Iˇsaˬyaˇ 41 - Akha

Iˇsaˬleˬlaˆ tsawˇ jeuˬ-ahˇ caw ba-eu Miˬyehˇ

¹ Miˬyehˇ ehˇ-eu, “Gaˇ mahˇ kaˬ gaˇ jaˆ-eu miˇ kʼahˬ deuˬ-oˇ, ciˬ cuˇ ni jawˇ-awˇ ngaˇ ehˇ gaˇ naˇ haˬ-awˬ. Naw maꞈ yaˇ kʼaˬ ja-eu gʼaˇ duˬ lehˬ hmˬ taˬ-awˬ. Naw maꞈ dawˬ ngehˬ-eu a kawˬ-aˬ jaˆ meh. Aˬ dui tiˬ kawˆ loꞈ-ehˇ uiˬ laˇ jiˇ-awˇ, aˬ geu gʼaˬ lehˬ nga lehˇ daˇ tsehˆ kaˇ-euˇ.

² “Guiˇ deuˆ gʼaˬ nya-eu gʼaˬ-ahˇ nahˇ ma doˆ kʼehˬ paw neh aˬ suˇ gʼaˬ neh sheuˬ ahˇ leꞈ-awˇ, guiˇ kʼaˇ deuˆ gaˇ gʼaˬ leˇ ni, aˬ suˇ gʼaˬ jahˇ nehˬ ta. Sahˬ paˬ hawˇ-eu miˇ kʼahˬ deuˬ-ahˇ aˬ yawꞈ gʼaˬ leˇ ni, aˬ suˇ gʼaˬ caw ba ta. Aˬ yawꞈ-euˬ mi cehˇ neh aˬ yawꞈ maꞈ-ahˇ, kʼaˬ lehˇ loꞈ-ehˇ byehˆ nmˆ nehˬ-awˇ, aˬ yawꞈ-euˬ kaˆ aˬ yawꞈ maꞈ-ahˇ, gʼoˆ yoeˬ jaˬ lehˇ baw byaˆ-eu loꞈ-ehˇ jahˇ nehˬ-euˬ meh.

³ Aˬ yawꞈ maꞈ-ahˇ aˬ yawꞈ maˬ naˬ leˇ ni teh-awˇ, kʼahˬ maˬ lahˇ ni mehˬ hu paw iˇ-eu meh. Aˬ yawꞈ kuiˇ toꞈ kawˇ dui dui-eu miˇ neh, miˇ tsa nawˬ tuˆ-eu maˬ dah-a.

⁴ Kʼoeˇ loꞈ-ehˇ bi pyeuꞈ laˇ-euˬ gʼaˬ aˬ suˇ gʼaˬ-a. Miˇ kʼahˬ shaˇ ka hawˇ-eu tsawˇ haˬ gaˇ kawˆ, dehˬ paˇ nehˬ-eu kʼoeˇ gʼaˬ aˬ suˇ gʼaˬ-a. Sahˬpaˬ Miˬyehˇ pyeuꞈ-eu ngaˇ-aˬ, aˇ dahˬ beh ngeh neh kʼoeˇ gaˇ jawˇ luꞈ-awˇ, aˇ saˬ saˬ ngeh keuˆ ni jawˇ ma.

⁵ “Gaˇ mahˇ kaˬ gaˇ jawˇ-eu tsawˇ haˬ deuˬ, ngaˬ neh mˇ-euˬ gaˇ deuˬ-ahˇ ya mawˇ-awˇ, guˆ-awˇ yaw dzuˬ dzuˬ-eu laꞈ kʼoeˇ, tiˬ kawˆ loꞈ-ehˇ uiˬ leˇ-awˇ laˇ-eu meh.

⁶ Mawˇ kawˇ taꞈ-eu deuˬ tiˬ gʼaˬ tiˇ gʼaˬ gʼaˬ biꞈ-eu meh.

