Iˇsaˬyaˇ 44 - Akha

Sahˬpaˬ Miˬyehˇ tiˬ gʼaˬ tehꞈ-ehˇ Miˬyehˇ pyeuꞈ-eu meh

¹ Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ zaˬ kʼaˆ Iˇsaˬleˬlaˆ-oˇ, naˇ haˬ-awˬ. Yaˬkoˆ-euˬ zaˬ deuˬ uˆ deuˬ pyeuꞈ-eu ngaˬ neh tseˇ doˆ-euˬ tsawˇ jeuˬ-oˇ, naˇ haˬ-awˬ.

² Nawˬ-ahˇ beh-euˬ Sahˬpaˬ Miˬyehˇ kʼoeˇ gʼaˬ ngaˇ ma. Nawˇ dehꞈ doˆ le ngeh tiˬ nah neh, nawˬ-ahˇ ngaˇ caw ba nehˬ-euˬ ma. Taˬ guˆ. Nawˇ ngaˬ-euˬ zaˬ kʼaˆ ma. Nawˬ-ahˇ ngaˇ gaˬ-awˇ tseˇ doˆ taˬ-euˬ ma.

³ “Iˇ cuꞈ mehꞈ-eu miˇ kʼahˬ-ahˇ ngaˇ iˇ cuꞈ biꞈ-awˇ, miˇ tsaˬ gui gaˇ lawˇ gawˆ bi yoeˇ le ma. Nawˬ-euˬ zaˬ deuˬ uˆ deuˬ kʼoeˇ taˆ ngaˇ baoˬ shehˆ daˆ nehˬ-awˇ, nawˬ-eu zaˬ deuˬ uˆ deuˬ-ahˇ ngaˇ guiˬ lahˬ biꞈ ma.

⁴ Iˇ cuꞈ jaˆ gaˇ dehꞈ-eu yaˇ moꞈ loꞈ-ehˇ aˬ yawꞈ maꞈ mehˇ laˇ-awˇ, lawˇ gawˆ dawˬ peh dehꞈ-eu iˇ nmˬ aˇ bawˇ-ahˇ duˇ tehꞈ-a.

⁵ “Ngaˇ Sahˬpaˬ Miˬyehˇ-euˬ tsawˇ haˬ ma lehˇ, tiˬ gʼaˬ saˇ-i tiˬ gʼaˬ ehˇ-awˇ, Iˇsaˬleˬlaˆ tsawˇ jeuˬ jawˇ gaˇ, aˬ yawꞈ maꞈ jawˇ ahˇ laˇ tehꞈ-a. Aˬ yawꞈ maꞈ yawˬ gʼaˬ yawˬ na luꞈ-euˬ laꞈ du-ahˇ, Sahˬpaˬ Miˬyehˇ-euˬ tsawˇ myahˇ boꞈ taˬ-awˇ, Miˬyehˇ-euˬ tsawˇ haˬ ma lehˇ yawˬ haˇ yawˬ ha myahˇ tehꞈ-a.”

⁶ Iˇsaˬleˬlaˆ-ahˇ ngehˬ gʼeh haw piˇ-eu Sahˬpaˬ Miˬyehˇ pyeuꞈ-eu, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˇ dahˬ beh-euˬ gʼaˬ hawˇ-eu aˇ saˬ saˬ-eu gʼaˬ ngaˇ ma. Ngaˇ uˬ taꞈ miˬ yehˇ nui gʼaˬ maˬ jawˇ,

⁷ Ngaˬ neh mˇ-euˬ gaˇ-ahˇ nui gʼaˬ mˇ nya meh loˇ. Aˇ dahˬ beh ngeh hawˇ-eu aˇ saˬ saˬ ngeh keuˆ ni, kʼaˇ pyeuꞈ laˇ-eu jeˬ tsaˬ tsehˆ nya-eu aˬ suˇ gʼaˬ jawˇ ta.

⁸ Ngaˬ-euˬ tsawˇ haˬ-oˇ, nawˇ taˬ guˆ. Aˇ hu ba neh iˬ nah keuˆ ni kʼaˇ pyeuꞈ laˇ-euˬ jeˬ-ahˇ, ngaˬ neh ehˇ tsehˆ taˬ-euˬ nawˇ siˬ nya-awˇ, nawˇ saˇ kiˇ pyeuꞈ-eu meh. Miˬ yehˇ nui gʼaˬ jawˇ ta siˬ loˇ. Ngaˇ maˬ gaˬ haw-euˬ baoˬ huiˬ-eu miˬ yehˇ nui gʼaˬ paˇ jawˇ ta loˇ.”

