Iˇsaˬyaˇ 34 - Akha

Muiˇ-eu deuˬ-ahˇ Miˬyehˇ kʼehˬ nehˬ tehꞈ-a

¹ Tsawˇ jeuˬ dawˬ tawˆ luꞈ-oˇ, laˇ-awˇ naˇ haˬ laˇ-awˬ. Tsawˇ haˬ dawˬ tawˆ luꞈ-oˇ, naˬ bawˇ ciˬ kʼmˇ laˇ-awˬ. Miˇ tsaˬ tahˬ kʼawˇ hawˇ-eu miˇ tsaˬ zaˬ dawˬ tawˆ luꞈ, laˇ-awˇ naˇ haˬ laˇ-awˬ.

² Tsawˇ jeuˬ dawˬ tawˆ luꞈ-ahˇ Sahˬpaˬ Miˬyehˇ nui ma pehˇ-awˇ, guiˇ maꞈ dawˬ tawˆ luꞈ-ahˇ aˬ yawꞈ nui ma daˆ luꞈ-eu meh. Aˬ yawꞈ maꞈ-ahˇ aˬ yawꞈ laˆ cawˆ nehˬ-awˇ, bi sehꞈ byoˆ jiˇ tehꞈ-a.

³ Aˬ yawꞈ maꞈ shiˇ-awˇ baꞈ dzeh-euˬ, yaw buꞈ yoˆ yoˆ-ehˇ ya ga-awˇ, gawˬ jawˬ-ahˇ shiˬ neˇ tseuˆ ni jaˆ tehꞈ-a.

⁴ Nahˇ ma, ba la, aˬ guiˇ dawˬ tawˆ guiˇ byoˆ jiˇ-awˇ, saˬ nmˇ lehˬ yoˆ-eu loꞈ-ehˇ mˬ lehˬ yoˆ kʼoꞈ-awˇ, siˬ guˬ maˇ sheuˇ aˇ paꞈ ga-eu loꞈ-ehˇ, aˬ guiˇ dawˬ tawˆ ga le tehꞈ-a.

⁵ Mˬ taˆ Sahˬpaˬ Miˬyehˇ mi cehˇ sheu doˆ leꞈ-awˇ, aˬ yawꞈ laˆ cawˆ ma lehˇ noeˬ duˬ taˬ-euˬ deuˬ jawˇ luꞈ-eu, Eˬdoˬ meuˬ-ahˇ deuˆ le tehꞈ-a.

⁶ Lawˇ-eu shehˇ-eu gʼaˇ duˬ ciꞈ myehꞈ hawˇ-eu yawˇ-ahˇ sehꞈ ngeh, shiˬ hawˇ-eu tsiˇ mi cehˇ-ahˇ lehꞈ leˇ-eu loꞈ-ehˇ, Sahˬpaˬ Miˬyehˇ-euˬ mi cehˇ-ahˇ, aˬ yawꞈ maꞈ-euˬ shiˬ hawˇ-eu tsiˇ lehꞈ leˇ tehꞈ-a. Bawˇzaˬlahˬ meuˬ-ahˇ aˬ yawꞈ kʼoeˇ loꞈ-ehˇ lawˇ nehˬ ngeh, Eˬdoˬ miˇ kʼahˬ-ahˇ jawˇ-eu tsawˇ haˬ deuˬ, sehꞈ gahˬ sehꞈ cu nehˬ gaˇ ya daˬ tehꞈ-a.

⁷ Nehꞈ nyoˬ hawˇ-eu mawˇ neˇ sehꞈ dzeh nehˬ-eu loꞈ-ehˇ, aˬ yawꞈ maꞈ ya coˬ sehꞈ jiˇ-awˇ, aˬ yawꞈ maꞈ-euˬ shiˬ hawˇ-eu tsiˇ, miˇ tsaˬ tiˬ gʼoeˬ yoeˇ dahˬ tehꞈ-a.

⁸ Ziˇoˬ meuˬ-ahˇ Sahˬpaˬ Miˬyehˇ ka kʼoꞈ le-awˇ, muiˇ-eu deuˬ-ahˇ laꞈ poˆ poˆ nehˬ ngeh nah, kʼoeˇ loꞈ-ehˇ gʼeh-eu jeˬ keuˆ le tehꞈ-a.

