Jaceuq 108 - Akha

Caw ba nehˬ laꞈ lehˇ shaˇ-eu guiˬ lahˬ shaˇ dawˬ

(Daˬbiˇ-euˬ caˇ dawˬ)

¹ Miˬyehˇ-oˇ, ngaˬ-euˬ nui ma ziꞈ dah ni jaˆ-eu ma. Ngaˇ nawˬ-ahˇ caˇ-awˇ ja ceuˬ-eu ma. Ngaˬ-euˬ nui ma-oˇ, noeˬ laˇ-awˬ.

² Ngaˬ-euˬ deuˇ-mˬ hawˇ-eu bawˬ law-oˇ, noeˬ laˇ-awˬ. Nahˇ ma-ahˇ ngaˇ laˆ noeˬ ma.

³ Sahˬpaˬ Miˬyehˇ-oˇ, miˇ kʼahˬ tsawˇ jeuˬ mehˬ shi, nawˬ-euˬ guiˬ lahˬ-ahˇ ngaˇ ja ceuˬ ma. Miˇ kʼahˬ zaˬ deuˬ mehˬ shi, nawˬ-ahˇ ngaˇ ja ceuˬ ma.

⁴ Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ mˬ-ahˇ keuˆ ni jaˆ-awˇ, nawˇ saˇ jaˇ ziꞈ-euˬ jeˬ mˬ-ahˇ tuˆ-eu meh.

⁵ Miˬyehˇ-oˇ, nawˇ huiˬ-eu mahˇ-eu gaˇ kawˆ mˬ kʼoeˇ taˆ pah mehˬ-awˇ, nawˬ-euˬ yaw shehꞈ kʼahˬ sehˇ miˇ kʼahˬ doe ni bi bya le-awˬ.

⁶ Nawˇ gaˬ-eu tsawˇ haˬ deuˬ ya buˬ ya law-iˇ ni, ngaˬ-euˬ shaˇ dawˬ-ahˇ naˇ haˬ-awˇ, nawˬ-euˬ baoˬ neh nga maꞈ-ahˇ ka kʼoꞈ nehˬ laꞈ.

⁷ Aˬ yawꞈ-euˬ muiˬ-eu shawˇ-eu jawˇ duˬ-ahˇ jawˇ-awˇ, Miˬyehˇ heu loꞈ-ehˇ ehˇ-eu meh. Sheˬkmˬ meuˬ-ahˇ ngaˇ nui kʼahˇ tiˬ shiˇ deuˆ biˇ-awˇ, ngaˬ-euˬ tsawˇ haˬ deuˬ-ahˇ Suˇkoˆ deh ga biˇ nehˬ ma.

⁸ Giˇlaˆ miˇ kʼahˬ ngaˬ-euˬ ma. Maˬnaˇseˬ miˇ kʼahˬ kʼawꞈ ngaˬ-euˬ ma. Eˇpaˬleˬ miˇ kʼahˬ ngaˬ-euˬ guiˇ deuˆ uˬ kʼoˆ pyeuꞈ-awˇ, Yuˇdaˆ miˇ kʼahˬ ngaˇ tuˆ tehˬ luꞈ-eu dzoeˬ dzaˬ gawˬ yoeˬ pyeuꞈ-eu ma.

⁹ Ehˇ kʼawꞈ, Mawˇbaˆ miˇ kʼahˬ-aˬ, ngaˇ iˇ cuꞈ dzuiꞈ-eu shehˇ byehˇ geuꞈ ma. Eˬdoˬ miˇ kʼahˬ-ahˇ ngaˬ-euˬ sehˬ nawˆ dzeh taˬ-awˇ, ngaˬ-euˬ miˇ kʼahˬ pyeuꞈ-eu gaˇ kawˆ tsaˬ tsoˆ nehˬ ma. Piˇliˇtiˆ miˇ kʼahˬ kʼoeˇ taˆ, ngaˇ gʼaˬ leˇ-euˬ gʼaˬ pyeuꞈ-eu gaˇ kawˆ kʼaˬ duˬ ni guˇ ma lehˇ ehˇ-eu meh.

¹⁰ Miˬyehˇ-oˇ, ziꞈ dah ni gawˬ ziꞈ taˬ-euˬ meuˬ-ahˇ, aˬ suˇ gʼaˬ ngaˬ-ahˇ sheuˬ gʼeh nehˬ laꞈ nmˇ. Aˬ suˇ gʼaˬ ngaˬ-ahˇ Eˬdoˬ miˇ kʼahˬ-ahˇsheuˬ gʼeh nehˬ laꞈ nmˇ. Eˬdoˬ miˇ kʼahˬ-ahˇ aˬ suˇ gʼaˬ ngaˬ-ahˇ sheuˬ gʼeh nmˇ.

¹¹ Nawˇ nga maꞈ-ahˇ aˬ diˇ aˬ maˇ byehˇ dzeh-euˬ ma loˇ. Nga maꞈ-euˬ guiˇ maꞈ nehˬ-ehˇ guiˇ deuˆ gaˇ nawˇ maˬ paˇ iˇ ma loˇ.

¹² Muiˇ-eu deuˬ-ahˇ nga maꞈ guiˇ deuˆ gaˇ caw ba nehˬ laꞈ. Tsawˇ haˬ zaˬ caw ba-eu gaˇ dahˇ maˬ tsoeˬ-a.

¹³ Miˬyehˇ nga maꞈ nehˬ-ehˇ jawˇ naˇ nga maꞈ gʼaˬ leˇ ma. Muiˇ-eu deuˬ-ahˇ aˬ yawꞈ deuˆ gʼaˬ tehꞈ-a.