Jaceuq 115 - Akha

Miˬyehˇ maˇ maˇ ni pyeuꞈ-eu gʼaˬ.

¹ Sahˬpaˬ Miˬyehˇ-oˇ, nawˇ tiˬ gʼaˬ-ahˇ tehꞈ-ehˇ, nga maꞈ-ahˇ maˬ ngeuˇ, nawˬ-ahˇ tehꞈ-ehˇ, baoˬ yaw shehꞈ kʼahˬ sehˇ oꞈ-eu meh. Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ hawˇ-eu, nawˬ-euˬ saˇ jaˇ ziꞈ-eu jeˬ baˬ da neh, nawˬ-ahˇ tehꞈ-ehˇ oꞈ-eu meh.

² “Naw maꞈ-euˬ Miˬyehˇ aˬ gaˇ jawˇ ta” lehˇ, aˬ cawˬ tsawˇ jeuˬ nga maꞈ-ahˇ aˬ jeˬ gʼeh ya naˇ haˬ ta.

³ Nga maꞈ-euˬ Miˬyehˇ mˬ kʼoeˇ taˆ jawˇ-awˇ, aˬ yawꞈ kʼaˇ mˇ mawꞈ-euˬ jeˬ mˇ-eu meh.

⁴ Aˬ yawꞈ maꞈ-euˬ miˬ yehˇ deuˬ pyuˇ hawˇ-eu shuiˇ neh jahˇ-awˇ, tsawˇ haˬ neh tehˆ-euˬ mawˇ kawˇ meh.

⁵ Kʼaˬ meh tsoꞈ-awˇ dawˬ maˬ ngehˬ nya-ehˇ, myaˆ nuiˆ tsoꞈ-awˇ maˬ mawˇ nya-a.

⁶ Naˬ bawˇ tsoꞈ-awˇ maˬ gaˬ nya-ehˇ, naˇ mehˇ tsoꞈ-awˇ maˬ behꞈ laꞈ nya-a.

⁷ Aˬ laꞈ tsoꞈ kʼawꞈ, maˬ luˆ nya-ehˇ, aˬ kuiˇ tsoꞈ kʼawꞈ, maˬ cah nya-a. Kuˬ byahˬ-ahˇ teˇ saˇ maˬ laˆ mahˇ nya-a.

⁸ Miˬyehˇ kʼoeˇ deuˬ-ahˇ tehˆ-awˇ jah-eu deuˬ, yawˬ ha neh tehˆ-euˬ tahˬ pahˬ aˬ ma mawˇ kawˇ loꞈ-ehˇ pyeuꞈ-iˇ luꞈ-uˇ.

⁹ Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ-ahˇ gʼoe-awˬ. Aˬ yawꞈ naw maꞈ-ahˇ bo saˆ haw piˇ-eu meh.

¹⁰ Miˬyehˇ-euˬ piˇ ma deuˬ-oˇ, Sahˬpaˬ Miˬyehˇ-ahˇ gʼoe-awˬ. Aˬ yawꞈ naw maꞈ-ahˇ ngehˬ gʼeh dah teˬ-eu meh.

¹¹ Aˬ yawꞈ-ahˇ uˬ duˬ kʼaˇ tahˬ-eu deuˬ, Sahˬpaˬ Miˬyehˇ-ahˇ gʼoe-awˬ. Aˬ yawꞈ naw maꞈ-ahˇ bo saˆ haw piˇ-eu meh.

¹² Sahˬpaˬ Miˬyehˇ aˬ dui-ahˇ maˬ ngehˇ-ehˇ, guiˬ lahˬ biꞈ loꞈ luꞈ meh. Iˇsaˬleˬlaˆ tsawˇ haˬ deuˬ hawˇ-eu, Miˬyehˇ-euˬ piˇ ma dawˬ tawˆ luꞈ-ahˇ, aˬ yawꞈ guiˬ lahˬ biꞈ tehꞈ-a.

¹³ Aˬ yawꞈ-ahˇ taˬ huiˬ taˬ mahˇ-eu tsawˇ haˬ dawˬ tawˆ luꞈ-ahˇ, huiˬ zaˬ nyiˇ zaˬ maˬ tseˇ paˆ ni, aˬ yawꞈ guiˬ lahˬ biꞈ nehˬ tehꞈ-a.

¹⁴ Naw maꞈ hawˇ-eu naw maꞈ-euˬ zaˬ deuˬ uˆ deuˬ-ahˇ, Sahˬpaˬ Miˬyehˇ bi jeuˬ bi o le tehꞈ-a.

¹⁵ Mˬ hawˇ-eu miˇ beh-euˬ Sahˬpaˬ Miˬyehˇ, naw maꞈ-ahˇ guiˬ lahˬ biꞈ luꞈ-uˇ.

¹⁶ Mˬ-aˬ, Sahˬpaˬ Miˬyehˇ-euˬ tehꞈ-ehˇ pyeuꞈ kʼawꞈ, tsawˇ haˬ zaˬ-ahˇ miˇ tsaˬ tahˬ kʼawˇ biꞈ taˬ-euˬ meh.

¹⁷ Shiˇ-eu tsawˇ haˬ deuˬ Sahˬpaˬ Miˬyehˇ-ahˇ maˬ ya ja ceuˬ-a. Shiˇ-eu miˇ kʼahˬ-ahˇ keuˆ-iˇ-euˬ deuˬ aˬ yawꞈ-ahˇ maˬ ya ja ceuˬ-a.

¹⁸ Ehˇ kʼawꞈ, dehꞈ luꞈ-eu aˬ dui maꞈ deuˬ, aˬ yawꞈ-euˬ guiˬ lahˬ-ahˇ ja ceuˬ ma. Nymˬ-mˇ hawˇ-eu mˬ maˬ maˬ byaˆ zaˇ ziˇ ja ceuˬ ma.