Iˇsaˬyaˇ 58 - Akha

Maˬ dzaˬ-eu zahˇ jahˇ byah-eu

¹ Sahˬpaˬ Miˬyehˇ heu loꞈ-ehˇ ehˇ-eu meh. “Nawˇ kʼaˇ guˇ doˆ coeˇ-eu guˇ-awˇ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ, aˬ yawꞈ maꞈ-euˬ iˬ baˇ gaˇ kawˆ-ehˇ gaˬ nehˬ-awˬ.

² Aˬ yawꞈ maꞈ yawˬ nah na ngaˬ-ahˇ uˬ duˬ tahˬ-eu laꞈ kʼoeˇ, ngaˬ-euˬ zahˇ dawˬ kʼoꞈ dawˬ-ahˇ naˇ haˬ-awˇ, ngaˬ-euˬ gaˇ ma siˬ mawꞈ dui dui nya lehˇ ehˇ luꞈ-eu meh. Tsaˬ-eu zahˇ dawˬ kʼoꞈ dawˬ ngaˬ neh bi biꞈ mawꞈ-awˇ, ngaˬ-ahˇ uˬ duˬ tahˬ-eu nui kʼahˇ shiˇ miˇ-a lehˇ, aˬ yawꞈ maꞈ ehˇ-eu meh.”

³ Aˬ yawꞈ maꞈ ehˇ-eu, “Sahˬpaˬ Miˬyehˇ yaw muiˬ maˬ no laꞈ gaˇ, aˬ jeˬ miˇ neh aˬ dui maˬ dzaˬ-eu zahˇ jahˇ-eu. Aˬ yawꞈ maˬ haw cawˬ nehˬ laꞈ gaˇ, aˬ jeˬ miˇ neh aˬ dui dzaˇ maˬ dzaˬ ni dzahˬ-eu.” Aˬ yawꞈ maꞈ-ahˇ Sahˬpaˬ Miˬyehˇ ehˇ-eu , “Gaˇ kawˆ heu loꞈ-ehˇ jaˆ-eu meh. Naw maꞈ maˬ dzaˬ-eu zahˇ jahˇ kʼawꞈ, yawˬ ha nui noeˬ tehꞈ-ehˇ geuꞈ-awˇ, naw maꞈ-euˬ gaˇ mˇ zaˬ deuˬ ahˇ kʼehˬ luꞈ-eu meh.

⁴ Naw maꞈ maˬ dzaˬ-eu zahˇ jahˇ luꞈ-eu heu, iˬ dehˬ iˬ ceh bi doˆ laˇ-eu gaˇ kawˆ tehꞈ meh. Naw maꞈ maˬ dzaˬ-eu zahˇ heu loꞈ-ehˇ jahˇ-eu baˬ da neh, naw maꞈ shaˇ dawˬ ngaˇ naˇ haˬ meh lehˇ noeˬ te loˇ.

⁵ Naw maꞈ maˬ dzaˬ-eu zahˇ jahˇ ngeh, yawˬ ha gʼawˇ mawˇ bi shaˬ bi zahˬ-eu meh. Uˬ jiˇ uˬ paꞈ loꞈ-ehˇ naw maꞈ-euˬ uˬ duˬ awˆ moꞈ-awˇ, guˬ daˇ pehˇ zeuˇ kʼawˬ-awˇ kʼaˬ lehˇ tawˆ daˆ taˬ-euˬ kʼoeˇ taˆ, naw maꞈ ga-awˇ maˬ dzaˬ ni dzahˬ-eu meh. Kʼoeˇ loꞈ-ehˇ mˇ gaˇ maˬ dzaˬ-eu zahˇ jahˇ-eu lehˇ kuˇ te loˇ. Kʼoeˇ loꞈ-ehˇ jahˇ gaˇ ngaˇ nui kʼahˇ shiˇ meh lehˇ noeˬ te loˇ.

⁶ “Ngaˇ geuꞈ mawꞈ-eu maˬ dzaˬ-eu zahˇ heu loꞈ-ehˇ ma. Kʼehˬ-eu kʼaˆ-eu shmˇ caˆ hawˇ-eu maˬ tsaˬ maˬ dawˇ-eu kʼaˆ baꞈ deuˬ, dawˬ tawˆ biˬ dzeh jiˇ-awˇ, kʼehˬ-eu kʼaˆ-eu jeˬ-ahˇ ya daˬ-eu tsawˇ haˬ deuˬ, dawˬ tawˆ puiˇ pyehˬ jiˇ-awˬ.

⁷ Hawˬ mehꞈ shaˬ-eu deuˬ-ahˇ hawˬ biˇ nehˬ-awˇ, nymˇ jiˇ maˬ baw-eu tsawˇ haˬ deuˬ gʼaˇ duˬ, nawˬ-euˬ nymˇ laˇ gʼoˆ pah taˬ-awˬ. Mehˬ tsoeˬ maˬ jaˆ-eu deuˬ-ahˇ mehˬ tsoeˬ biꞈ nehˬ-awˇ, yawˬ ha-euˬ aˬ yuiꞈ aˬ nyiˇ-ahˇ ngehˬ maˬ gʼeh ni taˬ byehˇ.

