Iˇsaˬyaˇ 66 - Akha

Miˇ kʼahˬ tsawˇ jeuˬ deuˬ-ahˇ Sahˬpaˬ Miˬyehˇ yaˇ kʼaˬ daˇ-eu

¹ Sahˬpaˬ Miˬyehˇ heu loꞈ-ehˇ ehˇ-eu meh. “Mˬ maˬ ngaˬ-euˬ nuiˇ duˬ pyeuꞈ-awˇ, miˇ maˬ aˬ kuiˇ cawˬ taˬ duˬ ma. Naw maꞈ ngaˬ-euˬ gʼaˇ duˬ nymˇ aˬ joˆ-ehˇ tsoˆ-awˇ, ngaˬ-ahˇ aˬ geu gaˇ bi jawˇ-eu gʼeh te.

² Boeˬ boeˬ luˆ luˆ dawˬ tawˆ ngaˬ neh beh-awˇ, nui nahˬ nui yu ahˇ-awˇ noeˬ poˆ noeˬ paˇ-eu deuˬ hawˇ-eu, ngaˬ-ahˇ guˆ-awˇ ngaˬ-euˬ ehˇ dawˬ naˇ haˬ geuꞈ-eu deuˬ-ahˇ, ngaˇ nui ma tsaˬ-eu ma.

³ “Tsawˇ haˬ zaˬ deuˬ yawˬ ha kʼaˇ noeˬ doˆ-euˬ jeˬ mˇ-eu meh. mawˇ neˇ sehꞈ-awˇ lawˇ-eu hawˇ-eu tsawˇ haˬ sehꞈ-awˇ lawˇ-eu, aˬ yawꞈ maꞈ gʼaˇ duˬ tiˬ kawˆ meh. Yawˇ zaˬ lawˇ-eu hawˇ-eu aˬ kuiˬ-euˬ kawˬ lahˇ ngawˬ kʼehꞈ-eu, aˬ yawꞈ maꞈ gʼaˇ duˬ tiˬ kawˆ meh. Dzaˬ la gʼo cehˇ lawˇ-eu hawˇ-eu aˬ zaꞈ-euˬ shiˬ lawˇ-eu, aˬ yawꞈ maꞈ gʼaˇ duˬ tiˬ kawˆ meh. Tsiˇ yaw saw jeˬ lawˇ-eu hawˇ-eu tahˬ pahˬ aˬ ma mawˇ kawˇ-ahˇ guiˬ lahˬ shaˇ-eu jeˬ, aˬ yawꞈ maꞈ-euˬ gʼaˇ duˬ maˬ beu gaˇ-a. Nui daˆ daˆ laˇ paˬ-ehˇ gʼeh-eu uˬ duˬ tahˬ-eu jeˬ-ahˇ, aˬ yawꞈ maꞈ cehˇ gʼa luꞈ-eu meh.

⁴ Kʼoeˇ baˬ da neh aˬ yawꞈ maꞈ guˆ-eu jeˬ pyeuꞈ-eu, luˬ-iˇ seˇ-iˇ-eu jeˬ aˬ yawꞈ maꞈ kʼoeˇ taˆ ngaˇ bi keuˆ le ma. Ngaˇ kuˇ ngeh aˬ yawꞈ maꞈ oˬ maˬ toˬ-ehˇ, ngaˬ-euˬ dawˬ-ahˇ maˬ naˇ haˬ-euˬ miˇ neh, kʼoeˇ loꞈ-ehˇ jahˇ nehˬ ma. Ngaˬ-euˬ mehˬ shi aˬ yawꞈ maꞈ yaw haiˬ jeˬ mˇ-awˇ, ngaˇ nui ma maˬ tsaˬ-eu jeˬ-ahˇ tseˇ geuꞈ-euˬ meh.”

⁵ Sahˬpaˬ Miˬyehˇ-ahˇ guˆ-awˇ ehˇ dawˬ naˇ haˬ-eu deuˬ-oˇ, aˬ yawꞈ-euˬ dawˬ-ahˇ naw maꞈ naˇ haˬ sheˇ. “Naw maꞈ ngaˬ-ahˇ saˇ jaˇ ziꞈ-eu miˇ neh, naw maꞈ tsawˇ jeuˬ tiˬ paˆ deuˬ naw maꞈ-ahˇ bye-awˇ, naw maꞈ-ahˇ myaˆ maˬ haw cawˬ-ehˇ, ‘Naw maꞈ laˬ kʼaˬ cehˇ luꞈ gaˇ nga maꞈ ya mawˇ ni, Sahˬpaˬ Miˬyehˇ-euˬ baoˬ bi mawˇ le-awˇ, naw maꞈ-ahˇ ka kʼoꞈ nehˬ luꞈ-uˇ’ lehˇ ehˇ tehꞈ-a. Ehˇ kawꞈ, kʼoeˇ loꞈ-ehˇ ehˇ-eu deuˬ kʼoeˇ taˆ, shaꞈ dawˇ-eu jeˬ keuˆ le tehꞈ-a.

