Iˇsaˬyaˇ 62 - Akha

¹ Yeˬluˇsaˬlehˬ meuˬ-ahˇ gʼaˬ biꞈ nehˬ-eu dawˬ ngaˇ ngehˬ ma. Meuˬ kʼoeˇ meuˬ ka kʼoꞈ-eu jeˬ za gʼaˬ-awˇ, aˬ yawꞈ gʼaˬ leˇ-eu jeˬ uˬ ciꞈ bya-eu nahˇ ma nahˇ doꞈ loꞈ-ehˇ maˬ bya laˇ kʼoeˇ keuˆ ni, ngaˇ ciˬ cuˇ ni maˬ jawˇ.

² Yeˬluˇsaˬlehˬ meuˬ-oˇ, nawˇ gʼaˬ leˇ-eu gʼaˬ pyeuꞈ-eu gaˇ, miˇ kʼahˬ tsawˇ jeuˬ dawˬ tawˆ ya mawˇ tehꞈ-a. Aˬ yawꞈ maꞈ-euˬ sahˬ paˬ dawˬ tawˆ, nawˬ-euˬ yaw shehꞈ kʼahˬ sehˇ-ahˇ ya mawˇ-awˇ, nawˬ-ahˇ tsawˇ myahˇ yaw shuiꞈ myahˇ paˇ tehꞈ-a. Sahˬpaˬ Miˬyehˇ neh biꞈ-euˬ tsawˇ myahˇ myahˇ tehꞈ-a.

³ Nawˇ-aˬ, Sahˬpaˬ Miˬyehˇ gʼaˇ duˬ, muiˬ dui dui-eu shuiˇ uˬ kʼoˆ loꞈ-ehˇ duˇ tehꞈ-a.

⁴ Paˬ tseuˆ bi tseuˆ dzeh-euˬ zaˬ lehˇ nawˬ-ahˇ maˬ paˇ kuˇ meh. Nawˬ-euˬ miˇ kʼahˬ-ahˇ kʼawꞈ, “meuˬ meuˬ tsoeˬ” lehˇ maˬ paˇ kuˇ meh. “Miˬyehˇ nui kʼahˇ shiˇ-eu gʼaˬ” lehˇ nawˬ-ahˇ ya kuˇ paˇ-awˇ, nawˬ-euˬ miˇ kʼahˬ-euˬ tsawˇ myahˇ yaw shuiꞈ-aˬ, “Laˬ kʼaˬ tiˬ cehˇ sheuˬ dahˬ dzaˬ-euˬ” lehˇ meh. Aˬ jeˬ miˇ neh ehˇ naˇ, Sahˬpaˬ Miˬyehˇ nawˬ-ahˇ nui kʼahˇ shiˇ-awˇ, nawˬ-euˬ miˇ kʼahˬ hawˇ-eu aˬ yawꞈ, miˬ zaˬ yo zaˬ-ahˇ duˇ-eu meh.

⁵ Miˬ daꞈ zaˬ daꞈ sheuˬ dahˬ dzaˬ-eu loꞈ-ehˇ, nawˬ-ahˇ beh-euˬ gʼaˬ nawˬ-ahˇ sheuˬ dahˬ dzaˬ tehꞈ-a. Miˬ zaˬ yo zaˬ tiˬ gʼaˬ tiˇ gʼaˬ nui kʼahˇ jaˆ-eu loꞈ-ehˇ, nawˬ-euˬ Miˬyehˇ kʼawꞈ nawˬ-ahˇ nui kʼahˇ jaˆ tehꞈ-a.

⁶ Yeˬluˇsaˬlehˬ meuˬ-oˇ, nawˬ-euˬ meuˬ lahˇ kʼoeˇ taˆ, meuˬ-ahˇ loꞈ piˇ-eu tsawˇ haˬ ngaˇ pyehˬ taˬ-eu ma. Uˬ ciꞈ nah gʼahˇ maˬ ehˇ aˬ yawꞈ maꞈ ciˬ cuˇ ni maˬ ya jawˇ-ehˇ, Sahˬpaˬ Miˬyehˇ aˬ yawꞈ-euˬ saˇ jaˇ-ahˇ maˬ ya ngehˇ ni, maˬ naˬ leˇ ni ya ehˇ noeˬ nehˬ-eu meh.

