Iˇsaˬyaˇ 36 - Akha

Aˬshuˇliˆ tsawˇ haˬ deuˬ Yeˬluˇsaˬlehˬ meuˬ-ahˇ guiˇ deuˆ-eu lehˇ gʼeh-eu

¹ Yuˇdaˆ miˇ kʼahˬ-ahˇ Heˬsaˬgiˇ uˆ lahˇ-eu tseˇ oeˬ kʼoꞈ tiˬ kʼoꞈ-ahˇ, Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni gʼeh-eu meuˬ deuˬ-ahˇ Aˬshuˇliˆ sahˬ paˬ Saˬneˬkaˬliˇ deuˆ gʼaˬ-euˬ meh.

² Kʼoeˇ naˇ, aˬ yawꞈ-euˬ guiˇ maꞈ deuˬ kʼoeˇ taˆ uˆ lahˇ-eu yaw huiˬ yaw mahˇ-ahˇ, guiˇ maꞈ maꞈ ma sheuˬ-awˇ Laˬkiˇshaˆ meuˬ-ahˇ neh Yeˬluˇsaˬlehˬ meuˬ-ahˇ sahˬ paˬ Heˬsaˬgiˇ jawˇ gaˇ bi iˇ-euˬ meh. Laꞈ taˆ paw-euˬ lah-ahˇ neh meuˬ-ahˇ iˇ cuꞈ yuˇ ahˇ-euˬ uiˇ kʼehˬ dawˬ peh, saˬ nmˇ saˬ paˇ mˇ-eu jawˇ duˬ-ahˇ jaˆ-eu gaˇ jawˬ-ahˇ, yaw huiˬ yaw mahˇ kʼoeˇ gʼaˬ jawˇ naˬ-euˬ meh.

³ Sahˬ paˬ-euˬ nymˇ-ahˇ haw-eu pyaˆ-eu gʼaˬ pyeuꞈ-eu Hiˇlaˬkiˇ-euˬ aˬ li Eˇliˇkmˬ, saˇ naˇ-ahˇ gaˇ nyehꞈ tehꞈ-eu gʼaˬ pyeuꞈ-eu Sheˬbaˬnaˬ hawˇ-eu, jaˇ laˇ yuˇ-eu paw aˬ yuiꞈ geuꞈ-eu gʼaˬ pyeuꞈ-eu Aˬsaˆ-euˬ aˬ li Yoˇaˬ, aˬ ha smˇ gʼaˬ meuˬ laꞈ kʼoeˇ neh doˆ laˇ-awˇ, aˬ yawꞈ-ahˇ tahˬ puˬ laˇ-euˬ meh.

⁴ “Aˬ jeˬ baˬ da neh sahˬ paˬ Heˬsaˬgiˇ yawˬ haˇ yawˬ ha nui kʼaˬ tsmˬ-eu gaˇ kawˆ-ahˇ, Aˬshuˇliˆ sahˬ paˬ siˬ nya mawꞈ meh” lehˇ, aˬ ha smˇ gʼaˬ-ahˇ Aˬshuˇliˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ ehˇ nehˬ-euˬ meh.

⁵ Aˬ yawꞈ ehˇ-eu, “Guiˇ deuˆ-eu tsawˇ gahˇ hawˇ-eu baoˬ maˬ jaˆ gaˇ, mehˬ boeˬ neh gʼaˬ leˇ nya ma lehˇ naw maꞈ noeˬ te loˇ. Aˬshuˇliˆ tsawˇ jeuˬ-ahˇ naw maꞈ ciˬ cehˆ nya ni, naw maꞈ-ahˇ aˬ suˇ gʼaˬ caw ba le gaˇ noeˬ muiˬ luꞈ te.

⁶ Iˇjiˇtuˆ miˇ kʼahˬ-ahˇ naw maꞈ noeˬ tmˬ-eu meh. Ehˇ kʼawꞈ, aˇ toꞈ aˇ kahˬ coeˇ-awˇ gawˬ yoeˬ toˆ-eu naˆ ni tehꞈ meh. Aˇ toꞈ aˇ kahˬ kʼoeˇ kʼehꞈ-iˇ-awˇ naw maꞈ-euˬ aˬ laꞈ-ahˇ dehˬ tsawˆ tehꞈ-a. Iˇjiˇtuˆ sahˬ paˬ-ahˇ nui kʼaˬ tsmˬ-eu tsawˇ haˬ deuˬ-euˬ guiˬ lahˬ kʼoeˇ loˆ ni tehꞈ meh.”

⁷ Aˬshuˇliˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ paˇ ehˇ-eu, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nui kʼaˬ tsmˬ-eu ma lehˇ, naw maꞈ ngaˬ-ahˇ paˇ ehˇ nmˇ loˇ. Kʼoeˇ loꞈ-ehˇ ngeuˇ naˇ kʼawꞈ, lawˇ duˬ tiˬ tsahˇ-ahˇ tehꞈ-ehˇ uˬ duˬ ya tahˬ meh lehˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ Heˬsaˬgiˇ ehˇ nehˬ ngeh, Sahˬpaˬ Miˬyehˇ-euˬ lawˇ duˬ hawˇ-eu uˬ duˬ tahˬ-eu jawˇ duˬ deuˬ-ahˇ aˬ yawꞈ neh laˆ cawˆ jiˇ-euˬ maˬ ngeuˇ-a loˇ.

