Iˇsaˬyaˇ 9 - Akha

¹ Shaˬ zahˬ guˆ gaˆ naꞈ dui dui-eu aˇ yamˬ heu-ahˇ, aˬ yawꞈ maꞈ buˬ-iˇ-eu gaˇ ma maˬ dahˇ-a. Dzeuˇ laˇ ngeh, Zeˬbuˬloˬ miˇ kʼahˬ hawˇ-eu Naˬtaˬliˇ miˇ kʼahˬ-ahˇ aˬ yawꞈ sawˇ dzeh nehˬ-euˬ meh. Ehˇ kʼawꞈ, mehˬ hu paw le-eu aˇ yamˬ laꞈ kʼoeˇ, Gʼahˇ ceh-euˬ iˬ ma laˆ shaˆ-euˬ nahˇ ma doˆ kʼehˬ paw, Yawˇdaˬ lawˇ baˬ nui baˬ-ahˇ keuˆ ni maˬ ehˇ, aˬ cawˬ tsawˇ jeuˬ jawˇ-eu Gaˬliˬlehˇ miˇ kʼahˬ-ahˇ keuˆ ni maˬ ehˇ, miˇ kʼahˬ pehˇ tsahˇ tsahˇ ma kʼoeˇ tsahˇ tsahˇ lah ni-ahˇ aˬ yawꞈ taˬ huiˬ taˬ mahˇ nehˬ tehꞈ-a.

Aˬ kaˇ kaˇ ziˇ-euˬ sahˬ paˬ

² Yaw zahˇ laꞈ kʼoeˇ cah-euˬ tsawˇ haˬ deuˬ, huiˬ-eu yaw shehꞈ-ahˇ ya mawˇ-euˬ meh. Zahˇ tsui ni gʼeh-eu shiˇ-eu lawˇ kʼmˬ lawˇ gawˆ-ahˇ jawˇ-euˬ deuˬ kʼoeˇ taˆ, nymˬ-mˇ yaw shehꞈ bya luꞈ-eu meh.

³ Aˬ yawꞈ maꞈ-ahˇ nawˇ bi huiˬ bi mahˇ laˇ-awˇ, laˬ kʼaˬ bi cehˇ-euˬ meh. Cehˇ laˆ luiˆ ngeh laˬ kʼaˬ cehˇ-eu loꞈ-ehˇ, pyuˇ shuiˇ myawˬ gahˬ biˇ ngeh laˬ kʼaˬ cehˇ-eu loꞈ-ehˇ, nawˬ neh mˇ taˬ-euˬ gaˇ-ahˇ, aˬ yawꞈ maꞈ laˬ kʼaˬ cehˇ-eu meh.

⁴ Aˬ yawꞈ maꞈ-ahˇ daˇ awˆ taˬ-euˬ kʼaˆ baꞈ kawˬ hawˇ-eu, aˬ yawꞈ maꞈ-euˬ baꞈ pu-ahˇ deh-eu daˇ kawˬ-ahˇ, nawˇ ngawˬ kʼehꞈ nehˬ-euˬ meh. Aˇ hu Miˇdiˬyaˬ guiˇ maꞈ-ahˇ nawˇ deuˆ gʼaˬ-euˬ loꞈ-ehˇ, nawˬ-euˬ tsawˇ haˬ-ahˇ nawˬ dzaˬ kʼaˆ dzaˬ-euˬ tsawˇ jeuˬ-ahˇ, nawˇ deuˆ gʼaˬ nehˬ-euˬ meh.

⁵ Guiˇ deuˆ-eu deuˬ nawˬ-eu sehˬ nawˆ hawˇ-eu shiˬ lehꞈ-eu aˬ yawꞈ maꞈ-euˬ mehˬ tsoeˬ miˬ dzaˬ-ahˇ bi dzah puiˆ jiˇ tehꞈ-a.

⁶ Aˬ dui gʼaˇ duˬ aˬ li tiˬ li dehꞈ le-euˬ meh. Aˬ dui-ahˇ aˬ li tiˬ li biꞈ laꞈ-euˬ meh. Aˬ dui kʼoeˇ taˆ aˬ yawꞈ uˆ lahˇ tehꞈ-a. Aˬ yawꞈ-ahˇ heu loꞈ-ehˇ kuˇ tehꞈ-a. “Zahˬ dui dui leˇ paˬ-ehˇ gʼeh-eu nui noeˬ nui duˇ biꞈ-eu gʼaˬ, Baoˬ huiˬ-eu Miˬyehˇ, Mˬ maˬ maˬ byaˆ zaˇ ziˇ dehꞈ-eu Aˬ da, Nui saˇ bi oꞈ-eu Sahˬ paˬ” lehˇ kuˇ tehꞈ-a.