⁷ Laꞈ saˇ maˇ deuˬ, shuiˇ myawˬ guˇ tehˆ-eu deuˬ-ahˇ, nya dui dui nga lehˇ ciˬ poeˬ nehˬ-eu meh. Tahˬ pahˬ aˬ ma mawˇ kawˇ seuˆ juˇ-eu gʼaˬ, shmˇ sehˬ taꞈ myahˬ-eu gʼaˬ-ahˇ ja ceuˬ nehˬ-eu meh. Shaˬ ciˬ toeˬ-euˬ muiˬ dui dui nga lehˇ aˬ yawꞈ maꞈ ehˇ-awˇ, shmˇ sehˬ neh tahˬ pahˬ aˬ ma mawˇ kawˇ-ahˇ, ziꞈ dah ni taꞈ tsoꞈ jiˇ-eu meh.

⁸ “Ehˇ kʼawꞈ, ngaˬ-euˬ zaˬ kʼaˆ Iˇsaˬleˬlaˆ-oˇ, nawˇ ngaˬ neh tseˇ doˆ-eu tsawˇ jeuˬ pyeuꞈ-awˇ, ngaˬ-euˬ cawˬ Aˬbyaˬhaˬ-euˬ zaˬ deuˬ uˆ deuˬ meh.

⁹ Mˬ dzeˇ miˇ dzeˇ-ahˇ neh nawˬ-ahˇ ngaˇ sheuˬ doˆ-awˇ, gaˇ mahˇ kaˬ-eu miˇ ma laꞈ coeˇ-ahˇ neh kuˇ doˆ laꞈ-awˇ, nawˇ ngaˬ-euˬ zaˬ kʼaˆ ma lehˇ ehˇ-euˬ ma. Nawˬ-ahˇ ngaˇ maˬ byehˇ dzeh byoˆ-euˬ uˬ taꞈ, tseˇ doˆ geuꞈ taˬ-euˬ ma.

¹⁰ Taˬ guˆ. Ngaˇ nawˬ nehˬ-ehˇ jawˇ ma. Ngaˇ naw maꞈ-euˬ Miˬyehˇ ngeuˇ ma. Tiˬ jeˬ-ahˇ-iˬ naw maꞈ guˆ-eu maˬ loˬ. Ngaˇ gʼaˬ biꞈ-awˇ caw ba nehˬ ma. Nawˬ maꞈ-ahˇ ngaˇ haw piˇ-awˇ ka kʼoꞈ ma.

¹¹ “Naw maꞈ-ahˇ nui ma pehˇ-eu tsawˇ haˬ deuˬ, daˬ ga-awˇ shaꞈ dawˇ-iˇ tehꞈ-a. Naw maꞈ-ahˇ guiˇ deuˆ-eu tsawˇ haˬ, ya shiˇ gaˇ keuˆ tehꞈ-a.

¹² Naw maꞈ-ahˇ muiˇ-eu tsawˇ haˬ-ahˇ naw maꞈ poˆ ngeh, maˬ poˆ mawˇ nya ni pyeuꞈ-iˇ tehꞈ-a. Naw maꞈ-ahˇ guiˇ deuˆ-eu tsawˇ haˬ, tiˬ jeˬ-iˬ maˬ gʼeh nya ni pyeuꞈ-iˇ tehꞈ-a.

¹³ Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Naw maꞈ-ahˇ ngaˇ gʼaˬ biꞈ-eu laꞈ kʼoeˇ, ‘Taˬ guˆ. Ngaˇ caw ba ma’ lehˇ ehˇ-eu ma.”

¹⁴ Sahˬpaˬ Miˬyehˇ heu loꞈ-ehˇ ehˇ-eu meh. “Gʼaˬ baˬ-awˇ nyiˇ-eu tsawˇ jeuˬ pyeuꞈ-eu Iˇsaˬleˬlaˆ-oˇ, Taˬ guˆ. Ngaˇ nawˬ-ahˇ caw ba ma. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu ngaˇ-aˬ, naw maꞈ-ahˇ ka kʼoꞈ-eu gʼaˬ ma.

¹⁵ Seuˬ yaw shuiꞈ taꞈ tsoꞈ-euˬ cehˇ diˬ lawˬ loꞈ-ehˇ, nawˬ-ahˇ ngaˇ bi pyeuꞈ laˇ ma. Gawˬ jawˬ deuˬ-ahˇ nawˇ diˬ meuˇ diˬ loeˇ-awˇ, gawˬ duˇ deuˬ-ahˇ kʼaˬ lehˇ laˆ lehˇ tehꞈ-a.

