Jaceuq 105 - Akha

Miˬyehˇ hawˇ-eu aˬ yawꞈ-euˬ tsawˇ haˬ deuˬ

¹ Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˬ. Aˬ yawꞈ huiˬ-eu mahˇ-eu gaˇ kawˆ ja gaˬ-awˬ. Aˬ yawꞈ neh mˇ taˬ-euˬ gaˇ deuˬ gaˇ kawˆ, tsawˇ jeuˬ dawˬ tawˆ luꞈ-ahˇ dzawˇ nehˬ-awˬ.

² Sahˬpaˬ Miˬyehˇ-ahˇ caˇ-awˇ ja ceuˬ-awˬ. Aˬ yawꞈ neh mˇ-euˬ kʼaˆ jeˬ-ehˇ gʼeh-eu gaˇ deuˬ, aˬ cawˬ-ahˇ dzawˇ nehˬ-awˬ.

³ Aˬ dui aˬ yawꞈ-euˬ tsawˇ haˬ ya pyeuꞈ-eu miˇ neh, laˬ kʼaˬ cehˇ dui dui-awˬ. Aˬ yawꞈ-ahˇ uˬ duˬ kʼaˇ tahˬ-eu tsawˇ haˬ deuˬ laˬ kʼaˬ cehˇ-awˬ.

⁴ Sahˬpaˬ Miˬyehˇ-ahˇ laꞈ jeuˬ shaˇ-awˇ, aˬ yawꞈ-ahˇ aˬ myah luꞈ uˬ duˬ tahˬ-awˬ.

^5-6 Aˬ yawꞈ-euˬ zaˬ kʼaˆ Aˬbyaˬhaˬ-euˬ zaˬ deuˬ uˆ deuˬ-oˇ, aˬ yawꞈ neh tseˇ doˆ-euˬ Yaˬkoˆ-euˬ zaˬ deuˬ uˆ deuˬ-oˇ, Miˬyehˇ neh mˇ-euˬ kʼaˆ jeˬ-ehˇ gʼeh-eu gaˇ deuˬ hawˇ-eu, aˬ yawꞈ neh yaˇ kʼaˬ daˇ-euˬ gaˇ kawˆ deuˬ-ahˇ, maˬ ngehˇ ni noeˬ keuˆ-awˬ.

⁷ Sahˬpaˬ Miˬyehˇ-aˬ, aˬ dui-euˬ Miˬyehˇ meh. Aˬ yawꞈ-euˬ dawˬ-aˬ, miˇ kʼahˬ dawˬ tawˆ luꞈ gʼaˇ duˬ meh.

⁸ Aˬ yawꞈ-euˬ dawˬ ma saˇ jaˇ-ahˇ mˬ maˬ maˬ byaˆ zaˇ ziˇ aˬ yawꞈ ziꞈ-awˇ, aˬ yawꞈ-euˬ saˇ jaˇ dawˬ-ahˇ aˇ heˇ ziˇ ziꞈ tehꞈ-a.

⁹ Aˬbyaˬhaˬ nehˬ-ehˇ dzaˬ-euˬ dawˬ ma saˇ jaˇ-ahˇ aˬ yawꞈ ziꞈ-awˇ, Iˇtsaˆ nehˬ-ehˇ dzaˬ-euˬ saˇ jaˇ-ahˇ ziꞈ tehꞈ-a.

¹⁰ Mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ, Yaˬkoˆ nehˬ-ehˇ Sahˬpaˬ Miˬyehˇ dzaˬ-euˬ meh.

¹¹ Nawˬ-ahˇ ngaˇ Kaˬnaˬ miˇ kʼahˬ biꞈ-awˇ, miˇ kʼahˬ kʼoeˇ nawˇ yaˬ geuꞈ tsehˆ tehꞈ-a lehˇ, aˬ yawꞈ ehˇ taˬ-euˬ jaˆ-eu meh.

