Iˇsaˬyaˇ 37 - Akha

Sahˬ paˬ Heˬsaˬgiˇ Iˇsaˬyaˇ-ahˇ nui noeˬ nui duˇ shaˇ-eu

¹ Dawˬ kʼoeˇ dawˬ-ahˇ sahˬ paˬ Heˬsaˬgiˇ ya gaˬ-euˬ nehˬ-ehˇ, noeˬ shaˬ dui dui-eu laꞈ kʼoeˇ mehˬ tsoeˬ cehˬ pyaˬ-awˇ, guˬ daˇ pehˇ zeuˇ mehˬ tsoeˬ dm-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ le-euˬ meh.

² Kʼoeˇ naˇ, sahˬ paˬ-euˬ nymˇ-ahˇ haw-eu pyaˆ-eu paw aˬ yuiꞈ geuꞈ luꞈ-eu Eˇliˇkmˬ, saˇ naˇ-ahˇ gaˇ nyehꞈ tehˬ-eu Sheˬbaˬnaˬ hawˇ-eu, piˇ ma yaw huiˬ deuˬ-ahˇ, Aˬmoˆ-euˬ aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇsaˬyaˇ jawˇ gaˇ pyehˬ gʼeh-euˬ meh. Aˬ ha smˇ gʼaˬ kʼawꞈ, guˬ daˇ pehˇ zeuˇ mehˬ tsoeˬ dm-awˇ iˇ-euˬ meh.

³ Aˬ yawꞈ maꞈ-ahˇ Iˇsaˬyaˇ jawˇ gaˇ heu loꞈ-ehˇ bi ehˇ iˇ-euˬ meh. “Iˬ nah-aˬ, noeˬ shaˬ noeˬ zahˬ-eu aˇ nah meh. Zaˬ ciˬ deˇ le-awˇ maˬ ciˬ doˆ nya ni shaˬ gaˇ duˇ miˇ-a.

⁴ Aˬshuˇliˆ sahˬ paˬ neh aˬ yawꞈ-euˬ yaw huiˬ yaw mahˇ gʼaˬ-ahˇ pyehˬ gʼeh leꞈ-awˇ, dehꞈ luꞈ-eu Miˬyehˇ-ahˇ yehˬ bawˬ sehˇ lu-ehˇ bi ehˇ le-euˬ meh. Kʼoeˇ loꞈ-ehˇ yehˬ bawˬ sehˇ lu-ehˇ ehˇ-eu dawˬ-ahˇ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ya gaˬ-awˇ, kʼoeˇ loꞈ-ehˇ ehˇ-eu tsawˇ haˬ deuˬ-ahˇ kʼehˬ nehˬ kʼaˆ nehˬ luꞈ-uˇ. Kʼoeˇ miˇ neh, maˬ luˬ maˬ seˇ-iˇ-ehˇ dzeˇ-eu aˬ dui-euˬ tsawˇ haˬ deuˬ gʼaˇ duˬ, Miˬyehˇ-ahˇ guiˬ lahˬ shaˇ nehˬ laꞈ-awˬ.”

⁵ Sahˬ paˬ Heˬsaˬgiˇ-euˬ dawˬ-ahˇ Iˇsaˬyaˇ ya gaˬ ngeh,

⁶ heu loꞈ-ehˇ tsaꞈ kʼoꞈ gʼeh-euˬ meh. “Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. Sahˬpaˬ Miˬyehˇ naw maꞈ-ahˇ maˬ ka kʼoꞈ nya-aˇ lehˇ Aˬshuˇliˆ sahˬ paˬ ehˇ-awˇ lmˬ luꞈ gaˇ taˬ guˆ lehˇ ehˇ-eu meh.

⁷ Sahˬ paˬ kʼoeˇ gʼaˬ aˬ yawꞈ-euˬ miˇ kʼahˬ-ahˇ maˬ gʼoꞈ leˇ-ehˇ maˬ jawˇ tehˬ nya ni, gaˇ kawˆ gʼawˬ mya jeˬ aˬ yawꞈ-euˬ naˬ bawˇ-ahˇ bi gaˬ le-awˇ, aˬ yawꞈ-euˬ miˇ kʼahˬ laꞈ kʼoeˇ aˬ yawꞈ-ahˇ bi sehꞈ ni Sahˬpaˬ Miˬyehˇ jahˇ tehꞈ-a.”