¹⁶ Aˬ yawꞈ maꞈ-ahˇ dzeh diˇ-awˇ, jaˬ lehˇ neh bi baw byoˆ gʼeh-awˇ, jaˬ lehˇ lehˇ ma neh bi hehˇ dzaˬ tehꞈ-a. Kʼoeˇ naˇ, ngaˇ naw maꞈ-euˬ Miˬyehˇ pyeuꞈ-eu miˇ neh, naw maꞈ laˬ kʼaˬ ya cehˇ tehꞈ-a. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu ngaˬ-ahˇ, naw maꞈ ja ceuˬ tehꞈ-a.

¹⁷ “Ngaˬ-euˬ tsawˇ haˬ iˇ cuꞈ mehꞈ-awˇ poˆ ngeh, aˬ yawꞈ maꞈ-euˬ kuˬ byahˬ gui ngeh, Sahˬpaˬ Miˬyehˇ pyeuꞈ-eu ngaˇ, aˬ yawꞈ maꞈ-euˬ shaˇ dawˬ naˇ haˬ nehˬ ma. Iˇsaˬleˬlaˆ-euˬ Miˬyehˇ pyeuꞈ-eu ngaˇ, aˬ yawꞈ maꞈ-ahˇ tiˬ jawˇ-iˬ maˬ byehˇ dzeh.

¹⁸ Gui coˇ ni gʼeh-eu gawˬ duˇ deuˬ kʼoeˇ taˆ, iˇ cuꞈ lawˇ baˬ bi yoeˇ le ma. Deh kʼawꞈ laꞈ kʼoeˇ lawˇ gawˆ bi yoeˇ le ma. Kʼaˇ shuiꞈ deh-ahˇ iˇ cuꞈ lah bi dahˬ laˇ-awˇ, miˇ tsaˬ gui gaˇ lawˇ gawˆ bi yoeˇ le ma.

¹⁹ Shuˬ liˇ aˇ bawˇ, aˬ kaˬ shaˆ aˇ bawˇ, myuˇduˇleˬ aˇ bawˇ, saˬ loˬ aˇ bawˇ, kʼaˇ shuiꞈ deh-ahˇ bi dehꞈ laˇ ma. Diˬ shuiˇ-ahˇ sahˬ kʼaˆ jeˬ laˇ-awˇ, miˬshuˬ, juˬniˬpaˬ hawˇ-eu guˇbaˬluˇ aˇ bawˇ deuˬ, bi dehꞈ byah jiˇ laˇ ma.

²⁰ Sahˬpaˬ Miˬyehˇ pyeuꞈ-eu ngaˬ-euˬ kuiˇ zaˇ laꞈ zaˇ-ahˇ, miˇ tsaˬ zaˬ deuˬ mawˇ-awˇ siˬ nya tehꞈ-a. Iˇsaˬleˬlaˆ-euˬ muiˬ-eu shawˇ-eu Miˬyehˇ neh, kʼoeˇ loꞈ-ehˇ pyeuꞈ laˇ ni mˇ-euˬ gaˇ kawˆ, aˬ yawꞈ maꞈ siˬ nya laˇ tehꞈ-a.”

Maˬ ngeuˇ-eu miˬ yehˇ deuˬ-ahˇ Sahˬpaˬ Miˬyehˇ dehˬ-euˬ

²¹ Iˇsaˬleˬlaˆ-euˬ sahˬ paˬ pyeuꞈ-eu Sahˬpaˬ Miˬyehˇ, heu loꞈ-ehˇ ehˇ-eu meh. “Miˇ kʼahˬ tsawˇ jeuˬ deuˬ-euˬ miˬ yehˇ deuˬ-oˇ, yaˇ kʼaˬ ja haw laˇ sheˇ. Naw maꞈ kʼaˇ ngehˬ nya-eu jeˬ ngehˬ laˇ sheˇ.

