Iˇsaˬyaˇ 30 - Akha

Iˇjiˇtuˆ miˇ kʼahˬ nehˬ-ehˇ mehˬ bawˬ mˇ-euˬ lehˬ-eu

¹ Sahˬpaˬ Miˬyehˇ heu loꞈ-ahˇ ehˇ-eu meh. “Yuˇdaˆ miˇ kʼahˬ-ahˇ uˆ lahˇ-eu tsawˇ haˬ deuˬ, ngaˬ-ahˇ puiˬ-eu miˇ neh, ya noeˬ shaˬ dui dui tehꞈ-a. Ngaˇ maˬ bi mˇ mawꞈ-eu jeˬ aˬ yawꞈ maꞈ mˇ-awˇ, ngaˇ nui ma maˬ tsaˬ-eu deuˬ-ahˇ mehˬ bawˬ gm-eu laꞈ kʼoeˇ, iˬ baˇ duˬ gahˬ gahˬ luꞈ-eu meh.

² Ngaˬ-ahˇ tiˬ dawˬ maˬ naˇ haˬ ni, Iˇjiˇtuˆ miˇ kʼahˬ-ahˇ laꞈ jeuˬ shaˇ-awˇ, Iˇjiˇtuˆ sahˬ paˬ-ahˇ jah-eu laꞈ kʼoeˇ, Iˇjiˇtuˆ tsawˇ jeuˬ-ahˇ tahˬ shaˇ-euˬ meh.

³ Ehˇ kʼawꞈ, aˬ yawꞈ maꞈ-ahˇ haw piˇ nehˬ-eu gʼaˇ duˬ, Iˇjiˇtuˆ sahˬ paˬ baoˬ maˬ jaˆ-ehˇ, Iˇjiˇtuˆ miˇ kʼahˬ-ahˇ nui kʼaˬ tsmˬ-euˬ, aˇ saˬ saˬ ngeh daˬ ga dui dui tehꞈ-a.

⁴ Iˇjiˇtuˆ meuˬ nyiˬ meuˬ pyeuꞈ-eu, Zoˇnaˆ hawˇ-eu Haˬneˬ meuˬ-ahˇ, aˬ yawꞈ maꞈ-euˬ tsawˇ kaˬ deuˬ oe keuˆ taˬ-euˬ kʼawꞈ,

⁵ aˬ yawꞈ maꞈ neh noeˬ-euˬ loꞈ-ehˇ maˬ caw ba nehˬ nya-eu, gaˇ dahˇ maˬ tsoeˬ-eu tsawˇ jeuˬ-ahˇ noeˬ tmˬ-euˬ miˇ neh, shaˬ zahˬ bi ciˬ tehˬ-awˇ daˬ ga tehꞈ-a.”

⁶ Heu-aˬ, laꞈ oˆ paw kʼaˇ shuiꞈ deh yaˇ-ahˇ jawˇ-eu, jeˬ zaˬ deuˬ-ahˇ taꞈ-eu Miˬyehˇ-euˬ dawˬ meh. “Aˇ laˬ jaˬ shiˇ hawˇ-eu doꞈ kʼaˆ-eu aˇ lawˇ deuˬ jawˇ duˬ, zaw nya-eu byaˆ yahˬ deuˬ gaˆ dzaˬ luꞈ-eu guˆ laˇ paˬ-ehˇ gʼeh-eu jawˇ duˬ tiˬ tsahˇ-ahˇ, miˇ kʼahˬ tsawˇ kaˬ geuꞈ-eu deuˬ cah tsehˆ luꞈ-eu meh. Aˬ yawꞈ maꞈ-ahˇ ngehˬ maˬ gʼeh nehˬ nya-eu tsawˇ jeuˬ gʼaˇ duˬ, aˇ poeˬ kʼaˆ dui dui-eu laꞈ sawˬ deuˬ-ahˇ, mahˬ tahˬ laˆ neh tawˬ-awˇ cah luꞈ-eu meh.

