Iˇsaˬyaˇ 48 - Akha

Miˬyehˇ-aˬ, aˬ kaˇ kaˇ ziˇ-euˬ Sahˬpaˬ Miˬyehˇ meh

¹ Yuˇdaˆ-euˬ zaˬ deuˬ uˆ deuˬ pyeuꞈ-eu, Iˇsaˬleˬlaˆ tsawˇ haˬ deuˬ heu gaˇ naˇ haˬ-awˬ. Sahˬpaˬ Miˬyehˇ tsawˇ myahˇ uˬ moˆ naw maꞈ kamˬ-awˇ, Iˇsaˬleˬlaˆ-euˬ Miˬyehˇ-ahˇ uˬ duˬ tahˬ ma lehˇ ehˇ-euˬ meh. Ehˇ kʼawꞈ ehˇ taˬ-euˬ loꞈ-ehˇ maˬ jaˆ-a.

² Ehˇ kʼawꞈ, nawˇ kʼahˬ sehˇ jehˆ-eu laꞈ kʼoeˇ, muiˬ-eu shawˇ-eu meuˬ-ahˇ jawˇ-eu tsawˇ haˬ pyeuꞈ-awˇ, Baoˬ huiˬ-eu Sahˬpaˬ Miˬyehˇ lehˇ myahˇ taˬ-euˬ, Iˇsaˬleˬlaˆ Miˬyehˇ-ahˇ gʼoe luꞈ ma lehˇ ehˇ-eu meh.

³ Iˇsaˬleˬlaˆ-ahˇ Sahˬpaˬ Miˬyehˇ ehˇ-eu, “Pyeuꞈ dzeuˇ-euˬ gaˇ kawˆ deuˬ aˇ hu ba neh ngaˇ ehˇ taˬ-awˇ, ja pyuˬ ni bi pyeuꞈ laˇ-euˬ ma.

⁴ Naw maꞈ nui ma gʼahˇ tehꞈ-a lehˇ ngaˇ siˬ duˬ taˬ-euˬ ma. Shmˇ loꞈ-ehˇ gʼahˇ-awˇ guiˬ shuiˇ loꞈ-ehˇ nehˬ-eu, ngaˇ siˬ dzeuˇ taˬ-euˬ ma.

⁵ Nawˬ-euˬ mehˬ shi kʼaˇ pyeuꞈ laˇ-euˬ dawˬ tawˆ, aˇ hu ba neh ngaˬ neh ehˇ tsehˆ taˬ jiˇ-euˬ ma. Nawˬ-euˬ tahˬ pahˬ aˬ ma mawˇ kawˇ deuˬ neh, kʼoeˇ loꞈ-ehˇ bi pyeuꞈ laˇ-eu meh lehˇ nawˇ maˬ ehˇ nya ni, kʼaˇ pyeuꞈ dzeuˇ yaꞈ-euˬ jeˬ maˬ pyeuꞈ laˇ mi naˆ-ehˇ, ngaˬ neh ehˇ kʼmˬ jiˇ taˬ-euˬ ma.

⁶ “Ngaˬ neh kʼaˇ ehˇ taˬ-euˬ pyeuꞈ laˇ jiˇ-euˬ miˇ neh, ngaˬ neh ngehˬ dzeuˇ-euˬ dawˬ tsaˬ-eu gaˇ kawˆ, nawˇ aˬ jeˬ ehˇ kʼaˇ paˇ za te. Nymˬ-mˇ poˆ jawˇ, aˬ kaˇ pyeuꞈ laˇ-eu gaˇ kawˆ deuˬ, dzeuˇ laˇ ngeh ngaˇ maˬ pah mehˬ-euˬ gaˇ kawˆ kʼoeˇ deuˬ, nawˬ-ahˇ ngaˇ paˇ ehˇ nehˬ-eu ma.

⁷ Nymˬ-mˇ hawˇ-eu gaˇ kawˆ kʼoeˇ deuˬ bi pyeuꞈ doˆ laˇ-euˬ ma. Dzeuˇ laˇ ngeh kʼoeˇ loꞈ-ehˇ gʼeh-eu jeˬ maˬ pyeuꞈ laˇ haw-aˬ. Dzeuˇ laˇ ngeh pyeuꞈ yaꞈ-euˬ gaˇ kawˆ pyeuꞈ law nmˇ-aˬ, gaˇ kawˆ heu nawˇ siˬ jiˇ ma lehˇ ehˇ tehꞈ-a.