Tahˬ pahˬ aˬ ma mawˇ kawˇ-ahˇ uˬ duˬ tahˬ-eu dawˇ ga meh

⁹ Tahˬ pahˬ aˬ ma mawˇ kawˇ-ahˇ uˬ duˬ kʼaˇ tahˬ-eu deuˬ, tsawˇ haˬ dawˇ ga pyeuꞈ-awˇ, aˬ yawꞈ maꞈ taˬ huiˬ taˬ mahˇ luꞈ-eu miˬ yehˇ tiˬ jeˬ-iˬ gaˇ dahˇ maˬ tsoeˬ-a. Miˬ yehˇ kʼoeˇ deuˬ-ahˇ uˬ duˬ kʼaˇ tahˬ-eu tsawˇ haˬ deuˬ myaˆ behꞈ-ahˇ duˇ-awˇ zaˬ siˬ tsawˇ gahˇ maˬ ahˇ-eu miˇ neh, ya shaꞈ dawˇ gaˇ keuˆ tehꞈ-a.

¹⁰ Tahˬ pahˬ aˬ ma mawˇ kawˇ tehˆ-awˇ miˬ yehˇ loꞈ-ehˇ taˬ huiˬ-eu laꞈ kʼoeˇ uˬ duˬ tahˬ-eu-aˬ, tiˬ jeˬ-iˬ gaˇ dahˇ maˬ tsoeˬ-a.

¹¹ Kʼoeˇ gaˇ uˬ duˬ kʼaˇ tahˬ-eu tsawˇ haˬ yawˬ gʼaˬ na luꞈ, daˬ ya ga tehꞈ-a. Tahˬ pahˬ aˬ ma mawˇ kawˇ tehˆ-eu deuˬ kʼawꞈ, tsawˇ haˬ zaˬ tehꞈ meh. Aˬ yawꞈ maꞈ-ahˇ kuˇ uiˬ-awˇ, pyehˆ tseˇ duˬ nehˬ ngeh, guˆ dui dui-iˇ-awˇ ya shaꞈ dawˇ dui dui tehꞈ-a.

¹² Shuiˇ tehˆ-eu tsawˇ haˬ-aˬ, shmˇ shmˇ byaˆ yuˇ-awˇ, miˬ dzaˬ-ahˇ baw baw neˇ-awˇ tehˆ-eu meh. Gʼaˬ kʼaˆ-eu aˬ yawꞈ-euˬ aˬ laꞈ diˬ puˬ-ahˇ tuˆ tehˬ-awˇ, shmˇ-ahˇ mawˇ kawˇ tehˆ pyeuꞈ-eu meh. Aˬ yawꞈ kʼoeˇ loꞈ-ehˇ mˇ ngeh, hawˬ mehꞈ, iˇ cuꞈ mehꞈ-eu baw-awˇ, gʼaˬ doeˇ kʼawꞈ doeˇ-eu meh.

¹³ Laꞈ saˇ maˇ geuꞈ-eu deuˬ daˇ kawˬ-ahˇ dza haw-awˇ, sahˬ duˇ neh kawˆ byawꞈ-awˇ, tsawˇ haˬ mawˇ kawˇ doˆ laˇ ni laꞈ saˇ maˇ keu ka neh taꞈ-awˇ, muiˬ dui dui-eu tsawˇ haˬ mawˇ kawˇ kʼoeˇ aˬ yawꞈ-euˬ nymˇ-ahˇ ciˬ taˬ-awˇ bi jaˆ-eu meh.

¹⁴ Shuˬ liˇ aˇ bawˇ maˬ ehˇ, tsuiꞈ kaˆ aˇ bawˇ maˬ ehˇ, guˇ baˬ luˇ aˇ bawˇ maˬ ehˇ, yawˬ ha kʼaˇ geuꞈ mawꞈ-eu jeˬ aˇ bawˇ sahˬ kʼaˆ-ahˇ tuˇ doˆ laˬ-iˇ-eu meh. Maˬ ngeuˇ naˇ, aˇ bawˇ yaw muiˬ jeˬ ka-awˇ, uˬ yehˇ bi yehˇ shehˬ-awˇ huiˬ laˇ gaˇ dawˬ-eu meh.

¹⁵ Aˇ bawˇ tiˬ kʼehˆ miˬ dzaˬ geuꞈ-awˇ, tahˬ pahˬ aˬ ma mawˇ kawˇ pyaꞈ gaˇ tiˬ kʼehˆ geuꞈ-eu meh. Tiˬ kʼehˆ-ahˇ, hawˬ mˇ dzaˇ saꞈ gʼeh-eu gʼaˇ duˬ hawˇ-eu yaw gaˆ lmˇ-eu gʼaˇ duˬ miˬ dzaˬ geuꞈ-awˇ, tiˬ kʼehˆ-ahˇ-aˬ, yawˬ ha uˬ duˬ tahˬ-eu gʼaˇ duˬ tahˬ pahˬ aˬ ma mawˇ kawˇ pyaꞈ geuꞈ-eu meh.

