Jaceuq 100 - Akha

Ja ceuˬ-eu caˇ dawˬ

¹ Miˇ kʼahˬ dawˬ tawˆ luꞈ Sahˬpaˬ Miˬyehˇ-ahˇ ja ceuˬ-awˬ.

² Sahˬpaˬ Miˬyehˇ-ahˇ laˬ kʼaˬ tiˬ cehˇ uˬ duˬ tahˬ-awˬ. Laˬ kʼaˬ cehˇ-eu caˇ dawˬ caˇ-eu laꞈ kʼoeˇ, aˬ yawꞈ-euˬ mehˬ shi uiˬ laˇ-awˬ.

³ Sahˬpaˬ Miˬyehˇ-aˬ, Miˬyehˇ meh lehˇ noeˬ siˬ-awˬ. Aˬ yawꞈ aˬ dui-ahˇ beh-awˇ, aˬ dui aˬ yawꞈ-euˬ ma. Aˬ dui aˬ yawꞈ-euˬ tsawˇ haˬ pyeuꞈ-awˇ, aˬ yawꞈ-euˬ yawˇ yawˇ maꞈ pyeuꞈ-eu ma.

⁴ Aˬ yawꞈ-euˬ guiˬ lahˬ-ahˇ noeˬ keuˆ-eu laꞈ kʼoeˇ, aˬ yawꞈ-euˬ gʼoˆ kʼehˬ-ahˇ uˇ leˇ-awˬ. Aˬ yawꞈ-ahˇ ja ceuˬ-eu laꞈ kʼoeˇ, aˬ yawꞈ-euˬ nymˇ-ahˇ uˇ leˇ-awˬ. Aˬ yawꞈ-euˬ guiˬ lahˬ-ahˇ noeˬ keuˆ-awˇ ja ceuˬ-awˬ.

⁵ Sahˬpaˬ Miˬyehˇ-aˬ, muiˬ-eu jaˬ-eu meh. Aˬ yawꞈ-euˬ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ gmˬ-awˇ, aˬ yawꞈ saˇ jaˇ ziꞈ-eu jeˬ mˬ maˬ maˬ byaˆ zaˇ ziˇ ziꞈ-eu meh.