Iˇsaˬyaˇ 40 - Akha

Noeˬ tmˬ kʼaˇ za-eu dawˬ deuˬ

¹ “Ngaˬ-euˬ tsawˇ haˬ deuˬ-oˇ, nui saˇ za-awˬ. Nui saˇ za-awˬ” lehˇ naw maꞈ-euˬ Miˬyehˇ ehˇ-eu meh.

² “Yeˬluˇsaˬlehˬ meuˬ-ahˇ jawˇ-eu deuˬ-ahˇ gʼaˬ biꞈ nehˬ-awˬ. Aˬ yawꞈ maꞈ shaˬ zahˬ mˇ luꞈ-eu myahˇ laˇ-awˇ, nymˬ-mˇ aˬ yawꞈ maꞈ-ahˇ iˬ baˇ pyehˬ nehˬ-euˬ ma. Aˬ yawꞈ maꞈ neh mˇ-euˬ iˬ baˇ aˇ poeˬ, oꞈ-eu geuˇ-eu loꞈ-ehˇ kʼehˬ gʼaˬ kʼaˆ gʼaˬ-euˬ ma.”

³ Teˇ saˇ guˇ doˆ laˇ gaˇ naˇ haˬ sheˇ. “Sahˬpaˬ Miˬyehˇ gʼaˇ duˬ bawˇ tsahˬ bawˇ dahˇ-ahˇ gaˇ ma shaˇ dahˇ-awˬ. Aˬ dui-euˬ Miˬyehˇ gʼaˇ duˬ kʼaˇ shuiꞈ deh-ahˇ gaˇ ma laˆ saˆ-awˬ.

⁴ Gʼaˬ lawˬ dawˬ tawˆ luꞈ duˬ dzm-awˇ, gawˬ jawˬ dawˬ tawˆ luꞈ duˬ byaˆ-awˬ. Gawˬ duˇ-ahˇ deh saˇ saˇ laˇ-awˇ, kuˬ kaˬ kuˬ hiˇ saˇ lehˆ ni pyeuꞈ laˇ tehꞈ-a.

⁵ Kʼoeˇ naˇ, Sahˬpaˬ Miˬyehˇ-euˬ yaw shehꞈ kʼahˬ sehˇ pah mehˬ le-awˇ, tsawˇ jeuˬ dawˬ tawˆ luꞈ ya mawˇ tehꞈ-a lehˇ, Sahˬpaˬ Miˬyehˇ saˇ jaˇ biꞈ taˬ-euˬ meh.”

⁶ “Guˇ gaˬ nehˬ-awˬ” lehˇ teˇ saˇ mahˇ doˆ laˇ-awˇ, “Aˬ jeˬ ya guˇ gaˬ nmˇ” lehˇ ngaˇ naˇ haˬ-euˬ ma. “Heu loꞈ-ehˇ guˇ gaˬ nehˬ-awˬ. Tsawˇ jeuˬ dawˬ tawˆ luꞈ yaˇ moꞈ loˆ ni tehꞈ-ehˇ tawˬ-awˇ, bawˇ tsahˬ aˇ yehˆ naˆ maˬ tseˇ maˬ gmˬ-a.

⁷ Sahˬpaˬ Miˬyehˇ jaˬ lehˇ bi baw leꞈ ngeh, yaˇ moꞈ nyoeˬ-iˇ-awˇ, aˇ yehˆ juˬ-iˇ-eu meh. Tsawˇ haˬ zaˬ yaˇ moꞈ naˆ maˬ tseˇ gmˬ-eu maˬ ngeuˇ-a.

⁸ Ngeuˇ meh. Yaˇ moꞈ nyoeˬ-iˇ-awˇ aˇ yehˆ juˬ-iˇ-eu meh. Ehˇ kʼawꞈ, aˬ dui Miˬyehˇ-euˬ dawˬ, mˬ maˬ maˬ byaˆ zaˇ ziˇ gmˬ meh.”