⁶ Meuˬ-ahˇ lawꞈ gʼa luꞈ-eu teˇ saˇ hawˇ-eu Uˬ duˬ tahˬ nymˇ nymˇ ma laꞈ kʼoeˇ guˇ-eu teˇ saˇ-ahˇ naˇ haˬ sheˇ. Muiˇ-eu deuˬ-ahˇ Sahˬpaˬ Miˬyehˇ kʼehˬ luꞈ-eu teˇ saˇ meh.

⁷ “Ngaˬ-euˬ muiˬ-eu shawˇ-eu meuˬ-aˬ, uˬ maˆ maˬ naˇ ni zaˬ baw-euˬ aˬ ma-ahˇ duˇ-eu meh.

⁸ Heu loꞈ-ehˇ gʼeh-eu gaˇ kawˆ-ahˇ, gaˬ haw mawˇ haw-euˬ tsawˇ haˬ jawˇ meh loˇ. Tiˬ nah laꞈ kʼoeˇ miˇ kʼahˬ tiˬ kʼahˬ dehꞈ doˆ le-awˇ, tiˬ kʼehˇ laˇ kʼehˬ laꞈ kʼoeˇ tsawˇ jeuˬ tiˬ jeuˬ pyeuꞈ doˆ laˇ nya meh loˇ. Ehˇ kʼawꞈ, Ziˇoˬ uˬ maˆ naˇ laˇ-eu maˬ dah ni, tsawˇ jeuˬ tiˬ jeuˬ bi dehꞈ doˆ le tehꞈ-a.

⁹ Ngaˬ-euˬ tsawˇ jeuˬ-ahˇ bi dehꞈ doˆ le-eu keuˆ laˇ-euˬ gaˇ, maˬ bi dehꞈ doˆ le ni ngaˇ laˆ tsoeˬ tehꞈ-a lehˇ taˬ noeˬ” lehˇ, Sahˬpaˬ Miˬyehˇ ehˇ taˬ-euˬ meh. %

¹⁰ Yeˬluˇsaˬlehˬ meuˬ-ahˇ kʼaˇ gaˬ-eu tsawˇ haˬ deuˬ, Yeˬluˇsaˬlehˬ meuˬ nehˬ-ehˇ laˬ kʼaˬ caw cehˇ-awˇ, aˬ yawꞈ gʼaˇ duˬ nui kʼahˇ shiˇ-awˬ. Yeˬluˇsaˬlehˬ gʼaˇ duˬ tsawˇ ngoeˇ ngoeˇ-euˬ deuˬ, nymˬ-mˇ aˬ yawꞈ nehˬ-ehˇ laˬ kʼaˬ cehˇ-awˬ.

¹¹ Zaˬ nahˬ aˬ ma aˬ coeˇ dawˇ-awˇ nui kʼahˇ shiˇ-eu loꞈ-ehˇ, Yeˬluˇsaˬlehˬ meuˬ-euˬ baw le za le-eu guiˬ lahˬ-ahˇ, naw maꞈ dawˇ-awˇ nui kʼahˇ ya shiˇ tehꞈ-a.

¹² Sahˬpaˬ Miˬyehˇ heu loꞈ-ehˇ ehˇ-eu meh. “Maˬ cawˆ-iˇ nya-eu baw le za le-eu guiˬ lahˬ, naw maꞈ-ahˇ ngaˇ biꞈ ma. Maˬ gui iˇ-eu iˇ cuꞈ lawˇ baˬ loꞈ-ehˇ, miˇ kʼahˬ tsawˇ jeuˬ-euˬ pyuˇ shuiˇ myawˬ gahˬ deuˬ, naw maꞈ jawˇ gaˇ yoeˇ le tehꞈ-a. Aˬ ma-euˬ bawˇ kʼahˇ laꞈ kʼoeˇ ciˬ ahˇ-awˇ, gaˬ huiˬ haw huiˬ-euˬ zaˬ-ahˇ naw maꞈ duˇ tehꞈ-a.

¹³ Aˬ ma zaˬ-ahˇ bo saˆ nehˬ-eu loꞈ-ehˇ, Yeˬluˇsaˬlehˬ laꞈ kʼoeˇ naw maꞈ-ahˇ ngaˇ bo saˆ nehˬ ma.

