Iˇsaˬyaˇ 47 - Akha

Baˬbuˇloˬ meuˬ-ahˇ yaˇ kʼaˬ daˇ-eu

¹ Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ-oˇ, dzoeˬ dzaˬ nuiˇ mahˬ kʼoeˇ taˆ zaꞈ ka le-awˇ, miˇ tsa kʼaˬ lehˇ tsahˬ-ahˇ nuiˇ-awˬ. Yaw beh nawˇ guiˇ maˬ bi deuˆ gʼaˬ haw-ehˇ, miˬ daꞈ daꞈ shuiꞈ-ahˇ duˇ-euˬ meh. Ehˇ kʼawꞈ, nawˇ nahˬ jawˆ ni maˬ paˇ gʼeh-ehˇ, nymˬ-mˇ aˬ cawˬ zaˬ kʼaˆ pyeuꞈ shaw-euˬ meh.

² Kʼaˬ lo lo lehˬ ngawˬ-awˇ cehˇ meu lehˬ-awˬ. Uˬ boeˬ lehˆ-awˇ, mehˬ tsoeˬ yaw muiˬ lehˆ-awˬ. Laˬ gʼaˬ sheu luiˆ daˆ-awˇ lawˇ baˬ tsehˆ-awˬ.

³ Nawˇ neˇ myawˆ ni jawˇ gaˇ aˬ cawˬ ya mawˇ tehꞈ-a. Nawˇ daˬ ga-awˇ shaꞈ dawˇ luꞈ gaˇ aˬ cawˬ ya mawˇ tehꞈ-a. Ngaˇ laꞈ poˆ poˆ nehˬ gaˇ laˆ tsoeˬ nya-eu gʼaˬ maˬ jawˇ-aˬ.”

⁴ Baoˬ huiˬ-eu Sahˬpaˬ Miˬyehˇ lehˇ myahˇ-euˬ, nga maꞈ-ahˇ ka kʼoꞈ-euˬ gʼaˬ-aˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ meh.

⁵ Sahˬpaˬ Miˬyehˇ ehˇ-eu, “Baˬbuˇloˬ aˬ buˇ-oˇ, yaw zahˇ laꞈ kʼoeˇ ciˬ cuˇ ni gʼeh gaˇ dzuˇ-awˬ. Tsawˇ jeuˬ dawˬ tawˆ luꞈ-euˬ sahˬ paˬ ma meh lehˇ, aˬ cawˬ nawˬ-ahˇ maˬ paˇ kuˇ meh.

⁶ Ngaˬ-euˬ tsawˇ jeuˬ-ahˇ ngaˇ nui ma pehˇ-awˇ, ngaˬ-euˬ tsawˇ haˬ maˬ paˇ sawˇ ni byehˇ dzeh nehˬ ngeh, nawˬ-euˬ baoˬ uˬ moˆ aˬ yawꞈ maꞈ-ahˇ ngaˇ bi jawˇ-euˬ ma. Kʼoeˇ ngeh aˬ yawꞈ maꞈ-ahˇ nawˇ gʼawˬ shaˬ maˬ gaˬ-ehˇ, tsawˇ mawˬ deuˬ-ahˇ kʼawꞈ yehˬ bawˬ-ehˇ jahˇ nehˬ-euˬ meh.

⁷ Aˬ myah luꞈ sahˬ paˬ ma ya geuꞈ ma lehˇ nawˇ noeˬ tmˬ-awˇ, gaˇ kawˆ heu deuˬ-ahˇ nawˇ maˬ shaˇ sawˇ ni, mehˬ hu paw pyeuꞈ laˇ-eu gaˇ kawˆ maˬ shaˇ noeˬ-a.

⁸ “Byawˬ-eu mo-eu jeˬ-ahˇ gaˬ-eu gʼaˬ-oˇ, ngaˇ ehˇ gaˇ naˇ haˬ sheˇ. Guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za lehˇ nawˇ noeˬ luꞈ meh. Miˬyehˇ naˆ ni huiˬ ma lehˇ nawˇ ehˇ-awˇ, nawˬ-ahˇ duˇ-eu gʼaˬ maˬ jawˇ-a lehˇ ehˇ luꞈ meh. Tiˬ jawˇ-iˬ miˬ coeˬ maˬ ya coeˬ-iˇ-ehˇ, zaˬ bi shiˇ-eu maˬ baw lehˇ nawˇ noeˬ meh.