⁹ Yeˬluˇsaˬlehˬ-oˇ, gawˬ jawˬ yaw goˇ-ahˇ daˆ leˇ-awˇ, laˬ kʼaˬ cehˇ-eu guiˬ lahˬ dawˬ guˇ gaˬ-awˬ. Ziˇoˬ gawˬ jawˬ-oˇ, teˇ saˇ yaw kʼaˆ kʼaˆ-ehˇ guˇ-awˇ, laˬ kʼaˬ cehˇ-eu guiˬ lahˬ dawˬ tsaꞈ gaˬ-awˬ. Maˬ guˆ ni dawˬ tmˇ dawˬ dzawˇ mˇ-awˇ, Yuˇdaˆ miˇ kʼahˬ-ahˇ jaˆ-eu meuˬ deuˬ-ahˇ, aˬ yawꞈ maꞈ-euˬ Miˬyehˇ oe luꞈ meh lehˇ ehˇ gaˬ nehˬ-awˬ.

¹⁰ Haw yawˬ. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ , aˬ yawꞈ neh ka kʼoꞈ-euˬ tsawˇ haˬ deuˬ-ahˇ sheuˬ-awˇ, aˬ yawꞈ-euˬ baoˬ neh uˆ lahˇ-eu lehˇ oe luꞈ meh.

¹¹ Yawˇ bo-eu yaw sahˇ yawˇ-ahˇ bo saˆ nehˬ-eu loꞈ-ehˇ, aˬ yawꞈ-euˬ yawˇ maꞈ-ahˇ aˬ yawꞈ bo saˆ nehˬ-awˇ, yawˇ zaˬ deuˬ-ahˇ tiˬ gaˇ jaˬ uiˬ jiˇ-eu laꞈ kʼoeˇ, aˬ yawꞈ-euˬ bawˇ kʼahˇ-ahˇ ciˬ-awˇ, yawˇ zaˬ aˬ ma deuˬ-ahˇ aˬ za za-ehˇ sheuˬ gʼeh tehꞈ-a.

Dawˬ tawˆ kʼoeˇ taˆ huiˬ dzehˬ-eu Miˬyehˇ

¹² Iˬ ma laˆ shaˆ iˇ cuꞈ laꞈ kʼawˆ-ahˇ tawˆ ahˇ-awˇ, dza haw nya-eu gʼaˬ jawˇ meh loˇ. Miˇ tsaˬ tahˬ kʼawˇ hmˬ lah ni kʼmˬ maˬ-ahˇ dawˆ ahˇ-awˇ, gawˬ jawˬ gawˬ duˇ-ahˇ paˆ yawˬ neh saˆ nya-eu gʼaˬ jawˇ meh loˇ.

¹³ Sahˬpaˬ Miˬyehˇ-ahˇ gaˇ mehˬ nya-eu gʼaˬ jawˇ meh loˇ. Aˬ yawꞈ-ahˇ zaˬ siˬ tsawˇ gahˇ mehˬ nehˬ nya-awˇ, ja noeˬ ja duˇ nya-eu aˬ suˇ gʼaˬ jawˇ ta.

¹⁴ Miˬyehˇ aˬ yawꞈ zaˬ siˬ nui gahˇ byah laˇ-awˇ, gaˇ aˬ joˆ-ehˇ ya mˇ-eu siˬ nya laˇ ni, aˬ suˇ gʼaˬ-ahˇ aˬ yawꞈ naˇ haˬ-iˇ-euˬ jaˆ ta.

¹⁵ Miˬyehˇ mehˬ shi miˇ kʼahˬ tsawˇ jeuˬ dawˬ tawˆ, iˇ cuꞈ tiˬ dzaˆ loˆ ni tehꞈ meh. Gaˇ mahˇ kaˬ gaˇ jaˆ-eu iˇ jaw lahˇ kʼoeˇ deuˬ kʼawꞈ, kʼaˬ lehˇ loꞈ-ehˇ pyaˇ sawˆ ni gʼeh-eu meh.