¹⁶ Aˇ bawˇ kʼoeˇ tiˬ kʼehˆ miˬ dzaˬ kʼehꞈ-awˇ shaˬ jiˇ tehˬ ba dzaˬ-awˇ nui kʼahˇ shiˇ-eu meh. Aˬ yawꞈ yaw gaˆ lmˇ-awˇ, “Yaw gaˆ lmˇ laˇ dui dui nya. Miˬ dzaˬ heu muiˬ dui dui nya” lehˇ ehˇ-eu meh.

¹⁷ Dzeˇ-eu tiˬ kʼehˆ-ahˇ tahˬ pahˬ aˬ ma mawˇ kawˇ pyaꞈ-awˇ, awˆ byaˆ-awˇ uˬ duˬ tahˬ-eu meh. Tahˬ pahˬ aˬ ma mawˇ kawˇ kʼoeˇ-ahˇ aˬ yawꞈ guiˬ lahˬ shaˇ-awˇ, “Nawˇ ngaˬ-euˬ miˬ yehˇ ma. Ngaˬ-ahˇ ka kʼoꞈ nehˬ laꞈ-awˬ” lehˇ ehˇ-eu meh.

¹⁸ Kʼoeˇ loꞈ-ehˇ gʼeh-eu tsawˇ haˬ deuˬ-aˬ, aˬ dzawˬ dzawˬ dui dui-awˇ, yawˬ ha aˬ jeˬ mˇ luꞈ-eu gaˇ kawˆ yawˬ ha maˬ siˬ nya-a. Aˬ yawꞈ maꞈ myaˆ nuiˆ miˆ tehˬ-awˇ, nui ma piˬ tehˬ taˬ-euˬ miˇ neh, yaw tsaˬ yaw dawˇ jeˬ-ahˇ maˬ siˬ nya-a.

¹⁹ Tahˬ pahˬ aˬ ma mawˇ kawˇ jahˇ-eu tsawˇ haˬ deuˬ heu loꞈ-ehˇ tiˬ jawˇ-iˬ maˬ ehˇ-a. “Daˇ kawˬ tiˬ tm-ahˇ miˬ dzaˬ doꞈ-awˇ, miˬ jiˆ kʼoeˇ taˆ hawˬ tahˬ puiˆ dzaˬ-awˇ, shaˬ jiˇ tehˬ ba dzaˬ-euˬ ma. Kʼoeˇ naˇ, daˇ kawˬ tiˬ tm-ahˇ tahˬ pahˬ aˬ ma mawˇ kawˇ pyaꞈ-euˬ ma. Nymˬ-mˇ ngaˇ daˇ kawˬ diˬ tm-ahˇ uˬ duˬ tahˬ luꞈ-eu ma” lehˇ tiˬ jawˇ-iˬ maˬ ehˇ-a.

²⁰ Kʼoeˇ-aˬ, kʼaˬ lehˇ tawˆ dzaˬ-eu naˆ ni dawˇ ga ga gaˇ duˇ-eu meh. Aˬ dzawˬ aˇ gah-euˬ nui noeˬ neh bi sheuˬ pyawˇ taˬ-euˬ miˇ neh, aˬ yawꞈ-ahˇ ngehˬ maˬ paˇ gʼeh nehˬ nya meh. Aˬ yawꞈ-euˬ aˬ laꞈ-ahˇ tuˆ tehˬ taˬ-euˬ tahˬ pahˬ aˬ ma mawˇ kawˇ kʼoeˇ miˬ yehˇ maˬ ngeuˇ-eu gaˇ kawˆ, aˬ yawꞈ-ahˇ maˬ mehˬ paˇ nya-a.

Beh-euˬ yaw sahˇ hawˇ-eu ka kʼoꞈ-eu yaw sahˇ Sahˬpaˬ Miˬyehˇ

²¹ Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ-oˇ, gaˇ kawˆ heu-ahˇ nawˇ taˬ ngehˇ. Nawˇ ngaˬ-euˬ zaˬ kʼaˆ pyeuꞈ-eu gaˇ kawˆ-ahˇ taˬ ngehˇ. Ngaˬ-euˬ zaˬ kʼaˆ bi geuꞈ-eu lehˇ nawˬ-ahˇ ngaˬ neh beh-awˇ, nawˬ-ahˇ ngaˇ tiˬ jawˇ-iˬ maˬ byehˇ dzeh ma.