Aˬshuˇliˆ tsawˇ haˬ deuˬ tiˬ poˆ paˇ lmˬ-eu

⁸ Aˬshuˇliˆ sahˬ paˬ Laˬkiˇshaˆ meuˬ-ahˇ byehˇ dzeh yaꞈ-awˇ, dawˬ peh jaˆ-eu Liˇbaˬnahˬ meuˬ-ahˇ guiˇ deuˆ luꞈ-eu gaˇ kawˆ, Aˬshuˇliˆ tsawˇ haˬ yaw huiˬ yaw mahˇ kʼoeˇ gʼaˬ ya siˬ-awˇ, sahˬ paˬ jawˇ gaˇ le-awˇ mehˬ bawˬ mˇ leˇ-euˬ meh.

⁹ Suˬdaˬ sahˬ paˬ Tiˇlaˬkaˬ gʼaˬ Iˇjiˇtuˆ guiˇ maꞈ sheuˬ-awˇ, aˬ yawꞈ maꞈ-ahˇ guiˇ deuˆ-eu lehˇ laˇ luꞈ-eu gaˇ kawˆ, Aˬshuˇliˆ tsawˇ haˬ deuˬ ya gaˬ-euˬ meh. Gaˇ kawˆ kʼoeˇ Aˬshuˇliˆ sahˬ paˬ ya gaˬ ngeh, sahˬ paˬ Heˬsaˬgiˇ jawˇ gaˇ sahˬ boꞈ tiˬ dzeh boꞈ-awˇ,

¹⁰ Yuˇdaˆ miˇ kʼahˬ-ahˇ heu loꞈ-ehˇ tsaꞈ ahˇ gʼeh-euˬ meh. “Yeˬluˇsaˬlehˬ meuˬ Aˬshuˇliˆ sahˬ paˬ-euˬ laꞈ-ahˇ maˬ ahˇ leˇ-aˇ lehˇ, nawˇ jah luꞈ-eu Miˬyehˇ ehˇ gaˇ taˬ naˇ haˬ.

¹¹ Aˬshuˇliˆ sahˬ paˬ neh laˆ cawˆ ma lehˇ kʼaˇ noeˬ-euˬ miˇ kʼahˬ deuˬ, aˬ joˆ-ehˇ pyeuꞈ-iˇ-euˬ gaˇ kawˆ nawˇ ya gaˬ-euˬ meh. Nawˇ teuˆ dzeuˇ nya ma lehˇ noeˬ te loˇ.

¹² Gaˬzaˬ meuˬ, Haˬlaˬ meuˬ hawˇ-eu Yeˬzehˇ meuˬ kʼoeˇ deuˬ-ahˇ, nga maꞈ-euˬ aˬ poeˬ aˬ bawˇ deuˬ neh laˆ cawˆ byoˆ nehˬ-awˇ, Teˬlaˬsaˬ meuˬ-ahˇ jawˇ-eu Behˬeˬdeˬ tsawˇ haˬ deuˬ-ahˇ aˬ yawꞈ maꞈ neh sehꞈ-euˬ kʼawꞈ, aˬ yawꞈ maꞈ-euˬ miˬ yehˇ tiˬ gʼaˬ-iˬ aˬ yawꞈ maꞈ-ahˇ maˬ ka kʼoꞈ nehˬ nya-a.

¹³ Haˬmaˆ meuˬ, Aˬpaˆ meuˬ, Seˬpaˬbeˬ meuˬ, Heˬnaˬ meuˬ hawˇ-eu Iˇbaˬ meuˬ kʼoeˇ deuˬ-euˬ sahˬ paˬ deuˬ aˬ geu paw iˇ byoˆ jiˇ-euˬ ta” lehˇ tsaꞈ ahˇ gʼeh-euˬ meh.

¹⁴ Dawˬ tsaꞈ dawˬ dzawˇ mˇ le-euˬ tsawˇ haˬ kʼoeˇ deuˬ neh yuˇ leꞈ-euˬ sahˬ boꞈ-ahˇ, sahˬ paˬ Heˬsaˬgiˇ gui haw-euˬ meh. Kʼoeˇ naˇ, Uˬ duˬ tahˬ nymˇ nymˇ ma-ahˇ aˬ yawꞈ le-awˇ, sahˬ boꞈ kʼoeˇ dzeh Sahˬpaˬ Miˬyehˇ mehˬ shi bi jaˆ-awˇ,

¹⁵ heu loꞈ-ehˇ guiˬ lahˬ shaˇ-euˬ meh.

