Iˇsaˬyaˇ 57 - Akha

Tahˬ pahˬ aˬ ma mawˇ kawˇ-ahˇ uˬ duˬ tahˬ-eu deuˬ ya shaˬ ya zahˬ tehꞈ-a

¹ Tsawˇ muiˬ deuˬ shiˇ-euˬ gaˇ, noeˬ keuˆ-eu tsawˇ haˬ maˬ jawˇ-a. Ehˇ kʼawꞈ, aˬ yawꞈ maꞈ shiˇ ngeh jawˇ, guˆ-eu gaˆ-eu jeˬ maˬ laˆ tsoeˬ nya-a.

² Dehꞈ ngeh muiˬ-euˬ tsawˇ haˬ kʼoeˇ deuˬ, shiˇ ngeh yaw saˇ oꞈ-awˇ gʼaˬ doeˇ ya naˬ dah meh.

³ Ehˇ kʼawꞈ, jaˬ nehꞈ hawˇ-eu meh maˬ laˇ-euˬ zaˬ-ahˇ duˇ-awˇ, aˬ cawˬ miˬ zaˬ gʼawˇ-eu deuˬ-euˬ zaˬ-ahˇ duˇ-eu, iˬ baˇ mˇ-eu naw maꞈ heu gaˇ laˇ sheˇ.

⁴ Aˬ suˇ gʼaˬ-ahˇ naw maꞈ cehꞈ lehꞈ ka te. Aˬ geu gʼaˬ-ahˇ naw maꞈ mehˬ laˇ cawˬ doˆ nehˬ-awˇ, aˬ jaꞈ jaꞈ niˇ gʼaˬ te. Naw maꞈ smˇ kʼoeˬ tahˇ joe-euˬ zaˬ maˬ ngeuˇ te loˇ.

⁵ Miˇ muiˬ bi muiˬ laˇ-eu miˬ yehˇ ma-ahˇ uˬ duˬ tahˬ-awˇ, muiˬ-eu shawˇ-eu aˇ bawˇ uˬ moˆ kʼaˬ miˬ sheu luꞈ-eu meh. Lawˇ baˬ dawˬ peh jaˆ-eu lo kʼahˬ laꞈ kʼoeˇ, naw maꞈ-euˬ zaˬ sehꞈ-awˇ lawˇ nehˬ shehˇ nehˬ-euˬ meh.

⁶ Kʼoeˇ gaˇ jaˆ-eu kʼaˬ lo lo juˇ naw maꞈ gʼoˆ-awˇ, miˬ yehˇ bi geuꞈ-awˇ uˬ duˬ tahˬ-euˬ meh. Aˬ gaꞈ dzaˇ uiˇ hawˇ-eu dzaˬ la gʼo cehˇ lawˇ nehˬ-eu jeˬ, kʼaˬ lo kʼoeˇ deuˬ-ahˇ naw maꞈ lawˇ nehˬ-euˬ maˬ ngeuˇ te loˇ. Naw maꞈ kʼoeˇ loꞈ-ehˇ mˇ luꞈ shaˇ luꞈ gaˇ, ngaˇ nui kʼahˇ shiˇ tehꞈ-a lehˇ noeˬ te loˇ.

⁷ Lawˇ-eu shehˇ-eu gʼaˇ duˬ hawˇ-eu kʼaˬ miˬ sheu-eu gʼaˇ duˬ, gawˬ jawˬ yaw goˇ-ahˇ naw maꞈ le-euˬ meh.

⁸ Naw maꞈ-euˬ nymˇ laˇ gʼoˆ naˇ kʼah, lawˇ ciꞈ zaˬ-euˬ tahˬ pahˬ aˬ ma mawˇ kawˇ ciˬ taˬ-euˬ meh. Naw maꞈ ngaˬ-ahˇ byehˇ dzeh yaꞈ-eu laꞈ kʼoeˇ, mehˬ tsoeˬ neˇ myawˆ ni lehˆ dzeh-awˇ, jeˇ lo ni kʼawˬ taˬ-euˬ yuꞈ zaˇ kʼoeˇ taˆ, naw maꞈ nui kʼahˇ jaˆ-eu tsawˇ haˬ nehˬ-ehˇ, nui kʼahˇ tiˬ shiˇ joe taꞈ-euˬ meh.

⁹ Naw maꞈ tsiˇ yaw saw jeˬ lehꞈ-awˇ, Moˇlehˆ miˬ yehˇ jawˇ gaˇ uˬ duˬ tahˬ leˇ-euˬ meh. Miˇ kʼahˬ doe ni naw maꞈ tsawˇ haˬ pyehˬ-awˇ, shiˇ-eu miˇ kʼahˬ-ahˇ keuˆ ni bi iˇ-awˇ, uˬ duˬ tahˬ-eu gʼaˇ duˬ miˬ yehˇ bi poˆ-euˬ meh.

¹⁰ Miˬ yehˇ nui deuˬ-ahˇ poˆ poˆ-ehˇ shaˬ sehꞈ leꞈ kʼawꞈ, maˬ paˇ poˆ ma lehˇ naw maꞈ maˬ noeˬ-a. Lawˇ ciꞈ zaˬ-euˬ tahˬ pahˬ aˬ ma mawˇ kawˇ gʼaˬ lahˬ lahˬ-eu miˇ neh, gʼaˬ maˬ ya baˬ-iˇ-aˇ lehˇ naw maꞈ noeˬ-eu meh.

