Iˇsaˬyaˇ 39 - Akha

Baˬbuˇloˬ miˇ kʼahˬ-ahˇ neh gaˬ le-euˬ dawˬ

¹ Aˇ yamˬ kʼoeˇ yamˬ laꞈ kʼoeˇ, sahˬ paˬ Heˬsaˬgiˇ jawˇ saˇ maˬ doˆ-eu gaˇ kawˆ-ahˇ, Baˬlaˬdaˬ-euˬ aˬ li pyeuꞈ-eu Baˬbuˇloˬ sahˬ paˬ Meˬlawˇdaˆbaˬlaˬbaˬ ya gaˬ-awˇ, sahˬ boꞈ tiˬ dzeh boꞈ ahˇ leꞈ-awˇ, laꞈ sawˬ biꞈ ha le-euˬ meh.

² Baˬbuˇloˬ sahˬ paˬ neh pyehˬ gʼeh leꞈ-euˬ tsawˇ kaˬ kʼoeˇ deuˬ-ahˇ Heˬsaˬgiˇ yaw muiˬ paˬ-ehˇ ha geuꞈ-awˇ, aˬ yawꞈ-euˬ pyuˇ shuiˇ myawˬ gahˬ deuˬ jeˬ hmˬ taˬ-euˬ gaˇ sheuˬ haw nehˬ-euˬ meh. Aˬ yawꞈ-euˬ pyuˇ hawˇ-eu shuiˇ deuˬ, aˬ yawꞈ-euˬ tsiˇ yaw saw gʼawˬ mya jeˬ hawˇ-eu, aˬ yawꞈ-euˬ guiˇ deuˆ-eu keu ka deuˬ mehˬ nehˬ-euˬ meh. Aˬ yawꞈ-euˬ myawˬ jeˬ hmˬ-eu nymˇ deuˬ hawˇ-eu, aˬ yawꞈ-euˬ miˇ kʼahˬ laꞈ kʼoeˇ kʼaˇ jaˆ-eu yawˬ jeˬ na luꞈ, tiˬ jeˬ-iˬ maˬ bi dzeuˇ-iˇ ni mehˬ nehˬ jiˇ-euˬ meh.

³ Kʼoeˇ naˇ, sahˬ paˬ Heˬsaˬgiˇ jawˇ gaˇ Iˇsaˬyaˇ le-awˇ, “Tsawˇ haˬ heu deuˬ aˬ geu gaˇ neh oe-awˇ, nawˬ-ahˇ aˬ jeˬ ehˇ le taˬ” lehˇ naˇ haˬ ngeh, “Aˬ yawꞈ maꞈ gaˇ mahˇ kaˬ dui dui-eu Baˬbuˇloˬ miˇ kʼahˬ-ahˇ neh oe-euˬ meh” lehˇ, Heˬsaˬgiˇ ehˇ kʼoꞈ nehˬ-euˬ meh.

⁴ “Sahˬ paˬ-euˬ nymˇ laꞈ kʼoeˇ jaˆ-eu mˇ myawˬ aˬ geu jeˬ-ahˇ aˬ yawꞈ maꞈ haw mawˇ yaꞈ taˬ” lehˇ, Iˇsaˬyaˇ naˇ haˬ ngeh, “Yawˬ jeˬ na luꞈ haw mawˇ yaꞈ jiˇ-euˬ meh. Myawˬ jeˬ hmˬ taˬ-euˬ nymˇ deuˬ laꞈ kʼoeˇ, kʼaˇ jaˆ-eu jeˬ dawˬ tawˆ luꞈ, ngaˬ neh aˬ yawꞈ maꞈ-ahˇ maˬ mehˬ doe nehˬ-euˬ tiˬ jeˬ-iˬ maˬ paˇ jaˆ ma” lehˇ, Heˬsaˬgiˇ ehˇ kʼoꞈ nehˬ-euˬ meh.

⁵ Kʼoeˇ ngeh, sahˬ paˬ Heˬsaˬgiˇ-ahˇ Iˇsaˬyaˇ heu loꞈ-ehˇ ehˇ nehˬ-euˬ meh.

⁶ “Sahˬpaˬ Miˬyehˇ heu loꞈ-ehˇ ehˇ-eu meh. Nawˇ jawˇ-eu sahˬ paˬ-euˬ nymˇ-ahˇ kʼaˇ jaˆ-eu jeˬ dawˬ tawˆ luꞈ, nawˬ-euˬ aˬ poeˬ aˬ bawˇ deuˬ neh iˬ nah keuˆ ni kʼaˇ jeˬ hmˬ taˬ-euˬ jeˬ dawˬ tawˆ luꞈ, tiˬ hmˬ-iˬ maˬ bi dzeˇ yaꞈ ni, Baˬbuˇloˬ miˇ kʼahˬ-ahˇ bi baꞈ gʼeh jiˇ-eu aˇ nah keuˆ le tehꞈ-a.

⁷ Nawˬ-euˬ o neh jeuˬ le o le-euˬ nawˬ-euˬ oeˬ paˬ oeˬ ma tiˬ paˆ na deuˬ kʼawꞈ, Baˬbuˇloˬ miˇ kʼahˬ-ahˇ bi nyehꞈ gʼeh-awˇ, Baˬbuˇloˬ sahˬ paˬ-euˬ nymˇ laꞈ kʼoeˇ zaˬ kʼaˆ ya geuꞈ tehꞈ-a lehˇ ehˇ-eu meh.”

⁸ Sahˬ paˬ Heˬsaˬgiˇ gʼeh, aˬ yawꞈ yaw dehꞈ kʼaˇ dehꞈ kʼoeˇ keuˆ ni, kʼoeˇ loꞈ-ehˇ gʼeh-eu shaˬ-eu zahˬ-eu jeˬ maˬ keuˆ le luꞈ nga siˬ lehˇ noeˬ siˬ-awˇ, “Nawˬ neh ngaˬ-ahˇ ehˇ gaˬ le-euˬ Sahˬpaˬ Miˬyehˇ-euˬ dawˬ teu dawˬ yaw muiˬ miˇ-a” lehˇ ehˇ kʼoꞈ nehˬ-eu meh.