Jaceuq 109 - Akha

Shaˬ zahˬ naꞈ-eu gʼaˬ toˇ-eu dawˬ

(Daˬbiˇ-euˬ caˇ dawˬ)

¹ Sahˬpaˬ Miˬyehˇ-oˇ, nawˬ-ahˇ ngaˇ ja ceuˬ-eu ma. Dawˬ maˬ tmˇ ni taˬ jawˇ nehˬ laꞈ.

² Jaˬ myawꞈ mehˇ shuiˇ deuˬ ngaˬ-ahˇ ja doeˇ-awˇ, maˬ ngeuˇ gaˇ keuˆ ni ja bu nehˬ laꞈ-eu meh.

³ Ngaˬ-euˬ gaˇ kawˆ maˬ muiˬ-eu jeˬ aˬ yawꞈ maꞈ ja-awˇ, gaˇ kawˆ maˬ jaˆ gaˇ dawˬ doeˇ ngehˬ luꞈ-eu meh.

⁴ Ngaˇ aˬ yawꞈ maꞈ-ahˇ gaˬ-awˇ guiˬ lahˬ shaˇ nehˬ luꞈ kʼawꞈ, aˬ yawꞈ maꞈ ngaˬ-ahˇ muiˇ-eu meh.

⁵ Yaw muiˬ jeˬ mˇ nehˬ gaˇ yaw doeˇ jeˬ mˇ kʼoꞈ nehˬ laꞈ-awˇ, gʼoeˇ-eu gaˬ-eu jeˬ-ahˇ bye-eu jeˬ biꞈ kʼoꞈ laꞈ-euˬ meh.

⁶ Ngaˬ-ahˇ muiˇ-eu gʼaˬ-ahˇ yaˇ kʼaˬ bi daˇ-eu gʼaˇ duˬ haiˬ-eu yaˇ kʼaˬ daˇ-eu gʼaˬ tseˇ doˆ-awˇ, aˬ yawꞈ-ahˇ muiˇ-eu tsawˇ haˬ neh, aˬ yawꞈ-ahˇ yaˇ kʼaˬ bi ja-awˬ.

⁷ Aˬ yawꞈ iˬ baˇ ahˇ meh lehˇ bi pyehˆ tseˇ duˬ-awˇ, aˬ yawꞈ neh guiˬ lahˬ shaˇ-euˬ dawˬ deuˬ kʼawꞈ, yaw lehˬ jeˬ mˇ-euˬ meh lehˇ bi daˇ-awˬ.

⁸ Aˬ yawꞈ-euˬ ziˇ bi nymˇ le-awˇ, aˬ yawꞈ-euˬ myawˬ gahˬ deuˬ aˬ cawˬ bi geuꞈ jiˇ-awˬ.

⁹ Aˬ yawꞈ-euˬ zaˬ deuˬ aˬ da maˬ baw ni bi shaˬ-awˇ, miˬ zaˬ gʼaˬ miˬ coeˬ bi coeˬ-iˇ-awˬ.

¹⁰ Aˬ yawꞈ-euˬ zaˬ deuˬ nymˇ jiˇ maˬ baw ni hawˬ shaˇ shaˇ shaˇ-ehˇ cah-awˇ, aˬ yawꞈ maꞈ jawˇ luꞈ-eu nymˇ nymˇ cehˇ laꞈ kʼoeˇ neh bi teh dzeh luꞈ-uˇ.

¹¹ Aˬ yawꞈ-euˬ myawˬ gahˬ dawˬ tawˆ luꞈ aˬ yawꞈ-ahˇ pyuˇ paˇ nehˬ-euˬ gʼaˬ yuˇ kʼoꞈ jiˇ-awˇ, aˬ yawꞈ neh kʼaˇ mˇ doˆ taˬ-euˬ jeˬ-ahˇ boeˇ miˬ siˬ kʼaˬ deuˬ yuˇ geuꞈ jiˇ luꞈ-uˇ.

¹² Tsawˇ haˬ tiˬ gʼaˬ-iˬ aˬ yawꞈ-ahˇ gʼawˬ shaˬ maˬ gaˬ ni, aˬ da maˬ baw-eu aˬ yawꞈ-euˬ zaˬ deuˬ-ahˇ ngehˬ gʼeh-eu gʼaˬ maˬ jawˇ ni shaˬ luꞈ-uˇ.

¹³ Aˬ yawꞈ-euˬ zaˬ deuˬ uˆ deuˬ shiˇ jiˇ-awˇ, zaˬ ziˇ-ahˇ aˬ yawꞈ-euˬ tsawˇ myahˇ byoˆ-iˇ luꞈ-uˇ.

¹⁴ Aˬ yawꞈ-euˬ aˬ poeˬ aˬ bawˇ-euˬ iˬ baˇ-ahˇ Sahˬpaˬ Miˬyehˇ maˬ ngehˇ-ehˇ, aˬ yawꞈ aˬ ma-euˬ iˬ baˇ maˬ pyehˬ nehˬ ni bi jaˆ luꞈ-uˇ.

¹⁵ Aˬ yawꞈ maꞈ-euˬ iˬ baˇ-ahˇ Sahˬpaˬ Miˬyehˇ tiˬ jawˇ-iˬ maˬ ngehˇ-ehˇ, aˬ yawꞈ maꞈ-ahˇ ngehˇ tsehˆ tsehˆ nehˬ luꞈ-uˇ.

¹⁶ Tsawˇ haˬ kʼoeˇ gʼaˬ gʼawˬ shaˬ gaˬ-eu maˬ siˬ nya-ehˇ, shaˬ-eu zahˬ-eu deuˬ hawˇ-eu noeˬ dui noeˬ duiˇ-euˬ deuˬ-ahˇ aˬ yawꞈ kʼehˬ-awˇ sehꞈ-euˬ meh.

