Jaceuq 102 - Akha

Sahˬ zahˬ puˬ le-euˬ zaˬ guˬ-euˬ guiˬ lahˬ shaˇ dawˬ

¹ Sahˬpaˬ Miˬyehˇ-oˇ, ngaˬ-euˬ shaˇ dawˬ-ahˇ naˇ haˬ-awˇ, caw ba nehˬ laꞈ lehˇ ngaˇ guˇ-eu teˇ saˇ nawˇ jawˇ gaˇ bi laˇ keuˆ laꞈ.

² Ngaˇ shaˬ zahˬ ya tahˬ puˬ ngeh, taˬ byehˇ dzeh nehˬ laꞈ. Ngaˬ-euˬ shaˇ dawˬ-ahˇ naˇ haˬ-awˇ, ngaˇ kuˇ ngeh yaw kawˇ-ehˇ oˬ toˬ nehˬ laꞈ.

³ Ngaˬ-euˬ ziˇ miˬ dzaˬ uˬ kʼoeˬ loꞈ-ehˇ byoˆ le luꞈ-awˇ, ngaˬ-euˬ gʼawˇ mawˇ miˬ dzaˬ loꞈ-ehˇ doꞈ luꞈ-eu ma.

⁴ Ngaˬ-euˬ gʼawˇ mawˇ diˬ meuˇ taˬ-euˬ yaˇ moꞈ yaw koˆ-ahˇ duˇ-awˇ, dzaˇ dzaˬ mawꞈ-eu nui ma maˬ ahˇ nya.

⁵ Ngaˇ yaw kʼaˆ-ehˇ mahˇ mahˇ-ehˇ jawˇ-eu miˇ neh shaˬ yoeˬ kʼoeˇ taˆ baˆ kʼoˆ tsoꞈ-eu tehꞈ miˇ-a.

⁶ Bawˇ tsahˬ-ahˇ dzuˇ luꞈ-eu jeˬ shiˇ kʼaˬ dzeˇ hawˇ-eu, cawˆ-iˇ-euˬ pu-ahˇ dzuˇ luꞈ-eu bo-mˬ bo lo-ahˇ duˇ miˇ-a.

⁷ Nymˇ kʼaˬ boeˬ kʼoeˇ taˆ cawˬ maˬ baw-ehˇ ngeuˇ-eu aˇ jiˇ loꞈ-ehˇ, yaw noeˬ-ehˇ ngaˇ yuꞈ luꞈ-eu ma.

⁸ Muiˇ-eu tsawˇ haˬ deuˬ nah ga-ehˇ ngaˬ-ahˇ ja doeˇ-awˇ, ngaˬ-ahˇ naˬ gʼa-eu tsawˇ haˬ deuˬ ngaˬ-euˬ tsawˇ myahˇ toˇ toˇ-ehˇ yaˬ kʼehˇ yaˬ-eu meh.

⁹ Kʼaˬ lehˇ-ahˇ hawˬ loꞈ-ehˇ ngaˇ dzaˬ-awˇ, myaˆ biˇ keuˬ-eu iˇ cuꞈ dawˇ luꞈ-eu ma.

¹⁰ Aˬ jeˬ miˇ neh ehˇ naˇ nawˇ ngaˬ-ahˇ nui ma pehˇ-awˇ, ciˬ diˇ-awˇ baꞈ dzeh nehˬ laꞈ-euˬ meh.

¹¹ Ngaˇ yaw dehꞈ dehꞈ-eu uˬ ciꞈ uˬ taw paw naˇ shmˇ shmˇ gaˇ duˇ-awˇ, yaˇ moꞈ koˆ-iˇ gaˇ duˇ miˇ-a.

¹² Ehˇ kʼawꞈ, Sahˬpaˬ Miˬyehˇ nawˇ mˬ maˬ maˬ byaˆ zaˇ ziˇ uˆ lahˇ-eu sahˬ paˬ pyeuꞈ-awˇ, dehꞈ daˆ leꞈ-eu yawˬ ziˇ na luꞈ nawˬ-ahˇ gʼawˬ shaˬ gaˬ nehˬ tehꞈ-a.

¹³ Ziˇoˬ meuˬ-ahˇ gʼawˬ shaˬ gaˬ-eu aˇ yamˬ tsaˬ laˇ-euˬ meh. Nymˬ-mˇ aˇ yamˬ tsaˬ dui dui meh.

¹⁴ Ziˇoˬ meuˬ bi laˆ cawˆ-euˬ kʼawꞈ, nawˬ-euˬ zaˬ kʼaˆ deuˬ gʼawˬ shaˬ gaˬ luꞈ meh. Meuˬ kʼoeˇ meuˬ luˬ-iˇ seˇ-iˇ-euˬ kʼawꞈ, aˬ yawꞈ maꞈ gʼawˬ shaˬ gaˬ luꞈ meh.