¹⁶ “Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-oˇ, Jeˬluˇbeˬ mawˇ kawˇ kʼoeˇ taˆ jaˆ-eu nuiˇ mahˬ kʼoeˇ taˆ nuiˇ luꞈ-eu nawˇ tiˬ gʼaˬ tehꞈ-ehˇ Miˬyehˇ pyeuꞈ-awˇ, miˇ tsaˬ kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ-ahˇ uˆ lahˇ luꞈ-eu meh. Mˬ hawˇ-eu miˇ-ahˇ nawˬ neh beh-euˬ meh.

¹⁷ Sahˬpaˬ Miˬyehˇ-oˇ, nga maꞈ-euˬ shaˇ dawˬ-ahˇ naˇ haˬ nehˬ laꞈ-awˇ, nga maꞈ kʼoeˇ taˆ keuˆ le taˬ-eu jeˬ-ahˇ haw mawˇ nehˬ laꞈ-awˬ. Dehꞈ luꞈ-eu Miˬyehˇ pyeuꞈ-eu nawˬ-ahˇ Seˬneˬkaˬliˇ neh yehˬ bawˬ sehˇ lu-ehˇ kʼaˇ ehˇ taˬ-euˬ jeˬ-ahˇ naˇ haˬ-awˬ.

¹⁸ Sahˬpaˬ Miˬyehˇ-oˇ, Aˬshuˇliˆ sahˬ paˬ deuˬ tsawˇ jeuˬ gʼawˬ mya jeuˬ-ahˇ laˆ cawˆ-awˇ, aˬ yawꞈ maꞈ-euˬ miˇ kʼahˬ bi luˬ bi seˇ-iˇ jiˇ-euˬ gaˇ kawˆ nawˇ siˬ nya luꞈ meh.

¹⁹ Kʼoeˇ naˇ, miˬ yehˇ maˇ maˇ ni maˬ ngeuˇ-eu, tsawˇ haˬ zaˬ-euˬ aˬ laꞈ neh jahˇ-euˬ daˇ kawˬ hawˇ-eu kʼaˬ lo tahˬ pahˬ aˬ ma mawˇ kawˇ pyeuꞈ-eu aˬ yawꞈ maꞈ-euˬ miˬ yehˇ deuˬ-ahˇ miˬ dzaˬ keuˬ dzeh nehˬ-euˬ meh.

²⁰ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ tiˬ gʼaˬ tehꞈ-ehˇ Miˬyehˇ pyeuꞈ-eu gaˇ kawˆ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ ya siˬ ni, Aˬshuˇliˆ tsawˇ jeuˬ-euˬ aˬ laꞈ laꞈ kʼoeˇ, nga maꞈ-ahˇ nawˇ ka kʼoꞈ nehˬ laꞈ-awˬ.”

Sahˬ paˬ Heˬsaˬgiˇ-ahˇ Iˇsaˬyaˇ neh tsaꞈ kʼoꞈ nehˬ-euˬ dawˬ

²¹ Aˬmoˆ-euˬ aˬ li Iˇsaˬyaˇ neh, sahˬ paˬ Heˬsaˬgiˇ-ahˇ heu loꞈ-ehˇ dawˬ tsaꞈ tsaꞈ kʼoꞈ nehˬ-euˬ meh. “Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. Aˬshuˇliˆ sahˬ paˬ Saˬneˬkaˬliˇ-ahˇ taꞈ leˇ-awˇ, nawˇ ngaˬ-ahˇ guiˬ lahˬ shaˇ-euˬ meh.

²² Saˬneˬkaˬliˇ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh. Saˬneˬkaˬliˇ-oˇ, Yeˬluˇsaˬlehˬ meuˬ nawˬ-ahˇ uiˇ-awˇ, noeˬ teˬ dui dui luꞈ meh.

²³ Aˬ suˇ gʼaˬ-ahˇ nawˇ yehˬ bawˬ sehˇ lu-ehˇ ehˇ-awˇ yaˬ kʼehˇ yaˬ luꞈ te lehˇ noeˬ-eu nya. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu ngaˬ-ahˇ, nawˇ yaw zeu maˬ baw te loˇ.

²⁴ Nawˬ-euˬ zaˬ kʼaˆ-ahˇ nawˇ pyehˬ gʼeh leꞈ-awˇ, goˇ dui dui-eu Leˬbaˬnoˬ gawˬ jawˬ-ahˇ nawˬ neh deuˆ gʼaˬ-euˬ gaˇ kawˆ, ngaˇ jawˇ gaˇ kʼahˬ sehˇ bi jehˆ le-euˬ meh. Kʼoeˇ gaˇ, goˇ dui dui-eu shuˬ liˇ aˇ bawˇ hawˇ-eu guˇ baˬ luˇ aˇ bawˇ deuˬ nawˇ tuˇ dzeh-awˇ, sahˬ kʼaˆ jeˬ dui dui-eu tsahˇ-ahˇ iˇ keuˆ-euˬ gaˇ kawˆ, nawˇ kʼahˬ sehˇ jehˆ-eu meh.