¹⁴ Kʼoeˇ loꞈ-ehˇ pyeuꞈ laˇ gaˇ mawˇ ngeh, naw maꞈ laˬ kʼaˬ ya cehˇ tehꞈ-a. Kʼoeˇ loꞈ-ehˇ pyeuꞈ laˇ ngeh, naw maꞈ jawˇ saˇ doˆ-awˇ gʼaˬ ahˇ tehꞈ-a. Kʼoeˇ loꞈ-ehˇ pyeuꞈ laˇ ngeh, Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ ehˇ dawˬ naˇ haˬ-eu deuˬ-ahˇ ngehˬ gʼeh-awˇ, ngaˬ-ahˇ muiˇ-eu deuˬ-ahˇ nui ma bi mawˇ gaˇ, naw maꞈ ya siˬ ya mawˇ tehꞈ-a.”

¹⁵ Sahˬpaˬ Miˬyehˇ miˬ dzaˬ nehˬ-ehˇ zaꞈ ka le-awˇ, aˬ yawꞈ nui ma pehˇ-eu deuˬ-ahˇ kʼehˬ-eu gʼaˇ duˬ, jaˬ lehˇ lehˇ ma-euˬ aˬ dahˇ kʼoeˇ taˆ dziˬ-awˇ oe tehꞈ-a.

¹⁶ Iˬ baˇ kʼaˇ ahˇ-eu miˇ tsaˬ zaˬ deuˬ-ahˇ, miˬ dzaˬ hawˇ-eu mi cehˇ neh kʼehˬ nehˬ-eu miˇ neh, tsawˇ haˬ gʼawˬ mya ni shiˇ tehꞈ-a.

¹⁷ Sahˬpaˬ Miˬyehˇ heu loꞈ-ehˇ ehˇ-eu meh. “Lawˇ ciꞈ zaˬ-euˬ uˬ duˬ tahˬ-eu zahˇ sahˇ kʼoꞈ-ahˇ gʼoe-eu laꞈ kʼoeˇ gʼawˇ mawˇ shawˇ-awˇ, muiˬ-eu shawˇ-eu yaˇ kmˇ-ahˇ aˬ cawˬ-euˬ mehˬ nah caw teh-iˇ-eu uˬ taꞈ, aˬ zaꞈ shaˬ jiˇ, ho caꞈ hawˇ-eu maˬ dzaˬ kʼmˬ-eu dzaˇ deuˬ dzaˬ-eu tsawˇ haˬ deuˬ gʼaˇ duˬ, aˇ saˬ saˬ-eu aˇ nah aˇ yamˬ peh le luꞈ meh.

¹⁸ Aˬ yawꞈ maꞈ-euˬ nui noeˬ hawˇ-eu aˬ yawꞈ maꞈ neh mˇ-euˬ gaˇ deuˬ ngaˇ siˬ luꞈ mawˇ luꞈ ma. Miˇ kʼahˬ tsawˇ jeuˬ dawˬ tawˆ luꞈ kuˇ uiˬ-eu gʼaˇ duˬ ngaˇ oe-eu ma. Aˬ yawꞈ maꞈ tiˬ gaˇ uiˬ laˇ jiˇ ngeh, ngaˬ-euˬ baoˬ-ahˇ gʼoe-awˇ mˇ nya-eu gaˇ deuˬ-ahˇ aˬ yawꞈ maꞈ ya mawˇ tehꞈ-a.

¹⁹ Aˬ yawꞈ maꞈ-ahˇ kʼehˬ nehˬ kʼaˆ nehˬ-eu gʼaˬ ngaˇ pyeuꞈ-eu gaˇ kawˆ, aˬ yawꞈ maꞈ ya siˬ duˬ tehꞈ-a. “Ehˇ kʼawꞈ aˬ yawꞈ maꞈ tiˬ paˆ na deuˬ-ahˇ ngaˇ maˬ kʼehˬ ni bi dzeuˇ-iˇ-awˇ, ngaˇ tsawˇ myahˇ doˆ-eu gaˇ kawˆ maˬ ya gaˬ haw-ehˇ, ngaˬ-euˬ baoˬ hawˇ-eu yaw shehꞈ kʼahˬ sehˇ-ahˇ maˬ ya mawˇ haw-euˬ tsawˇ jeuˬ deuˬ hawˇ-eu, gaˇ mahˇ kaˬ gaˇ jaˆ-eu miˇ kʼahˬ deuˬ-ahˇ, aˬ yawꞈ maꞈ-ahˇ ngaˇ pyehˬ gʼeh ma. Saˬbeˬ miˇ kʼahˬ hawˇ-eu Liˆbyaˇ miˇ kʼahˬ-ahˇ maˬ ehˇ, kaˆ beuˆ nya dui dui-eu deuˬ jawˇ-eu Luˇdeˬ miˇ kʼahˬ-ahˇ maˬ ehˇ, Tuˇbaˬlaˇ miˇ kʼahˬ hawˇ-eu Heˬlaˬsaˇ miˇ kʼahˬ-ahˇ maˬ ehˇ, aˬ yawꞈ maꞈ-ahˇ ngaˇ pyehˬ gʼeh ma. Miˇ kʼahˬ heu deuˬ laꞈ kʼoeˇ, ngaˬ-euˬ yaw shehꞈ kʼahˬ sehˇ gaˇ kawˆ aˬ yawꞈ maꞈ ja byah tehꞈ-a.