⁸ “Kʼoeˇ loꞈ-ehˇ mˇ naˇ, uˬ shawˬ bya-eu nahˇ ma yaw shehꞈ loꞈ-ehˇ, ngaˇ nui ma tsaˬ-eu jeˬ nawˬ-euˬ kʼoeˇ taˆ bya-awˇ, naw maꞈ-euˬ naˇ gawˇ yaw kawˇ-ehˇ taˬ leˇ tehꞈ-a. Naw maꞈ-ahˇ ka kʼoꞈ-eu gʼaˇ duˬ, naw maꞈ dawˬ peh ngaˇ aˬ myah luꞈ jawˇ-eu miˇ neh, guˆ-eu gaˆ-eu jeˬ-ahˇ yawˬ paw na luꞈ dzeuˇ-iˇ tehꞈ-a.

⁹ Naw maꞈ guiˬ lahˬ shaˇ ngeh ngaˇ naˇ haˬ-awˇ, naw maꞈ ngaˬ-ahˇ kuˇ ngeh ngaˇ naˬ bawˇ ciˬ kʼmˇ ma. “Naw maꞈ aˬ cawˬ-ahˇ kʼehˬ-eu jeˬ byehˇ-awˇ, aˬ cawˬ-ahˇ yehˬ bawˬ-ehˇ maˬ gʼeh-eu uˬ taꞈ, dawˬ doeˇ maˬ paˇ ngehˬ ni dehꞈ naˇ,

¹⁰ mehꞈ-eu shuꞈ-eu deuˬ-ahˇ naw maꞈ dzaˬ dzaˬ dawˇ dawˇ biꞈ-awˇ, shaˬ-eu zahˬ-eu tsawˇ haˬ deuˬ-ahˇ ngehˬ gʼeh nehˬ naˇ, naw maꞈ tiˬ jawˬ jaˆ-eu yaw zahˇ dawˬ tawˆ, nah gʼahˇ loꞈ-ehˇ bya laˇ tehꞈ-a.

¹¹ Kʼoeˇ naˇ naw maꞈ-ahˇ ngaˇ aˬ myah luꞈ sheuˬ gʼeh-awˇ, muiˬ-eu guiˬ lahˬ shehˬ byah lawˇ byah nehˬ-eu laꞈ kʼoeˇ, gʼoeˇ mˇ-awˇ jawˇ saˇ bi doˆ-eu miˇ neh, iˇ cuꞈ tiˬ byah za-eu yaˇ kmˇ hawˇ-eu, maˬ tsiˇ leˇ-eu lawˇ gawˆ-ahˇ naw maꞈ duˇ tehꞈ-a.

¹² Aˇ hu ba neh cawˆ-iˇ dzeuˇ-euˬ jeˬ-ahˇ, dawˬ pehˬ yaw oeˇ aˬ yawꞈ kʼoeˇ taˆ, nawˬ-euˬ tsawˇ haˬ deuˬ paˇ tsoꞈ ziꞈ leˇ tehꞈ-a. Byaˆ-iˇ taˬ-euˬ meuˬ lahˇ paˇ gawˬ ziꞈ-awˇ, nymˇ yaw cawˆ deuˬ paˇ tsoˆ muiˬ-eu tsawˇ haˬ nga lehˇ, aˬ cawˬ naw maꞈ-ahˇ kuˇ tehꞈ-a.”

Jawˇ nah-ahˇ lah-eu daw-eu guiˬ lahˬ

¹³ Sahˬpaˬ Miˬyehˇ heu loꞈ-ehˇ ehˇ-eu meh. “Jawˇ nah muiˬ-eu shawˇ-eu meh lehˇ siˬ-awˇ, yawˬ ha-euˬ nui kʼahˇ maˬ poˆ ni jawˇ-eu uˬ taꞈ, ngaˬ-euˬ nah muiˬ nah shawˇ-ahˇ taˬ huiˬ-eu laꞈ kʼoeˇ, maˬ mˇ maˬ shaˇ maˬ iˇ maˬ laˇ tsehˆ ni jawˇ-awˇ, maˬ muiˬ dawˬ doeˇ maˬ ngehˬ maˬ tmˇ doˆ ni jawˇ naˇ,

¹⁴ ngaˬ-euˬ nui kʼahˇ poˆ-eu miˇ neh za-eu, laˬ kʼaˬ cehˇ-eu jeˬ naw maꞈ za tehꞈ-a. Miˇ tsaˬ kʼoeˇ taˆ yawˬ gaˇ na luꞈ, aˬ cawˬ naw maꞈ-ahˇ taˬ huiˬ ni ngaˇ caw ba-awˇ, naw maꞈ-euˬ aˬ poeˬ Yaˬkoˆ-ahˇ ngaˇ biꞈ taˬ-euˬ miˇ kʼahˬ laꞈ kʼoeˇ, naw maꞈ laˬ kʼaˬ tiˬ cehˇ ya jawˇ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”