⁷ Iˇjiˇtuˆ miˇ kʼahˬ neh ngehˬ gʼeh-euˬ jeˬ, tiˬ pawꞈ-iˬ gaˇ dahˇ maˬ tsoeˬ-a. Kʼoeˇ miˇ neh, Iˇjiˇtuˆ miˇ kʼahˬ-ahˇ ngaˇ, doꞈ maˬ ahˇ-eu byaˆ yahˬ lehˇ kuˇ-eu ma.”

Naˬ lehˬ lehˬ-eu tsawˇ jeuˬ

⁸ Tsawˇ haˬ heu deuˬ haiˬ dui dui-eu gaˇ kawˆ, aˬ kaˇ kaˇ ziˇ keuˆ ni maˬ bi ngehˇ ni, sahˬ boꞈ laꞈ kʼoeˇ boꞈ ahˇ taˬ-eu gʼaˇ duˬ, Miˬyehˇ ngaˬ-ahˇ kʼehˇ le-euˬ meh.

⁹ Aˬ yawꞈ maꞈ Miˬyehˇ-ahˇ maˬ tsehˆ leˇ ni puiˬ-awˇ, jaˬ myawꞈ mehˇ shuiˇ myaˬ-eu laꞈ kʼoeˇ, Sahˬpaˬ Miˬyehˇ mehˬ gaˇ maˬ naˇ haˬ-a.

¹⁰ Miˬyehˇ gʼaˇ duˬ ngehˬ dah luꞈ-eu deuˬ-ahˇ, aˬ yawꞈ maꞈ kʼaˬ meh paꞈ tsoeˬ tsoeˬ nehˬ-awˇ, “Yaw tsaˬ yaw dawˇ jeˬ gaˇ kawˆ maˬ mehˬ ni, nga maꞈ naˇ haˬ mawꞈ-eu dawˬ deuˬ hawˇ-eu, gaˇ jaw jaw-eu dawˬ mehˬ le-awˬ” lehˇ ehˇ-eu meh.

¹¹ “Nga maꞈ cah-eu gaˇ ma-ahˇ taˬ laˆ tsoeˬ Iˇsaˬleˬlaˆ-euˬ muiˬ-eu shawˇ-eu Miˬyehˇ gaˇ kawˆ, nga maꞈ maˬ gaˬ mawꞈ nya” lehˇ ehˇ-eu meh.

¹² Ehˇ kʼawꞈ, Iˇsaˬleˬlaˆ-euˬ muiˬ-eu shawˇ-eu Miˬyehˇ, heu loꞈ-ehˇ ehˇ-eu meh. “Ngaˬ neh ehˇ-euˬ dawˬ-ahˇ naw maꞈ maˬ naˇ haˬ-ehˇ, nawˬ dzaˬ shuiˇ dzaˬ-eu meh.

¹³ Naw maꞈ iˬ baˇ huiˬ dui dui meh. Tsawˬ nga taˬ-euˬ meuˬ lahˇ lahˇ goˇ loꞈ-ehˇ, ja pyuˬ ni coˬ pyaˆ coˬ shaˆ jiˇ tehꞈ-a.

¹⁴ Mui duiˇ oeˬ lahˬ ga meuˇ jiˇ ngeh, miˬ jiˆ pehˆ ahˇ-eu kuˬ cuˇ luˇ pyehˬ maˬ dzeˇ-ehˇ, iˇ cuꞈ kuˬ-eu ni tseuˆ tseuˆ pyehˬ maˬ oꞈ-eu loꞈ-ehˇ, naw maꞈ guiˬ lahˬ doeˇ tehꞈ-a.”

¹⁵ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu, Iˇsaˬleˬlaˆ-euˬ Miˬyehˇ heu loꞈ-ehˇ ehˇ-eu meh. “Ngaˇ jawˇ gaˇ gʼoꞈ laˇ-awˇ gʼaˬ naˬ naˬ laˇ-awˬ. Guˆ-eu gaˆ-eu jeˬ-ahˇ naw maꞈ dzeuˇ-iˇ tehꞈ-a. Ciˬ cuˇ ni jawˇ-awˇ ngaˬ-ahˇ gʼoe ngeh, naw maꞈ gʼaˬ ahˇ laˇ tehꞈ-a. Ehˇ kʼawꞈ, naw maꞈ kʼoeˇ loꞈ-ehˇ maˬ geuꞈ-a.

