Jaceuq 107 - Akha

Miˬyehˇ-euˬ muiˬ-eu guiˬ lahˬ-ahˇ ja ceuˬ-eu

JA CEUˬ-EU SAHˬ BOꞈ NGAˬ TAꞈ TIˬ TAꞈ

¹ Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˬ. Aˬ yawꞈ aˬ dui kʼoeˇ taˆ muiˬ-eu meh. Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh.

² Aˬ yawꞈ neh ka kʼoꞈ nehˬ-euˬ tsawˇ haˬ dawˬ tawˆ luꞈ-oˇ, Sahˬpaˬ Miˬyehˇ-ahˇ tiˬ poˆ saˇ-iˬ tiˬ poˆ ja ceuˬ-awˬ. Muiˇ-eu deuˬ aˬ laꞈ laꞈ kʼoeˇ, aˬ yawꞈ naw maꞈ-ahˇ ka kʼoꞈ-awˇ,

³ aˬ cawˬ-euˬ miˇ kʼahˬ-ahˇ neh naw maꞈ-ahˇ, aˬ yawꞈ sheuˬ doˆ kʼoꞈ laꞈ-euˬ meh. Nahˇ ma doˆ kʼehˬ ga kʼehˬ hawˇ-eu laꞈ oˆ laꞈ taˆ, aˬ cawˬ miˇ kʼahˬ doe ni jawˇ byaˆ taˬ-euˬ naw maꞈ-ahˇ, aˬ yawꞈ sheuˬ kʼoꞈ doˆ laꞈ-euˬ meh.

⁴ Tiˬ paˆ na deuˬ miˇ kʼahˬ pyawˬ maˬ siˬ laˇ-eu kʼaˇ shuiꞈ deh-ahˇ jawˇ byoˆ taˬ-awˇ, jawˇ uˇ-iˇ-eu meuˬ maˬ poˆ mawˇ nya-a.

⁵ Aˬ yawꞈ maꞈ hawˬ hawˇ-eu iˇ cuꞈ mehꞈ-awˇ, noeˬ tmˬ kʼaˇ maˬ paˇ za meh.

⁶ Aˬ yawꞈ maꞈ noeˬ dui-awˇ Sahˬpaˬ Miˬyehˇ-ahˇ kuˇ ngeh, shaˬ zahˬ laꞈ kʼoeˇ aˬ yawꞈ ka kʼoꞈ doˆ nehˬ-euˬ meh.

⁷ Aˬ yawꞈ maꞈ-ahˇ dawˇ coe ni jaˆ-eu gaˇ ma caw caw-ehˇ sheuˬ gʼeh-awˇ, meuˬ-ahˇ sheuˬ uˇ-awˇ bi jawˇ-euˬ meh.

⁸ Sahˬpaˬ Miˬyehˇ-euˬ maˬ tsehˆ leˇ nya-eu gʼoeˇ-eu gaˬ-eu jeˬ hawˇ-eu, aˬ yawꞈ maꞈ gʼaˇ duˬ zahˬ leˇ paˬ-ehˇ gʼeh-eu jeˬ mˇ-euˬ guiˬ lahˬ baˬ da neh, aˬ yawꞈ-euˬ guiˬ lahˬ-ahˇ aˬ yawꞈ maꞈ ja ceuˬ-eu tsaˬ meh.

⁹ Iˇ cuꞈ mehꞈ-eu tsawˇ haˬ-ahˇ aˬ yawꞈ bi dawˇ dehˆ-awˇ, mehꞈ-eu shuꞈ-eu deuˬ-ahˇ muiˬ-eu guiˬ lahˬ tiˬ byah ni shehˬ nehˬ lawˇ nehˬ-euˬ meh.

¹⁰ Tiˬ paˆ na deuˬ zahˇ tsui ni gʼeh gaˇ jawˇ luꞈ-awˇ, paꞈ kuˆ-ahˇ shmˇ caˆ daˬ-awˇ uˇ-eu meh.

