Iˇsaˬyaˇ 64 - Akha

¹ Gawˬ jawˬ gawˬ duˇ nawˬ-ahˇ mawˇ-awˇ yaw dzuˬ dzuˬ ni, aˬ jeˬ miˇ neh mˬ gʼeu paˆ-awˇ maˬ oe ka te.

² Iˇ buiˇ buiˇ-eu loꞈ-ehˇ aˬ yawꞈ maꞈ yaw dzuˬ dzuˬ tehꞈ-a. Nawˬ-ahˇ muiˇ-eu deuˬ-ahˇ nawˬ-euˬ baoˬ bi mawˇ-awˇ, nawˬ-euˬ mehˬ shi miˇ kʼahˬ tsawˇ jeuˬ deuˬ yaw dzuˬ bi dzuˬ-awˬ.

³ Aˇ hu nga maꞈ maˬ noeˬ maˬ duˇ-euˬ gaˇ, guˆ-eu gaˆ-eu jeˬ nawˇ mˇ ngeh, gawˬ jawˬ deuˬ guˆ-awˇ yaw dzuˬ dzuˬ-euˬ meh.

⁴ Nawˬ-ahˇ gʼoe-eu deuˬ-ahˇ ngehˬ gʼeh nehˬ-euˬ, nawˇ loꞈ-ehˇ gʼeh-eu Miˬyehˇ-ahˇ, tsawˇ haˬ zaˬ deuˬ maˬ gaˬ maˬ mawˇ haw-aˬ.

⁵ Yaw tsaˬ yaw dawˇ jeˬ mˇ gaˇ laˬ kʼaˬ cehˇ-eu deuˬ hawˇ-eu, nawˬ-euˬ nui kʼahˇ poˆ-eu deuˬ-ahˇ nawˇ maˬ ngehˇ-a. Nawˇ nga maꞈ-ahˇ nui ma pehˇ kʼawꞈ, nga maꞈ iˬ baˇ mˇ-eu maˬ byehˇ dzeh-aˬ. Nawˇ nui ma pehˇ dui dui-euˬ kʼawꞈ, aˇ hu ba neh yaw lehˬ jeˬ nga maꞈ mˇ ka leꞈ-euˬ ma.

⁶ Aˬ dui dawˬ tawˆ luꞈ iˬ baˇ ahˇ-eu ma. Aˬ dui mˇ-euˬ muiˬ dui dui-eu jeˬ-aˬ, jawꞈ dui dui-eu pehˇ kʼahˬ-ahˇ duˇ-eu meh. Aˬ dui-euˬ iˬ baˇ baˬ da neh aˬ dui yaw dehꞈ dehꞈ-eu, aˇ paꞈ nyoeˬ-iˇ koˆ-iˇ jiˇ-awˇ, jaˬ lehˇ bi baw byoˆ gaˇ duˇ leˇ-eu meh.

⁷ Nawˬ-euˬ tsawˇ myahˇ-ahˇ kuˇ-eu tsawˇ haˬ maˬ jawˇ-a. Nawˬ-ahˇ uˬ duˬ tahˬ shaˇ-eu tsawˇ haˬ maˬ jawˇ-a. Nga maꞈ-euˬ iˬ baˇ baˬ da neh, nawˬ-euˬ myaˆ pyawˬ ciˬ zaꞈ taˬ-awˇ, nga maꞈ-ahˇ byehˇ dzeh laꞈ-euˬ meh.

⁸ Ehˇ kʼawꞈ, Sahˬpaˬ Miˬyehˇ nawˇ-aˬ, nga maꞈ-euˬ aˬ da ma. Nga maꞈ shaˬ jehˆ pyeuꞈ-awˇ, nawˇ oeˬ lahˬ tehˆ-eu yaw sahˇ meh. Nga maꞈ-ahˇ beh-euˬ gʼaˬ nawˇ meh.

⁹ Kʼoeˇ baˬ da neh nui ma pehˇ-eu aˇ dzehˬ taˬ dzeuˇ nehˬ laꞈ. Nga maꞈ-euˬ iˬ baˇ-ahˇ mˬ maˬ maˬ byaˆ zaˇ ziˇ taˬ paꞈ tawꞈ laꞈ. Nga maꞈ nawˬ-euˬ tsawˇ haˬ pyeuꞈ-eu miˇ neh, nga maꞈ-ahˇ gʼawˬ shaˬ gaˬ nehˬ laꞈ.

¹⁰ Nawˬ-euˬ muiˬ-eu shawˇ-eu meuˬ deuˬ, bawˇ tsahˬ bawˇ dahˇ pyeuꞈ jiˇ-euˬ meh. Yeˬluˇsaˬlehˬ hawˇ-eu Ziˇoˬ meuˬ tsoeˬ tsoeˬ-iˇ-euˬ meh.

¹¹ Nga maꞈ-euˬ aˬ poeˬ aˬ bawˇ deuˬ nawˬ-ahˇ ja ceuˬ-euˬ jawˇ duˬ, muiˬ-eu shawˇ-eu Uˬ duˬ tahˬ nymˇ nymˇ ma kʼoeˇ nymˇ, miˬ dzaˬ neh bi puiˆ byoˆ-euˬ meh. Nga maꞈ nui ma saˇ-eu jawˇ duˬ dawˬ tawˆ, luˬ-iˇ seˇ-iˇ jiˇ taˬ-euˬ meh.

¹² Gaˇ kawˆ heu-ahˇ nawˇ laꞈ pyehꞈ pyehꞈ-awˇ haw te loˇ. Sahˬpaˬ Miˬyehˇ nawˇ tiˬ jeˬ-iˬ maˬ shaˇ noeˬ ni, maˬ shaˬ coeˇ gaˇ keuˆ ni nga maꞈ-ahˇ bi shaˬ-eu lehˇ gʼeh te loˇ.