¹⁶ Naw maꞈ mahˬ paˬ yaw kawˇ dziˬ-awˇ, muiˇ-eu deuˬ-ahˇ cehˆ dzeuˇ-eu lehˇ leh jeh luꞈ meh. Maꞈ cehˆ-ehˇ maˬ gʼeh nya-eu miˇ neh, naw maꞈ mˇ-eu tsaˬ meh. Ehˇ kʼawꞈ, naw maꞈ-euˬ mahˬ yaw kawˇ ma lehˇ noeˬ kʼawꞈ, naw maꞈ-ahˇ teh-eu deuˬ kawˇ dzehˬ meh.

¹⁷ Aˬ cawˬ-euˬ yehˇ tiˬ gʼaˬ-ahˇ naw maꞈ ya mawˇ ngeh, nawꞈ maꞈ-euˬ yehˇ aˇ muiˇ gʼaˬ cehˆ tehꞈ-a. Aˬ cawˬ-euˬ yehˇ ngaˬ gʼaˬ-ahˇ mawˇ naˇ, naw maꞈ-euˬ yehˇ dawˬ tawˆ luꞈ cehˆ byoˆ jiˇ-awˇ, naw maꞈ guiˇ maꞈ kʼoeˇ myaˆ ni gʼeh-eu laꞈ kʼoeˇ, paˇ loˬ paˇ lehˇ baꞈ-eu tiˬ gʼaˬ tehꞈ-ehˇ, gawˬ jawˬ uˬ du dzeˇ yaꞈ tehꞈ-a.”

¹⁸ Naw maꞈ-ahˇ gʼawˬ shaˬ gaˬ nehˬ-eu gʼaˇ duˬ, Sahˬpaˬ Miˬyehˇ loꞈ luꞈ-eu meh. Aˬ yawꞈ aˬ myah luꞈ yaw tsaˬ yaw dawˇ miˇ neh, naw maꞈ-ahˇ gʼawˬ shaˬ gaˬ-eu lehˬ hmˬ taˬ-euˬ meh. Sahˬpaˬ Miˬyehˇ-ahˇ gʼoe-eu tsawˇ haˬ guiˬ lahˬ huiˬ-eu meh.

Miˬyehˇ aˬ yawꞈ-euˬ tsawˇ haˬ deuˬ-ahˇ guiˬ lahˬ biꞈ tehꞈ-a

¹⁹ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ tiˬ jawˇ-iˬ noeˬ shaˬ-awˇ maˬ paˇ ya ngoeˇ meh. Sahˬpaˬ Miˬyehˇ-aˬ, gʼawˬ shaˬ gaˬ nya-awˇ, caw ba nehˬ laꞈ lehˇ naw maꞈ aˬ yawꞈ-ahˇ shaˇ ngeh, naw maꞈ-euˬ shaˇ dawˬ-ahˇ naˇ haˬ nehˬ laꞈ tehꞈ-a.

²⁰ Naw maꞈ kʼoeˇ taˆ, shaˬ-eu zahˬ-eu aˇ nah aˇ yamˬ Sahˬpaˬ Miˬyehˇ bi keuˆ le tehꞈ-a. Ehˇ kʼawꞈ, aˬ yawꞈ-euˬ gʼawˇ mawˇ naw maꞈ-ahˇ mehˬ nehˬ tsoˆ nehˬ le-awˇ, naw maꞈ aˬ yawꞈ-ahˇ poˆ poˆ-ehˇ, maˬ paˇ ya shaˬ meh.