¹¹ Baoˬ huiˬ-eu Miˬyehˇ-euˬ dawˬ-ahˇ aˬ yawꞈ maꞈ puiˬ-awˇ, aˬ yawꞈ mehˬ nehˬ tsoˆ nehˬ gaˇ maˬ naˇ haˬ-eu miˇ neh, kʼoeˇ loꞈ-ehˇ ya daˬ-eu meh.

¹² Aˬ yawꞈ maꞈ myawˬ kʼaˆ ya mˇ-eu miˇ neh gʼaˬ jiˇ-awˇ, coˬ-iˇ luꞈ kʼawꞈ gʼeu tuˇ nehˬ-eu gʼaˬ maˬ jawˇ-a.

¹³ Aˬ yawꞈ maꞈ noeˬ dui-awˇ Sahˬpaˬ Miˬyehˇ-ahˇ kuˇ ngeh, shaˬ zahˬ laꞈ kʼoeˇ aˬ yawꞈ ka kʼoꞈ doˆ nehˬ-euˬ meh.

¹⁴ Yaw zahˇ laꞈ kʼoeˇ aˬ yawꞈ maꞈ-ahˇ sheuˬ doˆ laꞈ-awˇ, aˬ yawꞈ maꞈ-ahˇ paꞈ-euˬ shmˇ caˆ tseuˆ puiˇ doˆ nehˬ-euˬ meh.

¹⁵ Sahˬpaˬ Miˬyehˇ-euˬ maˬ tsehˆ leˇ nya-eu gʼoeˇ-eu gaˬ-eu jeˬ hawˇ-eu, aˬ yawꞈ maꞈ gʼaˇ duˬ zahˬ leˇ paˬ-ehˇ gʼeh-eu jeˬ mˇ-euˬ guiˬ lahˬ baˬ da neh, aˬ yawꞈ-euˬ guiˬ lahˬ-ahˇ aˬ yawꞈ maꞈ ja ceuˬ-eu tsaˬ meh.

¹⁶ Guiˬ shuiˇ laˇ gʼoˆ aˬ yawꞈ ngawˬ pyaˆ-awˇ, shmˇ gʼoˆ kʼehˬ ngawˬ kʼehꞈ dzeh-euˬ meh.

¹⁷ Tiˬ paˆ na deuˬ iˬ baˇ baˬ da neh tsawˇ uˬ uˬ-iˇ-awˇ, yaw haiˬ jeˬ mˇ-euˬ baˬ da neh ya shaˬ ya zahˬ-eu meh.

¹⁸ Aˬ yawꞈ maꞈ dzaˇ-ahˇ maˬ haw nahˇ-ehˇ pyeuꞈ-iˇ-awˇ, shiˇ taw tehˬ laˇ taˬ-euˬ meh.

¹⁹ Aˬ yawꞈ maꞈ noeˬ dui-awˇ Sahˬpaˬ Miˬyehˇ-ahˇ kuˇ ngeh, shaˬ zahˬ laꞈ kʼoeˇ aˬ yawꞈ ka kʼoꞈ doˆ nehˬ-euˬ meh.

²⁰ Aˬ yawꞈ-euˬ dawˬ neh aˬ yawꞈ maꞈ-ahˇ laˆ saˆ taˬ-awˇ, shiˇ gaˇ maˬ bi keuˆ ni ka kʼoꞈ-euˬ meh.

²¹ Sahˬpaˬ Miˬyehˇ-euˬ maˬ tsehˆ leˇ nya-eu gʼoeˇ-eu gaˬ-eu jeˬ hawˇ-eu, aˬ yawꞈ maꞈ gʼaˇ duˬ zahˬ leˇ paˬ-ehˇ gʼeh-eu jeˬ mˇ-euˬ guiˬ lahˬ baˬ da neh, aˬ yawꞈ-euˬ guiˬ lahˬ-ahˇ aˬ yawꞈ maꞈ ja ceuˬ-eu tsaˬ meh.