¹¹ Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ ngaˬ-ahˇ jaˬ myawꞈ myawꞈ-awˇ ngehˇ byoˆ coeˇ ni, naw maꞈ-ahˇ laˆ guˆ-eu miˬyehˇ kʼoeˇ deuˬ aˬ suˇ gʼaˬ-a. Ngaˇ ciˬ cuˇ ni jawˇ myahˇ laꞈ-euˬ miˇ neh, naw maꞈ ngaˬ-ahˇ maˬ paˇ taˬ huiˬ ma loˇ.

¹² Naw maꞈ yawˬ ha neh mˇ-euˬ tsaˬ ma lehˇ noeˬ meh. Ehˇ kʼawꞈ, naw maꞈ-euˬ gaˆ kawˆ ngaˇ pah doˆ jiˇ ngeh, naw maꞈ uˬ duˬ tahˬ-eu tahˬ pahˬ aˬ ma mawˇ kawˇ kʼoeˇ deuˬ, naw maꞈ-ahˇ maˬ caw ba nya-aˬ.

¹³ Caw ba nehˬ laꞈ lehˇ naw maꞈ ngoeˇ laˇ ngeh, tahˬ pahˬ aˬ ma mawˇ kawˇ kʼoeˇ deuˬ ngehˬ gʼeh luꞈ-uˇ. Jaˬ lehˇ tiˬ bahˬ laꞈ kʼoeˇ aˬ yawꞈ maꞈ byoˆ-iˇ jiˇ tehꞈ-a. Ehˇ kʼawꞈ ngaˬ-ahˇ jah-eu tsawˇ haˬ deuˬ-aˬ, miˇ kʼahˬ heu kʼahˬ laꞈ kʼoeˇ ziꞈ dah ni ya jawˇ-awˇ, Uˬ duˬ tahˬ nymˇ nymˇ ma laꞈ kʼoeˇ ngaˬ-ahˇ uˬ duˬ ya tahˬ tehꞈ-a.”

Miˬyehˇ ngehˬ gʼeh dah teˬ-eu saˇ jaˇ

¹⁴ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ jeuˬ-ahˇ ngaˇ jawˇ gaˇ gʼoꞈ laˇ-eu gʼaˇ duˬ, gaˇ jawˬ lehˬ hmˬ laˆ saˆ dahˇ-awˇ, gaˇ ma-ahˇ tsoeˬ-eu jeˬ yuˇ dzeh jiˇ-awˬ.

¹⁵ “Huiˬ-eu goˇ-eu muiˬ-eu shawˇ-eu Miˬyehˇ ngaˇ ma. Mˬ maˬ maˬ byaˆ zaˇ ziˇ ziꞈ-eu ngaˇ ma. Muiˬ-eu shawˇ-eu jawˇ duˬ yaw goˇ-ahˇ ngaˇ jawˇ kʼawꞈ, iˬ baˇ noeˬ poˆ-awˇ nahˬ yu ni gʼeh-eu deuˬ nehˬ-ehˇ ngaˇ jawˇ-awˇ, aˬ yawꞈ maꞈ noeˬ tmˬ kʼaˇ bi za-eu ma.

¹⁶ Ngaˬ-euˬ tsawˇ haˬ deuˬ-ahˇ dehꞈ-eu saꞈ laˇ biꞈ-awˇ, aˬ yawꞈ maꞈ-ahˇ ngaˇ maˬ paˇ noeˬ doeˇ-ehˇ, tiˬ jawˇ-iˬ nui ma maˬ pehˇ ma.

¹⁷ Aˬ yawꞈ maꞈ iˬ baˇ mˇ-awˇ nui kʼahˇ huiˬ gaˇ ngaˇ nui ma pehˇ-awˇ, aˬ yawꞈ maꞈ-ahˇ kʼehˬ-awˇ byehˇ dzeh-euˬ ma. Ehˇ kʼawꞈ, aˬ yawꞈ maꞈ-euˬ nui ma gʼahˇ-awˇ, yawˬ ha nui noeˬ geuꞈ-eu maˬ byehˇ dzeh-a.

¹⁸ “Aˬ yawꞈ maꞈ-euˬ dehꞈ jeˬ dehꞈ kawˆ ngaˇ siˬ jiˇ kʼawꞈ, aˬ yawꞈ maꞈ-euˬ naˇ gawˇ ngaˇ laˆ saˆ ma. Aˬ yawꞈ maꞈ-ahˇ ngaˇ sheuˬ gʼeh ngehˬ gʼeh-awˇ, tsawˇ ngoeˇ ngoeˇ luꞈ-eu deuˬ nui ma bi saˇ laˇ ma.

¹⁹ Dawˬ peh gaˇ mahˇ kʼaˇ jawˇ-eu tsawˇ haˬ-ahˇ, nui saˇ oꞈ-eu jeˬ ngaˇ biꞈ ma. Ngaˬ-euˬ tsawˇ haˬ deuˬ-ahˇ ngaˇ naˇ gawˇ laˆ saˆ ma.

²⁰ Ehˇ kʼawꞈ, haiˬ-eu tsawˇ haˬ deuˬ-aˬ, iˇ luˆ dzeh-eu maˬ naˬ leˇ-ehˇ, yaw jawꞈ yaw laꞈ beuˬ poˆ doˆ-eu laˆ shaˆ loꞈ-ehˇ, tiˬ jawˇ-iˬ yaw saˇ maˬ oꞈ-a.

²¹ Iˬ baˇ mˇ-eu tsawˇ haˬ nui saˇ maˬ oꞈ-a” lehˇ, Sahˬpaˬ Miˬyehˇ ehˇ taˬ-euˬ meh.