Iˇsaˬyaˇ 55 - Akha

Miˬyehˇ gʼawˬ shaˬ gaˬ-eu guiˬ lahˬ

¹ Sahˬpaˬ Miˬyehˇ heu loꞈ-ehˇ ehˇ-eu meh. “Iˇ cuꞈ kʼaˇ mehꞈ-eu tsawˇ haˬ deuˬ, iˇ cuꞈ jaˆ gaˇ laˇ-awˬ. Pyuˇ maˬ ahˇ-eu tsawˇ haˬ deuˬ kʼawꞈ, zeuˇ dzaˬ zeuˇ dawˇ laˇ-awˬ. Pyuˇ maˬ ahˇ-ehˇ aˇ poeˬ maˬ biꞈ nya kʼawꞈ, aˬ gaꞈ dzaˇ uiˇ hawˇ-eu mawˇ neˇ aˬ coeˇ zeuˇ dawˇ laˇ-awˬ.

² Dzaˬ-eu jeˬ maˬ ngeuˇ-eu gʼaˇ duˬ, aˬ jeˬ miˇ neh pyuˇ zmˬ dzeh te. Uˬ maˆ maˬ dehˆ-eu jeˬ gʼaˇ duˬ, aˬ jeˬ miˇ neh gʼaˬ gaˇ poeˬ zmˬ dzeh te. Ngaˬ-euˬ dawˬ-ahˇ naˇ haˬ geuꞈ-awˇ, gaˇ dahˇ tsoeˬ-eu jeˬ-ahˇ dzaˬ-awˬ. Kuiˇ-eu dzaˇ muiˬ naw maꞈ dzaˬ ngeh, naw maꞈ nui ma tmˬ jawˆ ni jaˆ tehꞈ-a.

³ “Naˬ bawˇ ciˬ kʼmˇ-awˇ ngaˇ jawˇ gaˇ laˇ-awˬ. Dehꞈ-eu saꞈ laˇ za ni naˇ haˬ laˇ-awˬ. Mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ, naw maꞈ nehˬ-ehˇ ngaˇ dzaˬ-eu ma. Daˬbiˇ-ahˇ saˇ jaˇ biꞈ taˬ-euˬ guiˬ lahˬ, naw maꞈ-ahˇ ngaˇ biꞈ ma.

⁴ Miˇ kʼahˬ tsawˇ jeuˬ deuˬ-ahˇ sheuˬ gʼeh-eu baoˬ aˬ yawꞈ-ahˇ ngaˇ biꞈ-awˇ, aˬ yawꞈ-ahˇ gʼoe-awˇ tsawˇ jeuˬ kʼoeˇ deuˬ-ahˇ, ngaˬ-euˬ baoˬ ngaˇ bi mawˇ-euˬ ma.

⁵ Boeˇ miˬ siˬ kʼaˬ tsawˇ jeuˬ deuˬ-ahˇ nawˇ dawˬ biꞈ tehꞈ-a. Dzeuˇ laˇ ngeh aˬ yawꞈ maꞈ nawˬ-ahˇ maˬ siˬ nya kʼawꞈ, nymˬ-mˇ nawˇ jawˇ paw cehˆ uˇ laˇ tehꞈ-a. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu ngaˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˬ, kʼoeˇ loꞈ-ehˇ pyeuꞈ laˇ ni mˇ ma. Taˬ huiˬ taˬ mahˇ-eu jeˬ hawˇ-eu yaw shehꞈ kʼahˬ sehˇ, naw maꞈ-ahˇ ngaˇ biꞈ ma.”

⁶ Sahˬpaˬ Miˬyehˇ-ahˇ poˆ mawˇ nya paˬ-ehˇ gʼeh ngeh poˆ-awˬ. Gaˇ mahˇ maˬ iˇ kaˬ mi naˆ-ehˇ kuˇ-awˬ.

⁷ Haiˬ-euˬ tsawˇ haˬ deuˬ dehꞈ jeˬ dehꞈ kawˆ bi paˇ-awˇ, nui noeˬ bi paˇ laˇ-awˬ. Aˬ yawꞈ maꞈ-ahˇ Sahˬpaˬ Miˬyehˇ jawˇ paw bi gʼoꞈ laˇ-awˇ, gʼawˬ shaˬ bi haw gaˬ-awˬ. Aˬ yawꞈ maꞈ Miˬyehˇ jawˇ paw gʼoꞈ laˇ ngeh, iˬ baˇ dawˬ tawˆ luꞈ-ahˇ pyehˬ nehˬ tehꞈ-a.