²² Lawˇ-eu shehˇ-eu laꞈ kʼoeˇ aˬ yawꞈ-ahˇ aˬ yawꞈ maꞈ ja ceuˬ-eu tsaˬ-awˇ, laˬ kʼaˬ cehˇ-eu caˇ dawˬ caˇ-eu laꞈ kʼoeˇ, aˬ yawꞈ neh mˇ-euˬ huiˬ-eu gaˇ deuˬ gaˇ kawˆ, aˬ cawˬ-ahˇ ja mehˬ-eu tsaˬ meh.

²³ Tiˬ paˆ na deuˬ iˬ ma laˆ shaˆ kʼoeˇ taˆ saˇ baoˬ dziˬ-awˇ, ya dzaˬ ya dawˇ ni pyuˇ poˆ-eu meh.

²⁴ Sahˬpaˬ Miˬyehˇ-euˬ kuiˇ zaˇ laꞈ zaˇ-ahˇ aˬ yawꞈ maꞈ ya mawˇ-awˇ, laˆ shaˆ kʼoeˇ taˆ huiˬ-eu gaˇ deuˬ mˇ luꞈ gaˇ ya mawˇ-euˬ meh.

²⁵ Aˬ yawꞈ dawˬ biꞈ-awˇ jaˬ lehˇ lehˇ ma bi baw leꞈ ngeh, laˆ shaˆ iˇ luˆ dzeh laˇ-eu meh.

²⁶ Saˇ baoˬ-ahˇ jaˬ lehˇ kʼoeˇ taˆ dzeh diˇ leꞈ-awˇ, yaw naꞈ-ahˇ bi ga taˬ-iˇ-eu meh. Kʼoeˇ naˆ naˆ-ehˇ guˆ laˇ paˬ-ehˇ gʼeh-eu jeˬ-ahˇ mawˇ ngeh, tsawˇ haˬ zaˬ laˇ baˇ-iˇ-eu meh.

²⁷ Aˬ yawꞈ maꞈ sahˬ tiꞈ tiꞈ-awˇ jiˇ baˬ yehꞈ-eu loꞈ-ehˇ, yawꞈ lawꞈ gʼaˇ laˇ-ehˇ ceh-eu meh. Aˬ yawꞈ maꞈ siˬ-eu gahˇ-eu jeˬ, gaˇ dahˇ maˬ tsoeˬ leˇ-a.

²⁸ Aˬ yawꞈ maꞈ noeˬ dui-awˇ Sahˬpaˬ Miˬyehˇ-ahˇ kuˇ ngeh, shaˬ zahˬ laꞈ kʼoeˇ aˬ yawꞈ ka kʼoꞈ doˆ nehˬ-euˬ meh.

²⁹ Jaˬ lehˇ lehˇ ma-ahˇ aˬ yawꞈ bi coꞈ-iˇ-awˇ, iˇ luˆ dzeh-eu naˬ leˇ-euˬ meh.

³⁰ Jaˬ lehˇ lehˇ ma naˬ leˇ-euˬ miˇ neh aˬ yawꞈ maꞈ laˬ kʼaˬ cehˇ-awˇ, aˬ yawꞈ maꞈ iˇ mawꞈ gaˇ sheuˬ keuˆ gʼeh nehˬ-euˬ meh.

³¹ Sahˬpaˬ Miˬyehˇ-euˬ maˬ tsehˆ leˇ nya-eu gʼoeˇ-eu gaˬ-eu jeˬ hawˇ-eu, aˬ yawꞈ maꞈ gʼaˇ duˬ zahˬ leˇ paˬ-ehˇ gʼeh-eu jeˬ mˇ-euˬ guiˬ lahˬ baˬ da neh, aˬ yawꞈ-euˬ guiˬ lahˬ-ahˇ aˬ yawꞈ maꞈ ja ceuˬ-eu tsaˬ meh.