⁸ Nga maꞈ-euˬ sahˬ paˬ-euˬ tsawˇ myahˇ uˬ moˆ neh naw maꞈ-ahˇ ngaˇ heu loꞈ-ehˇ lawˬ haw ma. Naw maꞈ-ahˇ ngaˇ mahˬ nyiˬ heˇ mawˇ biꞈ nyaˇ. Mahˬ dziˬ-eu tsawˇ haˬ naw maꞈ poˆ doˆ nya ma loˇ.

⁹ Aˬshuˇliˆ guiˇ maꞈ laꞈ kʼoeˇ, nyiˇ dui dui-eu aˬ yuiꞈ geuꞈ-eu tiˬ gʼaˬ naˆ ni kʼawꞈ, naw maꞈ maˬ kʼoˆ tsehˆ gaˇ neh, Iˇjiˇtuˆ tsawˇ haˬ deuˬ naw maꞈ-ahˇ mahˬ laˆ lawˬ hawˇ-eu mahˬ dziˬ-eu yehˇ deuˬ biꞈ gʼeh laꞈ tehꞈ-a lehˇ aˬ joˆ-ehˇ noeˬ tmˬ peuˬ-eu nya.

¹⁰ Sahˬpaˬ Miˬyehˇ ngaˬ-ahˇ maˬ caw ba nehˬ laꞈ ni, naw maꞈ-euˬ miˇ kʼahˬ-ahˇ ngaˇ guiˇ deuˆ-awˇ laˆ cawˆ le-euˬ nga lehˇ naw maꞈ noeˬ te loˇ. Miˇ kʼahˬ heu kʼahˬ-ahˇ guiˇ deuˆ-awˇ laˆ cawˆ nehˬ-eu gʼaˇ duˬ, Sahˬpaˬ Miˬyehˇ ngaˬ-ahˇ dawˬ biꞈ laꞈ-eu meh.”

¹¹ Kʼoeˇ ngeh, Eˇliˇkmˬ, Sheˬbaˬnaˬ hawˇ-eu Yoˇaˬ aˬ ha smˇ gʼaˬ, yaw huiˬ yaw mahˇ kʼoeˇ gʼaˬ-ahˇ heu loꞈ-ehˇ ehˇ nehˬ-euˬ meh. “Nga maꞈ-ahˇ Aˬlaˬmiˇ dawˬ ngehˬ cawˬ nehˬ laꞈ-awˬ. Nga maꞈ gʼoˆ shaw nya ma. Heˬbyehˇ dawˬ taˬ ngehˬ cawˬ laꞈ. Meuˬ meuˬ lahˇ kʼoeˇ taˆ daˆ-eu tsawˇ haˬ dawˬ tawˆ luꞈ naˇ haˬ luꞈ nga.”

¹² Yaw huiˬ yaw mahˇ kʼoeˇ gʼaˬ ehˇ-eu, “Naw maꞈ heu myaˆ gʼaˬ hawˇ-eu naw maꞈ-euˬ sahˬ paˬ tehꞈ-ehˇ bi siˬ-eu gʼaˇ duˬ, ngaˬ-euˬ sahˬ paˬ ngaˬ-ahˇ heu loꞈ-ehˇ bi ngehˬ bi tmˇ le-euˬ nga lehˇ naw maꞈ noeˬ te loˇ. Kʼoeˇ loꞈ-ehˇ maˬ ngeuˇ. Meuˬ meuˬ lahˇ kʼoeˇ taˆ nuiˇ luꞈ-eu tsawˇ haˬ kʼoeˇ deuˬ kʼawꞈ ya gaˬ ni ngaˇ ngehˬ luꞈ-eu ma. Aˬ yawꞈ maꞈ kʼawꞈ naw maꞈ loꞈ-ehˇ, yawˬ ha-euˬ keˬ ya dzaˬ-awˇ yawˬ ha-euˬ iˇ shoi ya dawˇ gaˇ keuˆ tehꞈ-a.”

¹³ Kʼoeˇ naˇ, yaw huiˬ yaw mahˇ kʼoeˇ gʼaˬ tsawˬ tuˇ-awˇ, Heˬbyehˇ dawˬ ngehˬ-awˇ heu loꞈ-ehˇ guˇ-eu meh. “Aˬshuˇliˆ sahˬ paˬ neh naw maꞈ-ahˇ ehˇ nehˬ laꞈ-euˬ dawˬ-ahˇ naˇ haˬ sheˇ.

¹⁴ Naw maꞈ Heˬsaˬgiˇ mehˇ shuiˇ shuiˇ gaˇ taˬ tawˆ leˇ. Aˬ yawꞈ naw maꞈ-ahˇ maˬ ka kʼoꞈ nya-a lehˇ Aˬshuˇliˆ sahˬ paˬ naw maꞈ-ahˇ sha tiꞈ biꞈ luꞈ meh.

