Iˇsaˬyaˇ 31 - Akha

Yeˬluˇsaˬlehˬ meuˬ-ahˇ Miˬyehˇ haw piˇ tehꞈ-a

¹ Iˇjiˇtuˆ miˇ kʼahˬ-ahˇ laꞈ jeuˬ shaˇ-iˇ-eu tsawˇ haˬ deuˬ, yaw kʼaˆ-ehˇ ya noeˬ shaˬ tehꞈ-a. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu, Sahˬpaˬ Miˬyehˇ-ahˇ maˬ gʼoe-ehˇ, mahˬ deuˬ-ahˇ nui kʼaˬ tsmˬ-awˇ, mahˬ laˆ lawˬ myaˬ gaˇ nui ma huiˬ-eu, mahˬ dziˬ-eu yehˇ deuˬ-euˬ gʼaˬ-ahˇ gʼoe-eu deuˬ, yaw kʼaˆ-ehˇ ya noeˬ shaˬ tehꞈ-a.

² Ehˇ kʼawꞈ, Miˬyehˇ yawꞈ mˇ-euˬ gaˇ yawꞈ siˬ nya-awˇ, shaˬ zahˬ guˆ gaˆ bi keuˆ le nya-eu meh. Yaw haiˬ jeˬ mˇ-eu tsawˇ haˬ deuˬ hawˇ-eu, aˬ yawꞈ maꞈ-ahˇ haw piˇ nehˬ-eu deuˬ-ahˇ, aˬ yawꞈ laˆ guˆ-awˇ kʼehˬ tehꞈ-a.

³ Iˇjiˇtuˆ tsawˇ haˬ kʼawꞈ tsawˇ haˬ zaˬ meh. Miˬyehˇ maˬ ngeuˇ-a. Aˬ yawꞈ maꞈ-euˬ mahˬ deuˬ kʼawꞈ shiˬ shaˬ jiˇ meh. Maˬ shiˇ nya-eu yaw sahˇ maˬ ngeuˇ-a. Sahˬpaˬ Miˬyehˇ aˬ laꞈ cawˬ doˆ laꞈ ngeh, aˬ cawˬ-ahˇ caw ba nehˬ-eu miˇ kʼahˬ dawˬ teˇ teˇ-awˇ, aˬ cawˬ-ahˇ gʼoe-eu miˇ kʼahˬ coˬ-iˇ-eu miˇ neh, nyiˬ kʼahˬ tiˬ gaˇ luˬ-iˇ seˇ-iˇ tehꞈ-a.

⁴ Sahˬpaˬ Miˬyehˇ ngaˬ-ahˇ ehˇ-eu, “Yawˇ bo-eu deuˬ aˇ naˆ guˇ kʼawꞈ, yawˇ kawꞈ sehꞈ-eu aˇ laˬ jaˬ shiˇ, maˬ luˆ laˇ ni jawˇ-eu loꞈ-ehˇ, Ziˇoˬ gawˬ jawˬ-ahˇ haw piˇ-eu, Baoˬ huiˬ-eu Sahˬpaˬ Miˬyehˇ pyeuꞈ-eu ngaˬ-ahˇ tiˬ jeˬ-iˬ maˬ teh luˆ nya-a.

⁵ Bahˬ kʼoeˇ taˆ zah luꞈ-eu aˇ jiˇ aˬ ma, aˇ jiˇ zaˬ-ahˇ haw piˇ luꞈ-eu loꞈ-ehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ, Yeˬluˇsaˬlehˬ meuˬ-ahˇ haw teˬ haw piˇ-eu ma.”

⁶ Iˇsaˬleˬlaˆ tsawˇ haˬ deuˬ-oˇ, dzeuˇ laˇ ngeh naw maꞈ iˬ baˇ mˇ-awˇ ngaˬ-ahˇ puiˬ-eu kʼawꞈ, ngaˇ jawˇ gaˇ gʼoꞈ kʼoꞈ laˇ-awˬ.

⁷ Naw maꞈ neh pyuˇ hawˇ-eu shuiˇ yuˇ-awˇ jahˇ taˬ-euˬ tahˬ pahˬ aˬ ma mawˇ kawˇ deuˬ-ahˇ, naw maꞈ yawˬ gʼaˬ na luꞈ ya biˬ dzeh-eu aˇ nah keuˆ le tehꞈ-a.

⁸ “Tsawˇ haˬ zaˬ neh maˬ tehˆ-euˬ mi cehˇ kʼehˬ-ahˇ, tsawˇ haˬ zaˬ neh maˬ deuˆ-euˬ mi cehˇ kʼehˬ-ahˇ, Aˬshuˇliˆ tsawˇ haˬ deuˬ ya shiˇ tehꞈ-a. Mi cehˇ kʼehˬ-ahˇ ya cehˆ byaˆ-awˇ, aˬ yawꞈ maꞈ-euˬ zaˬ yo aˬ cawˬ zaˬ kʼaˆ ya geuꞈ tehꞈ-a.

⁹ Ziꞈ dah ni gʼeh-eu aˬ yawꞈ maꞈ-euˬ taˆ, guˆ-eu miˇ neh byaˆ-iˇ tehꞈ-a. Guiˇ deuˆ-eu yaw huiˬ deuˬ guˆ dui dui-awˇ, paˇ loˬ paˇ lehˇ byehˇ-awˇ cehˆ tehꞈ-a” lehˇ ehˇ taˬ-euˬ meh. Yeˬluˇsaˬlehˬ meuˬ aˬ yawꞈ-ahˇ uˬ duˬ tahˬ-awˇ, lawˇ-eu shehˇ-eu jeˬ miˬ dzaˬ bi doꞈ laˇ-eu gʼaˬ pyeuꞈ-eu, Sahˬpaˬ Miˬyehˇ neh kʼoeˇ loꞈ-ehˇ ehˇ taˬ-euˬ meh.