¹⁶ Leˬbaˬnoˬ sahˬ kʼaˆ-ahˇ jawˇ-eu bawˇ tsahˬ jeˬ zaˬ dawˬ tawˆ, aˬ dui Miˬyehˇ-ahˇ maˬ lawˇ maˬ shehˇ loꞈ nya-a. Kʼoeˇ gaˇ kʼaˇ dehꞈ-eu aˇ bawˇ dawˬ tawˆ luꞈ, lawˇ gaˇ geuꞈ-eu miˬ dzaˬ maˬ loꞈ leˇ-a.

¹⁷ Miˇ kʼahˬ tsawˇ jeuˬ kʼaˇ jawˇ kʼaˇ deuˬ dawˬ tawˆ, aˬ yawꞈ mehˬ shi tiˬ pawꞈ-iˬ ehˇ nyaꞈ maˬ nyeuˆ-a.

¹⁸ Miˬyehˇ-ahˇ aˬ geu gʼaˬ nehˬ-ehˇ shaˇ cehˆ haw nmˇ. Aˬ yawꞈ aˬ jeˬ-ahˇ duˇ-eu ehˇ nya ma loˇ.

¹⁹ Aˬ laꞈ yaw nya deuˬ neh tehˆ doˆ-euˬ gaˇ, ba jiˬ deuˬ neh shuiˇ yaw-awˇ, pyuˇ diˬ tm kʼoeˇ taˆ ciˬ nuiˇ taˬ-euˬ, tahˬ pahˬ aˬ ma mawˇ kawˇ-ahˇ aˬ yawꞈ maˬ duˇ-a.

²⁰ Pyuˇ shuiˇ maˬ sahˇ-eu tsawˇ haˬ deuˬ, maˬ peuˬ-iˇ-eu aˇ bawˇ daˇ kawˬ poˆ-awˇ, laꞈ myawˬ laꞈ muˆ nya-eu deuˬ-ahˇ kʼehˇ-awˇ, maˬ coˬ-iˇ nya-eu tahˬ pahˬ aˬ ma taꞈ-eu meh.

²¹ Nawˇ maˬ siˬ nya teˬ loˇ. Nawˇ maˬ ya gaˬ-aˬ loˇ. Aˇ hu ba-euˬ gaˇ kawˆ kʼoeˇ, nawˬ-ahˇ maˬ ja mehˬ laꞈ-aˬ loˇ. Miˇ tsaˬ tahˬ kʼawˇ aˬ joˆ-ehˇ pyeuꞈ doˆ laˇ-euˬ gaˇ kawˆ, nawˇ maˬ gaˬ haw-aˬ loˇ.

²² Miˇ tsa haw ka leꞈ ngeh tsawˇ haˬ aˇ ho hui ni tehꞈ-ehˇ mawˇ-eu, mˬ taˆ goˇ dui dui gaˇ jaˆ-eu dzoeˬ dzaˬ nuiˇ mahˬ-ahˇ nuiˇ-eu gʼaˬ, miˇ tsaˬ tahˬ kʼawˇ-ahˇ beh-euˬ meh. Lawˆ kaˬ taw-euˬ loꞈ-ehˇ mˬ-ahˇ aˬ yawꞈ gʼeu taw-awˇ, saˬ paˇ sehˬ gʼawˆ loꞈ-ehˇ sheu joe-euˬ meh.

²³ Dzoeˬ dzaˬ sahˬ paˬ-ahˇ aˬ yawꞈ gʼeu ka-awˇ, zaˬ coeˬ zaˬ bi pyeuꞈ-iˇ-euˬ meh.

