Iˇsaˬyaˇ 6 - Akha

Iˇsaˬyaˇ-ahˇ Miˬyehˇ tseˇ doˆ-euˬ

¹ Sahˬ paˬ Awˇziˇ shiˇ ngeh kʼoꞈ, Sahˬpaˬ Miˬyehˇ-ahˇ ngaˇ mawˇ-euˬ ma. Aˬ yawꞈ-euˬ nuiˇ mahˬ-ahˇ nuiˇ-awˇ, aˬ yawꞈ-ahˇ ciˬ huiˬ ciˬ mahˇ nehˬ-euˬ meh. Aˬ yawꞈ-euˬ pehˇ kʼahˬ pehˇ mahˇ Uˬ duˬ tahˬ nymˇ nymˇ ma ma lah-ehˇ byah-eu meh.

² Seˬlaˬpeˬ lehˇ kuˇ-eu mˬ taˆ gʼaˬ kʼehˇ tiˬ deuˬ, aˬ yawꞈ-euˬ tiˬ jawˬ jawˇ-eu meh. Mˬ taˆ gʼaˬ kʼehˇ kʼoeˇ deuˬ aˬ dahˇ koꞈ dahˇ tsoꞈ-awˇ, myaˆ pyawˬ-ahˇ nyiˬ dahˇ, bawˇ kʼahˇ-ahˇ nyiˬ dahˇ dehˬ kaˬ-awˇ, nyiˬ dahˇ-aˬ, zaw-eu gʼaˇ duˬ zmˬ-eu meh.

³ Aˬ yawꞈ maꞈ tiˬ gʼaˬ tiˇ gʼaˬ heu loꞈ-ehˇ guˇ cawˬ-eu meh. “Baoˬ huiˬ-eu Sahˬpaˬ Miˬyehˇ-aˬ, muiˬ-eu shawˇ-eu meh. Muiˬ-eu shawˇ-eu meh. Muiˬ-eu shawˇ-eu meh. Muiˬ-eu shawˇ-eu meh. Aˬ yawꞈ-euˬ yaw shehꞈ kʼahˬ sehˇ miˇ tsaˬ kʼoeˇ taˆ byah luꞈ meh.”

⁴ Aˬ yawꞈ maꞈ kʼoeˇ loꞈ-ehˇ guˇ-eu teˇ saˇ baˬ da neh, Uˬ duˬ tahˬ nymˇ nymˇ ma nyeh nyeh-ehˇ pyeuꞈ-iˇ-awˇ, Uˬ duˬ tahˬ nymˇ nymˇ ma laꞈ kʼoeˇ uˬ kʼoeˬ byah-eu meh.

⁵ Ngaˇ heu loꞈ-ehˇ ehˇ-euˬ ma. “Ngaˇ noeˬ tmˬ kʼaˇ maˬ paˇ za miˇ-a. Ngaˬ-euˬ kʼaˬ meh-ahˇ neh kʼaˇ doˆ le-euˬ dawˬ yawˬ dawˬ na luꞈ iˬ baˇ ahˇ-eu uˬ taꞈ, iˬ baˇ ahˇ-eu dawˬ tehꞈ-ehˇ ngehˬ-eu tsawˇ haˬ deuˬ nehˬ-ehˇ ngaˇ jawˇ luꞈ-eu miˇ neh, ngaˇ iˬ baˇ naꞈ dui dui miˇ-a. Ehˇ kʼawꞈ, Baoˬ huiˬ-eu Sahˬpaˬ Miˬyehˇ pyeuꞈ-eu Sahˬ paˬ-ahˇ, ngaˬ-euˬ myaˆ nuiˆ neh ya mawˇ duˬ-euˬ ma.”

⁶ Kʼoeˇ ngeh, Seˬlaˬpeˬ mˬ taˆ gʼaˬ kʼehˇ kʼoeˇ tiˬ gʼaˬ, lawˇ duˬ kʼoeˇ taˆ ciˆ nyawˆ neh tehˬ doˆ-euˬ neˇ hoˬ ni doꞈ luꞈ-eu miˬ dzaˬ miˬ jiˆ yuˇ-awˇ, ngaˇ jawˇ gaˇ zaw ka leꞈ-euˬ meh.

⁷ Ngaˬ-euˬ mehˬ luꞈ-ahˇ, doꞈ luꞈ-eu miˬ dzaˬ miˬ jiˆ kʼoeˇ neh aˬ yawꞈ toeˬ ciˆ-awˇ, “Nawˬ-euˬ mehˬ luˬ-ahˇ miˬ dzaˬ miˬ jiˆ heu neh toeˬ ciˆ gʼaˬ shaw-euˬ baˬ da neh, nawˬ-euˬ yaw lehˬ yaw ca jeˬ tsiˬ shawˇ dzeh-awˇ, nawˬ-ahˇ iˬ baˇ pyehˬ nehˬ gʼaˬ-euˬ meh” lehˇ ehˇ-eu meh.