⁹ Eˬdoˬ miˇ kʼahˬ-ahˇ yoeˇ-eu lawˇ baˬ lawˇ gawˆ deuˬ, miˬ shuˬ miˬ dziˬ pyeuꞈ-iˇ jiˇ-awˇ, miˇ tsaˬ miˬ dzaˇ dzaˇ shuiˇ pyeuꞈ-iˇ jiˇ-euˬ miˇ neh, miˇ kʼahˬ kʼahˬ lah miˬ shuˬ doꞈ-eu loꞈ-ehˇ puiˆ dzaˬ tehꞈ-a.

¹⁰ Uˬ ciꞈ nah gʼahˇ maˬ ehˇ puiˆ-eu miˇ neh, mˬ maˬ maˬ byaˆ zaˇ ziˇ uˬ kʼoeˬ doˆ luꞈ tehꞈ-a. Miˇ kʼahˬ kʼoeˇ kʼahˬ tiˬ ziˇ saˇ-iˬ tiˬ ziˇ byoˆ le-eu miˇ neh, iˇ tsehˆ laˇ tsehˆ-eu maˬ jawˇ-ehˇ pyeuꞈ-iˇ tehꞈ-a.

¹¹ Dzeˇ ngawˇ hawˇ-eu awꞈ-aꞈ deuˬ kʼoeˇ gaˇ jawˇ geuꞈ tehꞈ-a. Miˇ kʼahˬ kʼoeˇ-ahˇ Sahˬpaˬ Miˬyehˇ laˆ byoˆ nehˬ-awˇ, mˬ hawˇ-eu miˇ maˬ beh mi naˆ-ehˇ jaˆ-euˬ, aˬ yawꞈ yaw oeˇ tsahˇ-ahˇ bi gʼoꞈ kʼoꞈ-iˇ tehꞈ-a.

¹² Miˇ kʼahˬ kʼoeˇ kʼahˬ-ahˇ dzoeˬ dzaˬ-eu sahˬ paˬ maˬ jawˇ-ehˇ, sahˬ paˬ sahˬ ma deuˬ maˬ baw ni pyeuꞈ-iˇ tehꞈ-a.

¹³ Sahˬ paˬ-euˬ nymˇ aˬ gah baw duˆ dehꞈ byah jiˇ-awˇ, meuˬ lahˇ baw-eu meuˬ deuˬ yaˇ moꞈ uˆ tehˬ jiˇ-awˇ, bawˇ tsahˬ aˬ kuiˬ hawˇ-eu dzeˇ ngawˇ deuˬ jawˇ byah jiˇ tehꞈ-a.

¹⁴ Haiˬ-eu bawˇ tsahˬ jeˬ zaˬ kʼoeˇ gaˇ uˇ-awˇ, nehꞈ muiˇ nehꞈ cehˇ guˇ cawˬ duˬ pyeuꞈ-iˇ-awˇ, uˬ ciꞈ gaˆ dzaˬ-eu nehꞈ kʼoeˇ gaˇ gʼaˬ naˬ naˬ le tehꞈ-a.

¹⁵ Dzeˇ ngawˇ deuˬ kʼoeˇ gaˇ bahˬ bahˬ-awˇ, zaˬ ceuꞈ-awˇ bo saˆ huiˬ tehꞈ-a. Jeˬ shiˇ kʼaˬ dzeˇ deuˬ kʼawꞈ, tiˬ mawˇ saˇ-i tiˬ mawˇ jawˇ uˇ le tehꞈ-a.

¹⁶ Jeˬ zaˬ deuˬ gaˇ kawˆ boꞈ ahˇ taˬ-euˬ, Sahˬpaˬ Miˬyehˇ-euˬ sahˬ boꞈ pah haw sheˇ. Jeˬ zaˬ heu deuˬ tiˬ mawˇ-iˬ maˬ ya byoˆ-iˇ-eu uˬ taꞈ, aˇ gu ma baw-eu aˇ teˬ maˬ ya bi jawˇ-a lehˇ, Sahˬpaˬ Miˬyehˇ dawˬ biꞈ taˬ-eu jaˆ-awˇ, aˬ yawꞈ maꞈ-ahˇ aˬ yawꞈ tiˬ gaˇ sheuˬ dzoeˇ tehꞈ-a.

¹⁷ Jeˬ zaˬ kʼoeˇ deuˬ gʼaˇ duˬ Sahˬpaˬ Miˬyehˇ miˇ tsaˬ biˇ-awˇ, yawˬ jeˬ na luꞈ-ahˇ biˇ oꞈ nehˬ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ ziꞈ dah ni jawˇ-awˇ, mˬ maˬ maˬ byaˆ zaˇ ziˇ aˬ yawꞈ maꞈ-ahˇ oꞈ tehꞈ-a.