⁹ Ehˇ kʼawꞈ, tiˬ kʼehˇ laˇ kʼehˬ tiˬ nah laꞈ kʼoeˇ, kʼoeˇ nyiˬ jeˬ luꞈ keuˆ le tehꞈ-a. Nyiˇ paˬ shaˆ ma-ahˇ nawˇ gʼoe kʼawꞈ, nawˬ-euˬ kʼaˬ dzeˇ zaˬ hawˇ-eu zaˬ deuˬ shiˇ tehꞈ-a.

¹⁰ “Yaw haiˬ jeˬ-ahˇ nawˇ kʼaˬ duˬ ni mˇ-awˇ, nawˬ neh mˇ-euˬ aˬ cawˬ maˬ mawˇ nya-a lehˇ nawˇ noeˬ meh. Nawˬ-euˬ zaˬ siˬ tsawˇ gahˇ nawˬ-ahˇ gaˇ ma sheuˬ bahˬ nehˬ-awˇ, Ngaˇ miˬ yehˇ ma. Ngaˬ-ahˇ duˇ-eu tsawˇ haˬ maˬ jawˇ, lehˇ nawˇ ehˇ meh.

¹¹ Nawˬ-euˬ kʼoeˇ taˆ guˆ-eu gaˆ-eu jeˬ keuˆ le meh. Nyiˇ paˬ shaˆ ma neh maˬ dehˬ tsoeˬ nya-a. Nawˬ neh yuꞈ maˆ maˬ maˆ haw-euˬ luˬ-iˇ seˇ-iˇ-eu jeˬ, nawˬ-euˬ kʼoeˇ taˆ ja pyuˬ ni ga keuˆ le tehꞈ-a.

¹² Nyiˇ paˬ shiˇ-awˇ, boeˇ mawˬ toˇ gaˇ gʼoe-awˬ. Nyiˇ ngeh neh nawˇ kʼoeˇ gaˇ gʼoe-euˬ meh. Kʼoeˇ deuˬ nawˬ-ahˇ caw jaw-eu baˬ da neh, muiˇ-eu deuˬ-ahˇ nawˇ teh byaˆ nehˬ nya-eu baw le.

¹³ Nawˬ-ahˇ nui noeˬ nui duˇ biꞈ-eu jawˇ kʼawꞈ, nawˇ gʼaˬ tiˬ pawꞈ-iˬ maˬ ahˇ-a. Ja maw nya-eu deuˬ mehˬ shi kuˇ doˆ-awˇ, nawˬ-ahˇ bi ka kʼoꞈ-awˬ. Aˬ guiˇ gaˇ kawˆ dzaw nya taˬ-awˇ, mˬ-ahˇ daˇ dza dehˬ jiˇ nya-eu, ba la aˬ yawꞈ siˬ yawꞈ kʼaˇ pyeuꞈ laˇ-eu gaˇ kawˆ, nawˬ-ahˇ ehˇ mehˬ nya-eu tsawˇ haˬ kʼoeˇ deuˬ, nawˬ-ahˇ bi ka kʼoꞈ-awˬ.

¹⁴ “Aˬ yawꞈ maꞈ gʼo yoeˬ-ahˇ duˇ-awˇ, miˬ dzaˬ bi puiˆ dzaˬ jiˇ tehꞈ-a. Aˬ yawꞈ maꞈ yawˬ haˇ yawˬ ha maˬ ka kʼoꞈ nya-a. Miˬ dzaˬ miˬ lmˇ kʼoeˇ aˬ yawꞈ maꞈ-ahˇ lahˇ dui dui tehꞈ-a. Yaw gaˆ lmˇ-eu miˬ jiˆ-ahˇ maˬ duˇ-a.

¹⁵ Nawˬ-euˬ tiˬ ziˇ gʼoe daˆ laꞈ-euˬ ja maw kʼoeˇ deuˬ, nawˬ-euˬ gʼaˇ duˬ heu loꞈ-ehˇ jahˇ tehꞈ-a. Dawˬ tawˆ luꞈ nawˬ-ahˇ byehˇ dzeh-awˇ, yawˬ ha gaˇ ma yawˬ ha iˇ-eu miˇ neh, nawˬ-ahˇ ka kʼoꞈ-eu maˬ jawˇ-a.”