¹² Miˬyehˇ-euˬ tsawˇ haˬ deuˬ tsawˇ haˬ maˬ myaˬ-ehˇ, Kaˬnaˬ miˇ kʼahˬ laꞈ kʼoeˇ boeˇ miˬ siˬ kʼaˬ pyeuꞈ luꞈ-eu meh.

¹³ Miˇ gahˬ tiˬ gahˬ saˇ-iˬ tiˬ gahˬ aˬ yawꞈ maꞈ cah doe-awˇ, miˇ kʼahˬ tiˬ kʼahˬ saˇ-iˬ tiˬ kʼahˬ cah paˇ-euˬ meh.

¹⁴ Ehˇ kʼawꞈ, aˬ yawꞈ maꞈ-ahˇ tiˬ gʼaˬ-iˬ maˬ ya kʼehˬ ni, miˇ kʼahˬ sahˬ paˬ deuˬ-ahˇ kʼehˇ-awˇ bi haw piˇ-euˬ meh.

¹⁵ “Ngaˬ neh tseˇ doˆ-euˬ ngaˬ-euˬ zaˬ kʼaˆ deuˬ-ahˇ taˬ laˆ coeˬ. Ngaˬ-euˬ gʼaˇ duˬ ngehˬ dah-eu deuˬ-ahˇ taˬ laˆ ciˆ” lehˇ, aˬ yawꞈ dawˬ biꞈ-euˬ meh.

¹⁶ Mehꞈ-eu shuꞈ-eu jeˬ aˬ yawꞈ maꞈ miˇ kʼahˬ kʼoeˇ taˆ, Sahˬpaˬ Miˬyehˇ neh bi keuˆ le-awˇ, dzaˬ dzaˬ dawˇ dawˇ bi byoˆ-iˇ-euˬ meh.

¹⁷ Ehˇ kʼawꞈ zaˬ kʼaˆ loꞈ-ehˇ bi ahˬ dzaˬ-euˬ Yoˇsehˆ-ahˇ, aˬ yawꞈ maꞈ-euˬ mehˬ hu pyehˬ gʼeh-euˬ meh.

¹⁸ Aˬ kuiˇ-ahˇ shmˇ caˆ paꞈ-awˇ, shmˇ lahˇ dah bi dah-euˬ meh.

¹⁹ Aˬ kaˇ pyeuꞈ laˇ-eu gaˇ kawˆ aˬ yawꞈ neh kʼaˇ ehˇ-euˬ loꞈ-ehˇ, maˇ jawˆ ni maˬ pyeuꞈ laˇ kʼoeˇ keuˆ ni, kʼoeˇ loꞈ-ehˇ bi daˬ-euˬ meh. Sahˬpaˬ Miˬyehˇ-euˬ dawˬ saˇ kiˇ kamˬ-eu laꞈ kʼoeˇ, aˬ yawꞈ tsaˬ-eu gaˇ kawˆ bi duˬ laˇ-euˬ meh.

²⁰ Kʼoeˇ naˇ, Iˇjiˇtuˆ sahˬ paˬ aˬ yawꞈ-ahˇ pyehˬ nehˬ-awˇ, sahˬ paˬ sahˬ ma deuˬ aˬ yawꞈ-ahˇ bi buˬ-iˇ-euˬ meh.

²¹ Yoˇsehˆ-ahˇ sahˬ paˬ-euˬ gaˇ bi tuˆ tehˬ-awˇ, miˇ kʼahˬ kʼahˬ lah ni kʼoeˇ taˆ bi uˆ lahˇ-euˬ meh.

²² Sahˬ paˬ-euˬ gaˇ mˇ-eu sahˬ paˬ sahˬ ma deuˬ naˆ maˬ tseˇ aˬ yawꞈ huiˬ-awˇ, sahˬ paˬ-ahˇ nui noeˬ nui duˇ biꞈ-eu deuˬ-ahˇ, mehˬ nya tsoˆ nya-eu baoˬ jaˆ-eu meh.