²² Mˬ dmˇ lawˬ-iˇ-eu loꞈ-ehˇ nawˬ-euˬ iˬ baˇ ngaˇ shiˆ shawˇ gʼaˬ-euˬ ma. Ngaˇ jawˇ gaˇ gʼoꞈ laˇ-awˬ. Ngaˇ nawˬ-ahˇ ka kʼoꞈ-eu gʼaˬ ma.”

²³ Mˬ-oˇ, laˬ kʼaˬ cehˇ-awˇ guˇ-awˬ. Miˇ tsaˬ yaw naꞈ tsahˇ-oˇ, guˇ-awˬ. Gawˬ jawˬ deuˬ laˬ kʼaˬ cehˇ-awˇ yaw kʼaˆ-ehˇ guˇ-awˬ. Sahˬ kʼaˆ-ahˇ kʼaˇ dehꞈ-eu aˇ bawˇ yawˬ bawˇ na luꞈ guˇ-awˬ. Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ ka kʼoꞈ-eu laꞈ kʼoeˇ, aˬ yawꞈ huiˬ-eu mahˇ-eu gaˇ kawˆ bi mawˇ-euˬ meh.

²⁴ “Ngaˇ naw maꞈ-ahˇ ka kʼoꞈ-eu Sahˬpaˬ Miˬyehˇ ma. Naw maꞈ-ahˇ beh-euˬ gʼaˬ ngaˇ ma. Ngaˇ-aˬ, yawˬ jeˬ na luꞈ-ahˇ beh-euˬ Sahˬpaˬ Miˬyehˇ ma. Mˬ sheu taw ngeh ngaˇ tehꞈ-ehˇ sheu taw-awˇ, ngaˇ miˇ tsaˬ-ahˇ beh ngeh tiˬ gʼaˬ-iˬ maˬ caw ba le-aˬ.

²⁵ Nyiˇ paˬ shaˆ ma deuˬ-ahˇ ngaˇ tsawˇ uˬ laˆ uˬ-awˇ, mah loˬ ja maw nya-eu deuˬ-ahˇ daˬ laˆ ga nehˬ-euˬ ma. Zaˬ siˬ tsawˇ gahˇ byah-eu deuˬ-euˬ dawˬ-ahˇ ngaˇ laˆ cawˆ-awˇ, aˬ yawꞈ maꞈ-euˬ zaˬ siˬ tsawˇ gahˇ yawꞈ ngehꞈ meh lehˇ bi siˬ-euˬ ma.

²⁶ Ehˇ kʼawꞈ, ngaˬ-euˬ zaˬ kʼaˆ aˬ kaˇ pyeuꞈ-eu gaˇ kawˆ mehˬ ngeh, ngaˬ-euˬ gʼaˬ kʼehˇ-ahˇ ngaˇ pyehˬ gʼeh leꞈ-awˇ, ngaˬ neh lehˬ hmˬ taˬ-euˬ gaˇ kawˆ bi ja mehˬ ngeh, aˬ yawꞈ neh kʼaˇ ehˇ-euˬ jeˬ ngaˇ bi pyeuꞈ laˇ ma. Yeˬluˇsaˬlehˬ meuˬ-ahˇ tsawˇ haˬ paˇ jawˇ byah-awˇ, Yuˇdaˆ meuˬ deuˬ paˇ teˬ ziꞈ jiˇ tehꞈ-a lehˇ ehˇ-euˬ ma. Meuˬ meuˬ tsoeˬ kʼoeˇ deuˬ meuˬ shuiꞈ paˇ shuiꞈ laˇ tehꞈ-a.

²⁷ Ngaˇ dawˬ kʼaˆ tiˬ dawˬ biꞈ-awˇ, iˬ ma laˆ shaˆ-ahˇ bi gui-iˇ-euˬ ma.

²⁸ Guˇluˆ-ahˇ ngaˇ heu loꞈ-ehˇ ehˇ nehˬ-euˬ ma. ‘Ngaˬ-euˬ gʼaˇ duˬ nawˇ dzoeˬ ya dzaˬ tehꞈ-a. Ngaˬ-euˬ nui kʼahˇ-ahˇ nawˇ mˇ byah tehꞈ-a. Yeˬluˇsaˬlehˬ meuˬ-ahˇ nawˇ paˇ bi tsoˆ muiˬ-awˇ, Uˬ duˬ tahˬ nymˇ nymˇ ma-euˬ dawˬ pehˬ gawˬ tehꞈ-a.’ ”