Jaceuq 104 - Akha

Beh-euˬ yaw sahˇ-ahˇ ja ceuˬ-eu caˇ dawˬ

¹ Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ. Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ aˇ naˆ ni huiˬ-eu mahˇ-eu nga. Baoˬ yaw sehꞈ kʼahˬ sehˇ-ahˇ nawˇ dm-awˇ,

² yaw shehꞈ neh tsahˇ lahˇ taˬ-euˬ meh. Mˬ-ahˇ sehˬ gʼawˆ loꞈ-ehˇ nawˇ sheu taw-awˇ,

³ mˬ taˆ iˇ cuꞈ kʼoeˇ taˆ nawˬ-euˬ nymˇ tsoˆ daˆ taˬ-euˬ meh. Mˬ dmˇ-ahˇ nawˬ-euˬ mahˬ laˆ lawˬ bi geuꞈ-awˇ, jaˬ lehˇ-euˬ aˬ dahˇ kʼoeˇ taˆ nawˇ dziˬ-eu meh.

⁴ Jaˬ lehˇ-ahˇ nawˬ-euˬ dawˬ tsaꞈ gaˬ-eu gʼaˬ bi geuꞈ-awˇ, mˬ myawꞈ-ahˇ nawˬ-euˬ gaˇ bi mˇ-euˬ meh.

⁵ Miˇ tsaˬ tahˬ kʼawˇ-euˬ dawˬ pehˬ duˬ puˇ-ahˇ nawˇ ziꞈ dah ni ciˬ tsoꞈ-awˇ, maˬ luˆ laˇ nya ni bi jaˆ-euˬ meh.

⁶ Miˇ tsaˬ tahˬ kʼawˇ-ahˇ pehˇ kʼahˬ bi dm-eu loꞈ-ehˇ, iˬ ma laˆ shaˆ neh nawˇ sheu kaˬ-awˇ, gawˬ jawˬ-ahˇ iˇ cuꞈ bi dahˬ pymˬ-euˬ meh.

⁷ Iˇ cuꞈ-ahˇ nawˇ dehˬ ngeh iˇ cuꞈ cehˆ byoˆ-awˇ, nawˇ yaw kʼaˆ-ehˇ guˇ-awˇ dawˬ biꞈ ngeh cehˆ byaˆ jiˇ-eu meh.

⁸ Gawˬ jawˬ uˬ du neh gʼaˬ lawˬ-ahˇ yoeˇ ka-awˇ, nawˬ neh laˆ saˆ taˬ-euˬ jawˇ duˬ-ahˇ yoeˇ uˇ-iˇ-eu meh.

⁹ Miˇ tsaˬ-ahˇ tiˬ poˆ maˬ paˇ bi dahˬ pymˬ-eu gʼaˇ duˬ, iˇ cuꞈ maˬ ya dahˬ daˆ leˇ-eu miˇ kaˬ nawˇ biˇ taˬ-euˬ meh.

¹⁰ Gʼaˬ lawˬ-ahˇ lawˇ gawˆ nawˇ bi yoeˇ-awˇ, gawˬ jawˬ yaw kaˬ-ahˇ lawˇ baˬ bi yoeˇ-euˬ meh.

¹¹ Lawˇ baˬ lawˇ gawˆ kʼoeˇ deuˬ bawˇ tsahˬ jeˬ zaˬ deuˬ-ahˇ iˇ cuꞈ bi dawˇ-awˇ, bawˇ tsahˬ mahˬ tahˬ laˆ deuˬ, iˇ cuꞈ mehꞈ-awˇ maˬ ya shaˬ-a.

¹² Lawˇ baˬ gawˆ taw dehꞈ-eu aˇ bawˇ uˬ laꞈ kʼoeˇ taˆ, aˇ jiˇ deuˬ bahˬ bahˬ-awˇ caˇ dawˬ caˇ luꞈ-eu meh.

¹³ Mˬ-ahˇ neh gawˬ jawˬ kʼoeˇ taˆ nawˇ uˬ yehˇ bi yehˇ le-awˇ, nawˬ-euˬ guiˬ lahˬ yaw dzahˇ miˇ tsaˬ kʼoeˇ taˆ byah luꞈ meh.