⁷ Aˬ yawꞈ uˆ lahˇ-eu baoˬ tiˬ jawˇ saˇ-iˬ tiˬ jawˇ huiˬ laˇ-awˇ, aˬ yawꞈ-euˬ miˇ kʼahˬ aˬ myah luꞈ nui saˇ oꞈ tehꞈ-a. Aˬ yawꞈ-euˬ dzoeˬ dzaˬ sahˬ paˬ Daˬbiˇ-ahˇ taꞈ tehꞈ-a. Yaw tsaˬ yaw dawˇ jeˬ kʼoeˇ taˆ baoˬ bi jaˆ-awˇ, mˬ maˬ maˬ byaˆ zaˇ ziˇ uˆ lahˇ tehꞈ-a. Heu deuˬ dawˬ tawˆ luꞈ bi pyeuꞈ laˇ-eu gʼaˇ duˬ , Sahˬpaˬ Miˬyehˇ noeˬ tsehˆ gʼaˬ taˬ-euˬ meh.

Iˇsaˬleˬlaˆ miˇ kʼahˬ-ahˇ Sahˬpaˬ Miˬyehˇ kʼehˬ tehꞈ-a

⁸ Yaˬkoˆ-euˬ zaˬ deuˬ uˆ deuˬ pyeuꞈ-eu Iˇsaˬleˬlaˆ miˇ kʼahˬ-ahˇ zaw leˇ-eu dawˬ, Sahˬpaˬ Miˬyehˇ pyehˬ gʼeh leꞈ-euˬ meh.

⁹ Iˇsaˬleˬlaˆ tsawˇ haˬ dawˬ tawˆ luꞈ siˬ le tehꞈ-a. Eˇpaˬleˬ tsawˇ jeuˬ hawˇ-eu Saˬmaˬliˆ meuˬ-ahˇ kʼaˇ jawˇ-eu tsawˇ haˬ deuˬ siˬ le tehꞈ-a. Aˬ yawꞈ maꞈ nui ma huiˬ-eu laꞈ kʼoeˇ, heu loꞈ-ehˇ dawˬ kʼaˆ ngehˬ-eu meh.

¹⁰ “Tsaˬ byaˆ gawˬ-awˇ tsoˆ taˬ-euˬ nymˇ byaˆ le naˇ, kʼaˬ lo gawˬ-awˇ tsoˆ paˇ tehꞈ-a. Siˬ guˬ pyaꞈ dmˬ kʼehꞈ le naˇ, shuˬ liˇ pyaꞈ dmˬ dawˆ paˇ tehꞈ-a.”

¹¹ Kʼoeˇ miˇ neh aˬ yawꞈ maꞈ-ahˇ guiˇ bi deuˆ-eu gʼaˇ duˬ, muiˇ-eu deuˬ-ahˇ Sahˬpaˬ Miˬyehˇ laˆ noeˬ tehꞈ-a.

¹² Nahˇ ma doˆ kʼehˬ paw jawˇ-eu Suˇliˆ tsawˇ haˬ deuˬ hawˇ-eu, nahˇ ma ga kʼehˬ paw jawˇ-eu Piˇliˇtiˆ tsawˇ haˬ deuˬ, Iˇsaˬleˬlaˆ miˇ kʼahˬ-ahˇ kawꞈ dzaˬ-eu lehˇ, kʼaˬ meh mˇ nga taˬ tehꞈ-a. Kʼoeˇ naˆ ni jahˇ nehˬ gʼaˬ-euˬ kʼawꞈ, Sahˬpaˬ Miˬyehˇ nui pehˇ maˬ jiˇ-ehˇ, Iˇsaˬleˬlaˆ-ahˇ kʼehˬ-eu gʼaˇ duˬ cawˬ ja taˬ-euˬ aˬ laꞈ maˬ baꞈ ka ni bi jaˆ tehꞈ-a.

¹³ Baoˬ huiˬ-eu Sahˬpaˬ Miˬyehˇ kʼoeˇ naˆ ni kʼehˬ nehˬ kʼawꞈ, Iˇsaˬleˬlaˆ tsawˇ haˬ deuˬ nui ma maˬ paˇ-ehˇ, aˬ yawꞈ jawˇ paw maˬ gʼoꞈ laˇ-aˇ.

¹⁴ Iˇsaˬleˬlaˆ tsawˇ haˬ hawˇ-eu aˬ yawꞈ maꞈ-euˬ aˬ yuiꞈ aˬ tsu deuˬ-ahˇ, uˬ duˬ hawˇ-eu dawˬ miˬ toˆ tsehˆ dzeh-awˇ, tiˬ nah laꞈ kʼoeˇ Sahˬpaˬ Miˬyehˇ laˆ cawˆ nehˬ jiˇ tehꞈ-a.