²¹ Naw maꞈ gaˇ oˆ gaˇ taˆ cah lehˬ iˇ lehˬ ngeh, “Gaˇ ma heu gaˇ dahˇ meh. Gaˇ ma-ahˇ cah-awˬ” lehˇ, naw maꞈ-euˬ naˇ kʼah aˬ yawꞈ jawˇ-awˇ ehˇ tehꞈ-a.

²² Pyuˇ hawˇ-eu shuiˇ yaw taˬ-euˬ naw maꞈ-euˬ tahˬ pahˬ aˬ ma mawˇ kawˇ deuˬ-ahˇ naw maꞈ haw jawꞈ-awˇ baꞈ dzeh-eu laꞈ kʼoeˇ, “Maˬ mawˇ laˇ gaˇ iˇ byoˆ gʼeh-awˬ” lehˇ naw maꞈ toˇ tehꞈ-a.

²³ Naw maꞈ neh siˬ yoeˬ kʼaˇ sehˬ-euˬ gaˇ, Sahˬpaˬ Miˬyehˇ uˬ yehˇ bi yehˇ le-awˇ, bi dehꞈ muiˬ laˇ-eu laꞈ kʼoeˇ, dzaˬ la gʼo cehˇ za dui dui le-eu uˬ taꞈ, naw maꞈ-euˬ mawˇ nyoˬ jeˬ kaˇ deuˬ gʼaˇ duˬ, jeˬ zaˬ gaˆ kʼahˬ jeˇ dui dui tehꞈ-a.

²⁴ Naw maꞈ-euˬ deh yaˇ tsehˬ-eu mawˇ neˇ hawˇ-eu mahˬ tahˬ laˆ deuˬ kʼawꞈ, yaw muiˬ paˬ-ehˇ baw shawˇ taˬ-euˬ cehˇ ya dzaˬ dehˆ tehꞈ-a.

²⁵ Muiˇ-eu deuˬ-euˬ ziꞈ dah ni gʼeh-eu taˆ deuˬ-ahˇ naw maꞈ beuˆ gʼaˬ-awˇ, aˬ yawꞈ maꞈ-ahˇ naw maꞈ sehꞈ ngeh nah, gawˬ jawˬ yawˬ jawˬ na luꞈ hawˇ-eu gawˬ duˇ yawˬ duˇ na luꞈ kʼoeˇ taˆ, iˇ cuꞈ lawˇ gawˆ yoeˇ le tehꞈ-a.

²⁶ Ba la yaw shehꞈ nahˇ ma loꞈ-ehˇ bya-eu uˬ taꞈ, nahˇ ma shiꞈ bymˇ bya dzehˬ laˇ-awˇ, shiꞈ nah bya-eu yaw shehꞈ tiˬ nah laꞈ kʼoeˇ bya jiˇ gaˇ duˇ tehꞈ-a. Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ-ahˇ diˬ naˇ laˆ naˇ nehˬ-euˬ naˇ gawˇ deuˬ-ahˇ aˬ yawꞈ paˇ laˆ saˆ taˬ ngeh nah, kʼoeˇ deuˬ dawˬ tawˆ luꞈ keuˆ le tehꞈ-a.

Aˬshuˇliˆ miˇ kʼahˬ-ahˇ Miˬyehˇ kʼehˬ nehˬ kʼaˆ nehˬ tehꞈ-a

²⁷ Haw yawˬ. Sahˬpaˬ Miˬyehˇ-euˬ tsawˇ myahˇ, gaˇ mahˇ kaˬ gaˇ neh oe luꞈ meh. Miˬ dzaˬ hawˇ-eu uˬ kʼoeˬ laꞈ kʼoeˇ, aˬ yawꞈ nui ma pehˇ-eu jeˬ mehˬ luꞈ meh. Aˬ yawꞈ mehˬ luˬ nui ma pehˇ dui dui-awˇ, aˬ yawꞈ-euˬ dawˬ, miˬ dzaˬ-ahˇ duˇ-eu meh.