¹⁴ Jeˬ zaˬ gʼaˇ duˬ yaˇ moꞈ nawˇ bi dehꞈ-awˇ, tsawˇ haˬ zaˬ zmˬ-eu gʼaˇ duˬ aˇ bawˇ hawˇ-eu, ka dzaˬ-eu gʼaˇ duˬ dzaˬ la gʼo cehˇ bi dehꞈ-eu meh.

¹⁵ Tsawˇ haˬ zaˬ-euˬ nui ma-ahˇ laˬ kʼaˬ bi cehˇ-eu gʼaˇ duˬ aˬ gaꞈ dzaˇ uiˇ doˆ laˇ ni maˬ ehˇ, tsawˇ haˬ zaˬ-euˬ gʼawˇ mawˇ laˆ saˆ-eu gʼaˇ duˬ saˬ loˬ tsiˇ doˆ laˇ ni maˬ ehˇ, tsawˇ haˬ zaˬ dzaˬ-awˇ gʼaˬ bi ahˇ-eu gʼaˇ duˬ kaˬ muˇ doˆ laˇ ni maˬ ehˇ, nawˇ kʼoeˇ loꞈ-ehˇ jahˇ nehˬ-euˬ meh.

¹⁶ Sahˬpaˬ Miˬyehˇ neh ka taˬ-euˬ aˇ bawˇ deuˬ pyeuꞈ-eu, Leˬbaˬnoˬ gawˬ jawˬ-ahˇ dehꞈ-eu shuˬ liˇ aˇ bawˇ deuˬ, uˬ yehˇ tiˬ loꞈ za-eu meh.

¹⁷ Aˇ bawˇ kʼoeˇ deuˬ-ahˇ aˇ jiˇ bahˬ bahˬ-awˇ, miˬ shuˬ aˇ bawˇ-ahˇ uiˇ dzoeˬ bahˬ bahˬ-eu meh.

¹⁸ Goˇ-eu gawˬ jawˬ kʼoeˇ taˆ yaˬ jawˇ-awˇ, pyaˬ iˬ deuˬ kʼaˬ lo gahˬ-ahˇ dzuˇ yaꞈ luꞈ-eu meh.

¹⁹ Ba la aˇ siˬ bi toꞈ-eu gʼaˇ duˬ ba la-ahˇ nawˇ beh-awˇ, nahˇ ma gʼeh aˬ yawꞈ ya ga ahˇ-eu aˇ yamˬ siˬ nya meh.

²⁰ Uˬ ciꞈ-ahˇ nawˇ beh-awˇ, zahˇ le ngeh bawˇ tsahˬ jeˬ zaˬ deuˬ doˆ le-eu meh.

²¹ Aˇ laˬ jaˬ shiˇ zaˬ deuˬ bawˇ tsahˬ jeˬ zaˬ-ahˇ shahˇ ngeh joeˬ-awˇ, Miˬyehˇ neh biˇ nehˬ-euˬ dzaˇ-ahˇ poˆ-eu meh.

²² Nahˇ ma doˆ laˇ ngeh aˬ yawꞈ maꞈ gʼoꞈ leˇ-awˇ, lo kʼahˬ laꞈ kʼoeˇ gʼoꞈ yuꞈ leˇ-eu meh.

²³ Tsawˇ haˬ zaˬ deuˬ yawˬ ha-euˬ myawˬ ngehˬ yaˇ ngehˬ-ahˇ dawꞈ leˇ-awˇ, uˬ ciꞈ ciꞈ le ngeh keuˆ ni mˇ-eu meh.

²⁴ Sahˬpaˬ Miˬyehˇ-oˇ, nawˬ neh mˇ taˬ shaˇ taˬ-euˬ jeˬ myaˬ dui dui-eu meh. Tsawˇ gahˇ ahˇ dui dui-eu laꞈ kʼoeˇ, kʼoeˇ deuˬ dawˬ tawˆ luꞈ-ahˇ nawˇ mˇ taˬ shaˇ taˬ-awˇ, miˇ tsaˬ kʼoeˇ taˆ nawˬ neh beh taˬ-euˬ boeˬ boeˬ luˆ luˆ deuˬ byah luꞈ-eu meh.

²⁵ Huiˬ dui jeˇ dui dui-eu iˬ ma laˆ shaˆ jaˆ-awˇ, maˬ gui jiˇ coeˇ-eu boeˬ boeˬ luˆ luˆ huiˬ huiˬ nyiˇ nyiˇ, kʼoeˇ laꞈ kʼoeˇ tiˬ byah ni jawˇ luꞈ meh.