¹⁵ Sahˬpaˬ Miˬyehˇ-ahˇ gʼoe-awˬ lehˇ Heˬsaˬgiˇ naw maꞈ-ahˇ mehˬ gaˇ taˬ naˇ haˬ. Sahˬpaˬ Miˬyehˇ naw maꞈ-ahˇ ka kʼoꞈ nehˬ le-awˇ, naw maꞈ-euˬ meuˬ-ahˇ nga maꞈ Aˬshuˇliˆ guiˇ maꞈ deuˬ maˬ bi deuˆ gʼaˬ ni Sahˬpaˬ Miˬyehˇ laˆ tsoeˬ tehꞈ-a lehˇ taˬ noeˬ.

¹⁶ Heˬsaˬgiˇ ehˇ gaˇ taˬ naˇ haˬ. Meuˬ laꞈ nyiˇ doˆ le-awˇ, nga maꞈ-euˬ laꞈ oꞈ awꞈ-awˬ. Laˇ-awˬ lehˇ Aˬshuˇliˆ sahˬ paˬ dawˬ biꞈ luꞈ meh. Naw maꞈ yawˬ ha neh mˇ za-euˬ aˬ gaꞈ aˇ siˬ hawˇ-eu siˬ guˬ maˇ sheuˇ aˇ siˬ ya dzaˬ-awˇ, yawˬ ha-euˬ iˇ cuꞈ lah duˬ-ahˇ ya kʼawꞈ dawˇ-eu a kawˬ-aˬ za tehꞈ-a.

¹⁷ Aˬ gaꞈ yaˇ kmˇ mˇ kʼaˇ za-awˇ, dzaˬ la gʼo cehˇ za le-eu naw maꞈ-euˬ miˇ kʼahˬ-ahˇ duˇ dui dui-eu jawˇ duˬ-ahˇ bi jawˇ-eu gʼaˇ duˬ, nga maꞈ-euˬ sahˬ paˬ naw maꞈ-ahˇ maˬ sheuˬ laˬ le kʼoeˇ keuˆ ni, naw maꞈ kʼoeˇ loꞈ-ehˇ ya dehꞈ ya jawˇ tehꞈ-a.

¹⁸ Sahˬpaˬ Miˬyehˇ naw maꞈ-ahˇ ka kʼoꞈ nehˬ laꞈ tehꞈ-a lehˇ Heˬsaˬgiˇ ehˇ gaˇ naˇ haˬ-awˇ gaˇ ma taˬ bi sheuˬ bahˬ. Aˬshuˇliˆ sahˬ paˬ-euˬ aˬ laꞈ laꞈ oˆ, yawˬ ha-euˬ miˬ yehˇ neh bi ka kʼoꞈ haw-euˬ miˇ kʼahˬ jaˆ meh loˇ.

¹⁹ Haˬmaˆ miˬ yehˇ hawˇ-eu Aˬpaˆ miˬ yehˇ, nymˬ-mˇ aˬ geu paw cehˆ byoˆ-awˇ jawˇ ta. Sheˬpaˬbeˬ miˬ yehˇ deuˬ aˬ geu gaˇ iˇ byoˆ jiˇ-euˬ ta.

²⁰ Saˬmaˬliˆ meuˬ-ahˇ ka kʼoꞈ nehˬ-euˬ gʼaˬ jawˇ meh loˇ. Nga maꞈ miˇ kʼahˬ uˆ lahˇ-eu uˬ moˆ maˬ ya jawˇ ni, miˇ kʼahˬ heu deuˬ-ahˇ aˬ yawꞈ maꞈ-euˬ miˬ yehˇ neh ka kʼoꞈ doˆ nehˬ-euˬ aˇ myaˆ poˆ jaˆ ta. Toˆ-ehˇ ngeuˇ naˇ, Yeˬluˇsaˬlehˬ meuˬ-ahˇ Sahˬpaˬ Miˬyehˇ ka kʼoꞈ tehꞈ-a lehˇ naw maꞈ aˬ joˆ-ehˇ noeˬ tmˬ peuˬ-eu nya.”

²¹ Sahˬ paˬ Heˬsaˬgiˇ neh ehˇ nehˬ taˬ-euˬ loꞈ-ehˇ, tsawˇ haˬ kʼoeˇ deuˬ dawˬ tiˬ dawˬ-iˬ maˬ ngehˬ ni ciˬ cuˇ ni jawˇ-eu meh.

²² Kʼoeˇ naˇ, Eˇliˇkmˬ, Sheˬbaˬnaˬ hawˇ-eu Yoˇaˬ aˬ ha smˇ gʼaˬ noeˬ shaˬ dui dui-eu laꞈ kʼoeˇ, yawˬ ha dm luꞈ-eu mehˬ tsoeˬ cehˬ pyaˬ-awˇ, Aˬshuˇliˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ neh ehˇ-euˬ dawˬ deuˬ, sahˬ paˬ Heˬsaˬgiˇ-ahˇ tsaꞈ gaˬ leˇ-euˬ meh.