Jaceuq 103 - Akha

Miˬyehˇ-euˬ gʼoeˇ-eu gaˬ-eu jeˬ

(Daˬbiˇ-euˬ caˇ dawˬ)

¹ Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ. Ngaˬ-euˬ nui ma gʼawˇ mawˇ dawˬ tawˆ luꞈ aˬ yawꞈ-euˬ muiˬ-eu shawˇ-eu tsawˇ myahˇ-ahˇ ja ceuˬ-awˬ.

² Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ gʼawˬ shaˬ gaˬ nya dui dui gaˇ taˬ ngehˇ.

³ Ngaˬ-euˬ iˬ baˇ dawˬ tawˆ luꞈ aˬ yawꞈ pyehˬ nehˬ laꞈ-awˇ ngaˬ-euˬ naˇ gawˇ dawˬ tawˆ luꞈ aˬ yawꞈ laˆ taˬ nehˬ laꞈ-eu meh.

⁴ Shiˇ-eu miˇ kʼahˬ-ahˇ maˬ yaˬ keuˆ ni aˬ yawꞈ ngaˬ-ahˇ haw piˇ-awˇ, gʼoeˇ-eu gaˬ-eu guiˬ lahˬ hawˇ-eu, gʼawˬ shaˬ gaˬ-eu guiˬ lahˬ biꞈ laꞈ-eu meh.

⁵ Ngaˇ zaˬ guˬ loꞈ-ehˇ pyeuꞈ-awˇ kʼaˬ dzeˇ loꞈ-ehˇ gʼaˬ kʼaˆ ni, ngaˬ-euˬ tiˬ ziˇ yaw muiˬ jeˬ tiˬ byah biꞈ laꞈ-eu meh.

⁶ Kʼehˬ-eu kʼaˆ-eu jeˬ-ahˇ ya daˬ-eu deuˬ-euˬ myaˆ pyawˬ-ahˇ haw-awˇ, Sahˬpaˬ Miˬyehˇ yaˇ kʼaˬ daˇ-eu laꞈ kʼoeˇ, aˬ yawꞈ maꞈ-ahˇ oꞈ-eu yaw tsaˬ yaw dawˇ jeˬ bi keuˆ le-eu meh.

⁷ Aˬ yawꞈ mˇ-eu lehˇ gʼeh-eu gaˇ deuˬ Moˇseˬ-ahˇ pah mehˬ-awˇ, aˬ yawꞈ neh mˇ-euˬ huiˬ-eu gaˇ deuˬ Iˇsaˬleˬlaˆ tsawˇ haˬ deuˬ-ahˇ bi mawˇ-eu meh.

⁸ Sahˬpaˬ Miˬyehˇ-aˬ, gʼawˬ shaˬ gaˬ nya-awˇ, gʼoeˇ-eu gaˬ-eu jeˬ byah-eu meh. Nui ma pehˇ-eu maˬ kawˇ-eu uˬ taꞈ, maˬ tsehˆ leˇ nya-eu gʼoeˇ-eu gaˬ-eu jeˬ byah luꞈ-eu meh.

⁹ Aˬ myah luꞈ iˬ baˇ maˬ taˬ-ehˇ, gʼawˬ myahˇ ni mui ma maˬ pehˇ-a.

¹⁰ Aˬ dui-euˬ iˬ baˇ-ahˇ geuˇ ni aˬ yawꞈ maˬ kʼehˬ maˬ kʼaˆ-ehˇ, aˬ dui-euˬ yaw lehˬ kʼaˇ ngeuˇ-eu loꞈ-ehˇ maˬ daˇ-a.

¹¹ Aˬ yawꞈ-ahˇ taˬ huiˬ-euˬ tsawˇ haˬ-ahˇ aˬ yawꞈ gaˬ-eu jeˬ mˬ naˆ ni goˇ-eu meh.

¹² Aˬ dui-euˬ iˬ baˇ-ahˇ, mˬ dzeˇ miˇ dzehˇ sha dzeh-eu meh.

¹³ Aˬ da zaˬ-ahˇ gaˬ-euˬ loꞈ-ehˇ, aˬ yawꞈ-ahˇ taˬ huiˬ-eu tsawˇ haˬ deuˬ-ahˇ Sahˬpaˬ Miˬyehˇ gaˬ-eu meh.

¹⁴ Aˬ dui-ahˇ aˬ jeˬ neh beh-euˬ aˬ yawꞈ siˬ nya meh. Aˬ dui miˇ tsaˬ pyeuꞈ-eu aˬ yawꞈ maˬ ngehˇ-a.

¹⁵ Aˬ dui yaw dehꞈ dehꞈ-eu yaˇ moꞈ loꞈ-ehˇ tehꞈ meh. Bawˇ tsaˬ aˇ yehˆ loꞈ-ehˇ aˬ dui yehˆ laˇ poˬ laˇ kʼawꞈ,

¹⁶ jaˬ lehˇ neh bi hehˇ dzaˬ gʼeh-awˇ, tiˬ jawˇ-iˬ maˬ paˇ ya mawˇ meh.

¹⁷ Ehˇ kʼawꞈ, Sahˬpaˬ Miˬyehˇ-ahˇ taˬ huiˬ taˬ mahˇ-eu deuˬ-ahˇ, aˬ yawꞈ gaˬ-eu jeˬ maˬ byoˆ-iˇ-ehˇ, aˬ yawꞈ-euˬ muiˬ-eu guiˬ lahˬ mˬ maˬ maˬ byaˆ zaˇ ziˇ bi keuˆ le-eu meh.

¹⁸ Aˬ yawꞈ-euˬ dawˬ ma saˇ jaˇ-ahˇ ziꞈ-awˇ, aˬ yawꞈ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu deuˬ-ahˇ, muiˬ-eu guiˬ lahˬ kʼoeˇ loꞈ-ehˇ biꞈ-eu meh.

¹⁹ Sahˬpaˬ Miˬyehˇ-aˬ, aˬ yawꞈ-euˬ dzoeˬ dzaˬ nuiˇ mahˬ mˬ kʼoeˇ taˆ bi jaˆ-awˇ, dawˬ tawˆ kʼoeˇ taˆ sahˬ paˬ geuꞈ luꞈ-eu meh.

²⁰ Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ caw teh-awˇ, aˬ yawꞈ-euˬ ehˇ dawˬ naˇ haˬ-eu, gʼaˬ kʼaˆ-awˇ baoˬ huiˬ-eu mˬ taˆ gʼaˬ kʼehˇ deuˬ-oˇ, Sahˬpaˬ Miˬyehˇ-ahˇ ja ceuˬ-awˬ.

²¹ Sahˬpaˬ Miˬyehˇ-euˬ nui kʼahˇ poˆ-awˇ aˬ yawꞈ-euˬ gaˇ mˇ-eu, mˬ taˆ jawˇ-eu baoˬ huiˬ-eu deuˬ-oˇ, Sahˬpaˬ Miˬyehˇ-ahˇ ja ceuˬ-awˬ.

²² Aˬ yawꞈ kʼaˇ uˆ lahˇ keuˆ gaˇ jawˇ-eu, aˬ yawꞈ neh beh-euˬ kʼaˇ dehꞈ kʼaˇ jawˇ-eu jeˬ dawˬ tawˆ luꞈ, Sahˬpaˬ Miˬyehˇ-ahˇ ja ceuˬ-awˬ. Ngaˬ-euˬ nui ma-oˇ, Sahˬpaˬ Miˬyehˇ-ahˇ ja ceuˬ-awˬ.