Iˇsaˬyaˇ 8 - Akha

Aˬshuˇliˆ miˇ kʼahˬ Sahˬpaˬ Miˬyehˇ-euˬ diˬ duˇ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Huiˬ-eu kʼaˬ lo teˇ byaꞈ tiˬ byaꞈ yuˇ-awˇ, maˬhaˬsaˬlaˇhaˬsaˬbaˆ lehˇ yaw huiˬ huiˬ-ehˇ boꞈ taˬ-awˬ.

² Jah coeˇ-eu tsawˇ haˬ nyiˬ gʼaˬ pyeuꞈ-eu piˇ ma Uˇliˇyaˆ hawˇ-eu Yeˬbeˬleˬkiˆ-euˬ aˬ li Zaˬkaˬliˇ aˬ nyaꞈ-ahˇ kuˇ-awˇ, tsawˇ kaˬ bi geuꞈ-awˬ.”

³ Aˇ yamˬ ui cuiˆ myahˇ laˇ ngeh, ngaˬ-euˬ nymˇ dahˬ aˬ nyiˇ pi leˇ-euˬ meh. Nga nyaꞈ dzeˇ zaˬ aˬ li ciˬ ngeh, “Maˬhaˬsaˬlaˇhaˬsaˬbaˆ lehˇ myahˇ nehˬ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh.

⁴ “Aˬ li kʼoeˇ li aˬ ma aˬ da-ahˇ maˬ kuˇ nya laˇ mi naˆ-ehˇ, Daˬmaˬsehˇ meuˬ hawˇ-eu Saˬmaˬliˆ meuˬ-ahˇ kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ, Aˬshuˇliˆ sahˬ paˬ neh bi deuˆ geuꞈ jiˇ-awˇ, bi baꞈ kʼoꞈ jiˇ gʼeh tehꞈ-a” lehˇ aˬ yawꞈ ehˇ-eu meh.

Aˬshuˇliˆ sahˬ paˬ oe-eu lehˇ gʼeh-eu

⁵ Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ nehˬ laꞈ-euˬ meh.

⁶ “Tsawˇ haˬ heu deuˬ coꞈ ngehˇ ni yoeˇ luꞈ-eu Shiˇloˆ lawˇ gawˆ-ahˇ byehˇ dzeh-awˇ, sahˬ paˬ Leˬzeˬ hawˇ-eu sahˬ paˬ Peˬkah aˬ nyaꞈ-ahˇ guˆ-awˇ yaw dzuˬ dzuˬ luꞈ-eu meh.

⁷ Kʼoeˇ miˇ neh, Sahˬpaˬ Miˬyehˇ pyeuꞈ-eu ngaˇ Aˬshuˇliˆ sahˬ paˬ hawˇ-eu aˬ yawꞈ-euˬ guiˇ maꞈ dawˬ tawˆ luꞈ-ahˇ sheuˬ ka leꞈ-awˇ, Yuˇdaˆ miˇ kʼahˬ-ahˇ guiˇ bi deuˆ le ma. Uˇpaˬlaˇ lawˇ baˬ iˇ jeuˬ oe ngeh lawˇ deh maˬ mawˇ laˇ-eu loꞈ-ehˇ, Aˬshuˇliˆ guiˇ maꞈ deuˬ yoeˇ gʼeh leꞈ tehꞈ-a.

⁸ Yuˇdaˆ miˇ kʼahˬ-ahˇ aˬ yawꞈ maꞈ iˇ jeuˬ jeuˬ ahˇ leꞈ-awˇ, kawˬ lahˇ-ahˇ keuˆ ni jeuˬ keuˆ laꞈ-awˇ, yawˬ jeˬ na luꞈ-ahˇ dahˬ pymˬ jiˇ tehꞈ-a. Iˇ jeuˬ kʼoeˇ miˇ kʼahˬ kʼoeˇ coeˇ heu coeˇ doˆ ni oe byah leꞈ tehꞈ-a.” Miˬyehˇ-oˇ, nga maꞈ nehˬ-ehˇ jawˇ nehˬ laꞈ.