⁸ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ nui noeˬ hawˇ-eu naw maꞈ-euˬ nui noeˬ beu gaˇ-awˇ, ngaˬ-euˬ gaˇ ma hawˇ-eu naw maꞈ-euˬ gaˇ ma maˬ duˇ-a.

⁹ Mˬ hawˇ-eu miˇ beu-eu loꞈ-ehˇ, ngaˬ-euˬ nui noeˬ hawˇ-eu ngaˬ-euˬ gaˇ ma, naw maꞈ-euˬ nui noeˬ hawˇ-eu gaˇ ma naˆ maˬ tseˇ, huiˬ dzehˬ mahˇ dzehˬ-eu ma.

¹⁰ “Ngehˇ hawˇ-eu uˬ yehˇ mˬ taˆ neh ga le ngeh, dzaˬ-eu aˇ siˬ hawˇ-eu ka-eu aˇ nuiˆ sahˇ le nya ni, aˇ cuˬ aˇ yehˆ bi yehˆ laˇ-eu gʼaˇ duˬ, miˇ tsaˬ-ahˇ iˇ cuꞈ maˬ shehˬ nyiꞈ yaꞈ-ehˇ, maˬ gʼoꞈ daˆ leˇ kʼmˬ gaˇ duˇ ni,

¹¹ ngaˬ-euˬ kʼaˬ meh-ahˇ pyehˬ doˆ-euˬ dawˬ kʼawꞈ, ngaˬ-euˬ nui kʼahˇ mˇ byah yaꞈ-awˇ, ngaˬ neh kʼaˇ kʼehˇ-euˬ jeˬ maˬ mˇ luiˆ kʼoeˇ keuˆ ni, ngaˇ jawˇ gaˇ yawˬ ngehꞈ-ehˇ maˬ gʼoꞈ laˇ-a.

¹² “Baˬbuˇloˬ meuˬ-ahˇ neh laˬ kʼaˬ tiˬ cehˇ, naw maꞈ ya gʼoꞈ doˆ laˇ tehꞈ-a. Naw maꞈ nui ma saˇ lehˆ ni ya doˆ le tehꞈ-a. Gawˬ jawˬ gawˬ duˇ naw maꞈ mehˬ shi caˇ dawˬ caˇ-awˇ, sahˬ lahˬ aˇ bawˇ deuˬ laꞈ kʼawˆ tehˆ tehꞈ-a.

¹³ Nymˬ-mˇ aˬ gah baw duˆ uˆ luꞈ gaˇ, guˇbaˬluˇ‘Guˇbaˬluˇ aˇ bawˇ’ ehˇ-eu-aˬ, nymˇ tsoˆ gaˇ zmˬ nya-eu aˇ bawˇ yaw gʼahˇ tiˬ jeˬ pyeuꞈ-awˇ, haw muiˬ dui dui-eu meh.* aˇ bawˇ dehꞈ byah tehꞈ-a. Nymˬ-mˇ myahˬ kaꞈ baw duˆ nawˆ-eu tsahˇ-ahˇ muˇduˇleˬMuˇduˇleˬ bawˇ ehˇ-eu-aˬ, Heˬbyehˇ dawˬ Haˬdaˆ aˇ bawˇ lehˇ kuˇ-eu aˬ bawˇ tiˬ jeˬ meh. Nyiˬ lmˇ byah ni goˇ-awˇ, lawˇ baˬ gawˆ taw dehꞈ myaˬ-eu meh. Aˬ myah luꞈ aˇ paꞈ nyoeˇ jawꞈ ni jaˆ-awˇ, aˇ yehˆ yaw ba, aˇ siˬ yaw naˆ meh. Sehˬ gʼawˆ-euˬ bawˬ-iˬ gʼeh ngeh aˇ paꞈ kʼoeˇ zmˬ-eu meh.* aˇ bawˇ jeˬ laˇ tehꞈ-a. Heu-aˬ, Sahˬpaˬ Miˬyehˇ pyeuꞈ-eu ngaˬ neh mˇ-euˬ gaˇ-ahˇ bi noeˬ mawˇ-eu gʼaˇ duˬ, mˬ maˬ maˬ byaˆ zaˇ ziˇ ziꞈ-eu bi siˬ bi mawˇ-eu tiˬ jeˬ pyeuꞈ-eu ma.”