³² Tsawˇ haˬ uiˬ leˇ bymˇ leˇ-awˇ jawˇ luꞈ ngeh, aˬ yawꞈ huiˬ dui mahˇ dui dui-eu gaˇ kawˆ, aˬ yawꞈ maꞈ ja mehˬ-eu tsaˬ-awˇ, aˬ yuiꞈ aˬ tsu deuˬ uiˬ leˇ-euˬ mehˬ shi, aˬ yawꞈ-ahˇ ja ceuˬ-eu tsaˬ meh.

³³ Lawˇ daˬ gui-iˇ-awˇ, lawˇ gawˆ tsiˇ-iˇ ni, Sahˬpaˬ Miˬyehˇ jahˇ nehˬ-euˬ meh.

³⁴ Miˇ muiˬ muiˬ gaˇ jawˇ-eu tsawˇ haˬ deuˬ maˬ muiˬ-eu miˇ neh, miˇ tsaˬ saˬ deuꞈ deh ga pyeuꞈ-iˇ ni, aˬ yawꞈ jahˇ nehˬ-euˬ meh.

³⁵ Kʼaˇ shuiꞈ deh ga-ahˇ lah bi pyeuꞈ-iˇ-awˇ, gui-eu pehˇ tsahˇ-ahˇ lawˇ gawˆ bi yoeˇ le-euˬ meh.

³⁶ Mehꞈ-eu shuꞈ-eu deuˬ-ahˇ kʼoeˇ gaˇ bi jawˇ-iˇ-awˇ, aˬ yawꞈ maꞈ meuˬ daˬ doˆ-awˇ jawˇ-euˬ meh.

³⁷ Aˬ yawꞈ maꞈ deh yaˇ hawˇ-eu aˬ gaꞈ yaˇ kmˇ mˇ-awˇ, mˇ za shaˇ za dui dui-euˬ meh.

³⁸ Aˬ yawꞈ-euˬ tsawˇ haˬ-ahˇ guiˬ lahˬ biꞈ-eu laꞈ kʼoeˇ, aˬ yawꞈ maꞈ-euˬ zaˬ deuˬ bi jeuˬ bi o le-awˇ, jeˬ zaˬ deuˬ bi myaˬ bi behˇ laˇ-euˬ meh.

³⁹ Aˬ cawˬ kʼehˬ nehˬ kʼaˆ nehˬ gaˇ ya daˬ-eu miˇ neh, Miˬyehˇ-euˬ tsawˇ haˬ deuˬ daˬ ga luꞈ ngeh,

⁴⁰ Aˬ yawꞈ maꞈ-ahˇ kʼehˬ-eu deuˬ-ahˇ aˬ yawꞈ bye-awˇ, kʼaˇ shuiꞈ deh ga ga ma laꞈ kʼoeˇ, iˇ tsaˬ laˇ tsaˬ maˬ siˬ ni bi shaˬ-euˬ meh.

⁴¹ Ehˇ kʼawꞈ shaˬ-eu tsawˇ haˬ deuˬ shaˬ zahˬ naꞈ gaˇ aˬ yawꞈ ka kʼoꞈ le-awˇ, aˬ yawꞈ maꞈ-euˬ miˬ sawˇ zaˬ deuˬ-ahˇ, mawˇ neˇ mawˇ maꞈ loꞈ-ehˇ bi jeuˬ bi o le-euˬ meh.

⁴² Yaw tsaˬ yaw dawˇ tsawˇ haˬ deuˬ kʼoeˇ gaˇ mawˇ ngeh laˬ kʼaˬ cehˇ kʼawꞈ, maˬ tsaˬ maˬ dawˇ-eu deuˬ ciˬ cuˇ ni jawˇ-eu meh.

⁴³ Zaˬ siˬ tsawˇ gahˇ kʼaˇ ahˇ-eu tsawˇ haˬ deuˬ, gaˇ kawˆ kʼoeˇ shaˇ sawˇ haw luꞈ-uˇ. Sahˬpaˬ Miˬyehˇ-euˬ maˬ tsehˆ leˇ-eu gʼoeˇ-eu gaˬ-eu jeˬ-ahˇ aˬ yawꞈ maꞈ shaˇ noeˬ doˆ luꞈ-uˇ.