⁹ Miˇ kʼahˬ tsawˇ jeuˬ deuˬ-oˇ, guˆ-eu laꞈ kʼoeˇ tiˬ gaˇ uiˬ leˇ-awˬ. Gaˇ mahˇ kaˬ-eu miˇ kʼahˬ deuˬ-oˇ, naˬ bawˇ ciˬ kʼmˇ-awˬ. Guiˇ deuˆ-eu gʼaˇ duˬ lehˬ hmˬ-awˬ. Ehˇ kʼawꞈ maˬ guˆ-ehˇ taˬ gʼeh. Guiˇ deuˆ-eu gʼaˇ duˬ lehˬ hmˬ-awˬ. Ehˇ kʼawꞈ maˬ guˆ-ehˇ taˬ gʼeh.

¹⁰ Tiˬ kawˆ loꞈ-ehˇ uiˬ leˇ-awˇ mehˬ bawˬ mˇ-awˬ. Ehˇ kʼawꞈ, tiˬ jeˬ-iˬ gaˇ dahˇ maˬ tsoeˬ-aˇ. Kʼaˇ ja mawꞈ-eu jeˬ ja doe-awˇ bawˬ dzaˬ-awˬ. Ehˇ kʼawꞈ, tiˬ jeˬ-iˬ maˬ deuˬ leˇ-aˇ. Aˬ jeˬ miˇ neh ehˇ naˇ, Miˬyehˇ nga maꞈ nehˬ-ehˇ jawˇ-eu ma.

Iˇsaˬyaˇ-ahˇ Sahˬpaˬ Miˬyehˇ mehˬ nehˬ-eu

¹¹ Sahˬpaˬ Miˬyehˇ-aˬ, huiˬ dui dui-eu aˬ yawꞈ-euˬ baoˬ-ahˇ gʼoe-awˇ, tsawˇ haˬ kʼoeˇ deuˬ kʼaˇ dehꞈ-eu loꞈ-ehˇ maˬ ya dehꞈ ni, ngaˬ-ahˇ heu loꞈ-ehˇ mehˬ nehˬ tsoˆ nehˬ laꞈ-euˬ meh.

¹² “Tsawˇ haˬ kʼoeˇ deuˬ nehˬ-ehˇ nawˇ mehˬ bawˬ taˬ gm. Aˬ yawꞈ maꞈ guˆ-eu jeˬ-ahˇ nawˇ taˬ guˆ.

¹³ Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ muiˬ gaˇ shawˇ gaˇ taˬ ngehˇ. Nawˇ ngaˬ-ahˇ ya guˆ meh.

¹⁴ Ngaˇ muiˬ dui shawˇ dui dui-eu miˇ neh, tsawˇ haˬ kʼoeˇ deuˬ sahˬ tiꞈ tiꞈ duˬ kʼaˬ lo loꞈ-ehˇ pyeuꞈ-eu ma. Ngaˇ-aˬ, Yuˇdaˆ miˇ kʼahˬ, Iˇsaˬleˬlaˆ miˇ kʼahˬ hawˇ-eu, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ kʼmˇ taˬ-euˬ lahˇ ju-ahˇ duˇ-eu ma.

¹⁵ Tsawˇ haˬ gʼawˬ mya ni sahˬ tiꞈ tiꞈ tehꞈ-a. Aˬ yawꞈ maꞈ coˬ-iˇ-awˇ, tahˬ kʼehꞈ tahˬ geuˆ tehꞈ-a. Aˬ yawꞈ maꞈ lahˇ ju-ahˇ paꞈ leˇ tehꞈ-a.”

Tsawˇ shiˇ-ahˇ mehˬ bawˬ taˬ mˇ

¹⁶ Ngaˬ-euˬ gʼaˬ zaˬ gʼaˬ kʼehˇ pyeuꞈ-eu naw maꞈ-aˬ, Miˬyehˇ neh ngaˬ-ahˇ kʼaˇ biꞈ laꞈ-euˬ dawˬ deuˬ maˬ bi byoˆ-iˇ ni ya jeˬ hmˬ-eu meh.