²⁵ Aˬ cawˬ miˇ kʼahˬ laꞈ kʼoeˇ nawˇ lah duˬ duˬ-awˇ iˇ cuꞈ dawˇ-euˬ gaˇ kawˆ kʼahˬ sehˇ jehˆ-eu uˬ taꞈ, nawˬ-euˬ yehˇ deuˬ neh Niˬlaˇ lawˇ baˬ nawˬ gui-euˬ meh lehˇ kʼahˬ sehˇ jehˆ-euˬ meh.

²⁶ “Heu deuˬ dawˬ tawˆ luꞈ pyeuꞈ laˇ ni, aˇ hu ba neh ngaˬ neh gaˇ kawˆ kawˆ taˬ jiˇ-euˬ nawˇ maˬ gaˬ-aˬ loˇ. Nymˬ-mˇ kʼoeˇ loꞈ-ehˇ pyeuꞈ laˇ ni ngaˇ jahˇ luꞈ-eu ma. Ziꞈ dah ni tsoˆ taˬ-euˬ meuˬ deuˬ-ahˇ byaˆ-iˇ ni jahˇ nya-eu baoˬ, nawˬ-ahˇ ngaˇ biꞈ taˬ-euˬ ma.

²⁷ Kʼoeˇ gaˇ jawˇ-eu tsawˇ haˬ deuˬ gʼaˬ maˬ ahˇ-a. Aˬ yawꞈ maꞈ guˆ-awˇ tsoˆ leˇ jiˇ taˬ-euˬ meh. Aˬ yawꞈ maꞈ-aˬ, nahˇ ma doˆ kʼehˬ paw neh baw gʼeh laꞈ-euˬ jaˬ lehˇ zaw leˇ ngeh nyoeˬ-iˇ koˆ-iˇ-eu daˬ yawˬ hawˇ-eu, nymˇ mˬ-ahˇ dehꞈ-eu jaˆ gaˆ-ahˇ duˇ-eu meh.

²⁸ “Ehˇ kʼaw, nawˬ-euˬ gaˇ kawˆ dawˬ tawˆ luꞈ ngaˇ siˬ nya jiˇ ma. Ngaˬ-ahˇ coeˬ laˇ ni nawˇ mˇ luꞈ-eu gaˇ kawˆ kʼawꞈ, ngaˇ siˬ nya luꞈ ma.

²⁹ Nawˇ ngaˬ-ahˇ guiˇ deuˆ le-euˬ gaˇ kawˆ hawˇ-eu, nawˇ nui ma huiˬ luꞈ mahˇ luꞈ-eu gaˇ kawˆ deuˬ ngaˇ ya gaˬ gʼaˬ jiˇ-euˬ ma. Nawˬ-euˬ naˇ mehˇ-ahˇ ngaˇ shmˇ kuˆ seuˬ diˬ ceuˬ-awˇ, nawˬ-euˬ kʼaˬ meh-ahˇ shmˇ daˇ ceh taꞈ tsoˆ-awˇ, nawˬ neh oe-euˬ gaˇ ma kahˇ li nawˬ-ahˇ ngaˇ tsahˇ kʼoꞈ gʼeh ma.”

³⁰ Kʼoeˇ naˇ, sahˬ paˬ Heˬsaˬgiˇ-ahˇ Iˇsaˬyaˇ heu loꞈ-ehˇ ehˇ nehˬ-euˬ meh. “Aˬ joˆ-ehˇ pyeuꞈ laˇ-eu lehˇ gʼeh-eu gaˇ kawˆ, nawˬ-euˬ gʼaˇ duˬ saˇ kiˇ heu loꞈ-ehˇ jaˆ tehꞈ-a. Tsuiꞈ nui kʼoꞈ hawˇ-eu naˬ yaꞈ kʼoꞈ laꞈ kʼoeˇ, bawˇ tsahˬ sahˬ lahˬ jaˆ gaˆ tehꞈ-ehˇ nawˇ ya dzaˬ tehꞈ-a. Ehˇ kʼawꞈ, na nui kʼoꞈ nawˇ cehˇ ya ka dzaˬ-awˇ, aˬ gaꞈ yaˇ kmˇ mˇ-awˇ, aˬ gaꞈ aˇ siˬ kʼawꞈ ya dzaˬ tehꞈ-a.