²⁶ Laˆ shaˆ kʼoeˇ taˆ saˇ baoˬ deuˬ cah luꞈ-awˇ, nawˬ neh beh taˬ-euˬ laˆ shaˆ byaˆ yahˬ kʼoeˇ mawˇ, laˆ shaˆ dawˬ dah niˇ gʼa luꞈ meh.

²⁷ Aˬ yawꞈ maꞈ mehꞈ ngeh bi dzaˬ bi dawˇ-eu gʼaˇ duˬ, dawˬ tawˆ luꞈ nawˬ-ahˇ tehꞈ-ehˇ gʼoe luꞈ-eu meh.

²⁸ Aˬ yawꞈ maꞈ-ahˇ nawˇ bi dzaˬ bi dawˇ-eu miˇ neh, aˬ yawꞈ maꞈ ya dzaˬ ya dawˇ dehˆ-eu meh. Aˬ yawꞈ maꞈ-ahˇ nawˇ dzaˬ dzaˬ dawˇ dawˇ biꞈ-eu miˇ neh, aˬ yawꞈ maꞈ nui kʼahˇ shiˇ duˬ jaˆ-eu meh.

²⁹ Nawˇ naˇ kʼah ciˬ pyawˇ ngeh, aˬ yawꞈ maꞈ guˆ-eu meh. Aˬ yawꞈ maꞈ saꞈ gʼawˇ kahˬ nawˇ yuˇ kʼoꞈ ngeh, aˬ yawꞈ maꞈ shiˇ tsehˆ-awˇ, miˇ tsaˬ yuˇ-awˇ aˬ yawꞈ maꞈ-ahˇ beh-euˬ loꞈ-ehˇ, miˇ tsaˬ paˇ ya pyeuꞈ-iˇ-eu meh.

³⁰ Ehˇ kʼawꞈ nawˇ aˬ yawꞈ maꞈ-ahˇ saꞈ gʼawˇ kahˬ biꞈ ngeh, aˬ yawꞈ maꞈ-ahˇ nawˇ beh dehꞈ nehˬ-awˇ, miˇ tsaˬ kʼoeˇ taˆ yaw dehꞈ dehꞈ-eu jeˬ-ahˇ nawˇ paˇ laˆ shuiꞈ-eu meh.

³¹ Sahˬpaˬ Miˬyehˇ-euˬ yaw shehꞈ kʼahˬ sehˇ, mˬ maˬ maˬ byaˆ zaˇ ziˇ gmˬ luꞈ-uˇ. Aˬ yawꞈ neh mˇ taˬ-euˬ gaˇ deuˬ-ahˇ, aˬ yawꞈ laˬ kʼaˬ cehˇ nui kʼahˇ shiˇ luꞈ-uˇ.

³² Miˇ tsaˬ tahˬ kʼawˇ-ahˇ aˬ yawꞈ haw ka gʼeh ngeh, miˇ tsaˬ tahˬ kʼawˇ yaw dzuˬ dzuˬ-eu meh. gawˬ jawˬ-ahˇ aˬ yawꞈ toeˬ ciˆ ngeh, uˬ kʼoeˬ tahˬ doˆ laꞈ-eu meh.

³³ Ngaˬ-euˬ tiˬ ziˇ Sahˬpaˬ Miˬyehˇ-ahˇ caˇ-awˇ ja ceuˬ ma. Ngaˇ saꞈ kʼaˇ gʼawˇ kʼoeˇ keuˆ ni, ngaˬ-euˬ Miˬyehˇ-ahˇ caˇ-awˇ ja ceuˬ ma.

³⁴ Ngaˇ laˬ kʼaˬ cehˇ-eu jeˬ aˬ yawꞈ jawˇ gaˇ neh doˆ le-euˬ miˇ neh, ngaˬ-euˬ caˇ dawˬ-ahˇ aˬ yawꞈ nui ma tsaˬ luꞈ-uˇ.

³⁵ Iˬ baˇ zaˬ deuˬ miˇ tsaˬ kʼoeˇ taˆ maˬ paˇ jaw ni bi laˆ byoˆ jiˇ-awˇ, haiˬ-eu tsawˇ haˬ deuˬ aˇ jeuˬ meh-iˇ luꞈ-uˇ. Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ. Sahˬpaˬ Miˬyehˇ-ahˇ ja ceuˬ-awˬ.