¹⁵ Tsawˇ jeuˬ dawˬ tawˆ luꞈ Sahˬpaˬ Miˬyehˇ-ahˇ guˆ tehꞈ-a. Miˇ kʼahˬ sahˬ paˬ sahˬ ma dawˬ tawˆ luꞈ, aˬ yawꞈ-euˬ baoˬ-ahˇ guˆ tehꞈ-a.

¹⁶ Ziˇoˬ meuˬ-ahˇ Sahˬpaˬ Miˬyehˇ paˇ tsoˆ muiˬ ngeh, aˬ yawꞈ huiˬ-eu mahˇ-eu gaˇ kawˆ pah mehˬ tehꞈ-a.

¹⁷ Byehˇ dzeh taˬ-euˬ aˬ yawꞈ-euˬ tsawˇ jeuˬ shaˇ dawˬ-awˇ, aˬ yawꞈ naˇ haˬ geuꞈ nehˬ tehꞈ-a.

¹⁸ Maˬ dehꞈ le dah-euˬ deuˬ Sahˬpaˬ Miˬyehˇ-ahˇ ja ceuˬ nya ni, aˬ yawꞈ neh mˇ taˬ shaˇ taˬ-euˬ gaˇ deuˬ-ahˇ, aˬ kaˇ kaˇ ziˇ gʼaˇ duˬ boꞈ ahˇ taˬ-awˬ.

¹⁹ Yaw goˇ-ahˇ jaˆ-eu muiˬ-eu shawˇ-eu jawˇ duˬ-ahˇ jawˇ-awˇ, Sahˬpaˬ Miˬyehˇ haw ka leꞈ luꞈ meh.

²⁰ Paꞈ kuˆ-ahˇ bi nyehꞈ uˇ taˬ-euˬ deuˬ mahˇ gaˇ aˬ yawꞈ gaˬ-awˇ, biˬ sehꞈ-eu lehˇ gʼeh-eu deuˬ-ahˇ pyehˬ nehˬ-eu meh.

^21-22 Miˇ kʼahˬ tsawˇ jeuˬ dawˬ tawˆ luꞈ uiˬ laˇ-awˬ. Sahˬpaˬ Miˬyehˇ-ahˇ uˬ duˬ tahˬ laˇ ngeh, Ziˇoˬ gawˬ jawˬ-ahˇ aˬ yawꞈ-euˬ tsawˇ myahˇ guˇ gaˬ-awˇ, Yeˬluˇsaˬlehˬ meuˬ laꞈ kʼoeˇ aˬ yawꞈ-ahˇ ja ceuˬ tehꞈ-a.

²³ Ngaˇ zaˬ guˬ pyeuꞈ-awˇ gʼaˬ kʼaˆ luꞈ ngeh yamˬ-ahˇ, Sahˬpaˬ Miˬyehˇ ngaˬ-ahˇ gʼaˬ bi baˬ-awˇ, ngaˬ-euˬ ziˇ bi nymˇ le-euˬ meh.

²⁴ Miˬyehˇ-oˇ, nymˬ-mˇ ngaˇ maˬ mawˬ le mi naˆ-ehˇ, ngaˬ-ahˇ taˬ sheuˬ byoˆ gʼeh nehˬ laꞈ. Sahˬpaˬ Miˬyehˇ-oˇ, nawˇ mˬ maˬ maˬ byaˆ zaˇ ziˇ dehꞈ-euˬ meh.

²⁵ Aˇ hu ba neh miˇ tsaˬ tahˬ kʼawˇ nawˇ beh-awˇ, nawˬ-euˬ aˬ laꞈ neh mˬ sawˆ pyeuꞈ taˬ-euˬ meh.

²⁶ Mˬ miˇ byoˆ-iˇ jiˇ kʼawꞈ, nawˇ maˬ byoˆ-iˇ nya-a. Kʼoeˇ deuˬ dawˬ tawˆ luꞈ mehˬ tsoeˬ loꞈ-ehˇ peuˬ-iˇ tehꞈ-a. Saˬ paˇ paˇ cehˇ loꞈ-ehˇ biˬ dzeh-awˇ, bi piˬ bi byoˆ-iˇ jiˇ tehꞈ-a.

²⁷ Ehˇ kʼawꞈ nawˇ aˬ myah luꞈ maˬ poˆ maˬ paˇ laˇ-ehˇ, ziˇ jiˇ-eu maˬ baw-a.

²⁸ Nga maꞈ-euˬ zaˬ ziˇ nui saˇ oꞈ-awˇ, aˬ yawꞈ maꞈ-euˬ zaˬ deuˬ uˆ deuˬ, nawˇ ngehˬ gʼeh haw piˇ-eu uˬ moˆ, guˆ kʼaˇ maˬ za ni dehꞈ tehꞈ-a.