⁸ Nawˬ-ahˇ maˬ jah coeˇ-eu ngaˇ siˬ nya ma. Dehꞈ le ngeh neh ngaˬ-ahˇ puiˬ-eu tsawˇ haˬ lehˇ bi kuˇ-euˬ meh. Kʼoeˇ miˇ neh gaˇ kawˆ heu nawˇ tiˬ jawˇ-iˬ maˬ ya gaˬ haw-ehˇ, nawˬ-euˬ naˬ bawˇ-ahˇ dawˬ tiˬ dawˬ-iˬ maˬ ahˇ leˇ haw-aˬ.

⁹ “Ngaˬ-euˬ tsawˇ myahˇ baˬ da neh nui pehˇ ngaˇ dzahˬ tehˬ-awˇ, ngaˬ-ahˇ ja ceuˬ-eu jeˬ baˬ da neh ngaˇ oˇ oꞈ-awˇ, nawˬ-ahˇ maˬ laˆ cawˆ ni taˬ nehˬ-euˬ ma.

¹⁰ Pyuˇ-ahˇ miˬ dzaˬ neh lawˬ haw-eu loꞈ-ehˇ, guˆ-eu gaˆ-eu miˬ dzaˬ laꞈ kʼoeˇ, nawˬ-ahˇ ngaˇ lawˬ haw-awˇ, nawˇ gaˇ dahˇ maˬ tsoeˬ-eu laˆ duˬ-euˬ ma.

¹¹ Ngaˬ neh mˇ-euˬ jeˬ ngaˬ-euˬ gʼaˇ duˬ ma. Ngaˬ-euˬ tsawˇ myahˇ cawˆ-eu jeˬ ngaˇ maˬ mˇ. Ngaˬ-euˬ yaw shehꞈ kʼahˬ sehˇ-ahˇ nui gʼaˬ maˬ bi taꞈ. Maˇ maˇ ni ngaˇ tiˬ gʼaˬ gʼaˇ duˬ tehꞈ ma.”

Sahˬpaˬ Miˬyehˇ tseˇ doˆ-euˬ aˬ yuiꞈ aˬ tsu pyeuꞈ-eu Guˇluˆ

¹² Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ neh kuˇ doˆ taˬ-euˬ Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ. Aˇ dahˬ beh-awˇ aˇ saˬ saˬ-eu Miˬyehˇ ngaˇ ma. Ngaˇ tiˬ gʼaˬ tehꞈ-ehˇ Miˬyehˇ ma.

¹³ Miˇ tsaˬ dawˬ pehˬ-ahˇ ngaˬ-euˬ aˬ laꞈ neh tehˆ-awˇ, mˬ-ahˇ aˇ maˇ laꞈ neh toˆ pyeh-euˬ ma. Mˬ hawˇ-eu miˇ-ahˇ ngaˇ dawˬ biꞈ ngeh, tiˬ poˆ tehꞈ-ehˇ jaˆ le-euˬ meh.

¹⁴ “Naw maꞈ dawˬ tawˆ uiˬ laˇ-awˇ naˇ haˬ-awˬ. Ngaˬ neh tseˇ doˆ-euˬ gʼaˬ Baˬbuˇloˬ meuˬ-ahˇ deuˆ meh lehˇ, ehˇ tsehˆ nya-eu miˬ yehˇ tiˬ gʼaˬ-iˬ maˬ jawˇ-a. Ngaˇ kʼaˇ bi mˇ mawꞈ-eu jeˬ-ahˇ, ngaˬ neh tseˇ doˆ-euˬ kʼoeˇ gʼaˬ mˇ tehꞈ-a.

¹⁵ Aˬ yawꞈ-ahˇ dawˬ ngehˬ-awˇ kuˇ doˆ-euˬ gʼaˬ ngaˇ ma. Ngaˇ aˬ yawꞈ-ahˇ sheuˬ gʼeh nehˬ-euˬ miˇ neh, aˬ yawꞈ kʼaˇ mˇ kʼaˇ pyeuꞈ pyeuꞈ leˇ tehꞈ-a.