²⁰ Ngaˬ-ahˇ laꞈ sawˬ biꞈ laˇ-eu loꞈ-ehˇ, aˬ cawˬ miˇ kʼahˬ laꞈ kʼoeˇ kʼaˇ jawˇ-eu naw maꞈ-euˬ tsawˇ haˬ dawˬ tawˆ luꞈ-ahˇ, aˬ yawꞈ maꞈ sheuˬ kʼoꞈ laꞈ tehꞈ-a. Zahˇ jahˇ gaˇ geuꞈ nya ni shawˇ-eu kʼa puˬ kʼa lu laꞈ kʼoeˇ, Iˇsaˬleˬlaˆ tsawˇ haˬ deuˬ dzaˬ la gʼo cehˇ lawˇ-eu jeˬ dawˆ ahˇ-awˇ, Uˬ duˬ tahˬ nymˇ nymˇ ma-ahˇ hehˇ laꞈ-eu loꞈ-ehˇ, naw maꞈ-euˬ tsawˇ haˬ kʼoeˇ deuˬ-ahˇ, mahˬ deuˬ, mahˬ tahˬ laˆ deuˬ, law taw deuˬ hawˇ-eu, mahˬ laˆ lawˬ deuˬ kʼoeˇ taˆ bi dziˬ-awˇ, Yeˬluˇsaˬlehˬ meuˬ laꞈ kʼoeˇ jaˆ-eu ngaˬ-eu muiˬ-eu shawˇ-eu gawˬ duˇ jaˆ gaˇ sheuˬ kʼoꞈ ha laˇ tehꞈ-a.

²¹ Aˬ yawꞈ maꞈ tiˬ paˆ na deuˬ-ahˇ piˇ ma hawˇ-eu Leˬbiˇ tsawˇ haˬ bi geuꞈ ma.

²² “Ngaˬ-euˬ baoˬ baˬ da neh, mˬ yaw shuiꞈ hawˇ-eu miˇ kʼahˬ yaw shuiꞈ maˬ cawˆ-iˇ ni ziꞈ-eu loꞈ-ehˇ, naw maꞈ-euˬ zaˬ deuˬ uˆ deuˬ hawˇ-eu naw maꞈ-eu tsawˇ myahˇ, maˬ cawˆ-iˇ ni ziꞈ tehꞈ-a.

²³ La shuiꞈ lah-eu bawˬ-iˬ kʼaˇ gʼeh ngeh maˬ ehˇ, jawˇ nah lah-eu kʼaˇ tsaˬ laˇ ngeh maˬ ehˇ, miˇ kʼahˬ yawˬ kʼahˬ na luꞈ-ahˇ kʼaˇ jawˇ-eu tsawˇ haˬ deuˬ, Yeˬluˇsaˬlehˬ meuˬ heu meuˬ laꞈ kʼoeˇ ngaˬ-ahˇ uˬ duˬ tahˬ laˇ tehꞈ-a” lehˇ Sahˬpaˬ Miˬyehˇ ehˇ-eu meh.

²⁴ “Aˬ yawꞈ maꞈ gʼoꞈ doˆ-iˇ ngeh, ngaˬ-ahˇ puiˬ-eu tsawˇ haˬ deuˬ shiˇ taˬ-awˇ ga gaˇ ya mawˇ tehꞈ-a. Aˬ yawꞈ maꞈ-ahˇ dzaˬ-eu buˬ joe deuˬ shiˇ-eu maˬ baw-ehˇ, aˬ yawꞈ maꞈ-ahˇ puiˆ-eu miˬ dzaˬ miˆ-iˇ-eu maˬ baw-a. Aˬ yawꞈ maꞈ-aˬ, miˇ tsaˬ zaˬ dawˬ tawˆ luꞈ gʼaˇ duˬ jawꞈ dui dui-eu jeˬ pyeuꞈ tehꞈ-a.”