⁷ Yeˬluˇsaˬlehˬ meuˬ-ahˇ aˬ yawꞈ paˇ laˆ ziꞈ-awˇ, miˇ tsaˬ dawˬ tawˆ luꞈ ya ja ceuˬ-eu meuˬ maˬ bi pyeuꞈ laˇ kʼoeˇ keuˆ, aˬ yawꞈ maꞈ aˬ yawꞈ-ahˇ gʼaˬ naˬ maˬ bi naˬ-a.

⁸ Sahˬpaˬ Miˬyehˇ heu loꞈ-ehˇ saˇ jaˇ dzaˬ taˬ-euˬ jaˆ-awˇ, aˬ yawꞈ-euˬ baoˬ zmˬ-awˇ saˇ jaˇ kʼoeˇ bi byah laˇ tehꞈ-a. “Muiˇ-eu deuˬ-ahˇ naw maꞈ-euˬ cehˇ maˬ paˇ bi dzaˬ ma. Boeˇ miˬ siˬ kʼaˬ deuˬ-ahˇ naw maꞈ-eu aˬ gaꞈ dzaˇ uiˇ maˬ paˇ bi dawˇ ma.

⁹ Ehˇ kʼawꞈ, cehˇ ka-awˇ yehˬ-euˬ deuˬ pyeuꞈ-eu naw maꞈ, cehˇ meu kaˬ muˇ dzaˬ-awˇ Sahˬpaˬ Miˬyehˇ-ahˇ ya ja ceuˬ tehꞈ-a. Aˬ gaꞈ yaˇ kmˇ laˆ saˆ-awˇ aˇ siˬ pyaˆ uiˬ-eu naw maꞈ, Uˬ duˬ tahˬ nymˇ nymˇ ma pu ka aˬ gaꞈ dzaˇ uiˇ ya dawˇ tehꞈ-a.”

¹⁰ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ tsawˇ haˬ deuˬ gʼoꞈ laˇ-eu gʼaˇ duˬ, meuˬ laꞈ nyiˇ doˆ-iˇ-awˇ gaˇ ma shaˇ dahˇ nehˬ-awˬ. Gaˇ jawˬ jawˬ ma shaˇ dahˇ nehˬ-awˇ, kʼaˬ lo maˬ bi tsoeˬ ni ngawˬ dzeh jiˇ-awˇ, miˇ kʼahˬ tsawˇ jeuˬ deuˬ siˬ nya ni byaꞈ byaꞈ taˬ-awˬ.

¹¹ Miˇ tsaˬ dawˬ tawˆ luꞈ-ahˇ Sahˬpaˬ Miˬyehˇ heu loꞈ-ehˇ ehˇ luꞈ meh. “Naw maꞈ-ahˇ ka kʼoꞈ-eu gʼaˇ duˬ, aˬ yawꞈ neh ka kʼoꞈ doˆ laꞈ-euˬ tsawˇ haˬ deuˬ-ahˇ sheuˬ-awˇ, Sahˬpaˬ Miˬyehˇ oe luꞈ meh lehˇ, Yeˬluˇsaˬlehˬ tsawˇ haˬ-ahˇ ehˇ nehˬ-awˬ.”

¹² “Miˬyehˇ-euˬ muiˬ-eu shawˇ-eu tsawˇ jeuˬ” lehˇ, “Sahˬpaˬ Miˬyehˇ neh ka kʼoꞈ nehˬ-euˬ tsawˇ jeuˬ” lehˇ, aˬ cawˬ naw maꞈ-ahˇ kuˇ tehꞈ-a. “Miˬyehˇ gaˬ-eu meuˬ” lehˇ, “Miˬyehˇ maˬ byehˇ dzeh-eu meuˬ” lehˇ, Yeˬluˇsaˬlehˬ meuˬ-ahˇ ya kuˇ tehꞈ-a.