²⁸ Aˬ yawꞈ saꞈ gʼawˇ ka ngeh, kawˬ lahˇ-ahˇ keuˆ-eu iˇ jeuˬ oe gaˇ duˇ-awˇ, yawˬ jeˬ na luꞈ hehˇ dzaˬ gʼeh-eu loꞈ-ehˇ, miˇ kʼahˬ tsawˇ jeuˬ hawˇ-eu aˬ yawꞈ maꞈ-euˬ yaw haiˬ dawˬ tawˆ luꞈ hehˇ dzaˬ gʼeh-eu meh.

²⁹ Ehˇ kʼawꞈ, Miˬyehˇ-euˬ tsawˇ haˬ deuˬ pyeuꞈ-eu naw maꞈ deuˬ-aˬ, muiˬ-eu shawˇ-eu bawˬ-iˬ gʼeh-eu uˬ ciꞈ tiˬ miˇ loꞈ-ehˇ, laˬ kʼaˬ cehˇ-awˇ caˇ dawˬ ya caˇ tehꞈ-a. Iˇsaˬleˬlaˆ-ahˇ haw piˇ-eu gʼaˬ pyeuꞈ-eu, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ, bawˬ law baw-awˇ le-eu tsawˇ haˬ loꞈ-ehˇ, naw maꞈ laˬ kʼaˬ ya cehˇ dui dui tehꞈ-a.

³⁰ Sahˬpaˬ Miˬyehˇ-aˬ, baoˬ huiˬ-eu aˬ yawꞈ-euˬ dawˬ tsawˇ haˬ yawˬ gʼaˬ na luꞈ-ahˇ bi gaˬ-awˇ, aˬ yawꞈ nui ma pehˇ-eu jeˬ aˇ naˆ ni guˆ laˇ paˬ-ehˇ gʼeh-eu gaˇ kawˆ, tsawˇ haˬ yawˬ gʼaˬ na luꞈ-ahˇ bi siˬ bi mawˇ tehꞈ-a. Miˬ dzaˬ miˬ lmˇ doˆ le-awˇ miˬ dzaˬ doꞈ luꞈ-eu mˬ dmˇ ya mawˇ-eu uˬ taꞈ, uˬ yehˇ aˇ siˬ ga le-awˇ, mˬ jeˬ jaˬ lehˇ oe tehꞈ-a.

³¹ Sahˬpaˬ Miˬyehˇ-euˬ teˇ saˇ ya gaˬ-awˇ, aˬ yawꞈ-euˬ kʼehˬ-eu kʼaˆ-eu jeˬ-ahˇ ya siˬ ya mawˇ ngeh, Aˬshuˇliˆ tsawˇ haˬ deuˬ guˆ dui dui tehꞈ-a.

³² Aˬshuˇliˆ tsawˇ haˬ deuˬ-ahˇ Sahˬpaˬ Miˬyehˇ tiˬ poˆ saˇ-iˬ tiˬ poˆ kʼehˬ nehˬ ngeh, aˬ yawꞈ-euˬ tsawˇ haˬ deuˬ tahˬ hawˇ-eu deuˇ-mˬ tiˬ poˆ saˇ-iˬ tiˬ poˆ diˬ caw tehꞈ-a. Miˬyehˇ-euˬ gʼawˇ mawˇ Aˬshuˇliˆ tsawˇ haˬ deuˬ-ahˇ guiˇ deuˆ tehꞈ-a.

³³ Aˬshuˇliˆ miˇ kʼahˬ-ahˇ miˬ dzaˬ yaw kʼaˆ-ehˇ bi puiˆ-eu gʼaˇ duˬ, aˇ hu ba neh lehˬ hmˬ taˬ-euˬ jawˇ duˬ jaˆ-eu meh. Kʼoeˇ-aˬ, naꞈ dui jeˇ dui dui-eu miˬ dzaˬ jehˆ bymˇ bymˇ ma meh. Miˬ dzaˬ jehˆ bymˇ kʼoeˇ bymˇ-ahˇ, miˬ dzaˬ miˬ lmˇ ahˇ-eu Sahˬpaˬ Miˬyehˇ-euˬ saꞈ neh baw-awˇ bi puiˆ tehꞈ-a.