³¹ Yuˇdaˆ miˇ kʼahˬ laꞈ kʼoeˇ maˬ luˬ maˬ seˇ-iˇ-ehˇ kʼaˇ ya dzeuˇ-iˇ-euˬ tsawˇ haˬ dawˬ tawˆ luꞈ, yaw naꞈ-ahˇ duˬ ciˇ toeˬ ziꞈ-awˇ mehˇ laˇ-euˬ miˇ neh aˇ siˬ sahˇ le-eu sahˬ lahˬ aˇ bawˇ loꞈ-ehˇ, dehꞈ doˆ dzaˬ laˇ tehꞈ-a.

³² Yeˬluˇsaˬlehˬ meuˬ hawˇ-eu Ziˇoˬ gawˬ jawˬ kʼoeˇ taˆ, maˬ luˬ maˬ seˇ-iˇ ni dzeuˇ-iˇ-euˬ tsawˇ haˬ jawˇ tehꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ bi pyeuꞈ laˇ-eu gʼaˇ duˬ Baoˬ huiˬ-eu Sahˬpaˬ Miˬyehˇ neh noeˬ tsehˆ taˬ-euˬ jaˆ-eu meh.

³³ “Aˬshuˇliˆ sahˬ paˬ-euˬ gaˇ kawˆ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ taˬ-euˬ meh. ‘Meuˬ heu meuˬ-ahˇ aˬ yawꞈ maˬ ya uˇ keuˆ laˇ-eu uˬ taꞈ, kaˆ myaˬ tiˬ myaˬ-iˬ maˬ ya beuˆ ahˇ laꞈ-a. Dehˬ daˬ duˬ baꞈ luꞈ-eu aˬ yawꞈ-euˬ yehˇ tiˬ gʼaˬ-iˬ meuˬ dawˬ peh maˬ ya laˇ tehˬ-eu uˬ taꞈ, meuˬ-ahˇ deuˆ -eu gʼaˇ duˬ meuˬ lahˇ jawˬ jawˬ-ehˇ taˆ maˬ ya tsoˆ goˇ-a.

³⁴ Meuˬ heu meuˬ-ahˇ maˬ ya uˇ keuˆ laˇ ni, aˬ yawꞈ oe-euˬ gaˇ ma caw caw-ehˇ paˇ ya gʼoꞈ kʼoꞈ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

³⁵ Ngaˬ-euˬ myaˆ pyawˬ naˇ mehˇ gʼaˇ duˬ maˬ ehˇ, ngaˬ-euˬ zaˬ kʼaˆ Daˬbiˇ-ahˇ ngaˬ neh saˇ jaˇ dzaˬ taˬ-euˬ baˬ da neh maˬ ehˇ, meuˬ heu meuˬ-ahˇ ngaˇ bo saˆ haw piˇ ma.’ lehˇ ehˇ taˬ-euˬ meh.”

³⁶ Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ Aˬshuˇliˆ taˆ-ahˇ uˇ-iˇ-awˇ, yehˇ tiˬ seh yehꞈ muiˇ ngaˬ heˇ gʼaˬ-ahˇ sehꞈ-euˬ meh. Yawˬ shawˬ yawˬ uˬ bya bya laˇ ngeh, aˬ yawꞈ maꞈ dawˬ tawˆ luꞈ yaw shiˇ-ehˇ ga-eu meh.

³⁷ Kʼoeˇ ngeh, Aˬshuˇliˆ sahˬ paˬ Saˬneˬkaˬliˇ naˇ kʼah paw jiˆ gʼoꞈ-awˇ, Niˇnaˬbeˬ meuˬ-ahˇ gʼoꞈ leˇ-euˬ meh.

³⁸ Tiˬ nah keuˆ laˇ ngeh, aˬ yawꞈ-euˬ miˬ yehˇ pyeuꞈ-eu Niˇsaˬloˆ miˬ yehˇ-euˬ uˬ duˬ tahˬ nymˇ-ahˇ aˬ yawꞈ uˬ duˬ tahˬ luꞈ ngeh, aˬ yawꞈ-euˬ aˬ li Aˬdaˬlaˬmeˬlehˆ hawˇ-eu Shaˬleˬzaˬ aˬ nyaꞈ nmˇ, aˬ yawꞈ-ahˇ mi cehˇ neh sehꞈ-awˇ, Aˬyaˬyaˇ miˇ kʼahˬ-ahˇ cehˆ-euˬ meh. Kʼoeˇ naˇ, aˬ yawꞈ-euˬ aˬ li Eˇsaˬhaˬdoˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.