¹⁶ “Ngaˬ-euˬ dawˬ peh jiˆ tuˆ laˇ-awˇ ngaˇ ehˇ gaˇ naˇ haˬ-awˬ. Aˇ dahˬ beh ngeh neh ngaˇ bya cehˆ ni ehˇ taˬ-euˬ jaˆ-awˇ, ngaˬ neh kʼaˇ ehˇ-euˬ jeˬ bi pyeuꞈ jiˇ laˇ-euˬ ma.” (Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ nymˬ-mˇ ngaˬ-ahˇ aˬ yawꞈ-euˬ baoˬ biꞈ nehˬ laꞈ-awˇ ngaˬ-ahˇ pyehˬ gʼeh leꞈ-euˬ meh.)

Aˬ yawꞈ-euˬ tsawˇ haˬ deuˬ gʼaˇ duˬ Sahˬpaˬ Miˬyehˇ-euˬ nui noeˬ

¹⁷ Naw maꞈ-ahˇ ka kʼoꞈ-eu Sahˬpaˬ Miˬyehˇ pyeuꞈ-eu, Iˇsaˬleˬlaˆ-euˬ muiˬ-eu shawˇ-eu Miˬyehˇ ehˇ-eu, “Ngaˇ naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Naw maꞈ gʼaˇ duˬ muiˬ ni mehˬ-awˇ tsoˆ-awˇ, naw maꞈ iˇ paˬ-ehˇ gʼeh-eu gaˇ ma mehˬ nehˬ-eu gʼaˬ ma.

¹⁸ “Ngaˬ-euˬ dawˬ-ahˇ naw maꞈ naˇ haˬ law nmˇ, maˬ gui-iˇ ni yoeˇ-eu lawˇ baˬ tiˬ gawˆ loꞈ-ehˇ, naw maꞈ gʼaˇ duˬ guiˬ lahˬ yoeˇ-awˇ, lawˇ deh-ahˇ tahˬ pymˬ-eu iˇ kʼawˇ loꞈ-ehˇ, gʼaˬ leˇ-eu jeˬ naw maꞈ za-euˬ tehꞈ-a.

¹⁹ Naw maꞈ-euˬ o neh jeuˬ le o le-euˬ zaˬ deuˬ uˆ deuˬ, kʼaˇ shuiꞈ loꞈ-ehˇ maˬ gui jiˇ coeˇ gaˇ keuˆ ni myaˬ-awˇ, aˬ yawꞈ maꞈ maˬ ya cawˆ-iˇ ni, ngaˇ kamˬ tsehˆ nehˬ-euˬ baw tehꞈ-a.”

²⁰ Baˬbuˇloˬ meuˬ laꞈ kʼoeˇ neh doˆ-iˇ-awˇ, iˇ buˬ iˇ law gʼeh-awˬ. Gaˇ kawˆ kʼoeˇ laˬ kʼaˬ cehˇ taˆ ni guˇ-awˇ, yawˬ gaˇ na luꞈ bi gaˬ doe-awˬ. “Aˬ yawꞈ-euˬ zaˬ kʼaˆ Iˇsaˬleˬlaˆ-ahˇ, Sahˬpaˬ Miˬyehˇ ka kʼoꞈ-euˬ meh” lehˇ guˇ gaˬ-awˬ.

²¹ Gui coˇ ni gʼeh-awˇ lahˇ dui dui-eu kʼaˇ shuiꞈ deh yaˇ-ahˇ, aˬ yawꞈ-euˬ tsawˇ haˬ-ahˇ Sahˬpaˬ Miˬyehˇ sheuˬ tsehˆ gʼeh ngeh, aˬ yawꞈ maꞈ-ahˇ iˇ cuꞈ maˬ bi mehꞈ-aˬ. Aˬ yawꞈ maꞈ gʼaˇ duˬ kʼaˬ lo-ahˇ iˇ cuꞈ doˆ le-euˬ meh. Kʼaˬ lo-ahˇ aˬ yawꞈ maˇ byoe bi dahˇ laˇ-awˇ, iˇ cuꞈ bi yoeˇ doˆ le-euˬ meh.

²² “Iˬ baˇ zaˬ deuˬ nui saˇ maˬ oꞈ-a” lehˇ, Sahˬpaˬ Miˬyehˇ ehˇ taˬ-euˬ meh.