²³ Kʼoeˇ naˇ, Iˇjiˇtuˆ miˇ kʼahˬ-ahˇ Yaˬkoˆ iˇ-awˇ, miˇ kʼahˬ kʼoeˇ kʼahˬ-ahˇ jawˇ-euˬ meh.

²⁴ Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ bi jeuˬ bi o le-awˇ, aˬ yawꞈ maꞈ-ahˇ muiˇ-eu deuˬ naˆ maˬ tseˇ bi kʼaˆ dzehˬ laˇ-euˬ meh.

²⁵ Iˇjiˇtuˆ tsawˇ haˬ deuˬ aˬ yawꞈ-euˬ tsawˇ haˬ deuˬ-ahˇ bye ni aˬ yawꞈ jahˇ-awˇ, aˬ yawꞈ-euˬ zaˬ kʼaˆ deuˬ kʼoeˇ taˆ smˇ kʼaˆ bi kʼaˆ-euˬ meh.

²⁶ Aˬ yawꞈ neh tseˇ doˆ-euˬ zaˬ kʼaˆ deuˬ pyeuꞈ-eu, Moˇseˬ hawˇ-eu Aˬloˬ-ahˇ aˬ yawꞈ pyehˬ gʼeh-euˬ meh.

²⁷ Miˬyehˇ neh bi mˇ-euˬ huiˬ-eu gaˇ aˬ yawꞈ nyaꞈ mˇ-awˇ, Iˇjiˇtuˆ miˇ kʼahˬ laꞈ kʼoeˇ kʼaˆ jeˬ-ehˇ gʼeh-eu jeˬ mˇ mehˬ-euˬ meh.

²⁸ Miˇ kʼahˬ kʼoeˇ kʼahˬ kʼoeˇ taˆ zahˇ tsui ni gʼeh-eu jeˬ Miˬyehˇ bi keuˆ le kʼawꞈ aˬ yawꞈ-euˬ dawˬ-ahˇ Iˇjiˇtuˆ tsawˇ haˬ deuˬ maˬ naˇ haˬ geuꞈ-a.

²⁹ Aˬ yawꞈ maꞈ-euˬ lawˇ baˬ deuˬ-ahˇ shiˬ bi pyeuꞈ-iˇ-awˇ, ngaˬ shaˬ dawˬ tawˆ luꞈ bi shiˇ jiˇ-euˬ meh.

³⁰ Aˬ yawꞈ maꞈ-euˬ miˇ kʼahˬ doe ni kʼaˬ paˬ doˆ laˇ-awˇ, sahˬ paˬ-euˬ nymˇ laꞈ kʼoeˇ kʼawꞈ jawˇ byah jiˇ-euˬ meh.

³¹ Miˬyehˇ dawˬ biꞈ-awˇ, miˇ kʼahˬ kʼahˬ lah ni, puˬ saˆ hawˇ-eu caˇ gawˬ baˬ maꞈ maꞈ leˇ-awˇ jawˇ-euˬ meh.

³² Uˬ yehˇ-euˬ dah zaˇ mˬ jeˬ tsawˬ tehˆ hawˇ-eu uˬ yehˇ aˇ siˬ, aˬ yawꞈ maꞈ-euˬ miˇ kʼahˬ kʼoeˇ taˆ bi ga le-euˬ meh.

³³ Aˬ gaꞈ baw duˆ hawˇ-eu siˬ guˬ maˬ sheuˇ aˇ bawˇ deuˬ bi deh nmˆ jiˇ-awˇ, aˇ bawˇ dawˬ tawˆ luꞈ bi deh kʼehꞈ jiˇ-eu meh.

³⁴ Aˬ yawꞈ dawˬ biꞈ ngeh, maˬ ehˇ jiˇ coeˇ ni myaˬ dui dui-eu nyehˇ bahˇ baˬ maꞈ ga le-awˇ,

³⁵ miˇ kʼahˬ kʼoeˇ kʼahˬ-ahˇ kʼaˇ dehꞈ-eu sahˬ lahˬ aˇ bawˇ hawˇ-eu, dzaˬ la gʼo cehˇ dawˬ tawˆ luꞈ dzaˬ jiˇ-euˬ meh.