²² Mehˬ hu paw keuˆ le-eu jeˬ-ahˇ nga maꞈ ya siˬ taˬ ni, aˬ kaˇ pyeuꞈ laˇ-eu gaˇ kawˆ deuˬ, laˇ-awˇ ja mehˬ laˇ sheˇ. Pyeuꞈ dzeuˇ yaꞈ-euˬ gaˇ kawˆ, saˇ naˇ-ahˇ dzawˇ laˇ-awˇ, dawˬ tsuiꞈ ehˇ mehˬ laꞈ sheˇ.

²³ Naw maꞈ miˬyehˇ ngaˇ lehˇ nga maꞈ ya siˬ duˬ ni, mehˬ hu paw pyeuꞈ laˇ-eu gaˇ kawˆ ja mehˬ laꞈ sheˇ. Nga maꞈ guˆ-awˇ tsoˆ leˇ paˬ-ehˇ, lahˬ hawˇ-eu dawˇ tiˬ jeˬ bi keuˆ le haw sheˇ.

²⁴ Naw maꞈ hawˇ-eu naw maꞈ neh mˇ-euˬ dawˬ tawˆ luꞈ, tiˬ jeˬ-iˬ gaˇ dahˇ maˬ tsoeˬ-a. Naw maꞈ-ahˇ uˬ duˬ tahˬ-eu tsawˇ haˬ deuˬ, nui daˆ daˆ laˇ paˬ-ehˇ gʼeh meh.

²⁵ “Nahˇ ma doˆ kʼehˬ paw jawˇ-eu tsawˇ haˬ tiˬ gʼaˬ-ahˇ, ngaˇ tseˇ doˆ taˬ-euˬ ma. Aˬ yawꞈ-ahˇ ngaˇ sheuˬ keuˆ laꞈ-awˇ, laꞈ taˆ paw neh guiˇ bi deuˆ ka leꞈ ma. Oeˬ lahˬ tehˆ-eu tsawˇ haˬ shaˬ jehˆ nawˬ-eu loꞈ-ehˇ, miˇ kʼahˬ sahˬ paˬ deuˬ-ahˇ aˬ yawꞈ nawˬ pahˬ tehꞈ-a.

²⁶ Naw maꞈ neh ehˇ-euˬ tsaˬ ngaˇ lehˇ ja ceuˬ paˬ-ehˇ, heu loꞈ-ehˇ pyeuꞈ laˇ tehꞈ-a lehˇ, aˬ geu gʼaˬ ehˇ taˬ-euˬ jaˆ te. Gaˇ kawˆ heu naw maꞈ tiˬ gʼaˬ-iˬ maˬ ehˇ-aˬ. Naw maꞈ heu loꞈ-ehˇ ehˇ-eu tiˬ gʼaˬ-iˬ maˬ gaˬ-aˬ.

²⁷ Sahˬpaˬ Miˬyehˇ pyeuꞈ-eu ngaˇ-aˬ, Ziˇoˬ meuˬ-ahˇ gaˇ kawˆ heu ehˇ beh beh-eu gʼaˬ ma. Yeˬluˇsaˬlehˬ meuˬ-ahˇ dawˬ tsaꞈ dawˬ dzawˇ mˇ-eu tsawˇ haˬ, ngaˇ pyehˬ gʼeh-awˇ, aˬ yawꞈ maꞈ-euˬ tsawˇ haˬ gʼoꞈ laˇ luꞈ-eu gaˇ kawˆ, bi tsaꞈ gaˬ-iˇ-euˬ ma.

²⁸ Miˬ yehˇ nui deuˬ-ahˇ ngaˇ haw gʼeh ngeh, aˬ yawꞈ maꞈ tiˬ gʼaˬ-iˬ dawˬ maˬ ngehˬ-ehˇ, ngaˬ neh naˇ haˬ-euˬ dawˬ-ahˇ maˬ ehˇ kʼoꞈ nya-a.

²⁹ Miˬ yehˇ heu deuˬ tiˬ gʼaˬ-iˬ gaˇ dahˇ maˬ tsoeˬ-a. Aˬ yawꞈ maꞈ tiˬ jeˬ-iˬ maˬ mˇ nya-a. Tahˬ pahˬ aˬ ma mawˇ kawˇ heu deuˬ yawˬ ngehꞈ pyeuꞈ-awˇ, baoˬ tiˬ pawꞈ-iˬ maˬ ahˇ-a.”