⁸ Kʼoeˇ ngeh, “Aˬ suˇ gʼaˬ-ahˇ pyehˬ gʼeh nmˇ. Aˬ suˇ gʼaˬ aˬ dui gʼaˇ duˬ ngehˬ dah-iˇ nmˇ” lehˇ Sahˬpaˬ Miˬyehˇ ehˇ-eu ngaˇ ya gaˬ-awˇ, “Ngaˇ iˇ ma. Ngaˬ-ahˇ pyehˬ gʼeh-awˬ” lehˇ ehˇ kʼoꞈ nehˬ-euˬ ma.

⁹ Kʼoeˇ naˇ, “Tsawˇ jeuˬ kʼoeˇ jeuˬ-ahˇ heu loꞈ-ehˇ ehˇ nehˬ-iˇ-awˬ” lehˇ aˬ yawꞈ ngaˬ-ahˇ ehˇ-eu meh. “Gaˬ-eu nui paw ya gaˬ kʼawꞈ, maˬ gʼoˆ shaw nya-a. Mawˇ-eu nui paw ya mawˇ kʼawꞈ, maˬ siˬ duˬ nya-a.

¹⁰ Tsawˇ haˬ heu deuˬ nui ma bi gʼahˇ-awˇ, naˬ bawˇ bi tuˇ-eu uˬ taꞈ, myaˆ nuiˆ laˆ behꞈ nehˬ-awˬ. Toˆ-ehˇ maˬ ngeuˇ naˇ, aˬ yawꞈ maꞈ myaˆ nuiˆ haw mawˇ nya-awˇ, naˬ bawˇ gaˬ leˇ-eu uˬ taꞈ, aˬ yawꞈ maꞈ-euˬ nui ma gʼoˆ shaw geuꞈ nya-eu miˇ neh, ngaˇ jawˇ gaˇ gʼoꞈ kʼoꞈ laˇ-awˇ, naˇ gawˇ taˬ leˇ tehꞈ-a.”

¹¹ “Aˇ myah keuˆ ni kʼoeˇ loꞈ-ehˇ jahˇ nehˬ nmˇ” lehˇ, Sahˬpaˬ Miˬyehˇ-ahˇ ngaˇ naˇ haˬ ngeh, heu loꞈ-ehˇ ehˇ kʼoꞈ nehˬ laꞈ-euˬ meh. “Meuˬ deuˬ cawˆ-iˇ jiˇ-awˇ, tsawˇ haˬ tiˬ gʼaˬ-iˬ maˬ jawˇ-ehˇ pyeuꞈ-iˇ ngeh keuˆ ni, nymˇ laꞈ kʼoeˇ tsawˇ haˬ tiˬ gʼaˬ-iˬ maˬ ya mawˇ-ehˇ, miˇ kʼahˬ kʼahˬ lah-ehˇ ciˬ cuˇ ni pyeuꞈ-iˇ ngeh keuˆ ni, kʼoeˇ loꞈ-ehˇ jahˇ nehˬ ma.

¹² Tsawˇ haˬ kʼoeˇ deuˬ-ahˇ gaˇ mahˇ kaˬ gaˇ Sahˬpaˬ Miˬyehˇ teh dzeh-awˇ, miˇ kʼahˬ kʼoeˇ kʼahˬ doe ni, byehˇ dzeh yaꞈ-euˬ jawˇ duˬ gʼawˬ mya ni jaˆ tehꞈ-a.

¹³ Tseˇ pu-ahˇ tiˬ pu dzeˇ yaꞈ-euˬ kʼawꞈ, paˇ bi puiˆ byoˆ jiˇ tehꞈ-a. Ehˇ kʼawꞈ, tsuiꞈ kaˆ aˇ bawˇ bi tuˇ dzeh ngeh, tsuiꞈ kaˆ sahˬ nyiꞈ tsawˬ tuˇ-ehˇ jaˆ yaꞈ-euˬ loꞈ-ehˇ, muiˬ-eu shawˇ-eu tsawˇ haˬ aˇ yoeˬ, miˇ kʼahˬ kʼoeˇ kʼahˬ laꞈ kʼoeˇ sahˬ nyiꞈ loꞈ-ehˇ dzeˇ yaꞈ tehꞈ-a.” (Sahˬ nyiꞈ-euˬ dawˬ tsuiꞈ-aˬ, Miˬyehˇ-euˬ tsawˇ haˬ yaw shuiꞈ dehꞈ tuˇ laˇ gaˇ ehˇ mawꞈ-eu meh.)