaˬ Miˬyehˇ-oˇ, ngaˇ nawˬ-euˬ zaˬ kʼaˆ ma. Nga maꞈ loꞈ-ehˇ nawˬ-ahˇ ngaˇ saˇ jaˇ ziꞈ ma.

¹⁷ Nawˬ-euˬ guiˬ lahˬ-ahˇ noeˬ keuˆ-eu lawˇ-eu jeˬ ngaˇ lawˇ-awˇ, nawˬ-ahˇ ngaˇ guiˬ lahˬ shaˇ ma.

^18-19 Nawˬ-euˬ tsawˇ haˬ deuˬ uiˬ leˇ taˬ-euˬ mehˬ shi, Yeˬluˇsaˬlehˬ meuˬ Uˬ duˬ tahˬ nymˇ nymˇ ma-euˬ muiˬ-eu shawˇ-eu jawˇ duˬ-ahˇ, ngaˬ neh saˇ jaˇ dzaˬ taˬ-euˬ jeˬ nawˬ-ahˇ damˬ ma. Sahˬpaˬ Miˬyehˇ-ahˇ ja ceuˬ-awˬ.