¹⁷ Aˬ yawꞈ aˬ cawˬ-ahˇ yaˬ kʼehˇ yaˬ-eu loꞈ-ehˇ, yaˬ kʼehˇ yaˬ nehˬ gaˇ ya daˬ poˆ luꞈ-uˇ. Aˬ yawꞈ aˬ cawˬ-ahˇ guiˬ lahˬ maˬ biꞈ mawꞈ-eu loꞈ-ehˇ, aˬ yawꞈ-ahˇ guiˬ lahˬ biꞈ-eu gʼaˬ maˬ jawˇ ni pyeuꞈ-iˇ luꞈ-uˇ.

¹⁸ Yaˬ kʼehˇ yaˬ-eu jeˬ-ahˇ mehˬ tsoeˬ dm-eu loꞈ-ehˇ aˬ yawꞈ dm tsahˬ taˬ-euˬ meh. Aˬ yawꞈ neh yaˬ kʼehˇ yaˬ-euˬ jeˬ iˇ cuꞈ nyiꞈ leˇ-eu loꞈ-ehˇ aˬ yawꞈ-euˬ gʼawˇ mawˇ-ahˇ nyiꞈ leˇ-awˇ, tsiˇ nyiꞈ leˇ-eu loꞈ-ehˇ aˬ yawꞈ-euˬ shaˬ yoeˬ-ahˇ nyiꞈ leˇ luꞈ-uˇ.

¹⁹ Yaˬ kʼehˇ yaˬ-eu jeˬ mehˬ tsoeˬ dm-eu loꞈ-ehˇ aˬ yawꞈ-ahˇ dm gʼoeˬ-awˇ, joꞈ paꞈ loꞈ-ehˇ aˬ myah luꞈ lahˇ tehˬ taˬ luꞈ-uˇ.

²⁰ Sahˬpaˬ Miˬyehˇ-oˇ, ngaˬ-ahˇ yaw doeˇ ehˇ-eu muiˇ-eu deuˬ-ahˇ, kʼoeˇ loꞈ-ehˇ kʼehˬ nehˬ-awˬ.

²¹ Ehˇ kʼawꞈ, Sahˬpaˬ Miˬyehˇ nawˬ neh saˇ jaˇ dzaˬ-euˬ loꞈ-ehˇ, ngaˬ-ahˇ ngehˬ gʼeh laꞈ-awˇ, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ muiˬ-eu baˬ da neh, ngaˬ-ahˇ ka kʼoꞈ laꞈ-awˬ.

²² Ngaˇ-aˬ, shaˬ-eu zahˬ-eu mehꞈ-eu shuꞈ-eu tsawˇ haˬ pyeuꞈ-awˇ, nui ma shaˬ zahˬ naꞈ dui dui-eu ma.

²³ Uˬ ciꞈ paw naˇ shmˇ shmˇ le-eu loꞈ-ehˇ ngaˬ-euˬ ziˇ jiˇ le shaw-iˬ-awˇ, nyehˇ bahˇ loꞈ-ehˇ jaˬ lehˇ neh hehˇ dzaˬ gʼeh miˇ-a.

²⁴ Hawˬ mehꞈ dzahˬ-euˬ miˇ neh pawˬ tsuiꞈ yaˇ laˇ taˬ-awˇ, baˆ kʼoˆ hawˇ-eu shaˬ yoeˬ tehꞈ miˇ-a.

²⁵ Aˬ cawˬ ngaˬ-ahˇ mawˇ ngeh uiˇ-awˇ, uˬ duˬ dzuiꞈ-awˇ cehꞈ lehꞈ ka haw-eu meh.

²⁶ Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˬ-ahˇ caw ba le-awˬ. Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ baˬ da neh, ngaˬ-ahˇ ka kʼoꞈ le-awˬ.

²⁷ Nawˇ ngaˬ-ahˇ ka kʼoꞈ-eu gʼaˬ pyeuꞈ-eu gaˇ kawˆ, ngaˬ-ahˇ muiˇ-eu deuˬ-ahˇ bi siˬ leˇ-awˬ.

²⁸ Aˬ yawꞈ maꞈ ngaˬ-ahˇ yaˬ kʼehˇ yaˬ kʼawꞈ, nawˇ ngaˬ-ahˇ guiˬ lahˬ biꞈ tehꞈ-a. Ngaˬ-ahˇ kʼehˬ-eu deuˬ bi shaꞈ dawˇ-iˇ-awˇ, nawˬ-euˬ zaˬ kʼaˆ ngaˇ gʼaˬ laˬ kʼaˬ bi cehˇ laꞈ-awˬ.

²⁹ Ngaˬ-ahˇ muiˇ-eu deuˬ daˬ ga-eu jeˬ neh bi pymˬ tehˬ-awˇ, shaꞈ dawˇ-eu jeˬ dm-awˇ jawˇ luꞈ-uˇ.

³⁰ Sahˬpaˬ Miˬyehˇ-euˬ guiˬ lahˬ-ahˇ ngaˇ yaw kʼaˆ-ehˇ guˇ-awˇ ja ceuˬ ma. Tsawˇ haˬ uiˬ leˇ bymˇ leˇ taˬ-euˬ mehˬ shi, aˬ yawꞈ-ahˇ ngaˇ ja ceuˬ ma.

³¹ Aˬ jeˬ miˇ neh ehˇ naˇ, shaˬ zaˬ zahˬ zaˬ-ahˇ aˬ yawꞈ haw piˇ-awˇ, shiˇ gaˇ keuˆ ni kʼaˆ dzaˬ-eu deuˬ-euˬ laꞈ-ahˇ ka kʼoꞈ doˆ nehˬ-eu meh.