¹⁵ Uˬ duˬ-aˬ, aˬ yuiꞈ aˬ tsu deuˬ meh. Dawˬ miˬ-aˬ, Miˬyehˇ gʼaˇ duˬ ngehˬ dah-eu deuˬ meh. Aˬ yawꞈ maꞈ mehˬ-eu jeˬ jaˬ myawꞈ myawꞈ luꞈ-eu meh.

¹⁶ Tsawˇ haˬ heu deuˬ-ahˇ sheuˬ gʼeh-eu deuˬ gaˇ ma sheuˬ bahˬ-awˇ, aˬ yawꞈ maꞈ miˇ bahˬ bahˬ jiˇ taˬ-euˬ meh.

¹⁷ Kʼoeˇ miˇ neh zaˬ guˬ deuˬ-ahˇ Sahˬpaˬ Miˬyehˇ maˬ taˬ nehˬ-ehˇ, muˇ coeˬ aˬ nmˇ hawˇ-eu miˬ coeˬ miˬ ma-ahˇ gʼawˬ shaˬ maˬ gaˬ ni, tiˬ gʼaˬ-iˬ maˬ bi dzeuˇ-iˇ-a. Aˬ yawꞈ maꞈ Miˬyehˇ maˬ baw-ehˇ, yaw haiˬ tehꞈ-ehˇ mˇ-eu uˬ taꞈ, dawˬ ngehˬ-eu yaw muiˬ maˬ ahˇ-eu miˇ neh meh. Kʼoeˇ naˆ ni jahˇ nehˬ gʼaˬ-euˬ kʼawꞈ, Sahˬpaˬ Miˬyehˇ nui pehˇ maˬ shuꞈ-iˇ-ehˇ, Iˇsaˬleˬlaˆ-ahˇ kʼehˬ-eu gʼaˇ duˬ cawˬ ja taˬ-euˬ aˬ laꞈ, maˬ baꞈ ka ni bi jaˆ tehꞈ-a.

¹⁸ Yaw haiˬ jeˬ miˬ dzaˬ doꞈ doˆ laˇ-awˇ, aˬ gah baw duˆ hawˇ-eu yaˇ saˬ-ahˇ puiˆ tehꞈ-a. Sahˬ kʼaˆ ma-ahˇ doꞈ nyawˬ leˇ-awˇ, uˬ kʼoeˬ mˬ-ahˇ lehˬ yoˆ daˆ leꞈ tehꞈ-a.

¹⁹ Baoˬ huiˬ-eu Sahˬpaˬ Miˬyehˇ-euˬ nui pehˇ baˬ da neh, miˇ kʼahˬ kʼahˬ lah-ehˇ miˬ dzaˬ doꞈ laˇ tehꞈ-a. tsawˇ haˬ zaˬ miˬ dzaˬ miˬ doꞈ loꞈ-ehˇ bi puiˆ dzaˬ-awˇ, mehˇ nmˇ yaw kaˬ gʼawˬ shaˬ maˬ gaˬ nya-aˇ.

²⁰ Dzaˇ kʼaˇ jaˆ-eu ceh dzaˬ jiˇ-awˇ, kʼaˇ dzaˬ nya-eu jeˬ poˆ dzaˬ jiˇ kʼawꞈ, uˬ maˆ maˬ dehˆ laˇ-eu miˇ neh, yawˬ ha baw-euˬ zaˬ-ahˇ sehꞈ-awˇ, shaˬ jiˇ ya dzaˬ gaˇ keuˆ tehꞈ-a.

²¹ Maˬnaˇseˬ tsawˇ jeuˬ hawˇ-eu Eˇpaˬleˬ tsawˇ jeuˬ, tiˬ jeuˬ tiˇ jeuˬ kawꞈ sehꞈ dzaˬ tehꞈ-a. Aˬ yawꞈ maꞈ tiˬ gaˇ paˇ gm leˇ-awˇ, Yuˇdaˆ miˇ kʼahˬ-ahˇ paˇ ceh le tehꞈ-a. Kʼoeˇ naˆ ni jahˇ nehˬ gʼaˬ-euˬ kʼawꞈ, Sahˬpaˬ Miˬyehˇ nui pehˇ maˬ taˬ leˇ-ehˇ, Iˇsaˬleˬlaˆ-ahˇ kʼehˬ-eu gʼaˇ duˬ cawˬ ja taˬ-euˬ aˬ laꞈ maˬ baꞈ ka ni bi jaˆ tehꞈ-a.