¹⁷ Sahˬpaˬ Miˬyehˇ-aˬ, aˬ yawꞈ-euˬ tsawˇ haˬ deuˬ maˬ bi mawˇ-eu gʼaˇ duˬ, jawˇ zaꞈ luꞈ-eu meh. Ehˇ kʼawꞈ, aˬ yawꞈ-ahˇ ngaˇ gʼoe-awˇ, noeˬ tmˬ-eu laꞈ kʼoeˇ loꞈ luꞈ-eu ma.

¹⁸ Sahˬpaˬ Miˬyehˇ neh ngaˬ-ahˇ biꞈ laꞈ-euˬ zaˬ deuˬ nehˬ-ehˇ ngaˇ jawˇ luꞈ-eu ma. Ziˇoˬ gawˬ jawˬ kʼoeˇ taˆ nuiˇ luꞈ-eu Baoˬ huiˬ-eu Sahˬpaˬ Miˬyehˇ-aˬ, Iˇsaˬleˬlaˆ tsawˇ haˬ deuˬ jawˇ gaˇ, dehꞈ luꞈ-eu dawˬ kawˬ deuˬ loꞈ-ehˇ nga maꞈ-ahˇ pyehˬ gʼeh leꞈ-euˬ meh.

¹⁹ Ehˇ kʼawꞈ, ja maw nya-eu deuˬ hawˇ-eu, teˇ saˇ yaw nahˬ yaw gʼahˇ baw baw-ehˇ nyiˇ paˬ shiˇ nya-eu nyiˇ paˬ shaˆ ma deuˬ-ahˇ gʼoe-eu gʼaˇ duˬ, aˬ cawˬ naw maꞈ-ahˇ gʼaˬ biꞈ tehꞈ-a. “Dehꞈ luꞈ-eu deuˬ-euˬ dah zaˇ shiˇ dzeuˇ-euˬ deuˬ nehˬ-ehˇ ngehˬ cawˬ taꞈ-awˇ, nehꞈ-euˬ dawˬ-ahˇ naˇ haˬ geuꞈ-eu tsaˬ tehꞈ-a” lehˇ, nyiˇ paˬ shaˆ ma kʼoeˇ deuˬ ehˇ tehꞈ-a.

²⁰ Aˬ yawꞈ maꞈ-ahˇ naw maꞈ heu loꞈ-ehˇ ehˇ kʼoꞈ nehˬ-awˬ. “Sahˬpaˬ Miˬyehˇ mehˬ nehˬ tsoˆ nehˬ laꞈ-eu jeˬ-ahˇ naˇ haˬ geuꞈ-awˬ. Nyiˇ paˬ shaˆ ma deuˬ ehˇ gaˇ taˬ naˇ haˬ. Aˬ yawꞈ maꞈ neh ehˇ-euˬ jeˬ naw maꞈ gʼaˇ duˬ tiˬ jeˬ-iˬ gaˇ dahˇ maˬ tsoeˬ-a.”

Ya shaˬ ya zahˬ-eu aˇ nah aˇ yamˬ

²¹ Tsawˇ haˬ kʼoeˇ deuˬ nui ma cawˆ-awˇ hawˬ mehꞈ shaˬ-eu laꞈ kʼoeˇ, miˇ kʼahˬ doe ni cah cah-ehˇ jawˇ tehꞈ-a. Aˬ yawꞈ maꞈ hawˬ mehꞈ mehꞈ ngeh nui ma pehˇ laˇ-awˇ, aˬ yawꞈ maꞈ-euˬ sahˬ paˬ hawˇ-eu aˬ yawꞈ maꞈ-euˬ Miˬyehˇ-ahˇ yaˬ kʼehˇ yaˬ tehꞈ-a. Aˬ yawꞈ maꞈ mˬ-ahˇ gʼawˇ leuˇ haw-awˇ,

²² miˇ tsaˬ-ahˇ awˆ moꞈ haw kʼawꞈ, shaˬ zahˬ naꞈ-eu jeˬ hawˇ-eu yaw zahˇ jeˬ-ahˇ tehꞈ-ehˇ ya mawˇ-eu meh. Zahˇ dui dui-eu tsahˇ-ahˇ aˬ yawꞈ maꞈ bi teh ahˇ taˬ-euˬ meh.