³⁶ Iˇjiˇtuˆ nymˇ jiˇ yawˬ jiˇ na luꞈ laꞈ kʼoeˇ, dehꞈ beh beh le-euˬ aˬ li aˬ yuiꞈ deuˬ-ahˇ, aˬ yawꞈ bi shiˇ jiˇ-euˬ meh.

³⁷ Kʼoeˇ naˇ, Iˇsaˬleˬlaˆ tsawˇ jeuˬ-ahˇ aˬ yawꞈ sheuˬ doˆ gʼeh-awˇ, pyuˇ hawˇ-eu shuiˇ tawˬ-awˇ doˆ-iˇ-euˬ meh. Aˬ yawꞈ maꞈ dawˬ tawˆ luꞈ gʼoeˇ mˇ-awˇ gʼaˬ ahˇ-eu meh.

³⁸ Iˇjiˇtuˆ tsawˇ haˬ deuˬ aˬ yawꞈ maꞈ-ahˇ guˆ-awˇ, aˬ yawꞈ maꞈ doˆ-iˇ gaˇ laˬ kʼaˬ cehˇ-eu meh.

³⁹ Aˬ yawꞈ-euˬ tsawˇ haˬ deuˬ-ahˇ mˬ dmˇ joe shmˇ nehˬ-awˇ, uˬ ciꞈ paw miˬ dzaˬ yaw shehꞈ bya nehˬ-euˬ meh.

⁴⁰ Aˬ yawꞈ maꞈ shaˇ dzaˬ-eu loꞈ-ehˇ kʼahˬ zaˬ laˬ ma pyehˬ gʼeh leꞈ-awˇ, nui kʼahˇ tiˬ shiˇ ya dzaˬ dehˆ ni, mˬ taˆ neh dzaˬ dzaˬ dawˇ dawˇ biꞈ ka leꞈ-euˬ meh.

⁴¹ Kʼaˬ lo-ahˇ aˬ yawꞈ pah ngeh iˇ cuꞈ tahˬ doˆ laꞈ-awˇ, kʼaˇ shuiꞈ deh-ahˇ lawˇ baˬ loꞈ-ehˇ yoeˇ-euˬ meh.

⁴² Aˬ yawꞈ-euˬ zaˬ kʼaˆ Aˬbyaˬhaˬ nehˬ-ehˇ dzaˬ-euˬ, muiˬ-eu shawˇ-eu dawˬ ma saˇ jaˇ-ahˇ, aˬ yawꞈ noeˬ mawˇ-euˬ meh.

⁴³ Aˬ yawꞈ neh tseˇ doˆ-euˬ tsawˇ jeuˬ-ahˇ kʼoeˇ loꞈ-ehˇ sheuˬ doˆ gʼeh-awˇ, aˬ yawꞈ maꞈ laˬ kʼaˬ cehˇ-awˇ caˇ dawˬ caˇ-euˬ meh.

⁴⁴ Aˬ cawˬ tsawˇ jeuˬ-euˬ miˇ kʼahˬ aˬ yawꞈ maꞈ-ahˇ biꞈ-awˇ, aˬ cawˬ-euˬ deh yaˇ bi yuˇ geuꞈ-euˬ meh.

⁴⁵ Aˬ yawꞈ-euˬ tsawˇ haˬ deuˬ aˬ yawꞈ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-awˇ, aˬ yawꞈ mehˬ nehˬ tsoˆ nehˬ-euˬ dawˬ-ahˇ ziꞈ ni, kʼoeˇ loꞈ-ehˇ jahˇ nehˬ-euˬ meh. Sahˬpaˬ Miˬyehˇ-ahˇ ja ceuˬ-awˬ.