²⁴ Aˬ yawꞈ maꞈ-aˬ ka-euˬ tiˬ dehˬ pyeuꞈ-awˇ, duˬ ciˇ maˬ toeˬ ziꞈ-euˬ sahˬ lahˬ-ahˇ duˇ-eu meh. Sahˬpaˬ Miˬyehˇ jaˬ lehˇ bi baw laꞈ ngeh, aˬ yawꞈ maꞈ koˆ-iˇ-awˇ gʼoˆ yoeˬ loꞈ-ehˇ bi baw byoˆ gʼeh-eu meh.

²⁵ Miˬyehˇ-ahˇ aˬ suˇ gʼaˬ nehˬ-ehˇ shaˇ cehˆ haw nmˇ. Aˬ yawꞈ-ahˇ duˇ-eu jawˇ meh loˇ.

²⁶ Mˬ-ahˇ gʼawˇ leuˇ haw sheˇ. Aˬ guiˇ kʼoeˇ deuˬ-ahˇ aˬ suˇ gʼaˬ beh taˬ ta. Aˬ yawꞈ maꞈ-ahˇ guiˇ maꞈ loꞈ-ehˇ sheuˬ gʼeh-eu gʼaˬ neh beh-euˬ meh. Aˬ guiˇ dawˬ tawˆ luꞈ aˬ yawꞈ siˬ jiˇ-awˇ, yawˬ siˬ na luꞈ tsawˇ myahˇ biꞈ doe-euˬ meh. Aˬ yawꞈ-euˬ baoˬ huiˬ dui dui-eu miˇ neh, aˬ guiˇ tiˬ siˬ-iˬ maˬ ga teˬ-iˇ-a.

²⁷ Teu miˇ neh Iˇsaˬleˬlaˆ-oˇ, nawˬ-euˬ shaˬ zahˬ Sahˬpaˬ Miˬyehˇ maˬ siˬ nya-ehˇ, maˬ tsaˬ-eu jeˬ nawˇ ya daˬ ngeh, ngehˬ maˬ gʼeh laꞈ nga lehˇ aˬ jeˬ miˇ neh nawˇ mahˇ luꞈ te.

²⁸ Nawˇ maˬ siˬ nya te loˇ. Nawˇ maˬ ya gaˬ-aˬ loˇ. Sahˬpaˬ Miˬyehˇ mˬ maˬ maˬ byaˆ zaˇ ziˇ Miˬyehˇ pyeuꞈ-awˇ, miˇ dawˬ tawˆ luꞈ-ahˇ beh-euˬ meh. Aˬ yawꞈ gʼaˬ doeˇ doeˇ-awˇ gʼaˬ baˬ-eu maˬ baw-ehˇ, aˬ yawꞈ nui noeˬ tiˬ gʼaˬ-iˬ maˬ siˬ duˬ nya-a.

²⁹ Gʼaˬ doeˇ doeˇ-awˇ gʼaˬ baˬ luꞈ-eu tsawˇ haˬ deuˬ-ahˇ, aˬ yawꞈ gʼaˬ biꞈ lahˬ nehˬ-eu meh.

³⁰ Aˇ kʼoꞈ yaw nahˬ deuˬ kʼawꞈ gʼaˬ baˬ laˇ-euˬ baw-awˇ, zaˬ guˬ deuˬ coˬ-iˇ nya-eu meh.

³¹ Ehˇ kʼawꞈ, Sahˬpaˬ Miˬyehˇ-ahˇ gʼoe-eu tsawˇ haˬ deuˬ, gʼaˬ yaw shuiꞈ paˇ ahˇ laˇ-eu meh. Kʼaˬ dzeˇ zaw-eu loꞈ-ehˇ aˬ yawꞈ maꞈ tuˇ laˇ-awˇ, cehˆ coeˬ coeˬ ngeh gʼaˬ doeˇ maˬ doeˇ leˇ-ehˇ, gaˇ ma cah ngeh gʼaˬ teˬ-iˇ-eu maˬ baw-a.